Кыдз епаöс кöч велöтiс

Олiс-вöлiс — отир коласын сорласис да богатсявны тэрмасис — вöралiсь Епа. И юан-сёяныс сылöн эз вöв, а тшыгйöн эз кув, паськöмыс öтiк вежлас вöлi, а гор вылын пасьтöг эз пукав.

Старука горт гöгöрас видзöтö-лöсьöтö, а Епа вöрсö меръяйтö, чашъя чегö, нинкöммесö бырöтö да паськöмсö лэдзö. Вöвлi, кöр туанöс кыяс, кöр сьöлаöс вияс, а кöр и коккесö весь нöитас.

Мунiс öтпыр кöчавны, джын лымсö вöрсис талис да весь: и шырöс эз пантав. Бергöтiс лямпаэсö гортланяс, а паныт кресь петiс кöч, чуть оча кымöс эз тапкисьö.

Епа мöдiс пезьдöтны кöчсö, а сiя и горöтчис морт моз:

— Эн тэрмась, Епа, менö вийны. Перво кывзы, мый висьтала.

Епа синнэсö барöтiс: вöвлытöм чудо да и токо. Ассис вексö бырöтö ни, а сэтшöмсö эз на аддзывлы.

Кöч пуксис мыр вылö, коксö кок вылас пуктiс да и бобгö:

— Кöр виян менö, сэк то этадз кер. Кучиксö кулян да купечлö вузалан. Шедтöм сьöм вылас козапиянöс босьтан. Быдтан сiйö — кык пиян ваяс...

Епа пеллесö öшöтiс да кывзö, пишальсö му вылас пуктiс. «То эд, — думайтö, — кытöн шудыс! И йöлок лоас, и пияннэс понда сьöм босьта».

А кöч, бытьтö тёшша ордын гöститтöн, богатсьöтö Епасö:

— Вузалан нiйö — порсёк небан. Быдтан сiйö — дас пиян ваяс. Вузалан дзуттэсö — куканёк босьтан, куканьыс мöсö пöрас, порозок сетас, тэ сiйö вöв вылö вежан.

Сэтшöм эмбурсянь Епалöн юрыс бергöтчис. Аддзö ни сiя, кыдз бодритö лысанöй мерин вылын. Да мый мериныс — сивöй, лöз печата рысак вылын! А мысок вылас кыксувда керку бельялö. Пырö Епа гортас, а иньыс шоныт ырöш вайö, быгъяö да тагъяö, пызан вылö яя шыд сувтöтö да небыт каравай шöралö.

А иньыслö Епа дона козин козьналö — кумачовöй ковта да сатиновöй сарапан. А сыбöрын...

«Да ладно, ужо, кöчсö пöрöта...»

Дзар керис Епа, а кузь пельлöн и дукыс абу: пышшöма да быдöс эмбурсö Епалiсь нуöтöма.

Донтöмик пятаккез

Посадöт мунö вузасись, пустöй коробъяöн ни, товартöг. Бура вузасьöма, сьöмыс быдса кöшель öксьöма, да чисто пятаккез. И мöдö ыргöнсö эзысь вылö вежны, вот и ряксö?

— Локтö, кинлöн эзысь эм! Босьтасьö!

— Мый вузалан? — юасьö барыня.

— Пятаккез, — шуö вузасись.

— Донаöн я?

— Гривенник вылö кык пятак сета.

«Видзöт, кытшöм донтöма», — думайтiс барыня да кыскис ассис гривенниккесö.

Атрапей

Локтö гортас савдат. Служба понда сылö сетöмась кык тыква. Пырас савдат öтiк керкуö, тыкваэсö гöбечö пуктас. Кылас отирыс, што савдат мыйкö свиттяланаö вайис, ванырöн уськöтчас видзöтны тыкваэсö. Видзöтöны, дивуйтчöны: эта пö мый сэтшöмыс. А савдат висьталö: — Эта — атрапей.

— Воно тай мый сiя! — шуöны отирыс. — Дак эд зэв нö ни бур сiя...

— А кыдз инö, — öзйöтö нiйö савдат. — Саридз сайись эдö.

— Дак эд дона сэки?

— Кыдз инö! Шуöны — атрапей. Кин тöдö, мый сiя лоö, дак и червонеч сетас.

Посадын сэтшöм поредня: кин мый кылас, сэк жö и суседö котöртö. Сiдз и эстöн петас. Эз на ешты савдат «трофей» йылiсь юöртны, кыдз керкуас уськöтчис поп да порог дорсянь горöтö:

— Ме... Ме кыкнан атрапейсö босьта!

Савдат ас пондас шуö: «Босьт, батюшко, босьт, тэнат сьöмыт уна».

Кыдз сёйис, сiдз и уджалiс

Озыр прикодын олiс надз поп. Роботниксö пемытсянь пемытöдз уджöтiс, а вердiс öтпырись луннас. Роботник мырсис, мырсис да и мунiс сы ордiсь. Поп мöдiкöс медалiс уджавны.

Вот öтiк асылö поп саймöтö роботниксö одзся-одз да тшöктö:

— Ветлы-ко турунла, да эн манитчы, чожа берт. Сыбöрын мельничаö мунан.

— Мыйкö бы сёйыштны, батюшко, — корö роботникыс. — Тшыгувъя умöль...

— Сiя-ту сiдз, да няньыс эшö узьö. Локтан да вöлись и сёян.

Но ладно, вöлись дак вöлись. Доддялас роботник вöв, мунас звонар ордö да водас узьны. Югдандорас саймас и бöр локтас просто.

— Но, вайин турунсö? — юалö поп. А роботникыс шуö:

— Эг эд, батюшко: зородыс сё эшö узьö.