Сизимок

Кöркö олiсö-вöлiсö кык вон, кык удав зон: öтыс — озыр, а мöдыс — гов. Озырыс меринöс видзас, голыс — кöбылажугöс.

Мунiсö кыдзкö воннэс туйö. Мунiсö, мунiсö, рас дорö локтiсö да юскисисö, вöввесö пондiсö вердны. Сьöвталiсö вöввезнысö, лэдзисö видз вылас, асьныс узьны водiсö. Недыр мыйись озыр воныс саймöтö говсö:

— Олёш, а Олёш! Чеччы жö! Менам няридзö чанялöма! Саймис Олёш, казялiс чанёксö да шуö:

— Кöбылаö менам, юрвердiсьö, чанёк сетöма. А воныс:

— Не-э, Олёш, этö няридзö меным чанёксö сетiс. Ежели бы кöбылажугыт кокнямис, сэк чаньыс бы сы дын вöлi, а не менам няридз бокын.

Етшасисö, етшасисö, а ладсö эз аддзö. Мунiсö судö.

Озырыс судьясö сьöмöн тыртö, а голыс синванас гывъялö. Судья öшас, оз тöд кинлö чаньсö сетны: öтыс сьöм сетiс, а мöдсö — жаль.

Мунасö воннэс сар дынö: сэтчин пö правдасö аддзам ни. Кывзас нiйö сар, висьталас:

— Вот тiянлö нёль загадка: Мый му вылас медчож? Мый медгоса? Мый меднебыт? Мый медся ни дона?

Куим лун пö тiянлö тöдмавны, а нёльöтас меным висьтавны. Кöр ваят пö ответсö, сэк и чань йылiсь пондам баитны.

Мунöны воннэз — юррез öшöтöмась, ныррезныс чуть муас оз павкö — горёыс эд нырыштö!

Озырлöн карас кума вöлöма. Вот сы ордö и мунiс сiя. Юасьö кума кытшöм шог пö кутiс?

— Сэтшöм ни шог кутiс, кума, кытшöм оз и овлы чочком югытас, — шуö мужык. — Сетiс сар меным нёль загадка тöдны.

— Кытшöмöсь, ноко?

— А то тай кытшöмöсь: мый му вылас медчож? Кумаыс и шуö:

— А этö Бели Якалöн вöлыс — кöчöс одзалö.

— Öтiк эм! — радуйтчö озыр. — А мый медгоса?

— Да Якаыслöн порсьыс — мый я эшö! Попаддяся кыкись кызжык, чеччыны ни оз вермы — коккес оз видзö.

— Мöдiк эм! — шуö озыр. — А висьтав-ко: мый меднебытыс?

— Да дзодзог гöн, кум!

— Куимöт эм! Но а мый медся ни дона?

— Сарлöн керкуыс.

— Вот и нёльöт эм! Аттьö, кума!

А эта коста жö Олёш гортас пукалö шуштöм-гажтöм, дзик арся лун. Сибöтчис сы дынö медучöт зоныс, сизимöтыс, и юалö:

— Мый, тятю, тöждiсян, али кинкö öбидитiс?

— Сетiс меным сар нёль загадка тöдмавны, да вот ог вермы.

— Эн тöждiсь, ме отсала тэныт, — шуö Сизимок. — Ноко висьтав, кытшöмöсь загадкаэс.

— Да кытчö ни тэныт, зону! — шуö Олёш. — Ыджытжык воннэт оз тöдö, а тэ эшö нач мывкыдтöм — сизимвося вöлись.

— А тэ висьтав, — тшöктö Сизимок.

— Любо, дак кывзы нö: мый му вылас медчож?

— Сiя — дума. Думася медчожыс нем абу.

— А мый медгоса?

— Муся госажык нем абу — сiя быдöс госсö сетö подалö и быдмаслö.

— А мый меднебыт, зону?

— Меднебыт — киыт. Подушка вылö водан, а юр увтат китö пуктан.

— Этö сiдз и эм, — шуö айыс. — А мый му вылас медся ни дона?

— Онся донажыкыс нем абу: онмöссян кö — и ай-мамыт оз колö.

