Кудым ош

Важся каддэзö, кöр Иньва юыс котöртöма эшö мöдiк местаöт — кошшöма веськытжык туй, олöма-вöлöма миян ладорын вына йöз. И шуöмась этö йöзсö чуд увтыр. Олöма сiя вöр пыдöссэзын, кытчö мöдiк йöззэс и туйсö абу тöдлöмась, токо разь казявтöг шедасö.

Поздiсьöма чуд увтырыс, кыдз шыррез да муошшез, гуэзын, сьöд му пытшкын. И морттэс абу тöдлöмась не чер, не пурт, не нянь, не сов. Сёян-юансö нылö сетлöмась вöрыс да ваыс, шонытсö да гажсö — шондi, а бытшöм ен Ойпель вашöтлöма ны дынiсь шогöттэз, пöрöс да берся умöльторсö.

Бура паськалöма чуд увтырыс, уна горттэз пуксьöтлöма сiя Иньва ю дорö, а öтiк увтыр ны коласiсь олöма Сылпан мыс вылын.

Чожöсь да повтöмöсь сэтöн отирыс вöлöмась: ылiсь вöррезöт ветлöтöмась и дорйисьны кужöмась. А медвынаöн асьнысö мыччалöмась куим вон, чудь памлöн зоннэз — Купра, Май да Кудым.

Кудымыс вöлöма ош кодь вына, сысянь и шуöмась сiйö Кудым Ош. Вöлöма мортыт куим аршин сувда, муыс сылö вынсö да мывкыдсö куим мортлiсь сетöма, а синнэс и ойнас тупкася буржыка аддзöмась.

Пасьтасьöма сiя не бура, не басöка, а тöв и гожум новйöма кучиккезiсь вурöм паськöм да кöмкöт, а юрсö не зэрсянь, не лымсянь, не шондiсянь, не лёк тöвсянь абу сайöвтлöма.

Кудым Ошлöн вöлöма ён высина мам — ыджыт мыгöра да мывкыд юра инь, кöдö шуöмась Пöвсин. Сiя быдöс родсö ас кипод увтас видзöма, и быдöнныс сiйö кывзöмась. Ачыс уджавлöма мужыккескöт тшöтш, гортас ыджыт кринкаöн ва кайöтлöма да абу кошшывлöма лаб каянiнсö, а кайлöма крутикас веськыта.

Пöвсин öддьöн радейтöма Ойпельöс — чудь отирлiсь бур енсö, и эта понда Ойпель пыр отсавлöма сылö.

Ныкöт жö олöма мöдiк инь — уна тöдiсь Чикыш. Сiя учöтсянь велалöм веськöтчыны да тшыкöтчыны, кужлöма изiсь шедтыны бичир, вийöм мортöс ловзьöтлöма. Тöдчывлöм Чикыш вöрись дядькöт — Сюра-пелякöт и вермывлöм пöртмавны мортлiсь синнэз.

Кудым Ошлöн айыс, Сылпанiсь пам, ветлывлöм войнаöн мöдiк увтыррез вылö: Курöгкарö и Круточойö, Кама дорö и Юграö. Öтiк ветлансянь сiйö вайöтöмась кулöмöн, и нельки Пöвсин иньыс — Ойпельöс бура радейтiсь, да уна тöдiсь Чикыш абу вермöмась ловзьöтны сiйö.

Дзебöмась памсö Кува дорö, Изъюр мыс вылö, кытöн вöлöма еннэзлöн горт. Чудь увтыр сэтöн юрбитлöма еннэслö да казьтывлöма кулöм-вийöм отирöс.

Дзебасö сылпанса пöрись памнысö да пондасö бöрйыны виль памöс. И керасö памнас Кудым Ошöс. Сетасö сылö памлiсь паськöм да пас, бура юрбитасö Ойпельлö, тшöктасö берегитны Кудым Ошöс пöрöссянь да тшыкöтöмсянь, а эшö ёнжыка берегитны лёк ньöвъёссезсянь да лэчыт пуртсянь. А сыбöрын и том памлö висьталасö, медбы сiя сiдз жö бура, кыдз и пöрись памыс, дорйис нылiсь гортнысö да отирсö, челядьöс и пöрисьöс, медбы сылпанса лэчыта видзисö шодззезнысö, а ньöвъёссез медбы прокод вöлi мавтöмöсь бильöн.

