Куим вон

Олiсö-вöлiсö старик гозъя, нылöн вöлiсö куим зон, öддьöн чожöсь да вынаöсь. Öтпыр старик да куимнан зоныс мунiсö вöравны гортсяняныс ылö. Звир да сьöла вöлi уна, и вöралiссез бура вöралiсö куим мисечся дыржык. И вот бырсис нылöн сёян. Старик и шуö аслас зоннэзлö:

— Но, зоннэзö, звир-сьöлаыс уна, колö бы токо вöравны, а нянь запасным бырсис. Петалö-ко тiйö кöдакö гортö да вайö сёянсö.

А учöтжык зоныс баитö:

— Оз ков гортö петны, вермам овны няньтöг, öтiк яй вылын. Яйсö эд не небны!

Сiдз нiя и керисö. Учöтжык зонсö айыс ошкис: тэ пö кöть и медтом, а самöй толковöй, бур совет миянлö сетiн.

Олöны нiя вöрын, вöралöны да яй сёйöны няньтöг. Урыс да сьöлаыс сё унажык да öддьöнжык шедö. Вöралiсö сiдз дыркодь, и бырсисö нылöн спичаэз, немöн лоис шедтыны би.

Арся погоддя умöль: то зэр, то шляка да кöдзыт, а гортöдззаныс ылын. Айныс и шуö зоннэслö:

— Кывзö, менам дона зоннэз, кин тiян коласiсь ветлас няньла да спичаэзла?

А медучöт зоныс баитö.

— Норовитам эшö гортö мунны, ме кая то эта медвылын кöз вылö, видзöта, абу я матын миян гöгöр деревня нето керкуок. Эм кö, дак буржык лоас судзöтны сэтчинiсь бисö, а не мунны гортö эта ылына места.

Сiдз и керисö. Медучöт вонныс кайис медыджыт кöз вылö, видзöтiс гöгöр и казялiс: кытöнкö ылын, кыдз ош син, дзузъялö-сотчö биок.

— Вот этадз веськыта, öддьöн ылын тыдалö биок! — горöтлö сiя кöз вывсяняс воннэслö.

Воннэс эзö веритö, кöз вылö кайисö и аддзöны: забыль, ылын-ылын сотчö биок. Лоисö öддьöн радöсь, кöз вылiсь лэдзчисö и пондiсö советуйтчыны, кöда жö куим вон коласiсь мунас эта би дынö.

— Ась мунö пöрисьжык вонныт, — шуö айныс. — Сiя тiянся прокажык, чожжыка ветлас.

Пöрись вон согласитчис, босьтiс ассис пишаль да мунiс била. Мунiс сiя öддьöн дыр, токо пемдандорас локтiс эта би дынö. Локтiс, видзöтö: биыс сотчö учöтик керкуок пытшкын. Очаг вевдöрын öшалö ыргöновöй пöрт, а би очаг бокас абу некин. Пырис керкуокас и пондiс бисö ыджытжыка бы пестыны. Тэчö би вылö пес, ачыс думайта: «Ужо, буржыка песта, а сыбöрын медгырись биа шоммесö нöбöта».

И вот кинкö кыз голосöн ыкöстiс. Пöрисьжык вон повзис сыбурна, што усис кок йывсис. А кöр чеччис, видзöтö: сулалö öддьöн ыджыт да ён старик, тошыс турун ноша ыжда и лым кодь дзор.

— Мыля юасьтöг бисö вöрöтан? — горöтiс бöра старик. — Висьтав, кин тэ и кысянь локтiн?

Пöрисьжык вон и пондiс висьтасьны: сiдз и сiдз пö, локтi пö ме ылiсянь, мийö пö вöралам и бырсисö спичаэз да нянь запас.

— Но и мый, — шуö старик, — кытшöм меным дело, што тiян бырсисö спичаэз да нянь запас? Меным колö то мый: верман кö тэ висьтасьны быдöс йылiсь и нем йылiсь, мöднёж шуны, сы йылiсь, кöда некöр эз вöвлы, сэк ме тэныт сета нянь и би, он кö вермы висьтавны, то мыжъя.

Керны нем, колö мыйкö висьтавны. И пондiс пöрисьжык вон бöбöтлыны старикöс. Бöбöтлiс, бöбöтлiс да и сорасис, висьталiс сiйö, кöда забыль эм.

Лöгасис старик, кватитiс сiйö юрсиöттяс, ыжмитiс пидзöсэз коласас и давай вурны ременьöн, кыдз кагаöс.

Öдва-öдва мездöтчис пöрисьжык вон, уськöтчис ыбöсö и коккез му бердö оз павкалö, мышкас оз видзöт, котöртö. Лок тiс айыс дынö да воннэс дынö и висьтасис быдöс, мый сыкöт вöлi.

