Кöбыла кольттез

Олас-вылас поп — кыз кынöма да кыз сьöм кöшеля. Сэтчö жö надз да йöз эмбур вылö заруйтчö. Кыдзкö мунас поп базарö да савдатöс туй вылас панталас. А савдат кык тыква нöбöтö. Поп и юалö савдатлiсь:

— Мый нö сэтшöмсö нöбöтан, савдат?

Савдат вежöртас, што поп тыкваэсö абу на аддзывлöм, сiдзкö, позьö и бöбöтны кыз кынöмöс, и шуö:

— Кöбыла кольттез мöда вузавны. Поп думайтас-керас да юалö:

— Донаöсь я öнi кöбыла кольттес? савдат висьталö:

— Кытöн кыдз... Саратовын öтiкыс сизимдас руб сулалö, а Москваын эшö донажык. Да и кытшöм породаись эд...

— Тэнат кытшöм породаись?

Аддзö савдат, што поплöн синнэс öзйисö товар вылас, одзлань сiйö бöбöтлö:

— Менам — рысаклöнöсь. Кыкнансö кö босьтан, дак витдасöн сета.

— А кыдз нiйö пöжны?

— Пуктан кудö, кудсö — гор вылö и пöж сэтöн. Куим неделя пукалан — рысак чаннез петаласö.

Поплö сэтшöм товарсö бокö некыдз оз туй лэдзны, и сiя босьтас кыкнан тыквасö.

Локтас поп гортас да попаддялö шуö:

— Матушка, кöбыла кольттезiсь колö бы чаннез пöжны. Пукав тэ ны вылын куим неделя.

Попаддя шуö:

— Кин босьтiс, сiя и пöжас.

Поплö керны нем: каяс гор вылö и пöжö.

Поди неделя-мöд ни пукалас, сэтчö староста локтö, попсö пыртчыны корö — зон чужöма. А попыс куд вывсис оз бы чеччы. Но и староста попыстöг оз бы мун.

Споритасö, споритасö, староста аддзас поплiсь плеть да плетьнас кутчас кульны «чань пöжисьсö». Кульыштас спина кузяс, юалас:

— Локтан, он? Поп:

— Ог лок!

Староста кульыштас, юалас:

— Локтан, он? Поп:

— Ог!

Староста поплiсь боккесö сэтчöдз плетьнас пöжас, што попыс кватитас кудсö конувтас да пышшас гортсис. А староста сы бöрсянь вöтчö.

Поп локтас öсек дорö, пондас сы вевдöрöт вуджны да кудсö уськöтас. А öсек увтас вöлöмась кык руд кöч, нiя повзясö да пышшыны пондасö. Поп казялас нiйö да горöтö:

— Чиба, тпру! Чиба, тпру! Ме кöбыла — тiян мам!

ЕН СЕТÖМ

Дöвалöн öшас дзодзог. Мунас дöва сiйö кошшыны и аддзас поп картаись. Аддзас да шуас:

— Тэ мыля инö, батюшко, менчим дзодзогöс йöртiн? Поп висьталö:

— Ме эг йöрт, сiйö меным Еныс сетiс.

— Кыдз нö сетiс, батюшко?

— А ме Еныслö бура кейми: сет, мыся, енöй, нимлун кежам яйтор, и сiя, аддзан, сетiс.

Сiдз дöва и мунас гортас куш киэзöн.

Лун я, кык я чулалас, дöва мöскöт локтö поплöн пороз. Дöва чепöссяс öтöрас, осьтас карта воротасö, и мöс да пороз пырасö картаö.

Думайтас-керас дöва да корас мужыккезöс, и нiя начкыласö порозсö, а кучиксö йöр вылö öшöтасö косьтыны. Мунö поп и аддзö, што сылiсь порозсö кульöмась.

— Тэ мый сiйö керин, грека кынöм? — видö дöвасö поп. — Мыля менчим порозöс гусялiн?

Дöваыс и шуö:

— Ме, батюшко, сiйö эг гусяв, сiйö Еныс меным сетiс.

— Быдса пороз сетiс?

— А ме эд быдса лун Еныслiсь кори.