Гажа местаын Сылпаныс сулалöма, но öдöлейтасö сэтiсь олiссесö враггез: то сёян да паськöм мырддясö, то нывкаэзöс нуöтасö. И шуас сэк Кудым Ош мамыслö да воннэслö, и уна тöдiсь Чикышлö, и быдсöн увтырыслö:

— Миянлö колö мунны эстiсь. Вайö керамö аслыным виль горт — керамö кар гöрд Изъюр вылас, Ойпельыс син одзö да сы борд увтö, ась сiя доръяс миянöс, кыдз мам учöт пияннэзöс.

Чöлiсö отирыс, бытьтö кыввезнысö нылiсь нетшкисö, эз и вöрзьöтчö, дзик кикокнысö ойтöв кöстiс. Нельки визыв Иньва сувтчисмоз, дугдiс визлачас галянас орсны. Эд сiдз и думайтны оз туй, нетолишто керны! Али оз тöд Кудым Ош, што Изъюр вылас вексö вöвлi еннэзлöн оланiн да касьтiсян му? Лöгасяс Ойпель и вермас мыжйыны быдсöн увтырсö.

Тöдiсь Чикыш висьталiс:

— Ась киэс косьмасö сылöн, кин лысьтас еныслiсь мусö вöрзьöтны!

Пöрись отир юррезнаныс гогинялöны: бура пö баитö Чикыш, ны моз думайтö. Но Кудым Ош оз кывзы тöдiсьсö, ассис баитö:

— Отир! Тiйö сетiт меным асланым увтырлiсь пас. Тiйö кöсйит кывзыны менö, кыдз челядь ассиныс ай-мам. Кинлö абу жаль юрыс, кин мöдö сiйö врагыслö сетны — ась кольччö татчö. Кин мöдö овны, ась мунас мекöт Изъюрас.

Чöлiс Сылпан, токо Иньва ю öддьöнжык пондiс гыасьны да горавны визлаччезас.

Тöдiсь Чикыш мöдпырся шуас:

— Еныс мыжъяс, кöдна мунасö, и нiя вексö нёльподöн пондасö кыскасьны.

Чöлiс отирыс, токо Иньва ю горзöмöн горзiс, пельдöтлiс гыэзнас берег дорись иззэсö да кылöтiс сьöрас.

Сэк Кудым Ош нюжöтас киэсö шондi паныт да кеймисьöмöн горöтчас:

— Мича шондi! Осьт жö морттэслiсь синнэсö, сет нылö вежöрсö да мыччав, кытöн овны!

И сэтöн чудь увтыр казялас, кыдз шондiыс югдöтö Изъюр керöссö.

— Ачыс шондiыс мыччалö, кытöн пондам овны! — висьталас Кудым Ош да иньдöтчас сэтчин, Кува ю дорас. А сы бöрсянь мунасö томмес и кыссясö пöриссес. И керасö сэтчин аслыныс виль горт, йöръясö сiйö вылын йöрöн-заплотöн. И шуасö чуддэз ассиныс виль гортнысö Кудым кар.

И висьталас сэк Кудым Ош:

— Горт миян шогмис бур. Öнi колö ветлыны Изкарö — асланым воннэз дынö.

Босьтас Кудым Ош бур козин да гöснеч и ветлас Изкарö, ваяс сэтчинiсь кöртовöй черрез, пурттэз да ньöвъёсь йыввез. А эшö тöдас мыйись сэтчин кöрт керöны и кыдз кöртсис чер-пурт дорöны. Сэксянь Кудымкарын лоас асланыс кöрт. Лоас кöрт — лоас бур олан, лоас ыджыт вын.

