Мыля ид шепыс дженыт

Одзжык Иньва дорас отирыс эд шальча токо вöлöма — кага ыжда. Мый сiя проктöмыс керас — не гöрны, не керасьны, не вундыны. Пань ыжда гöрокöн мусö гöрöмась-чувйöмась, а вöвныс — баля кодь. Да муныс сраминаэтлöн бур вöвлöм — сьöдмусин, сюыс гырись туся, шепыс — вуджсяняс пондöтчöм.

Кыдзкö ид вундöны пö, öтiклöн дыш вундыны, вот сiя и видчö:

— Ась чоморыс вундö эттшöмсö, етш ни менам орис!

И орас, небось, кöр тылöпыс оз и тыдав шепсис — сы кузя.

А чоморыт сэтöн и эм:

— А кытшöм инö тэныт колö идсö?

— Учöтик шепаö, кöть бы чунь кузя вöлi.

Быдöс шырзяс чоморыс — быд тылöпсö, быд заоксö — и токо йылокас шепсö коляс.

Сэксянь миян идыс и дженыт шепа.

Мыля ошыс дженыт бöжа

Звирресö да подасö еныс муись керöма. Ляп-ляп керас — шупкас учöтжык енлö. Сiя волькöтас, син-öм керас, пель-ныр, кинлö и сюр. Дынас сякöй лякассö видзö — гöрд сёй, чочком сирсёй, ва дорись нять. Вот и керö — кöдö чочкомö, кöдö гöрдö, а кöдö сераö.

Волькöтас, пöльыштас öмас да дрингас бöрас — мун броддьы!

Перво ыджыттэсö керасö — вöв, мöс, ош. Казяласö: заптöм муыс бырсьö, и пондасö учöтжыкöсь керны: кöин, руч, пон, туан, кöч, ур, кань, шыр — быдöс керасö, мый тöдвыланыс усяс.

Ашынас бöжжез кöвдаласö, тэчасö косьтыны да тöвзьöтны, асьныс узьны водасö.

Руч локтас — басöкжык бöж босьтас. Ур локтас — кокнитжык бöж бöръяс. Кöин локтас — шонытжык бöж кышалас. Кöч локтас — дженытжык бöж аслыс лякöтас. Шыр локтас — вöснитик бöжок нуöтас.

Ош бöрйисяс, бöрйисяс — сё не сы сьöртi: то кызöв, то чукыля, то йыла. Кöдкоста ныръясис — нем оз кольччы. Вот вöлись и öддзас горöтны.

Еннэс саймасö, юасьöны: мый пö лоис? А-а, öтiклö бöжыс пö абу тырмöма! Дак дыр я пö керны сiйö? Кватитчасö — а немись керны. Но эд колö! Вот и зыртас еныс чуннес коласiсь ляксö да, мымда öксяс сёйыс, сымдаись и керас: дженытикö, нёжтöмö.

АДТЫ

Вöлi миян увтырись бытшöм мужык. Вöралiсь и черикыйись. Сiя пыр ветлывлöм чериавны öтiк ты дорö. А тыыс сэки дзик саридз вöлöма, не то што öнi.

Кыдзкö аръявнас локтöма ты дорас. Лöнь вöлöма погоддяыс. Ваыс сöдз, шондiыс орсöтчö сыкöт. Но сэтчö гудыртчöма нёбоыс, пемдöм, а шондiыс быгыльтчöм кымöр пыдöсас. Тöвчик öддзöма гудыртны-бергöтны, быгъясьöма ва вевдöрыс, ваввес, дзик шальнöйöсь, кайöны берег вылас.

Веж биöн поткöтöма нёбосö чарньöв, öддзöма ёркйыны-гымавны, ровно изыннэз вöр пыдöсас потласьöны. И вот сы коста ты шöрсяняс, вабергачсяняс, петöма да уйö мужыкытланьö... Э-эк, мед ой кежö не казьтыны, — ачыс сар-тшукаыс, тыись мича нылыс! Уйö жагвыв, зарни бöжнас чуть вöрöтыштлö да эзысьрöма голя вылас юрсö пöлiнялö.

Повзяс мужык, горöтчыны оз вермы. Поныс лякасяс коккес бердö, видзöтö кöзяиныс синнэзö, жыв горзыны мöдö.

