Ош ордын срокын

Оласö-вöласö пöрись гозъя. Нылöн вöлöмась кык ныв. Ыджытжык нывсö дзибъя вöр сайö нiя сетасö жöник сайö.

Öтпыр учöтжык нылыс пондас ай-мамыслiсь юасьны ветлыны сойыс ордö печканöн. Мамыс шуö:

— Кытчö тэ öтнат мунан, дзибъя вöрö пыран, эд тэ öшан?

— А кытчöкö эд пета жö, — шуö нылыс.

— Но инö мунан — мун. Токо ме сета тэныт тшакыль. Кытчö тшакыльыс пондас таравны, тэ сэтчö и мун.

Нывка босьтас печкан, пиас сюйыштас лён сöдз, киас босьтас мамыслiсь тшакыль да петас деревня сайö ыб вылö. Ыб вылын тшакыльсö лэдзас кисис. Тшакыль таралö туй кузя, нывка мунö бöрсяняс. Чулалас ыб, чулалас видз, петас тшöк сьöд вöр. Тшакыль сё таралö и таралö. Нывка мунö бöрсяняс. Медбöрын вöр шöрас туй öшас. Тшакыль таралас-таралас да вужъяэз коласö пырас. Нывка сьöрсяняс бы кыдз мышкыртчас. Друг кинкö сiйö кокöттяс сапырнитас-кутас. Видзöтö — одзас ош сулалö.

— Тэ кыдз лысьтiн, нывка, менам дзибъяинö локны?

— Ме сiдз и сiдз, — шуö нывка, — муна сойö ордö печканöн да тшакыльö вужъя коласö пырис, мöда бы судзöтны.

— Кытшöм тэныт вужъя коласiсь тшакыль судзöтöм, эд эта менам керку.

Кутас нывкаöс ки пöлöт ошыс да пыртö гортас, шуö, пондан пö меным пестунничайтны — ошпияннэзöс видзны.

Вот нывка олö ош ордын лун, олö кыкö, ош тшöктö сiйö öтiкö керны, мöдiкö керны. Куимöт лунас ош лöсьöтчö мунны кыйсьыны: яй, шуö, бырис, сёйны лоö нем. Мунтöнняс нывкалö закажитö:

— Тэ, нывка, буржыка видзöт менам кагаэз сьöрын. Онмöсьтан нiйö да весь эн ов — керку посöдзсö обикодит.

— А кыдз тэнчит кагаэтö онмöсьтыны? — юалö нывка.

— А пондан öкайтны да шувлы:

Öввö-öввö кага,

Öввö-öввö, зарни.

Оша-Мишаыс бабö,

Оша-Мишаыс узьö.

Кага, баб, кага, баб,

Бокат каб, бокат каб.

Кага, узь, кага, узь,

Локтö сюзь, локтö сюзь.

Ош мунас. Нывка, кöдкоста ошпияннэс узьöны, джодж чышкас, бекöрпань миськалас. Öтiкö-мöдiкö горби гöгöр керас. Ошпияннэс саймасö, пондасö корны сёйны. Нывка петас чуланö, аддзö: сэтчин ошлöн берся вужыс заптöма. Вужжез пыртас, ошпияннэс токо марскöны-сёйöны. Медбöрын нывка аддзас мöс няняэз, ошпияннэзлö öманыс сетас, зыбкаö водтöтас, зыбка дюттьöтö и öвйöтан песня сьылö:

Öввö-öввö кага,

Öввö-öввö, зарни.

Оша-Мишаыс бабö,

Оша-Мишаыс узьö.

Кага, баб, кага, баб,

Бокат каб, бокат каб.

Кага, узь, кага, узь,

Локтö сюзь, локтö сюзь.

Недыр мыйись ошпияннэс онмöссясö.

Нывка петас посöдз чышкыны. Посöдз чышкö, а ачыс курыт синваöн бöрдö-геръясьö:

А мыся ни тэ, гортся олöмöй,

Мыся я ни тэ, шоныт позiньöй,

Кыдз я петi тай шоныт мам позсим,

Аслам юр вылö лёксö кытсöвтi.

Инми-сюри тай дзульзян пöткаöн

Дзугъя пезинö — ошпозъяинö.

Шондi югöрыс татчö оз сибав,

Гажа луныслöн чужöм оз серав.

Оз лок, оз вайöт кокнит лун тöлок,

Оз ну, оз нöбöт курыт синваöс

Шоныт мам позъям, чужанiнам.

Усяс, тыдалö, меным, том нывлö,

Рöма дзоридзöн арся кадö моз

Пöрны-кельдöтны кöдзыт пуж увтын.

Котöртö ош керку дынöт баля баран. Кылö: кинкö кытöнкö зэв норöн геръясьö. Шы вылас локтас, аддзö — нывка горзö.

— Тэ, нывка, мый геръясян?

— А кыдз меным не геръясьны: кык сой тай вöлiмö, да ыджыт сойö жöник сайö мунiс. Меным сытöг гажтöм лоис; ме печканöс босьтi да мöдi сы ордö бы мунны, да то тай кытчö сюри — ошпозъяинö.