Локтас кад гöтрасьны Кудым Ошыслö.

Уна тöдiсь Чикыш висьталас сылö:

— Ойланяс эм визыв ю, а эта ю пöлöт олö вогув увтыр. Эта увтырлöн эм ыджыт князь, а князьыслöн эм ныв — шуöны Костö. А кин пö босьтас сiйö ас саяс, сылöн чужас зон-богатыр... Ветлы-ко, Кудым Ош, корасьны сiйö.

Кылас Кудым Ош вогув ныв йылiсь и шуас:

— Ме верита тэныт, пöрись Чикыш, и ветла сэтчин корасьны. Меным иньöс сэтшöмö и колö. Чужтас сiя богатырöс, и мийö сыкöт некинлö сэсся ог сетчö.

— Сiдз и лоас, Кудым Ош. Тэрмась корасьны, медбы эз одзав кинкö.

Бöръяс Кудым Ош аслыс ёрттэзöс, пуксясö нiя виль пыжжезö да уясö Иньва кывтытö, кытöн Анюшкар сулалö. Сэтöн олö Кудым Ошлöн тöдса пам — Анюш.

Кокнита, дзик дзодзоггез, уйöны пыжжес, а том памлö колö эшö перытжыка: пондiс кыскыны сьöлöмыс вогув ныв дынö. Вот и тэрмöтö ёрттэсö, шоччисьны оз сет.

Локтасö Анюшкарö, юасясö, кыдз мунны вогуввез дынö. Анюш велöтас:

— Каят Кама кузя ва паныт быдса лун, рытнас локтат ыджыт карö. Сiя карын памöн инька пукалö. Миян увтырись жö. Сылiсь и юасят одзланись туйсö.

Локтас Кудым Ош Кама дорись карö, юасьö, кыдз вогуввезö сюрны. Инька-пам тöдö, мый сэтчин том пансö виччисьö, и панласьны кутчас:

— Берт-ко, Кудым Ош, гортат, сiдз буржык лоас. Ны моз тэ баитны он куж — кин тэнö вежöртас и кин отсалас? Юртö колян сэтчин.

Кудым Ош висьталас:

— Ме немись ог пов и эг велав джын туйсяняс бертлыны. Верман кö, дак отсав.

Аддзö инька-пам: он вермы бергöтны этö мортсö. Вот и шуö:

— Сэк кывзы, мый висьтала, и висьталöмöс прокод юрат видз. Корасян кö вогув нывсö — бöр эн керсьы. Мый бы эз вöв, а гöтрась сы вылын. Эн вунöт: мый бы эз вöв, а гöтрась. Кöр видзöтан сiйö да он понды босьтны — юртö орöтасö да майöг вылö кышаласö. А ме сета тэныт ассим мортöс — туй мыччалiсьöс. Сiя и ны моз кужö баитны.

Узяс сэтöн Кудым Ош, и ашынас сiйö туй мыччалiсь морт Ваяси нуöтас сы ладорö, кытöн орсö ой югöр.

Дыр нiя уясö юэз кузя, сэсся мунасö подöн да вöлись локтасö вогув карö. Кудым Ош иньдöтас Ваясисö князьыс дынö, тшöктас висьтавны ас йывсис: локтiс пö тэ дынö чудь пам. Висьталас мортыс, но асныра князь вашöтас сiйö и тшöктас пöднавны карö пырансö. И ковсяс Кудым Ошлö узьны öтöрас, йöр бокын, кыдз горттöм понлö.

Асывнас чудскöй пам бöра иньдöтас Ваясисö князьыс дынö, и бöра нем оз пет.

Эшö öтiк ой узяс öтöрас, и Ваяси мунас князьыс дынö куимöтпыр.

И сэк вежöртас гордöй вогув, што чудскöй пам эшö сысся асныражык, и лэдзас сiйö дынас.

— Мыйлö татчö локтiн — гöтрасьны али менчим юрöс серавны? — лöгöн юалiс сiя.