Лöгасис айыс, ыстiс шöрöт зонсö.

― Мун, — шуö, — кöть тэ бисö вай.

Босьтiс шöрöт вон ассис пишаль и мунiс. Локтiс эта жö керкуокö, но и сылöн нем эз пет: старик сiдз жö мыжйис, кыдз и пöрисьжык вонсö.

Öдва мездöтчис шöрöт вон эта старик кипод увтiсь и давай котöртны бöр, невна туйсö эз öшты.

Локтiс айыс да воннэс дынö, висьталiс аслас горё йылiсь, а учöт вонныс и шуö:

— Эк тiйö, воннэз, воннэз, да кытшöм жö тiйö морттэз, коли стариксö ылöтны эд кужö!

Воннэз сералöмöн баитöны:

— А вот тэ ветлы да и кор сылiсь бисö, сетас тэныт сiя жар, дыр пондан казьтывны.

— Эдö повзьöтлö, кöда оз пов, — шуö учöт вонныс, — не битöг жö эд овны, вот муна и вая.

Босьтiс сiя ассис пишаль да мунiс. Мунiс веськыта и локтiс сiя жö керкуок дынö. Пырис керкуокас, а сэтчин куйлö самöй сiя старикыс: юрыс ком угöлас, а коккес порог дорын.

— Дыр ов, бур морт, — горöтчис учöт вон, — он ли лэдз менö шоччисьыштны?

Старик и шуö:

— Шоччись, шоччись, том морт, кынмин кö — кай гор вылö шонтiсь да висьтась, кин тэ сэтшöм, кысянь локтiн. Ме öддьöн бы кывза сэтшöм каскиэсö, кытшöмöсь некин эшö эз кывлы, некин эз висьтасьлы, кöднаын быдöс бы вöлi бöбöтöм, нем правдаыс эз вöв. А висьталан кö правда йылiсь, дак юр вывсит быдöс юрситö лета.

— Каскиэз висьтала уна, токо öшöт пеллетö да кывзы. Но баитчам сiдз: пондас кö дышыт петны кывзыны да кутчан шыасьлыны паныт, сэк ме юр вывсит быдöс юрситö лета. Согласен тэ лоан этадз?

Старик шуö:

— И этадз ладно, бур.

Медучöт вон кайис гор вылö да пондiс висьтасьны:

— Вот, кöркö öддьöн и öддьöн важын öтiк морт лэбзис нёбоö, и лэбзис сiя не етша, а быдса куим год и токо сыбöрын локтiс нёбоöдззас, а сэтчин морттэз быдöс онняюрöн ветлöтöны. Сiя нылiсь и юалö, мыля нiя онняюрöн. Сылö паныт шуöны, миян пö кöмкöт абу, а небны некытiсь. И вот эта мортыс медасис нылö вурны сапоггез да чаркиэз, а тшетина туйö öктiс эна отирлiсь юрсинысö, но не томмезлiсь, а сэтшöм дзор стариккезлiсь, кыдз тэ.

— Но этадз, батя, оз туй, — горöтчис сэтчö старик.

А медучöт вон чеччöвтiс гор вылiсь, сапырнитiс, мымда кырыммезас тöрö, стариклiсь юрсисö да летыштiс, ачыс горöтчис:

— Эшö кö шыасян менам висьтасьöм дырни, сэк юр вылат öтiк юрси тылöп оз кольччы.

Эта бöрын старик куйлö да кывзö, шы оз сет, а медучöт вон висьтасьö одзлань:

— Вот öтпыр öтiк морт мунö туй вылöт, видзöтö: зöр увтiсь падеритö-петö йики. Эта мортыс кутчис йикисö öктыны. Сымда öктiс, што кыйис сэтiсь гез и öддьöн кузьö. Этöн гезнас позис судзöтны дажö паськыт ты нето ыджыт ю пыдöс. И вот сiя гезнас тыись да юись пондiс кыйны сюра-пеляэзöс, вакуллезöс. Кыйис сiдз, што нiя сы дынö локтiсö асьныс. Кыйис быдöс. Вон, видзöт, нiя локтöны татчö!

Старик чеччöвтiс местасис да — ыбöсö и шуö:

— Мыля жö тэ сыбура бöбöтчан? Некин тай абу. А медучöт вон сылö паныт:

— То тэ кытшöм старик, кыдз тай кык дора коса. Тэ ачыт эд бöбöтчыны тшöктiн.

Чеччöвтiс гор вывсис, сапырнитiс старикöс юрсиöттяс кыкнан кинас и мымда вермис летыштiс юрсисö да шуö.

— Но, старик, кыла кö ме эшö кöть öтiк кыв, сiдз и виччись — быдöс лета юрситö.