— Тэ дугды геръясьны: геръясьöмöн он отсав! Лок, пуксьы ме вылö да сюррез бердам кутчись. Ме тэнö гортöдззат вайöта.

Нывка вожасяс баля баран вылö, сюррез бердö кутчисяс, и баля баран пöлялö-петö вöрсис, нывкаöс петкöтö.

Ош эта коста гортас локтас, гöгöрпöв бергöтчас — нывка абу. Посöдз дорö петас, аддзö: баля туй сы керку дынсянь кушланьö мунöм. Ош рякöстас да рякöстас, и давай баля баран сьöрö вöтчыны.

Баля баранлö вот токо вöрись петны ни, петны ни, ош сэтчö сiйö вöтас. Баля баранöс джагöтас, нывкаöс сивъяс кутчöтас и вайöтас гортас бöр. Гортас нывкаöс йиркöтас да йиркöтас: вот пö тэныт, тöд, мöдпырся эн пышшывлы, колисö кö тэнö гортолiсьöн. Нывка сыркъялас, сыркъялас, мый — керны нем. Сiйöн сорöн ош ордö кольччас и пондас овны.

Олö нывка лун, олö мöдiк — куимöт лунас ош бöра мунö кыйсьыны. Нывкаöс кольö гортолiсьö и закажитö:

— Тэ видзöт менам, керку гöгöрсö дзимляв, пияннэзöс онмöсьты, посöдзсö чышкы да эн жö бöбась бöра гортат пышшыны. Кута кö, кута, пешлан бöра ош кабыррезöс.

Ош мунас. Нывка чышкас джодж, öтiкö, мöдiкö горби одзын керас, ошпияннэс саймасö.

Удас-вердас нiйö нывка, зыбкаö водтöтiс и бöра онмöсьтö, шувлö:

Öввö-öввö кага,

Öввö-öввö, зарни.

Оша-Мишаыс узьö.

Оша-Мишаыс бабö,

Кага, баб, кага, баб,

Бокат каб, бокат каб.

Кага, узь, кага, узь,

Локтö сюзь, локтö сюзь.

Ошпияннэс онмöссясö. Нывка петас посöдзö, чышкисьö и бöра люлльöтö-бöрдö, ассис причотсö тэчö:

А мыся ни тэ, гортся олöмöй,

Мыся я ни тэ, шоныт позiньöй,

Кыдз я петi тай шоныт мам позсим,

Аслам юр вылö лёксö кытсöвтi.

Инми-сюри тай дзульзян пöткаöн

Дзугъя пезинö — ошпозъяинö.

Шондi югöрыс татчö оз сибав,

Гажа луныслöн чужöм оз серав.

Оз лок, оз вайöт кокнит лун тöлок,

Оз ну, оз нöбöт курыт синваöс

Шоныт мам позъям, чужанiнам.

Усяс, тыдалö, меным, том нывлö,

Рöма дзоридзöн арся кадö моз

Пöрны-кельдöтны кöдзыт пуж увтын.

Мунö сэтi матi гöгöр öшка. Жаль сылö нывка лоас. Локтас да и шуö:

— Тэ дугды жö, нывка, бöрдны-геръясьны. Бöрдöмöн нем он кер. Тэ пуксьы жö ме вылö, сюррез бердам кутчись да видзсьы, ме тэнö вöрсис петкöта да гортöдззат сё вайöта.

А нывка паныт шуö:

— Ой тэ, öшкаиньöй, бур сьöлöминьöй, кытчö ни тэныт менö вöрись петкöтны, ош дынiсь гусявны. Баля баран мöдiс жö бы петкöтны да кушинöдззас эз пет, ловсö ош гыж увтын пуктiс. Эн ни тэ асьтö лёкöдз вошты.

— Мый лоас — сiя и ло, — öшка шуö, — а лок, вывтам пуксьы. Мыйись мый кö, сюррезö менам ёнöсь, ошлö ог сетчы, ме кынöмсö сылiсь резьöта.

Нывка вожасяс öшка вылö, сюррез бердö кутчас, и öшка пöлялö-петö вöрсис, нывкаöс ош ордiсь гусялö.

Ош бöра кыйсянсянь гортас локтас, гöгöрпöв бергöтчас — аддзö: сы посöдз дынсянь мунöм öшка туй. А мый эттшöмыс — бöра пö тай пестунняöс гусялöмась. Размöд рякöстас и пöльтö öшка сьöрö.

Öшкалö вöрись токо петны ни, петны ни, да кляпина пантасяс. Öшка сы увтöт бы уйыштас да сюррезнас кышасяс. Ош сэтчö сiйö и вöтас. Öшкаöс джагöтас, нывкаöс бöра ас йылас пуксьöтас и бертас гортас бöр. Гортас одззамоз жö нывкаöс йиркöтас да йиркöтас, вот пö тэныт, мöдпырся тöд, кыдз колö пышшавны. Нывка бöра сыркъялас-керас да сiйöн сорöн и кольччас.