— Мöда гöтрасьны тэнат ныв вылын, Костö вылын, — шуас паныт, Кудым Ош.

Эта вылö серöмтчас князь:

— Менам йöрын сэсся абу прост майöггес, некытчö лоас тэнчит юртö кышавны. Сiйöн кора: вунöт нiйö кыввесö, кöднö меным висьталiн, и мун гортат.

Кудым Ош мöдпырся висьталас:

— Ме локтi гöтрасьны, князь, тэнат ныв вылын. И нуöта сьöрам не токо юрöс, но и тэнчит нывтö. Шудсö токо сiя аддзас, кин оз пов ассис юрсö öштыны.

Уна йöз кöрасьлöмась ни Костöсö, да некин абу босьтöма: нёжтöм пö сiя, кыдз кин и эм — не морт, не кукань. И быдöнныслiсь, кин корасьлöм, князь керавлöма юррезнысö.

Тшöктас князь мыччавны том памыслö нывсö.

Мунасö Кудым Ош да Ваяси чумö, кытöн нывкаэс олöны. А чумыс вевттьöма не банöн, кыдз мöддэс, а кучиккезöн, да пытшкас эшö мöдiк чум.

Панталас том памöс пöрись инька, пыртас пытшкас. Сэтчин небыт кучиккез вылын пукалö морт не морт, кукань не кукань: киэс, коккес — мортлöнöсь, да чужöмыс гöна — мöслöн и эм. Токо синнэс басöкöсь, норöнмоз видзöтöны.

Тувдiс местаас Кудым Ош, кылыс öм пытшкас кынмис — шы оз сет.

Висьталас ас мознас Костö, а Ваяси чудь кылöн Кудым Ошлö шуас:

— Эн пов меись, Кудым Ош: ме не сэтшöм, кытшöмö часöт аддзан.

Кутас Костö чепöльнас да нетшкöвтас гöна рожасис пилим, а сы увтын — морт кучик.

— Мунан я мекöт тэ, Костö? — юалас Кудым Ош. Костö висьталас:

— Ме тэкöт кöть кытчö муна. Кудым Ош бертас князь дынö и шуас:

— Ме гöтрася тэнат ныв вылын.

Вогув князь тшöктас керны ыджыт пир. Начкыласö кöррезöс, кыясö чери да быдкодь кайезöс, пуасö да пöжаласö сёянсö быдса керöс.

Эта коста князьлöн иньыс нывсö жöник сайö лöсьöтö, чужöмсö сылiсь чышкö да миссьöтö, мöс кучиксö яй бердсис кыртöтö. А лякöтлöма сiйö личинасö нылыс чужöм вылö ачыс мамыс, медбы асныра князь эз сет нывкасö нелюбöй сайö.

Кык лун да кык ой ыджыт пир кежас лöсьöтчасö, а куимöт лунас гöссез öксясö.

Петкöтасö невестасö чумсис. Мунö Костö — дзик юсь уйö. Чужöмыс шовковöй вевтöсöн вевттьöма.

Князь сэтöн и шуас:

— Мыччав-ко, ныв, ассит чужöмтö жöникытлö да и йöзыслö.

Мамыс молитва моз лыддьöтас:

— Ась усяс тэнат чужöм вылiсь гöныс и лоан тэ, Костö, басöк чужöма!

И кульыштас нылыс чужöм вылiсь вевтöссö. Диво кутас князьсö:

— Тэ я этö, Костö?!

— Этö ме, тятю, — шуас Костö. — Еныс вашöтiс менчим шогöтсö, и ме лои сойезöся басöкжык!

— Мед лоас сiдз! — шуас князь да тшöктас пондöтны ыджыт пирсö.

Сыбöрын Кудым Ошлö сетасö уна козин, пыжжез да отирöс и кольлаласö том гозъясö чудь муэзö. А медбы туй вылас Костö эз вомдзась, сылiсь чужöмсö бöр лякасö гöна кучикöн.

Локтас Кудым Ош Кува ю дорö, панталас сiйö Пöвсин, юалас зоныслiсь:

— Кыдз нö шуöны ичмоньнымöс?