Сибöтчас берег дорас тшука, чавкйыштас-горöтас ас мознас — и вöрсö, топ тортаöн, вештасö ты дынсис, тöвчикыс дугдас гудыртны, шондiыс бöр ас кодяс лоас. Мужыкöс диво кутас, аслас синнэзлö оз верит: сы одзын сулалö не тшука, а басöк нывка, и шуö:

— Ме тэнö важын ни тöда, мужык. Шуч тэ татчö вовлан, и ме тэнö пыр бура гöститöта. Уна ни сеталi ассим сойезöс-воннэзöс, и нем эг босьтлы тэнчит, гов юрлiсь. Часöт кывзы, мый шуа. Ме — сар-тшука, тыись мича ныв. Тэныт колас сетны меным козин-гöснеч. Тэсянь первöйсянь босьта понтö. А мöдiккезöс, кöдна локтасö татчö, асьнысö пырта вон сiя бергачö, аслам оланiнö.

Ыджыт горё кутас мужыкöс. Жаль поныс, да керны нем — сетас. Пон токо кавнитас öтпыр и öшас.

Шондi бöра саясяс сук кымöррезö. Тыыс дзик бöбмас, шальнöй ваввез пизьöны-ветлöны öт-мöдöрö. Мича ныв пöртчас тшукаö да сунгисяс ты пыдöсас.

Дыр сулалас мужык. Оз мыччисьö не тшука, не поныс. Сэксянь сiйö тысö пондасö шуны Адты.

ВАЖВИСЬТТЭЗ

Коми йöз, нылöн му да оланiннэз

Вына отир, атаманнэз

Чудь, важ отир

Розбойниккез, кладдэз

КОМИ ЙÖЗ ДА НЫЛÖН МУ

Комму ― ком йöзлöн му

Кыдз вишерсалö пермяккез отсалöмась

Кыдз коми йöзсö пыртöмась

Кыдз шогмöмась Антипина да Паршакова деревняэз

Мортлöн му

Пермяккезлöн кар

КОММУ - КОМ ЙÖЗЛÖН МУ

Менам матшкаö вöлi Луп ю дорись, сiя шувлiс: «Гайна сайись му — Комму, сэтчин олöмась кöркö коммез». Ком — этö чери.

Гедö, Василий Пёдорович Анфалов, сiдз жö баитлiс: «Кудымкарчи — ком йöз».

МОРТЛÖН МУ

Ми, зырана отир, Кама, Коса да Иньва дортi муэсö шуам Комму. Эта лоö — комлöн му. А «ком» чудскöй отир кылын лоö — морт.

ПЕРМЯККЕЗЛÖН КАР

Мöсква да Чердын öтдруг сувтöмась и öтмоз строитчöмась: Мöскваыс сизим мыс вылын, и Чердыныс сизим мыс вылын. Сiйöн и шуам: «Чердынь-городок — Москве браток».

Öнi нылö сюрс во ни.

Кыкнан карсö лэбтöмась пермяккез и ассиныс ниммез сетлöмась Мöсква — мöс ю, Чердын — чер тыш, чер обук.

Пермяккес, аддзан, кöркö öддьöн паськыта овлöмась — Чердынсянь Мöсква ю дорöдз.

КЫДЗ ВИШЕРСАЛÖ ПЕРМЯККЕЗ ОТСАЛÖМАСЬ

Миян эм Полюд керöс, кöркö сы вылын вишера отир олöмась — важжес эд пыр мыссэз вылö строитчывлöмась: и потоп оз вöрзьöт, и враг казявтöг оз сибöтчы.

Полюдсö унаись тотара пондылöмась грабитны, но вишерса абу сетöмась. Öтпыр быдса войско локтöма, а войскосö вайöтöма тотарка-атаманка. Ыджыт атаманкаыс вöлöма, öддьöн вына, öддьöн лёк. Не чужöй йöзсö, не ассис немымда абу жалейтöма.

Дыр я атаманка воюйтöма, некин оз тöд, но Полюд вылас кайöма ни, вот-вот пырас вишерса гортö.

Вишерса иньдöтасö пермяккез дынö ассиныс мортöс юöрöн: миянöс вермö пö тотарка-атаманка, корам отсöт.

Кöдакöт юöрсö иньдасö, сiя комиэс дынöдз оз ешты локны: кöиннэз сёясö.

А тотара радуйтчöны ни: не талун, дак ашын Полюд лоас нылöн, сы вылын пондасö пируйтны.

Юöра мортсö аддзасö вöралiссез и кöмкöтыс сьöртi тöдасö: эта пö вишера морт, раз серöтöм котiа. Сiя пö, натьтö, миян дынö пондiс локны отсöтла.

Пермяккез сэк жö чукöртасö ыджыт дружина и мунасö вишера вöррезö. Мунтöнняс ныкöт öтлаасясö и роч отир, и нiя уськöтчасö тотара вылö, и атаманка пышшас гортас.

Кöбы отсöтыс локтiс невна сёрöнжык, тотара босьтiсö бы Полюдсö: вишера отир лыйлöмась ни быдöс ньöвъёссезнысö, туплялöмась враг вылö заптöм керрез да иззэз.