Коми чуддэз

Юэз дорöт пармаэзын

Кöркö уна каррез вöлöмась,

Сэтöн коми чуддэз олöмась,

Лöня, гусьöна уджалöмась,

Некинлö абу мешайтöмась.

Да Степан святöй аддзисьöма,

Атаманнэз сьöрас босьтöма,

Розоритны каррез пондöма.

Сэки Юкся петöм воннэскöт,

Сувтöм паныт атаманнэслö,

А святöй Степанлö шуöма: —

Тэ дука урöс сёян,

Ми огö сёйö урсö —

И тэнö огö тöдö! —

И тышкасьны сэтöн пондöмась

Коми чуддэс атаманнэскöт,

Да одз асывсянь луншöрвиöдз

Кыссьöм вира тышкасьöмыс,

И лёк пуля пöрись Юксяöс

Кыдз пожумöс, сэтöн октöма.

Сувтас Юкся местö Пуксипи,

Сы дын локтö Чурак Пелымкöт,

И луншöрсянь сэк ойшöрвиöдз

Ыджыт бой горалас пармаын.

Сэтчö Чазь да Бач сибöтчасö —

Атаманнэс повзьöм кöччез моз

Коми чуддэз шогъя пышшасö,

А Степан котöртас ю дорö,

Пуксяс аслас святöй плот вылö,

Дзебас юрсö изын из сайö,

Кама кузя кывтас доль.

Одзза мортлöн коктуй

Вот шуам: одзза йöзыс, первöйыс, туйез абу керлöм, поссэз абу видзöм, да и керкуэс нылöн абу вöлöмась. А мыйлö нылö керкуэсö?

Баитлiсö тай: «Одзза йöзыс вöлöм гöна кучика, кöин гыжа — паськöм да кöмкöт эз ков. А колiс бы, дак кысь сымдасö? Эд мортыс пу ыждаöдз быдмылöм».

Öтiк сэтшöм морт коктуйсö Пешнигортас кольöм жö тай: яг понас тальччöм öт кокнас да ляпкöтöм, и керöс помыс — торъя чöвпан.

Нiя ыджыттэс, тальччалöмась эд керöс вывсянь керöс вылö, ваэсö да нюрресö вожмалöмась.

А поди ыджыт мортыс кинкö сьöрö вöтчис али кинкöсянь пышшис да нинкöм нырнас ягас чужйисис — мийö эд эг аддзылö.

Чучкöйез пышшöмась розбойниккез шогъя

Миян Коча гöгöрын эм Чучкöй мыс, эм Ошмыс, эм Карла, эм Чивыльыб — сэтöн быдлаын олöм чучкöй йöз, сэсся абу лоöм. Аддзалам нылiсь сийöсiсь да сермöтiсь украшеннёэз.

Чивыльыбын олöма Чивыль, пöрись мужык. Вöр шöрын öтнас олöма. Сы ордö локтасö розбойниккез (нiя лунвылын кытöнкö олöмась, татiссес вылö пыр уськöтчывлöмась), корöны сылiсь зарни:

— Сет öнi жö зарни, и ми мунам. Чивыльлöн зарни абу.

А розбойниккес горöтöны:

— Вай! Он сет — сотам! Абу да, кытiсь сетас?

Розбойниккез джоджö чапкасö горпöдан, керасö ыджыт би да и сотасö Чивыльсö.

Сiдз и мöдiккезöс поди сотiсö, а кинкö ештiс и пышшыны.

Сэксянь эта местын чучкöй йöз абу лоöм.

Тöдтöм йöзлöн горт

Чöжöгöв гöгöрын эмöсь тöдтöм нима местаэз: Татил, Öдöгай, Нис; юэз: Сулчим, Булач. Кытшöм йöз нiйö сiдз шуöма?

Кöркö вöвлöма Важгорт деревня. Сылöн ним — коми ним, миян геддэз, натьтö, сiдз шувлiсö сiйö.

Но геддэс жö то кыдз висьтасьлiсö Важгортын олiссес йылiсь.

Чöжöгöвса, комиэс, мунöны уджавны али локтöны кысянь Важгорт деревняöт, а сэтöн отир вексö уджалö-тэрмасьö, некöр весь оз ов.

Юалöны нылiсь:

— Ойшöрсянь али луншöрсянь уджалат? Важгортса нем оз вежöртö. Нылiсь рочöн юалöны: — С полуночи али с полудня робите?

Сiдз жö нем оз вежöртö. Нылöн асланыс сёрни вöлöма.

А кытчö нiя сэсся лоасö — некин абу кывлöм.

Мöдiк важ деревня вöлöма — Лёдзов, дак сэтöн коми кывсö тöдлöмась. Лёдз нима морт сэтчö пуксьылöма овны. Сiя кысянькö пышшöма, медбы заводö эз вашöтö нето савдатö эз сетö.

ЕНЫБ

Луп ю дорын, Важгорт урочишшо сайын, эм öтiк мыс, абу и ыджыт. Эстöн сiя медбур места, гажа. Сы вылö каян — ылö тыдалö. Мыс увтас мусис ключчез петöны. Куима нiя, куим öшмöс кöркö вöлöмась. Öтiк мыс увтiсь петöны, а куим ладорö котöртöны. Ваыс нылöн öддьöн чöскыт.

Эта мыслöн нимыс — Еныб, енлöн ыб.

Мыля сiйö сiдз шуöны?

Менам гедö сто квать годöдз олiс, сiя висьтавлiс: «Еныб дорын сулавлiс ен, ми сы дынö кеймисьны ветлывлiм, кыдз тi öнi вичкуэзöт ветлöтат».

Айö сiйö енсö тöдлöма жö, а ме ог тöд, ме дырни эз ни вöв. Öтiккез шуöны, што сiя пуовöй вöлi, мöдiккез — што изовöй. Кытчö лоис еныс, эг жö кывлы. Поди кöр вичкуэсö керисö, дак вичкуö пыртiсö. А кыдз важ ен вöлi, дак важ йöзыс дзебисö кытчöкö.

Война воэзас пöрись отирыс гожумнас сёянöн-юанöн Еныб вылас кайлывлiсö, токо ог тöд, мый понда: али пикан лун чулöтны, али касьтiсьны (сэтöн жö неылын шойна эм — важ отирыс сэтöн куйлö).