— Костö сылöн нимыс, — висьталас том пам.

— Косьтö? Косьтас сiя тэнö и миянöс öтлаын! — горöтчас Пöвсин да осьтас ичмоньлiсь чужöмсö и сэк жö дöвкас зоныслö: — Ылiсь вайöтiн, а баля рожа тай инö?

— Тэ буржыка видзöт да вöлись висьтав, — шуас Кудым Ош мамыслö и сы шогъя гусьöн кульыштас Костöлiсь личинасö.

Пöвсин гуддьыштас синсö, видзöтас нывка вылö, ошкас сылiсь басöксö:

— О-о, сыви татöн некин абу! И эшö юалас Пöвсин:

— Кыдз пондан шуны менö и ыджытöн али учöтöн татöн лоан?

Костö шуас:

— Кытчöдз ловъя лоан, мамöн понда шуны и тэсся ыджытжыкö ог пуксьы.

Гленитчас Костö пöрись мортыслö басöкнас и баснинас, и сiя ки пöлöттяс пыртас нывкасö карас.

Виччисясö кудымкарса, кöр чужас виль тöлiсь, и керасö свадьба. Веж лудовка вылö ольсаласö небыт кучиккез да тэчасö сэтчö быдкодь сёянсö: яй пöжалöмö и уль яй, чери пуöмö и уль чери, берся чöскыт ягöд да турун, сувтöтасö туиссэз да чуманнэз маöн.

Уна гöсь сэтöн пукалö — ылiсь и матiсь чуд увтыр: Иньвайылiсь кык вон Паль да Кöч, Иньва кывтытiсь Анюш, Кува ю дорын олiссез и Велва дорись отир, Кöс ю дорись Юкся пам зоннэзнас. Костöкöт ордчöн пукалöны Купра да Май, Пöвсин да Чикыш.

Куим лун гажöтчас Кудымкар, нёльöтас мунасö гöссес гортаныс, и Кува ю дорын лöньсяс пöлян торыс да сьылöмыс, бöра пондöтчас пырся олан.

Мöдiк виль тöлiсьö Кудым Ош тшöктас лöсьöтны пыжжез, медбы петны Кама вылö да кывтны увланьö и сэтчин вежны кучиккез зарни да эзысь вылö, вайны инь пöлöслö мöдöтчаннэз.

Лöсьöтчасö кудымкарса виль муэз видзöтны, а ны ордö тöдтöм отир локтасö. Пыжжез нылöн кокнитöсь да зэв басöкöсь, а пыжжезас — берся товар.

Петас Кудым Ош ны дынö, юалас:

— Киннэз тiйö, отир? Кытшöм увтырись и мый вайитö?

Йöз отир шуöны:

― Кысянь шондi петö, сэтчин олö бур хан да сылöн отир. Хан иньдöтiс миянöс тэнат гортö, Кудым Ош. Вайим тэныт ньöввез да ёссез, инь пöлöслö паськöм, а поснит челядьлö чöскыт гöснеч. Мый колö тэныт, том пам, босьт быдöс, а миянлö сет небыт кучиккез.

Висьталöны этадз локтiсь отир, асьныс дона товарсö мыччалöны: и кумачсö, и парчасö, и пелькытш да чунькытш, ньöвъёссез да кöртовöй шодззез.

Кудым Ош полö локтiссесö карас лэдзны: талун пö етша отирыс гортын. А отирыс тшöктö осьтны крепыт йöрнысö, лэдзны кар пытшкас вузасиссесö. Да и Костö корö, и том пам тшöктас осьтны воротаэсö.

Пöвсинлöн кылö сьöлöмыс: локтiссес нем бурсö эз вайö, но оз вермы öвны отирсö, оз вермы сувтöтны Кудым Ошöс, медбы сiя эз осьт горт ыбöснысö тöдтöм йöзлö.

Пырасö локтiссес карас и ворота одзас оз чапкö некытшöм козин — этадз керöны токо лёк йöз.

