Кытчö ветлiн да мый аддзылiн

Ветлi ме öтпыр бурлачитны. Мунi, мунi — Корезаöдз локтi, сарлö нин шуллез керны медаси. Кули, кули паздерсö — дворечсö паздернас тыртi. Повзис сарыс, што и тронсö сылiсь тырта, вашöтiс дворечсис. Уджыс понда сетiс стекляннöй сапоггез. Кышалi нiйö пельпон вылам и кысся гортö. Пантасис мужык, юасьö:

— Кытчö ветлiн и мый аддзылiн? Ме шуа:

— Вöлi Корезаын, куим год нин шуллез кери, а сы понда сар сетiс стекляннöй сапоггез. А öнi вот гортö муна.

— Сет сапоггетö, ме вöлöс сета.

Но, ладно, вежсим. Муна одзлань. Пантасьö инька, мöс вашöтö, юасьö: кытчö пö ветлiн да мый аддзылiн. Вöлi, мыся, Корезаын, куим год нин шуллез кери, а сы понда сар сетiс меным стекляннöй сапоггез да нiйö, мыся, вöв вылö вежи.

Инька шуö:

— Сет вöвтö меным, а босьт менчим мöссö.

Но, ладно, бöра вежсим, и муна одзлань. Пантасьö старука, гöйтан понын баляöс кыскö.

— Кытчö, мужык, ветлiн да мый аддзылiн?

— Вöлi Корезаын, куим год нин шуллез кери, а сы понда сар сетiс стекляннöй сапоггез. Нiйö вежи вöв вылö, а вöвсö — мöс вылö.

— Сет меным мöстö, ме баля сета.

Но, ладно, вежсим. Кутi гöйтанöттяс балясö да муна одзлань. Пантасьö нывка, одзас дзодзогöс вашöтö.

— Кытчö, мужык, ветлiн да мый аддзылiн?

— Вöлi ме Корезаын, куим год нин шуллез кери, а сы понда сар сетiс стекляннöй сапоггез. Нiйö вежи вöв вылö, вöвсö — мöс вылö, мöссö — баля вылö.

— Сет меным балятö, ме дзодзог сета.

Но, ладно, вежсим. Муна одзлань, а пантасьö зонка, каньöс нöбöтö.

— Кытчö, мужык, ветлiн да мый аддзылiн?

— Вöлi ме Корезаын, куим год нин шуллез кери, сы понда сар сетiс стекляннöй сапоггез. Нiйö вежи вöв вылö, вöвсö — мöс вылö, мöссö — баля вылö, балясö — дзодзог вылö.

— Сет меным дзодзогтö, ме кань сета.

Но, ладно, вежсим, и муна одзлань. Пантасьö старик, юасьö:

— Кытчö, мужык, ветлiн да мый аддзылiн?

— Вöлi ме Корезаын, куим год нин шуллез кери, сы понда сар сетiс стекляннöй сапоггез. Нiйö ме вежи вöв вылö, вöвсö — мöс вылö; мöссö — баля вылö, балясö — дзодзог вылö, дзодзогсö — кань вылö.

— Сет меным каньтö, ме сьöктан сета.

Босьтi сьöктансö, локтi горт пруд дынöдз, аддза: прудас ёкыш кольть уялö. Шупки сьöктаннам кольтяс, да эг инмы. Кайи гортö, инькаö юалö:

— Кытöн вöлiн да мый аддзылiн?

— Вöлi ме Корезаын, куим год нин шуллез кери, сы понда сар сетiс стекляннöй сапоггез.

Уськöтчис инькаö чом миськавны.

— Мыйлö миськалан, инька?

— Сапоггетö сэтчин пуктыны.

— А ме нiйö вöв вылö вежи. Уськöтчис инькаö карта весöтны.

— Мыйлö весöтан, инька?

— А вöвтö сэтчин сувтöтны.

— Ме сiйö мöс вылö вежи.

Уськöтчис инькаö мöс видзан керны.

— Мыйлö, керан, инька?

— Мöстö сэтчин йöртны.

— Ме сiйö баля вылö вежи.

Уськöтчис инькаö гид весöтны.

— Мыйлö весöтан, инька?

— Балясö сэтöн видзны.

— Ме сiйö дзодзог вылö вежи.

Уськöтчис инькаö дзодзог видзан керны.

— Мыйлö керан, инька?

— Дзодзогсö некытчö йöртны.

— Ме сiйö кань вылö вежи.

Пондiс инькаö öрок гарйыны.

— Мыйлö гаръян, инька?

— Каньсö вердны.

— Ме сiйö сьöктан вылö вежи.

Инькаö öддзис ваявны отопкиэз.

— Мыйлö ваялан, инька?

— Вочны.

— Ме сьöктаннас ёкыш кольтьö шупки.

Уськöтчис инькаö гор лонтны, кашник миськавны.

— Мыйлö горсö лонтан, инька?

— Ёкыш кольтьсö пуны.

— А ме эд эг инмы ёкыш кольтяс!

Старукаö öбыртiс юр кузям гормöччанöн.

Ме бöр-бöр да пöрöтi кöньöс...

Вот и каски быдöс.