Вöралiсь опонь да барин

Олiс-вöлiс коми му вылын парма вöр дорын вöралiсь Опонь. А вöрыс вöлi баринлöн.

И вот öтпыр Опонь мунiс вöрас вöравны; мунiс, мунiс и казялiс кöчöс. Пукалö кöчыс, пеллезнас вöрöтыштлö, и повзьöм синнэзнас Опонь вылö видзöтыштлö. Гым лыйис кöчсö Опонь. Кöч тушмыль усис бок вылас и нюжöтiс коккесö.

— Öтiк эм! — горöтчис Опонь, босьтiс кöчсö да спина саяс наперекось öшöтiс. И мунiс бы гортас, кöчöс жаритiс, чöскыта бы пажнайтiс, эта вылын бы и пом вöлi.

Но, эта жö кадö вöрас вöлöма барин. Уськöтчис сiя пуэз сайсянь Опонь вылö, кутiс моросöттяс и давай зэгöтны да ыксыны:

— Кыдз тэ лысьтан вöравны менам вöрын? Эта эд вöрыс и звиррез да кайез, кöдна сэтöн олöны — быдöс менамöсь. Эта понда ме тэнö тюрмаö пуксьöта.

Öтнас бы вöлi бариныс, дак Опонь бы пышшис. Но эд бариныс бöрын сулалöны нёль казак шашкаэзöн да пистолеттэзöн, сiйö токо и видзöтöны, кыдз бы Опоньöс кутны.

Опонь и баитö:

— Простит менö, батюшко барин. Кöч юрыс эд абу дона, не ошöс жö ме вийи.

— Вийин кöбы тэ ошöс, дак ме бы тэнö век кежö ыстi каторгаö. Ошсö лыйны тэ эн и думайт!

— Ог, батюшко барин, казяла кö ошсö аслам вöв вылiсь нето мöс вылiсь и то ог вöрзьöт, токо простит менö!

— Ог простит. Проститны кö тiян коддесö, дак тiйö быдöс вунöтчат, не Енiсь не сарись одö пондö повны. Казаккез, кутö этö супостатсö да нуöтö посадö суд вылö!

Кутiсö казаккез Опоньöс, чужъялöмöн да лёнас сеталöмöн вайöтiсö посадö. Чукöртчисö волостнöй правленнёö суддяэз и судитiсö сар закон статтяэз сьöртi. Приговор вöлi то кытшöм: барин вöрись кöч вийöм понда пуксьöтны Опоньöс тюрмаö куим год кежö.

Пукалiс вöралiсь Опонь энö куим годсö и локтiс гортас. Сьöлöм гаж семъяыскöт олыштiс, шоччисьыштiс лун-мöд, но вöралiсьлöн сьöлöм оз керпит: босьтiс тув вылiсь пишаль да мунiс вöравны. Барин вöрись сiя и воробейсö полiс вийны, но туйыс вöлi эта барин вöр пытшкöт.

Мунö Опонь туй вылöт эта барин вöрöт, öт-мöдöрö видзöтыштлö да кывзiсьыштлö. И кылö, кинкö лёк горшöн ыксö. Котöртiс Опонь эта шы вылö и видзöтö: баринсö ыджыт пöрись ош нырыштöм да мый вермö лапаэзнас мичкöтö-вартлö, мöдö сылiсь барскöй кучиксö кульыштны.

Казялiс барин Опоньöс и кеймисьö:

— Опонь, дона мортiньöй, лый жö, лый жö ме вылiсь ошсö, мездöт менö кулöм увтсис!

Опонь и шуö:

— Ог ме лысьт сiйö лыйны, лыя кö, дак тэ менö ыстан каторгаö.

— Бур тэ морт, кора ме, тэрмась, тэрмась лый, чожажык.

Опонь киэзнас öвтчыны пондiс и баитö:

— Ог ме лый ошсö, кыдз жö ме сiйö лыя, эд вöрыс, вöр пöткаыс и звирыс — быдöс тэнатöсь. Меным оз позь и шатьсö тэнат вöрись вöрзьöтны.

Висьталiс этадз Опонь и мунiс одзлань, а ошыс баринлiсь öддьöн кокнита барскöй кучиксö кульыштiс.