Казялас сэтшöмсö Кудым Ош, горöтас:

— Отир! Локтiссес миянöс бöбöтiсö! Вашöтам нiйö бöр! Мужык пöлöс кутчасö тышкасьны врагкöт. Инькаэз да нывкаэз дзебсисясö пыдöжык.

Уна ньöвъёсь иньдöтасö враггес Кудым Ош моросö. Öтiк мöртчас сы сьöлöмö. Чепöссяс сьöлöмсис визыв вир, и том пам öштас садьсö.

Усяс сiя кок йывсис небыт турунас, ыжмитчас мороснас му бердас и сэк жö вились садясяс: веськалас сылöн бытшкöм сьöлöмыс.

Чеччöвтас Кудым Ош кок йылас, оз аддзы кöртовöй шодзсö и кватитас потш да сiйöн кутчас врагсö сырйыны.

Мöдiк ньöвъёсь татшкисяс Кудым Ош сьöлöмö, и пам усяс му вылас кыминь, и горт муыс бöра веськöтас сiйö.

Куимöт ньöвъёсь мöртчас пам сьöлöмö и пöрöтас мортсö гатш. Оз туй сылö мороснас ыжмитчыны шоныт му бердас, оз туй босьтны муыслiсь виль вын да садь.

Локтiссез чепсасьöны кар пытшкын, отирсö вартлöны — корöны небыта керöм кучиккез.

Висьталас Пöвсин гортiссеслö:

— Сетö быдöс, мый корöны, нем эд дзебö. Од сетö — асьныс босьтасö и тiянöс нуöтасö, поснит челядьсö Изъюр вывсянь ваас чапкаласö. Сетö и нем эд жалейтö: кöда миян вöлi, миянлö жö и дöнзяс.

Тыртас враг ассис пыжжесö ур кучиккезöн, руч да низь кучиккезöн и мунас аслас туй кузя. Мымдакö уясö нiя да пондасö пешлыны, кытшöм добро нiя талун босьтiсö. Видзöтöны, шамралöны, а ны пыжжезын — öтiк пикан. И лэбтiсясö етшасьны, дзик кань да пон, видöны ассиныс ыджытнысö: этö тэ пö миянöс бöбöтiн, аслыт босьтiн, мый эм бурыс, а миянлö пö колин турунжуг!

Ыджытныс видзöтас аслас пыжись — сыын тожö некытшöм кучик абу.

Лöгасяс розбойник, тшöктас бертны чудь карö да куштыны сiйö.

А карын Костö кисьтö курыт синва — садясьны оз вермы... Чожа я, не я, но Пöвсин да уна тöдiсь Чикыш, кöда тöдчылöма Сюра-Пелякöт, — куллезлöн саркöт, ловзьöтасö Кудым Ошсö да вийöм отирсö.

Мыччисясö лёк йöзлöн басöк пыжжезныс, а Кудым Ош кватитас одзжык заптöм из, да не учöтö, а дас кык пуд сьöкытаö, и чапкас сiйö Изъюр вывсяняс Кува юас. Лэбтiсяс ыджыт тöв, Кува пондас чепсасьны ыджыт гыэзöн, и враглöн пыжжес падмасö. Петасö враггес берегö, а вöрыс кужа-кажа ны вылö пöрö, туйсö пöдналö нылiсь, вийö нiйö.

Куим ой да куим лун погоддяыс сiдз ыжмалас, куим ой да куим лун розбойниккес думайтасö, кыдз сибöтчыны Кудымкар дынö.

Нёльöт лунас Кудым Ошыс уськöтчас аслас отиркöт враг вылö, ёна перкъяс сiйö, ыджытнысö босьтас пленö. Сiя пидзöс вылас сувтас, öддзас кеймисьны Кудым Ошлö:

— Лэдз менö, пам, аслам иннез дынö, учöт челядьö дынö, сы понда сета уна товар.