Чулалö лун, чулалö мöдiк — ош бöра лöсьöтчö мунны кыйсьыны. Мунтöнняс нывкалö быднёжöн ни: и лöгнас асласöн, и ош бурнас закажитö:

— Тэ менам бытшöмика жö ов, эн жö ни куимöтпырся пышшы. Кута кö, кута — ме джын ловтö тэнчит босьта.

Мунас ош. Нывка бöра керкуын öтiкö-мöдiкö керас, ошлiсь кагаэз онмöсьтас, посöдзö петас и бöра люлльöтлö-геръялö.

Матi гöгöр гöнитö вöв. Кылас нывкалiсь причот шысö да керку посöдз дынö сибöтчас.

— Мыйись, нывка, горзан?

— Ме горза сiйöн, сiйöн...

Нывка висьтасяс вöвлö, кыдз мый вöлi, кыдз сюрис ош ордö, кыдз кыкись пондылiс пышшыны, да эз вермы.

— Чöв, эн горзы, горзöмöн он отсав, — шуö вöв. — Лок вожась ме вылö, ме сё ни тэнö ош ордiсь гусяла и гортат петкöта.

— Эн жö ни тэ асьтö лёкö вошты, — шуö нывка. — Менö баля баран пондылiс гусявны — эз вермы; öшка пондылiс — эз вермы; и тэнö ош джагöтас, ловйöн вöрсис он пет.

— Мый лоас, сiя и ло, — шуö вöв, — лок пуксьы ме вылö, мунам.

Нывка вожасяс вöв вылö, и вöв пöлялö-петö вöрсис, нывкаöс ош ордiсь гусялö.

Ош локтас кыйсянiнiсь, гöгöрпöв бергöтчас, аддзö — гортолiсьыс бöра абу. Öтöрö уськöтчас — посöдз дорсянь вöв туй мунö.

— Но, — шуö, — куимöтпырся тай гортолiсьö пышшис. Вöта кö, вöта — сё ни ме сылiсь джын ловсö босьта, мед мöдпырся тöдiс, кыдз колö горт кольны, пышшавны.

И уськöтчас вöв сьöрö. А вöв, мый вермö, гöнитö, тэрмасьö вöрсис петны. Вот токо петны ни, петны — ош сiйö вöтö, лапаэзнас ни сыналö, бöжпонсö куталö. Вöв лöсьöтчас-керас да ошлö бöжнас синнэз кузяс кыдз виззьыштас — ош падмыштас, синнэсö лапаэзнас чышкыштас да бöра и вöтчö.

Токо вот-вот вöлöс кутны ни, а кушиныс тыдалö, эшö размöдiсь бытшöмика чеччöвт, и вöр коляс бöрö. Ош петны кушинö оз лысьт, полö — поннэз сiйö летасö. Вот вöв кучикись петö-гöнитö. А ош сысся чожажык чепöссьö. Медбöрын ош вöлöс бöжöттяс сапырнитас-кутас — вöвлöн бöжыс орас, а ош мыр вевдöрöт мотылькнитчас. А вöв сы коста нывкакöт кушинö петас. Туй вылöдз нывкаöс вайöтас, вывсис лэдзас, ачыс гöнитас бокö йирсьыны, а нывка локтас туй кузя гортас.

ВÖВ ДА КÖИН

Кыт токо эз и рышшит тшыг кöин, а некытшöм кишка тупкöт эз сюр. А сёйны сiдз окота, што кынöмас кишкаэс шутнялöны. Котрасис-котрасис сiдз да инмис видз дорö, кытöн вöв йирсис. «Вот, — шуö кöин, — öнi пöттöдз пруддя ачым да эшö гортö кöть öтiк лопатка нöбöта». Висьталiс этö и веськыта вöлокыс дынö иньдöтчис.

Кылiс звир дуксö вöлыс, пеллесö сувтöтiс. А кöин му бердас ляпкöтчöма ни, чеччöвтны лöсьöтчö да вöв горшö пиннесö мöртны.

Вöв бытьтö оз вежöрт, мыйлö кöиныс ляпкöтчис, юалö:

— Тэ мый, рукйöсь, кынöм вылат кыскасян?

— Тэнö мöда сёйны, ылöстöм, — паныт шуö кöин. Вöв эз повзьы и местасис трек эз кер.

— Сёян, дак сёй, — шуö, — токо перво подковвезöс резьöт, а то пиннетö ештан чеглавны.

«А эд бурö сiя велöтö, — ошкис вöвсö кöиныс. — Сiдз ме и кера». Сибöтчис матöжык и юасьö:

— Кысянь пондöта резьöтнытö?

— Кöда коксянь кузнеччез пондöтчöны, — шуö вöв.

— А ме мыйöн тöда? — лöгасис кöин. — Ог жö ме понды ны дынö котöртны!

— Но, сэк пондыв бöрсяням. Вугыртiс-оськöвтiс рукйöсь гöна кöин вöв бöжланьö, мышкыртiс юрсö подков дынас, а вöлыс кыдз швангис юрпыдöсас — кöин дватсать сажень мымда тульки-мельки таралiс, унньöвтiс да подковсö ёрдiс.

А вöв дзик бордйылын, кытчö павкö гыжыс, кытчö оз, улича понöдз пöльтiс.