«Ёгортан курöтан...»

Ыстасö зонкаöс Ёгортан кузнеч ордö жигала корны, кöдöн куран юрö осьтаэз писькöтлöны. Мунö зонка, и мед не вунöтны, мыйла ыстiсö, модьö ныр увтас:

— Куран юр пырöтан, куран юр пырöтан... Пантасьö старик, юалö:

— Кытчö, зонка, тэрмасян?

— Пырöтанла иньдiсö, — шуö зонка и мунö одзлань. Мунöв-керас да вунöтас, кыдз пырöтансö шуöны, и модьö мöднёж:

— Курöтан пырöтан, курöтан пырöтан... Пантасьö старука, юалö:

— Кытчö, зону, котöртан?

— Ёгортанö — шуö зонка, ачыс куимöтнёж ни пондö модьны:

— Ёгортан курöтан, Ёгортан курöтан... Локтас Ёгортаннэзас да сiдз и корас:

— Меным Ёгортан курöтан колö.

Сiйö оз вежöртö, бöр гортас иньдöтасö да бытшöмика тшöктасö юавны, мый колö.

Котрасяс зонка, юалас, мый колö, и бöра кузнеч ордö котöртö. Котöртас, котöртас, чаг ёгö инмас да усяс. Сэтчö и вунöтас, мыйла иньдöтiсö. Вот и ветлöтö ёг чукöр гöгöрöт да вунöтöм кывсö кошшö. Сэтчö мужык локтас, юалö, мый керö зонкаыс.

— Кошша, — шуö мöдыт.

— Кытчö уськöтiн?

— Этчö...

Мужык думайтас, што серебрушка уськöтiс, и тожö кошшисьö. Локтас гед и давай киэзнас ёгсö соровтны. Инька мунас вала и сетас совет: буржык пö кошшисьны ёгас куранöн. Зонка радувъяс горöтö:

— Вот, вот — куран! — и уськöтчас котöртны Ёгортанö. А мужык да гед думайтасö, што зонка куранла мунiс, и тэрмасьöны сытöг серебрушкасö аддзыны: кыкыслö унажыкöн дöнзяс!

Асныррез

Оласö-вöласö да кадсö чулöтасö пöрись гозъя, öтiк асылö нiя пуасö поклёбка, сёйыштасö сiйö да етшасьны кутчасö, кинлö чугунсö миськавны. И мыдзтöдз споритасö, но некöда оз вермö. Сэк старик шуас:

— Вай вот кыдз керам: водамö узьны, и кин медодз саймас да шыасяс — сылö и миськавны.

Старука согласитчас, и нiя водасö узьны.

Лун чулалас, рыт локтас, а нiя сё куйлöны да чöлöны, дзик чуркаэз.

Суседдэзныс повзясö: эз я мыйкö шогмы? Локтасö ны ордö — некин оз тыдав, некöда оз шыасьö. Пöлатьö видзöтасö — старик гозъя сэтчин узьöны. Кытсöвтасö — чöлöны. И решитасö отирыс: кулöмась. Вайöтасö попöс, сiя отпевайтас пöрись гозъясö да мунас. Старик да старука и асьныс повзясö ни, но куйлöны. Сэтчö и колясö отирыс нiйö.

Вот и ой локтас, а нiя оз чеччö. Друг кылöны: кинкö гусьöник керкуас пырö, но чöлöны А пыриссес куима, нiя гусясьны локтöмась, паськöм петкöтлöны. Öтпыр петкöтасö — старик гозъя чöлöны. Мöдпыр петкöтасö — чöлöны. Куимöтпырся пож да быгрöтчан босьтасö, сэк старукаыт и горöтчас:

— Эд вöрöтö быгрöтчансö! Старик шуас:

— Миськав чугунсö, старука!

СIДЗ СЫЛÖ И КОЛÖ

Кöркö вöлöмась пöрись гозъя, олöмась öддьöн умöль. Öтпыр старикыс аддзас ид тусь, сэтiсь старукаыс пуас шыд. Пуксясö сёйны, васö панялыштасö, а тусьсö озö тöдö, кыдз янсöтны. Сэтчö лэбзяс гут и тусьсö сёяс.

Старик да старука ножö сы сьöрын вöтлiсьны да горöтлыны:

— Ак, тэ сёйин?! Виям срамöс!

Старик киын — укват, старука киын — нянь зыр. Вöтлiсясö, вöтлiсясö да пондасö шоччисьны. Старик пукалö пöлатьын, коккесö пöлать юр вылас öшлöм, а старука — лабичын. Сы пора гутыс пуксяс старикыс кымöс вылö. Старукаыс казялас гутсö да нянь зырнас шваткас сы кузя. Старик чер-бар улö усяс да коккесö нюжöтас.

Старука повзяс, Лэбтiсяс ыксыны:

— Ой, вийи! Ой, вийи!

Старик кылас этö, садясяс да и шуö:

— Сiдз сылö и колö, сэсся дугдас гусясьны!