Кудым Ош висьталас сылö:

— Меным нем оз ков тэсянь, лёк морт. Токо босьта ме аслым тэнчит лыйсянтö, а мöддэтлiсь аслам отирлö сета. И тэнö гортат лэдза, мун татiсь ловйöн да здоровöн. Но гортат висьтав: ась некин лёк могöн татчö оз лок. Миян етша отирыс, да миянлö вöрыс и юыс отсалö, муыс и погодаыс миян дор... Босьт менчим этö гижöтсö, сiя тэныт туй осьтас, миян вöррезiсь петкöтас.

Пуктас Кудым Ош бановöй гижöт вылö ассис пас и лэдзас лёк отирсö.

Чулалас кынымкö гожум, и Кудым Ош бöра лöсьöтчö мунны Кама кузя шоныт муэзö. Туйö петтöдз чукöртчасö луд вылö, кытöн сулалö нылöн Ен. Кеймасö бур туй понда, тöдiсь Чикыш сетас гöснеч и Сюра-Пелялö, и Вакульлö. Сыбöрын Кудым Ош мунас айыс шойна дынö, кытöн быдмö ыджыт пожум, да иньдöтас пожумас кöрт ныра ньöвъёсьсö, и ёсь мöртчас пу шöрас. Эта лоö: ны понда петас бур ветлан.

Кольлалас зонсö пöрись Пöвсин, кольлалас жöниксö Костö, кольлаласö памöс да сылiсь ёрттэсö пöрись и том.

Шувгö вöрыс Иньва дорись мыссэзын, дзульзьö быдкодь пöтка. Лун чулалас, мöдiк чулалас, и петасö чудь йöз Кама ю вылö да уясö одзлань. Кöр тöлiсьыс важмас да пондас орны, локтасö нiя ыджыт карö. Кöрталасö пыжжезнысö и нöбöтасö товарнысö кар шöрас, тэчасö князь керку одзö.

Князьлö гленитчас чуддэзлöн козиныс и товарыс, и сэтöн пондöтчас вузасьöм-вежсьöм.

Тшöктас Кудым Ош ассис отирсö вайны тагъя ма да потшшуйтны сiйöн князьсö. Ваясö сылö чöскыт юансö, и пам да князь öтiк туисiсь юасö, öтмоз öммезнаныс чупнитасö — ошкасö бытшöм гöснечсö.

Князь пуксьöтас чудь отирсö сёян дорö, потшшуйтас винаöн, быдкодь сёянöн да няньöн.

Кудым Ош, кöть уналаын вöвлi ни, оз тöд, мый сэтшöм нянь и мыйöн сiйö сёйöны. Пешлас — не яй, не чери, но небыт да чöскыт. И пондас юасьны, кысь няньсö босьтöны.

Князь нуöтас Кудым Ошöс горт саяс, мыччалас быдмас вылö:

— То няньыс быдмö.

Корас Кудым Ош кöдзыс вылö невна сю. Сылö сетасö да висьталасö, кыдз быдтыны, кыдз вундыны-вартны, кыдз пизь керны да нянь пöжавны.

Ваясö чуддэз сьöраныс рудзöг да ид.

Локтö Кудым Ош гортас. Панталö сiйö Костö, а киас видзö кага.

— Эта миян зон.

Шыннялö Кудым Ош: зоныс кыз киа да кузь кока, мывкыда сина да читкыля юра — богатыр лоас!

— Быдмы, Ошпиян! — горöтчас пам. И зонсö пондасö шуны Ошпиянöн.

Кынымкö год бöртi, кöр уна ни öксяс няньыс, Кудым Ош корас гöссезöс, вердас нiйö чöскыт няньöн. Корас быдлаись, а Юкся оз лок: юöрыс сы дынöдз абу мунöма.

Лöгасяс Юкся, мыля сiйö орддьöны, мунас Кудымкарö, медбы няньсö кудымкарсалiсь мырддьыны.

Лöгасяс Кудым Ош эта вылö, тшöктас ассис отирсö тöчитны чер да пурт, босьтны ёнжык шодззез да ньöвъёссез, мавтны нiйö бильöн и нуöтас отирсö Юксялö паныт.