Повзис да повзис эта стрась понiсь старик, пуксис и шы оз сет. А медучöт вон одзлань висьтасьö:

— Вот öтпыр мунi ме вöравны, сьöрам босьтi пишаль да чер. Ветлöтöв-кери вöрöттяс, видзöта: пожум вылын пукалöны уна и уна гуттэз. Куталi ме нiйö да кöртавлi шöртöн öта-мöд бердö, а шöрт помсö косйöвтi ас гöгöрам и кушак бердам домалi.

Гуттэз ым-м лэбтiсисö и давай лэбзьыны, öтлаын и менö лэбзьöтöны. Ок и нуöтiсö жö эна гуттэс менö и пуэз коласöт, и кымöррез вевдöрöт! Вот видзöта, увланьын миян весьтын паськыт ты. Кöр ты шöр весьтас лоимö, кыдз нарошно, шöртыс орис. Уси ме ты вылас, уявны ог куж, вöйны пондi. А эта ты вылын стрась уна уткаэз уялiсö. Кутi ме öтiк уткаöс кокöттяс, и сiя менö петкöтiс кöс берегö. Аттьö эта уткалö. Пукала берег дорын и думайта, кытчö жö öнi мунны? Спичаэз абуöсь, кöдзыт, гегда и кула. Видзöтыштi, а ты вылöттяс доль лöсьöтчöм да токо чышкö-мунö ош. Пишальöс пыкыштi пельпон бердам и метитча. И вот ош пондiс баитны морт голосöн:

— Тэ эн лый менö, бур морт, а висьтав, мый тэныт колö.

А ме сё метитча, а ошыс сё матöжык ме дынö локтö. Пуктi пишальöс бокам и шуи:

— Кер давай би, ме кынма.

— Спичаэз сьöрам абуöсь, — баитö ош, — а вот пуксьы ме вылö и ме тэнö нуöта сэтчин, кытöн эм би, и тэ шонтiсян.

Вожаси ме эта ош вылö, нуöтiс сiя менö вöррезöт, шаттяэзöт, нюррезöт, уна ты да ю вуджим. И вот тэ ордö сiя менö вайöтiс, а тэ меным бисö он мöд сетны. Ноко, лок жö, Миша, пыр татчö да мийö тэкöт этö стариксö кыдз колö пидзралам.

Старик кыдз ыкöстас, дажö гатш пöрас, сыбура повзяс и шуö:

— Эн вöрöт, пожалуйста, эн вöрöт, коль менö ловйöн. Мый тэныт колö — босьт и шы ог сет. На вот тэныт биа галя, на вот тэныт тывкöрт, кöдöн пондан биа галя кузяас вартыштлыны, а биа галя вылас пондан пуктыны чага. Тывкöртiсь да биа галяись пондасö чеччыны бичироккез, кутчисясö чага бердас и лоас тэныт би быд пораö. А медбы нем тэнат эз вам, вот тэныт кучиковöй кöшелёк. Вот тэныт пишаль, кöда некöр оз понды инмыны бокö, вот тэныт кучиковöй сумка, пистоннэз, порок, дроб — быдкодь вöралан припас. Эта сумкаись припасыс оз понды быравны, а тырмас век кежö. А вот тэныт нянь, токо менö коль ловйöн.

Медучöт вон иньдöтчис бöр пöрисьжык воннэс дынö, а старик сетiс сылö лекарство туруннэз и дажö ылöдз эд кольлалiс. Вöралiсь — медучöт вон мунiс веськыта и чожа локтiс айыс да воннэс дынö. А нылöн быдöс мыла-гажныс ни бырöма — виччисьöны.

Пондiс висьтасьны медучöт вон, кыдз сiя стариксö бöбöтiс, а воннэз осьтiсö öммезнысö и кывзöны. Сэтöн жö висьтасикас кыскис кöшелёк, а кöшелёкись биа галя, тывкöрт да чага, тывкöртнас биа галя бердö сят-сят-сят керис, киссисö бичироккез, öзйис и чага. Сiдз шедтiсö би. А кöр пондiсö сотчыны нодьяись кражжез, радöсь лоисö и мымда вын ыксöны:

— То кытшöм вöлöма биыс, и не öтiк век кежö. Айныс висьталiс сэк аслас медучöт зонлö:

— Сета ме тэныт, дона зонöй, вöралан запасöс и пишальöс. Пондан тэ вöравны и овны, кыдз тэныт гленитчас. А тiянлö, пöрисьжык зоннэз, ог советуйт вöравны сiйöн, што тiйö од кужö нуны этö делосö, а советуйта вöдитны нянь.

Айыс зоннэскöт эшö дыркодь вöралiсö. Кутiсö звирсö да сьöласö уна, вайисö гортаныс да вузалiсö, сьöм лоис тыр. Пондiсö овны буржыка и öнодз сё олöны.