Зимогор

Тiйö эд кывлö, мый вöлi öтпыр аркмöма? Дак кывзö. Уджалас зимогор ассис сроксö Кама вылын и кыссьö жагöник гортас. Öтiк деревняын сiйö ойыс вöтас, и ковсяс узянiн кошшыны. Аддзö: дорись керку дынас морт пукалö, вот и юасьö сылiсь:

— А мый, бытшöм морт, оз я туй тiян деревняын узьны? Морт сылö и шуö:

— Кöть кытчö пыр, узьнытö сё ни лэдзасö. Токо миян панытö эн пыр. Сэтчин олöны мужык гозъя, нiя öддьöн надзöсь и некинöс узьнытö оз лэдзö.

— Ноко ме сэтчин и юася, — шуас зимогор да пырас мортыс сусед ордö.

Пырас, ыбöс дорокас сувтчыштас и корсьö:

— Лэдзит бы, бытшöм отир, коккез шоччöтыштны, пöрись коскаэз шонтыштны, а ме ыджыт аттьö висьталi бы.

Надз гозъя сэтöн жö и откажитны пондасö, но кыдз токо шыасясö, зимогор кир-пар чöвтчас, пöрччасяс да пöлатьö каяс и вöлись шуас:

— Аттьö, бытшöммез, аттьö!

Думайтöны мужык гозъя, што зимогорыс умöля кылö, и ыксöны сылö пель одзас:

— Ми ог лэдзалö узиссесö, мун мöдiклаö корсьы! А зимогор паныт:

— Перина, шуат, сетат? Оз ков, нем оз ков меным, öтiк пась тырмас, — и босьтас кöзяиныслiсь тулуп да шебрасяс сiйöн.

Вежöртасö: воть и воть оз кыв зимогорыт, и дугдасö сiйö вöрöтны.

Ашынас кöзяиныс эшö пемытöн уджавны мунас, а иньыслö висьталас, медбы сiя узисьыслiсь сьöм босьтiс.

Вот и гор ни колö лонтны, сёян пуны-пöжны, да полö инькаыт — узисьыс эд саймас да сёйны пондас корны.

Виччисяс-керас надз кöзяйка, кöр зимогорыс саймас да мунас, а сiя сё саркйö-узьö, и лонтас горсö: ась пö узьö, ме сы коста шаньгаэз пöжала да дзеба ылöжык.

Пöжассясö шаньгаэс, страпка пондас дзимлясьны гор одзас. А зимогор какраз сэтчö и чеччас, кöмасяс-пасьтасяс курни-верни и лöсьöтчас мунны бытьтö. кöзяйка сы дынö:

— Сьöм вешты да вöлись мун!

А зимогорлö сiя и колö, кöр сыкöт шыасясö:

— Шаньгаэз, шуан! Позьö и сёйыштны.

Пуксяс зимогор сёйны, лотошитас пöттöдз, кöзяйкалö аттьö висьталас да и мунас аслас туй кузя.

ДУДЫК

Ветлöтö деревняöт Тулыс, видзöтö, кин мымда печкис. Локтас Дудык ордö, öшын увтас кытсасьö:

— Ноко мыччав, Дудык, мымда тöвбытöн печкин? Дудык пишкö-узьö, нем оз кыв.

Тулыс саймöтас нывкасö, стыдитö, мыля сiя луннас узьö. А Дудык бöбöтчö:

— Ойбыт печки тай да шоччисьны водыштi. Часöт мыччала тöвся печкöмöс.

Осьтас Дудык коробъясö и шуö:

— Лыддьы, Тулыс, ме понда мыччавны.

А коробъяас öтiк ректан, öтiк тшакыль да шöртöн öтiк чöрс. Вот Дудык и ваялö öтiкöн öшын одзас да висьтавлö:

— Öтiк ректан, öтiк тшакыль; мöдiк ректан, мöдiк тшакыль; куимöт ректан, куимöт тшакыль...

И сiдз кыкдас ректан да кыкдас тшакыль мыччалас.

— Тэ чож вöлöмыт, уна печкöмыт, — ошкас Тулыс нывкасö да и жöниккезлö сiдз висьталас.

Босьтас Дудыкöс öтiк зонка, а Дудык сьöрас прос коробъя ваяс. Лöгасяс зонка да вашöтас гортсис Дудыксö, сэсся дöвкас Тулыслö:

— Тэ менö бöбöтiн невестанат. Лöгасяс Тулыс да ёрдас Дудыкöс:

— Ов тэ вексö семъятöг, шатлась паськыт му вылöт. Сiдз Дудык и шатласяс ассис вексö.

Дыш олёнушка

Олöма, олöма Олёнушка да и жöник сайö мунöма. Жöник иньдас сiйö вундыны, Олёнушка вундыштас мымдакö, а сыбöрын лунтыр бороздаын туплясяс. Локтас гортас, жöникыс юалö:

— Уна я вундiн?

— Торок тай вундыштi, — шуас Олёнушка. Мöдiк лунö каяс ыб вылö, вундас кольта-мöд и бöра лунтыр узяс. Лэдзчас гортас, жöникыс юалö:

— Уна я вундiн?

— Быдса тор вундi.

Куимöт лунас жöникыс каяс сьöрсяняс да караулитас. И кöр Олёнушка водас узьны, жöникыс юрсисö шырас да чужöмсö саöн мавтас. Саймас Олёнушка, думайтö: «Мый эттшöмыс? Менам вöлiсö чикиссез, и вöлi ме сöстöм. А этö поди не ме?»

Лэдзчас гортас, сувтас öшын увтас да юалас:

— Иван, тэ гортын?

— Гортын, — шуас Иван.

— А Олёнушкаыс?

— Гортын жö.

И решитас инькаыт, што сiя былись не Олёнушка, и чапкас гортсö.

Вот кыдз дышкульсö жöникыс велöтас.