Мывкыда митей

Вöлöма-олöма öтiк деревняын Митей нима мужык. Кыдз йöзыс сылö висьталасö — сiдз сiя и керö.

Керас öтчид сiя аслыс керкуок: öшыннэс видзöтöны ой вылö, ыбöсыс — лун вылö. Локтас сы дынö сусед, шуö:

— Бур керкуыт. Токо мыля нö öшыннэс видзöтöны ой вылö, ыбöсыс — лун вылö? Колö, медбы öшыннэс видзöтiсö лун вылö, ыбöсыс — ой вылö.

Думайтö Митей: «А быль эд, мыля бы не сiдз керны?»

Разяс керкуоксö, лэбтас мöднёж, öшыннэс видзöтöны лун вылö, ыбöсыс — ой вылö. Локтас сы дынö мöдiк сусед.

— Бытшöм керкуок. Токо мыля нö öшыннэс видзöтöны лун вылö, а ыбöсыт ой вылö? Колö, медбы öшыннэс видзöтiсö асыв вылö, а ыбöсыс — рыт вылö.

Думайтас, думайтас Митей, бöра разяс керкуоксö. Керас вились: öшыннэс видзöтöны асыв вылö, ыбöсыс — рыт вылö. Локтас сы дынö куимöт сусед, ошкö: бур пö керкуокыт, токо вот öшыннэс мылякö видзöтöны асывлань, а ыбöсыс — рытлань. Колö пö, медбы öшыннэс видзöтiсö рытлань, а ыбöсыс — асывлань.

Думайтас, думайтас Митей, разяс керкуоксö, керас вились, токо сувтöтас сiйö ыджыт гöглян вылö. Локтас сы дынö бöра сусед и шуö:

— Мыля нö öшыннэт рытлань видзöтöны? Эд лунлань колö.

— А позьö и сiдз, — висьталас паныт Митей да сы одзын жö бергöтас гöглян вылас керкуоксö.

Сэксянь Митейсö нимтöмась Мывкыда Митейöн.

КЫК ВОН

Олiсö кык вон. Кыкнанныс гöтыраöсь. Учöтжык воныслöн вöлi уна челядь, а пöрисьжык воныслöн челядьыс эзö вöлö. Кöр кулiс нылöн айныс, нiя мусö эзö янсöтö, а кöдзны пондiсö öтлаын. Няньыс шогмис öддьöн бур. Вартiсö быдöс сюсö и вöлись няньсö янсöтiсö öта-мöд коласын öтмымдаöн.

Локтiс ой. Водiсö узьны. Пöрисьжык воныс и думайтö «Сiдз я мийö янсöтiм няньсö, кыдз колiс бы? Вонöлöн семъяыс ыджыт, сылö и няньыс колö унажык. Муна да содта сылö аслам сусекись».

Сiдз и керис. Мунiс амбарö да аслас сусекись мымдакö сюсö кисьтiс воныс сусекö.

Саймис ойнас учöтжык воныс да и думайтö: «Сiдз я мийö янсöтiм няньсö вонöкöт? Мийö эшö томöсь, да и челядь быдмöны, миян лоас кинлö уджавны, а вонöлöн уджавны некинлö. Нiя öтнаныс иньыскöт и чожа пöрисьöсь ни лоасö, колö няньсö сылö содтыны».

Сiя жö ойö чеччис и керис, кыдз думайтiс. Асывнас кыкнан воныс видзöтöны, а сусеккезаныс няньыс öтмымдаöн. Дивуйтчисö нiя, но öта-мöдныслö нем эзö шуö.

Мöдiк ойö керисö сiдз жö — öтыс одзжык петалiс, мöдыс сёрöнжык петалiс и бöра асыв кежö нянь нылöн вöлi öтмымдаöн.

Сiдз нiя новйисö няньсö öта-мöдныслö уна ойез сьöрна, и öтпыр амбарас пантасисö. Сэк вöлись пондiсö тöдны кыкнанныс, мыля нылöн няньыс асыв кежö пыр вöлi öтмымдаöн.

Эта бöрын кык вон кувтöдз олiсö öтлаын и быд пораö отсалiсö öта-мöдлö.

Кыдз мужык дзодзоггезöс янсöтiс

Öтiк гов мужыклöн эз тырмы нянь. И думайтiс сiя няньсö корны баринлiсь.

Начкылiс мужыкыс дзодзог, жаритiс сiйö да нöбöтiс козьнавны баринлö.

Барин босьтiс дзодзогсö и шуö: «Аттьö тэныт дзодзог понда, токо ме ог тöд, кыдз ме понда сiйö янсöтны. Менам эм инь, кык зон да кык ныв. Кыдз бы миянлö дзодзогсö янсöтны öтмымдаöн?»

Мужык и шуö: «Ме янсöта».

Босьтiс пурт, вундыштiс дзодзог юрсö да сетiс бариныслö и висьталiс: «Тэ, барин, керкуын юр, тэныт и колö сетны юрсö».

Сыбöрын вундыштiс бöжсö да сетiс барыняыслö и горöтчис: «Тэныт видзöтны керку сьöрын, гортын пукавны, тэныт и бöж гöгöрыс».

Вундыштiс коккесö да сетiс зоннэслö: «Тiянлö коккез — тальны ай туйез».

Ныввеслö сетiс борддэз: «Тiянлö чожа гортсянь лэбзьыны, вот тiянлö и борддэз. А этiя кольччис, дак ме сiйö аслым босьта». — И босьтiс аслыс быдсöн дзодзогсö.

Сералöв-керис сэтöн барин и сетiс мужыклö нянь да сьöм.

Кылiс озыр мужык, што дзодзог понда барин сетöма гов мужыклö нянь да сьöм. Сiя начкылiс вит дзодзог, жаритiс нiйö и нöбöтiс баринлö.

Босьтiс барин дзодзоггесö да и шуö: «Аттьö тэныт дзодзоггет понда, да вот менам эм инь, кык зон да кык ныв, быдöнным квать морт. Кыдз бы миянлö янсöтны тэнчит дзодзоггетö, медбы быдöннымлö дöнзис öтмымдаöн?»

Думайтiс, думайтiс озыр мужык, кыдз янсöтны — некыдз оз туй.

Иньдiс барин корны гов мужыкöс, медбы сiя отсалiс янсöтны дзодзоггесö.

Локтiс гов мужык и пондiс янсöтны дзодзоггесö. Öтiкö сетiс баринлö иньыскöт и шуö. «Öнi тiйö дзодзогыскöт куимаöсь». Öтiкö сетiс зоннэслö и горöтчис нылö: «И тiйö öнi куимаöсь». Öтiк дзодзог сетiс ныввеслö «И тiйö дзодзогнас лоит куимаöсь».

Аслыс мужык босьтiс кык дзодзог и шуö: «И мийö öнi куимаöсь — быдöннымлöн öтмымдаöн».

Пондiс сэтчö серавны барин и сетiс гов мужыклö эшö сьöм да нянь, а озыр мужыксö вашöтiс.

Озыр шуö: «Дзодзоггес эд менам, мыля нö, барин, мöдiклö няньсö да сьöмсö сетан?»

А барин сылö: «Кин шедтö, сылö и сетöны».