Куим лун чулалiс, нёльöтас воннэз сар дынö локтiсö. Перво озырыс ответсö видзис — сар нем эз шу. Сэсся Олёш висьталiс, кыдз Сизимок сiйö велöтiс. Сар токо кашельнитiс да слугаыслiсь корис шовковöй сунисок. Вайис слугаыс суниссö, сар сетiс сiйö Олёшлö.

— Кый талун ойнас эта сунисiсь кушак и вай ашын асывнас меным.

Босьтiс Олёш сунисоксö, бертiс гортас шуштöм-гажтöм. Сизимок казялiс айсö, юалiс, кин сiйö öбидитiс. Айыс висьталiс:

— Эта сунисiсь сарыс таой тшöктiс кыйны кушак. Сизимок пельдöтiс сартас бердiсь жельöпок, сетiс айыслö да тшöктiс:

— Нöбöт, тятю, этö сарыслö, ась сiя керас сэтiсь кушак кыян станок, мед вöлi мый вылын кыйны кушаксö.

Олёш ашынас мунiс сар дынö, висьталiс сылö, кыдз тшöктiс Сизимок. А сар паныт:

— Дёка ме, а тэ, мужык, месся дёкажык. Вот тэныт сета ме курöгöс, тэ кольттьöт сiйö да пöжöт дас типок и вай нiйö меным мöдлун павжун кежö.

Босьтiс Олёш курöгсö, локтiс гортас шуштöм-гажтöм. Сизимок панталiс айсö да юалiс, мыля сiя сэтшöм гажтöм. Айыс висьталiс, мый сысянь корöны. А Сизимок шуис:

— На тэныт шогдi тусёк, нöбöт сiйö сарлö да висьтав: «Типпес петалöны ни, а верднытö немöн. Кöдз тусьсö, ойнас быдты сю, варт да типпес понда шыдöс из».

Олёш мунiс сар дынö и висьталiс сiдз, кыдз зоныс велöтiс. А сар юалiс.

— Кинкöт тэ этадз думайтiн?

Олёш повзис да и висьталiс, кин сiйö велöтö. сар шуис:

— Ме китрöй, а сiя месся китрöйжык. Ась ашын ме дынö локтö, но пасьтöг и не пасьтöг, не подöн и не вöлöн, не козинöн и не козинтöг.

Олёш локтiс гортас шуштöм-гажтöм да быдöс висьталiс зоныслö, мый тшöктiс сарыс керны.

— Вод, тятю, узьны. Шондi петас — юрнымöс югдöтас, туйсö мыччалас.

Ой чулалiс, асыв локтiс, шондi петiс. Сизимок и шуö айыслö:

— Босьт руб сьöм и неб сы вылö ловъя кöчöс да вайöт гортö.

Мунiс Олёш вöралiсь ордö, а сiя какраз кöчöс кутöм. Небис Олёш кöчсö, гортас вайöтiс. Сизимок сакö каттисис, босьтiс сьöрас витульганöс, кöч вылö вожасис и ускок сар дынö гöнитiс.

Казялiс сар Сизимокöс да паныт петiс. Дивуйтчö, што быдöс сiдз керöма, кыдз думайтiс. И юалiс:

— Тi голöсь вот, а мыйсянь ёнöсь, мый сэтшöмсö юатö-сёятö?

— Меным айö чери кыйö, да не ваись, а берегсис, саксö оз и вадлы. А ме черисö запонам ваяла да пожын пуа — сысянь и ёнöсь.

— Тэ тай бöбöв, — шуис сар. — Кин жö сiдз керö?

— А тэ вежöра? — юалiс Сизимок.

— Ме сар, а саррес чисто вежöраöсь.

— А кыдз жö вермö няридзыс чанявны?

— А быль эд сiдз, зонка! — висьталiс сар и тшöктiс слугаэслö сетны чаньсö Олёшлö. А Сизимокöс сар наградитiс орденöн да кöшель зарни сетiс. А кöр Сизимоклö тырис кыкдас год, сы сайö сар ассис нывсö сетiс да ыджыт свадьба керис.

Ме тожö сэтчин вöлi, кудпыдöс вильöтi да кынöмö пондiс висьны. Сэк Öмелика бабö гöг вылам гырнич сувтöтiс, а сы понда грош корис, но ме сiйö бöбöтi — алтын сетi.