Кыдз зонка би кошшис

Бипур дорын пукалö пöрись морт — дозоритö бисö. Сы дынö локтас зонка би корны — гортсяняс иньдöтасö.

— Сетышт, гедiньöй, кöть öтiк шомок!

— Висьталан кö бывальшина — мый оз вермы лоны, дак сета.

И зонка кутчас вöвлытöмсö висьтасьны:

— Пöжимö мийö кыдзкö сур. Гырничыс пöрис, и сэсь киссис сусло. Суслосö вöв юис да потiс. Керимö кыдзовöй шатись асык, асыкалiм вöлыслiсь кынöмсö, да асыксис быдмис кыдз — кузь и кузь, кымöрöдз топ. Кайи ме кыдзыс кузя кымöрас. Аддза: пороззэзöс гуттэз вылö вежöны. Куталi ме гуттэсö да вежи нiйö кымöрись пороззэз вылö.

Окота лоис му вылас лэдзчыны, а вöлыс öтлаын кыдзнас мунöма кытчöкö. Начкылi пороззэзöс, вундалi кучиккесö да кери сэтiсь ремень и пондi лэдзчыны сы кузя. Лэдзчи, лэдзчи — ременьыс эз судз му бердöдззас. Гажтöм лоис, гыжйыштi спинаöс — пытш шедiс. Вот и бур! Кульыштi сылiсь кучиксö, кери ремень, содтi мöдыс дынö, бöра лэдзчи, а му дынöдззас ылын эшö. Кыдз му вылас лэдзчыны?

Мужык гуна вылын зырöн сю тöлöтö, йикиыс кымöрас лэбзьö. Куталi ме йикисö — сэтiсь гез кыйи, содтi ремень бердас, да муöдззас эз судз. Чеччöвтi му вылас да инми нюрö, сибдi. Лэбзис ме дынö тури, юр вылам пондiс поз керны. Кутчиси сы коккез бердö — туриыс орöтчис, коккесö киам колис.

Мунiс бокöттям чочком тоша старик — этö тэ, гедiньöй, вöлöмыт — эз отсав меным петны. Кöрталi тури коккесö оча, шогмис куран кодь кузь бедь, ме сiйöн кутчиси тэ бердö и петi зыбунсис.

— Бöбöтчан, зонка! — горöтiс би дозоритiсьыс. — Эз вöв сэтшöмыс!

— А-а, бур бывальшинаыс? Вай-ко öнi битö!

Не поп, не чорт

Вот стариклöн кулас старукаыс, а дзебны немöн — не сьöм, не нянь абу. А нем дорас эд попсö он кор, да и могиласö некин оз лок гарйыны — сё мыйöнкö вештiсьны колö. Вот эд оланыс вöлöма!

Но мый керны?

Думайтас, думайтас старикыт да и мунас ачыс могиласö гарйыны. Токо мöртас зырсö муас — жиль-жоль жольнитас! Но, мый пö эттшöмыс лоö? Ывтiжык гарйыштас — бöра жиль-жоль, и мыччисяс котёлок. Босьтас сiйö старик, видзöтас — котёлокас зарни пежъялö.

Чапкас гарйисьны, мунас базарö, небас сэтчинiсь яй да пизёк пельняннез понда, чукöртас öтi-мöдi гöснеч коласiсь да поп дынö котöртас.

Примитас сiйö поп, кыдз вонöс: и гарйисьны отирöс иньдöтас, и отпевайтан и подорожна кулöмыслö киас сюйыштас — эта пö райö пырны пропуск.

Кöр жольöтö зепат, дак эд тэ быдöнлö бур!

Вот дзебасö старукасö, казьтыласö, кыдз колö, и розьнитчас отирыс старикыс ордiсь. А поп кольччас и давай юасьны:

— Тэ, старик, кысь сымда сьöмсö босьтiн? Эн я кинлiськö чом петкöт?

— Эг, батюшко. Этö старукаö эмбурсö колис.

Веритас поп, да недыр кежö. Кывсяс сылö, што старикытлöн уна сьöм эм. Вот и корö стариксö вичкуö исповедь вылö. Локтас старик, а поп бöра юасьö:

— Кытiсь сьöмтö? Кинöс грабитiн?

— Эг грабит. Клад аддзи.

— Кысь аддзин?

И висьталас старик быдöс, кыдз вöлi. Поплöн и оныс öшас, сё думайтö, кыдз бы стариклiсь сьöмсö бöбöтны.

Казялас попаддя батюшколiсь маитчöмсö, юасьö, мый лоис. И поп висьталас, мыйсянь узьны эз понды.

— Начкыв козасö, — шуö попаддя, — да кульöм кучиксö вывтат пасьтав да мун стариксö повзьöт. Сiя и шупкас тэныт сьöмсö.

Но мый — бытшöм совет. Начкыласö козасö ойнас, поп пасьталас шоныт кучиксö вывтас, попаддя вурас сiйö йöрнöс бердас батюшкоыслö. Рад не рад попыт: öнi пö ме судзöта сьöмсö! Но и локтас старикыс ордö, тарс-тарс керас ыбöсас, шуас:

— Осьт ыбöстö, старик, баитны колö. Старик юалö:

— Кин тэ?

— Ме чорт.

— Ог лэдзав куллесö ойнас, — висьталас старик да бöр водас узьны. А поп мунас öшын увтас и бöра тарс-тарс керас. Локтас старик öшын дынас да кыдз видзöтас öтöрас — былись сэтчин сюра чорт сулалö да баитö:

— Вай зарнисö меным, кöдö могильниксис аддзин. Ме тэнö тшöктi токо джынсö босьтны, а тэ быдöс нöбöтiн. Он кö сет, часöт пыра тэ дынö и сёя тэнö.

Старик повзяс да и чапкас öтöрас зарнисö. Поп кватитас сiйö, котöртас гортас да и шуö иньыслö:

— Вот öнi пондам овны! Старикыт бöр говсялас. Резьöт-ко коза кучиксö.

Попаддя пурт босьтас, швач орöтас сунис — вир чепöссяс. А поп горöтö:

— Ой, зубыт! Эн орлав жилаэзöс, суниссö вундышт! Попаддя мöдiклаöт швач вундыштас — бöра вир чепöссяс, а поп эшö öддьöнжык горöтö:

— Ой, зубыт! Ой, зубыт!

Мый керны? Кыт бы эн вундышт — сё жила, а не сунис.

Попаддя котöртас старикыс дынö, тшöктö бöр чöвтны попыс вылiсь коза кучиксö: этö пö тэ лякöтiн. А старик шуö:

— Ась ачыс вайö зарнисö, да луннас, сэк кыртас сы бердiсь коза кучикыс.

Поп öдва-öдва луншöрсö виччисяс, сэсся ыджыт пась пасьталас, сюрресö пыдын шапка увтö дзебас да нöбöтас зарнисö старик ордö. Коляс зарнисö да чожажык гортас: öнi пö шедас ни коза кучикыс. Но сiя эшö ёнжыка лякасьöма, и сюррес кузьжыка быдмöмась.

Поп пырас гор сайö, пыкöталас сюрресö стенаас и пукалö сэтчин. И пызан дорö петны оз лысьт. Не поп, не чорт лоас. Сiйöн и абу эд öнi миян попным.