Нинкöм да налевка

Споритöмась кыдзкö нинкöм да налевка: кинлöн буржык оланыс? Налевка и шуö:

— Нинкöм тэ, нинкöм! Месся умöльжык оланыс некинлöн ни югытас абу. Тэныт мый? Лунтыр öтöрöт ветлöтан, асьтö мыччалан да отирöс нёджжалан, а ойыс локтас — тэ и швапкисян гор вылö, и некытшöм шог абу. А менö сюйыштасö чизыр шöмас да вевдöрсяняс эшö пöлöн вевттясö. Не мича лунсö ог аддзыв, не сöстöм рунас ог лолав. Гуын дзик ола. Уна я сэтöн керпитан?

— Налевка тэ, налевка! Разь тэнат умöль оланыт? А менам кытшöм?! Тэ кöть лабичын да гöбечын боккетö пöжан, не зэрсö, не нятьсö он аддзыв. А ме пемытсянь пемытöдз нятьсö воя, быд комокыс да чагыс менö чувйыштö, морозыс кынтö. Кынман-гегдан лунтыр, локтан гортö. кöзяинö сёйны-юны пондас, а ме пызан увтас куруöн орса. Сэсся пöрччасяс, чапкас менö горö. Жар вылас шуч косьма. Ашынас кыскас, пуктас пидзöс вылас поперег да кыдз кажйыштас — быдöс коскаэзö пазаласö. Вот кытшöм нинкöмыслöн оланыс.

ТЕШ ВИСЬТОККЕЗ

Дозыс жаль лоис

Комиöн буржык

Мöдпырся баитам

Мыйкö петас

Пöв нинкöма мужык

Сола шöмтöм

Том дак том

Ырöш керикö

МÖДПЫРСЯ БАИТАМ

Мужык асывнас пырö суседыс ордö.

— Чеччит ни?

— Чеччим тай.

— Баитны пырыштi.

— Баит инö.

— Куританыт эм?

— Абу эд.

— Но, мöдпырся нö баитам, — висьталас локтiсьыс да бöр мунас.

ЫРÖШ КЕРИКÖ

Оградаын инька керö ырöш. Сысъялас ырöшсö кринкаö, бокö вештас да мунас пожсö гывйöвтны. Сы коста локтас мöс да содтас ырöшас ассис «васö». Казялас инькаыт этö, вашöтас мöссö да и думайтö: «Мымда жö повно шоллис? А, кöшся унажыксö сёроно эз». И чапкас ырöшсис öтiк кöш.

СОЛА ШÖМТÖМ

Ичмонь пöжас ырöш, сайкöтас, сысъялас да и солалас шöмтöмсö. А сэсся аньыслö шуö: — Совсö токо кык кырым пуктi — абу етша?

ДОЗЫС ЖАЛЬ ЛОАС

Туйын мортлöн горшыс косьмö, сiя кежас керку дынö, кытöн челядь орсöны, тшöктас юан петкöтны. Зоночка сёй дозöн петкöтас, мужык быдöс юыштас да тожно казялас, што миськавтöм дозöн удöмась — ырöш быгыс доррезас косьмöма. Лöгасяс эта вылö мужыкыт да желльыштас дозсö столб бердö.

Зоночка рик-рик бöрдчас да шуö:

— Мыля жугдiн? Сэсся кытчö чильнытö пондам?

МЫЙКÖ ПЕТАС

Старик ленивка кузя кыссьö гор вывсянь пöлатьö старукаыс дынö да бобгö:

— Мыйкö петас я, оз я, петас я, оз я...

Старука кылас бобгöмсö да лöгасяс, што онсö дзугöны, и чужъяс стариксö. Старик усяс джоджас да шуö:

— Не весь шуи: не öтiк, дак мöдiк петас.

ТОМ, ДАК ТОМ

Старик корсьö том дöвакöт пантасьны. Дöва шуас: — Кöр ме куканьсö кытсöвта, тэ лок да йики видзанас пыр...

Баитчасö сiдз да и янсöтчасö. А дöва старикыс инь дынö котрасяс да сiйö ас туяс йики видзанас пыртас, вöлись кытсасьö:

— Тпрутя, тпрутя!

Старик кыш-паш локтыштас да — йики видзанас... А сыбöрын и шуö:

— Том, дак том жö и эм!

Пöв нинкöма мужык

Мужичок ветлас гöститны и локтö гортас. А расокын кай горалö:

— Вить-вить-вить-витьö! А мужыклö кывсьö:

— Юрыт тай вись-вись-висьö!

Мужичоклöн юрыс потласьны готов, но сiя чöлö. А каёк нарошно дозыляйтö сылö:

— Юрыт тай вись-вись-висьö!

Лöгасяс мужичок, мöдас мыйöнкö вачкыны каёксö, да нем оз аддзы. И пöрччалас нинкöмсö да нинкöмнас шупкас. Тарварыш чайтас тар лэбзьö да кутас нинкöмсö да вöрö лэбзьöтас.

Сiдз мужичок кык шогöн гортас локтас.