О пöрись Ойпель, да тэ, ыджыт Ен!

Разь письтiсö тiян синнэзныт, разь тупкасисö пеллезныт? Али чуддэс дынiсь мунiт кытчöкö? Вон вылö вон тöчитö пурт, чуд вылö чуд мунö войнаöн, а тiйö од падмöтö нiйö! Разь колö тiянлö отирлöн вирыс, разь любо кывзыны тiянлö иннезлiсь-маммезлiсь геръясьöмсö, поснит челядьлiсь горзöмсö?

Эз панöвт войнасö не Ойпель, не ыджыт Ен. Пантасисö кык чудь увтыр Кöс ю дорын, кыдз пурт да из; öтыс оз вермы вундыштны, а мöдыс оз керассьы. Не ой, не лун оз тöдö, сё тышкасьöны — муыс кок увтаныс зэгалö, пармаыс ружтöмöн ружтö, а вирыс шорöн котöртö Кöс юö, мичöтö васö гöрд рöмöн.

Куим ой, куим лун сiдз тышкасясö, быдöс отирыс кок йывсиныс усяс: кöда чер-пуртсянь, кöда йыла шодзсянь да лэчыт ньöвъёссянь, а кöда и мыдзöмсянь.

Кольччасö ловйöн-здоровöн кык морт: Кудым Ош да пöрись Юкся.

Пантасясö нiя, кыдз лёк пороззэз öта-мöд вылö синнэзнысö барöтасö. Сöтö бы Юкся мечнас, но киыс оз лэбтiсь; кыдз пöжöм шать öшалö. Мöртö бы Кудым Ош шодзсö Юкся кынöмö, да вöрзьöтчыны оз вермы.

Вынсьöтчас Юкся, медбöръя мыласö öктас и лэбтас мечсö, но мечыс усяс кисис, ачыс сунгисяс кыминь. Усикас нюжöтас кисö Кудым Ошланьö. Кудым Ош вежöртас этö сiдз: Юкся сыкöт бурасьны мöдö.

Вунöтас Кудым Ош неважся öбидасö, кутас Юксялiсь кисö да шуас:

— Уна отир тэ вийин, пöрись Юкся, и колiс бы асьтö кырасö кундыны, да аддзö Ойпель: каитчан тэ и медодз китö мелань нюжöтiн. Сэк ов, кытчöдз муыс тэнö новйöтас, и некöр мöдiккезкöт эн кутчы етшасьны. Вай пондам лöня овны и öтвыв керны.

Эта кадсянь чудь увтырыс дугдöма öта-мöдкöт лёкасьны.

Кудым Ош няньсö быдöнныслö сетöма: Кöчлö и Пальлö, Юксялö и Анюшлö, Купралö и Майлö, кöр нiя янсöтчöмась сы дынiсь. Эта понда Кудым Ошсö отирыс вексö донтöм и казьтылöм бур кылöн.

Костö недыр олöма, а Кудым Ош сто год да эшö джын сто олас, и вöлись кулöмыс сы дынö локтас.

Пондас кувны богатыр, корас дынас Ошпиян зонсö да висьталас:

— Кöр ме кула, пуктö менö сыспуись керöм гробö, а гробсö вартö кöртöн и крепыта игналö, ась и ва воть сэтчин оз сюр. Ме узя, мымда колö, и сайма. А кöр сайма, тiянлö олансö эшö буржыкö кера. Но и тiйö весь эд олö, прокод кошшö аслыныт шудсö. И ёртасьö матiсь и ылiсь йöзкöт. А öнi прошшайтчö мекöт. Быд мужык ась павкöтчас веськыт пельпон бердам öтiк чуньöн да босьтас менчим вын. Кин павкöтчас кык чуньöн да босьтас кыкись унажык вын, сiя выныс лоас лёк вын.

Прошшайтчасö отирыс, и Кудым Ош онмöссяс кыз онöн.