Озыр корасись

Менö нывканам корасьлiсö неöтпыр.

Вот кыдзкö локтiс озыр жöник. Кривöй. Сiйöн и корасьö говсö, торковöй дубассö. Корасьöны сваттэс, а тятюö шуö:

— Пена, пет ноко комсит да висьтав, мунан, он.

А кывлi ни: гов инькалö озырыс сайын умöль овны. Ась пö лоас гов жöник, да муса.

И петi комсис да, медбы не лöгöтны жö сваттэсö первöй кывсянь, висьталi:

— Муна сы сайö, узяс кö сiя этö ойсö неолан керкуас — öтнас и битöг.

Жöник петук моз сорссö лэбтыштiс — бытьтö немись оз пов, — горöтчис:

— А мыля бы не узьны?

Но, сiдз дак сiдз. Лонтi неолан керкуас гор, ештöтi. А вöлi ырöш керны, ме сiйö сысъялi да мöд керкуас гор вылö шöммöтны лэбтi.

Рытнас повтöм жöникыслö висьталi:

— Кöр пемдас, мунан мöд керкуас. Ме тэныт пöлатяс ольсаси.

Ачым сысся одзжык сэтчинiсь джоджулас пыри да пукала гусьöник.

Ме бöрсянь и сiя локтiс, пöлатьö кайис.

Дыр не дыр куйлiс сэтчин, кыла — баитны пондiс:

— Эн пышкайт, ог пов!

Этö ырöшыс горвыв пöдлöсас шöммö, а сiя суседкуöс думайтö.

Кывзiсяс-керас, а ырöшыс сё сiдз жö пизьö. Зонкаыт горöтлöмöн ни шуö:

— Ог пов, мыся, ог пов!

Сiдз шуö, да ачыс пöлать дорас вешшö.

Ырöшыс эшö öддьöнжык пышкайтö, а мöдыт мый вын горöтлö:

— Ог пов! Ог пов! Ог пов!

Горöтлö, а ачыс гöбечас ни, кылö, лэдзчис. Гöбечас каб вöлi, кабсö кокнас тойыштас, сiя джоджас усяс.

— Эн камöт, ог пов! — горöтлö повтöм жöник, ачыс пимиэсö ни кöмалас да — посöдзö, нельки ыбöссö бöрсяняс эз пöднав.

А посöдзас ме куран коли — нарошно гатш пуктi. Сiя тальччас пиннес вылö — оропыс кымöс кузяс вачкас.

— Эн вачкась, ог пов! — горöтас озыр жöник да пасьтöг и пышшас.

Ме петi джоджувсис, игнаси бöрсяняс, шуи:

— Но, сваабог

Дышкучик

Дöвеч олас, олас öтнас да гöтрасяс. Иньыс дышся-дыш шедас — и поклёбка бы оз пу, а печкöм-кыйöм йылiсь и баитны нем.

Жöникыс и юалö:

— Мыля нö, ичмонь менам, он печкы? Мый инö кыйны пондам, мый вывтö пасьтавны?

Иньыс шуö:

— Дак эд печканö абу, немöн печкынытö. Кошшас-керас мужык — быль абу, и мунас печкан пу пöрöтны. А иньыс мöдiклаöт одзалас мужыксö да чашъяö пырас и виччисьö. Жöникыс локтас, пондас пусö керавны, а иньыс нёжтöм голосöн повзьöтлö:

— Эн пöрöт пусö — иньыт кулас!

Мужыкытлöн öтiк инь кулiс ни, дак сiя тöдö этö бедасö, и чапкисяс керасьны да гортас лэдзчас. Но эд печкансö колö керны, и ашынас мöдiк вöрö мунас. А иньыс бöра одзалас сiйö, чашъяö дзебсисяс, и кöр мужык пондас керавны пусö, нёжтöм голосöн горöтас:

— Эн пöрöт пусö — иньыт кулас!

Чапкисяс мужык керасьны, но куимöт лунас виль местаö мунас, пондас пусö пöрöтны, а инькаыс сэтöн ни:

— Эн пöрöт пусö — инькаыт кулас!

«Мый лоас, сiя и ло, — думайтö мужык, — а талун просто ог берт». И пöрöтас пусö, печкан керас, сетас иньыслö да печкыны тшöктас. А дышкучик бöра ылöтчыны:

— А кыдзи кула печкытöнняс? Тöдiсь тшöктiс повны печкансис.

— Он жö поди кув.

Инькаытлö некытчö воштiсьны, вот сiя печкас, печкас да и усяс бытьтö. Усяс, да и няргö:

— Он кö сот печкантö — кула. Ыджыт шог менö маитö. Мужыкыс и шуö:

— Вод инö кыминь, сэк долытжык лоас.

Иньыс водас кыминь. Жöникыс сы лопаткаэз вылö пуксяс, дубассö лэбтас — да нагайкаöн, нагайкаöн! Сiдз и вашöтас иньыслiсь дышсö. Аддзат, кытöн лекарствоыс вöлöма?