Богатыррес вольвылын вöлöмась

Чучкöй богатыррез уна вöлöмась, нiя Вольвылын олöмась. Пуксипи деревня дынын. Висьтавлiсö и ниммезнысö нылiсь, да вунöтi öнi.

Богатыррес дöс пöгибнитöмась, кöр гортнысö дорйöмась. Нiя тотаракöт косясьöмась — на живот и на смерть.

Вольвылын эм Шойнаыб, сэтöн уна кулöм куйлö, мыжйисьö дöс, ежели оз казьтылö. И богатыррес сэтöн куйлöны. Семикöн, стрöча коста казьтылöны. Нiя эд отир понда пöгибнитiсö, кыдз савдаттэз жö.

Нöшöн косясьöмась, черöн керасьöмась. Кöда нöшнас оз вермы врагсö пöрöтны, дак мöдiк богатырлö горöтö:

— Чапкы черсö меным, вонö!

Сылö чапкасö черсö, сiя уськöтас врагсö, а черсö мöдiклö чапкас — кин корас.

Онтип богатыр йылiсь

Карпов ладорын овлöма богатыр, а шувлöмась Онтипöн.

Морос одзас вöв новйöтлöма, дзик дзельöс, пöв киöн, изын видзлöм. Пес пö пельпон вылас быдса пуöн ваялöма.

Кылöма сы йылiсь сар, иньдöтöма ассис слугаэсö да тшöктöма вайöтны дынас, натьтö, аслас войскоö: богатыррес эд вексö Россиясö дорйöмась.

Локтасö, öтöрас сiйö виччисьöны. Онтип петас, дыровайтчас ныкöт. Сылö мыйкö баитöны, а сiя нем оз вежöрт. Аддзö токо, што сiйö сьöраныс корöны. Повзяс Онтип, пырас гидйö да пöднасяс. Мöддэс ёркйöны, ыбöссö чегöны. Но, умöль пö эд делоыс, пышшыны колö! Тойыштас стенасис кер-мöд, пондас пышшыны. А нинкöммес ыджытöсь и ыджытöсь — быдса сельничаэз — ылö он пышшы нiйöн. Сэтчö воньыс пöрччасьöм, и мужыкыт тальччöм вонь вылас, усьöм. Сэтöн сiйö кутасö, кöрталöны бы гезйöн. Сiя оз сетчы, конешно: кватитас öтiкö — му бердас желльыштас, мöдiкö кватитас — мыр бердö сырйыштас, кыдз каньöс. Мöддэс повзясö да пышшасö.

Кöбы пишаллез вöлiсö дак, поди и кутiсö бы, а, тыдалö, пишаллез эз на вöлö.

Пышшас гортсис, пыд вöрö кытчöкö пырас: загрек быдса войско пö локтас, дак эд виясö слугаэсö вартлöм понда.

ЧИВУЛЬ

Кöркö вöлi Чивуль род. Чивуль — сэтшöм нимкодь. Чивуль вöлöма вына, аслыс городишшо керлöма, а не деревняын олöма.

Эм сэтшöм места — Чивулькар. Нюрын сiя, арайын. Арай — нюр шöрас кöсжык места, а сэтöн — крёш, мысок. Крёш вылын йöр вöлöма, йöрас — керку. Керкуас богатыр олöма. Сiйö, натьтö, Чивульнас и шуисö.

ДЗУЗДЯ

Одзжык, чуднöй кадас, чудоэс тыр вöвлöмась. Мекöт монастырын дзуздянка олiс, дак то кытшöм чудо висьтасис.

Вöвлöма Дзуздя нима инька, дак öтдруг квать зон вайöм. Öтпыр токо и сьöктылöма.

А мыйöн сыным кагасö нимöтны, кыдзи пондасö горзыны?

Еныс казялас инькаытлiсь горёсö да сетас сылö эшö нёль няня — кватя жö няняэс лоасö. Öтiк зонöс öтiкöн нимöтö, мöдiкöс — мöдiкöн — быдöнныслöн эм нимасяныс. И быдöнныслö йöвсö тырмöтас, быдöннысö быдтас. Кватьнан зоныс богатыррез лоасö.

Дзуздяыс, мамыс, тожö ыджытовöй вöлöма.

Чучкарской богатыррез

Эм Искар посад, сэтчин эм важ городишшо — скала вылын. Сэтöн овлöмась пермяккез, а эшö одзжык — чучкаррез. Чучкарреслöн богатыррез вöвлöмась, нiя вермасьлöмась — кин ылöжык чеччöвтас. Сыбöрын, кöр вöввез лоасö, пондасö вöввез вылын чеччавны ылiсянь öддзöтасö вöвнысö да стена вевдöрöт кар пытшкö чеччöвтöны.

Майко да кудымко

Майкарыс öддьöн важ городишшо. Городишшо — этö йöрйöм карок, сы гöгöр ыджыт пöрлалöм пуэзiсь кыкпöвса стын керöм.

Майкарсö сотлöмась розбойниккез, кытшöмкö атаман. А Майкарас тожö атаман олöм, поди и Май, сiдз кыдз Майкар — Майлöн горт. Майсö шувлöмась, тыдалö, Майко. Сiдз жö и гортсö сылiсь пондöмась шуны, а сыбöрын — Майкор. Сэтöн жö олöма Кудымко. Сэсся янсöтчöма, аслыс горт керöма. Сылiсь гортсö перво шуöмась Кудымко, а вöлись — Кудымкор.