Бöб зонпиян

Озыр мужык медалас зонпиянöс срокö. Рöдитчас зонпиян куим год кежö, эта понда сто руб корас. Эшö — мед сiйö некöр эз видö: кыдз видасö — мунас ны дынiсь, а медасьöм донсö быдсöн босьтас.

Но вот, срошнöй лоис, кöзяин гозъялö позьö и базарö ветлыны. Лöсьöтчöны мунны и закажитöны срошнöйлö:

— Ми карö мунiм, тэ гортын ов. Немтор эн кер, токо ва кайöтлы да джодж миськав.

— Кайöтла и миськася.

Вот кöзяин гозъя доддяласö пара вöв да мунасö. Зонпиян сёяс пöттöдз, узьыштас да ва кайöтлыны кутчас. Куим кöньöс тыртас, сэсся некытчö кисьтны. А ваявны эшö окота. И ваялö да джоджас кисьтлö. Кисьтлас, кисьтлас — порогвиöдз ваыс лоас. Пыртас öр, пöднасяс, пуксяс öрас — порогувтсянь да комöдз, комсянь да порогувтöдз нырöн ветлö.

А ноко пö эшö пыдынжык ва кера — и куимнан кöньöссö пöрöтас. Ваыс лабич сувда лэбас.

Локтасö кöзяин гозъя, керку ыбöс пöдана пытшксяняс.

— Мый нö керö срошнöйным? — шуöны. — Пöднасьöм тай да.

Ёркöтчöны, ёркöтчöны, а срошнöй уялö.

— Осьт, срошнöй, ми бертiмö ни!

— А вот уйышта да и осьта!

Уйыштас öрнас порогувтö, осьтас ыбöссö — ваныр кöзяин гозъясö кок йылiсь пöрöтас. А видны зонпиянтö оз туй, нiя токо юалöны:

— Мый нö тэ эттшöмсö керин?

— Джоджсö мöда миськавны да нятьсö кöтöта.

— Да разь этадз миськалöны?

— А ме сiдз тай.

Баитасö сiдз да быдöнныс кутчасö миськасьны. Миськасясö, миськасясö — быдöс миськассяс.

Мöд лунö кöзяин-кöзяйка бöра карö мунöны и срошнöйлö нырас и öмас тшупöны:

— Немтор эн кер, токо баля начкыв.

— Начкыла, начкыла.

Кöзяин гозъя мунасö, срошнöй пöттöдз сёяс, узьыштас да и баля бердö кутчас — яй керас. Яй дзимлялас, кучик дзимлялас, юр-кок дзимлялас. А киэс лудöны, эшö мыйкö колö керны. И кутчас да быдöс баля табунсö начкас.

Кöзяин-кöзяйка локтасö, аддзöны: оградаын кульöм баляэс онняюрöн öшалöны. Лöгныс сiдз петö — зонпиянсö асьсö бы кулисö, но рöдитчöм кывсö эз на вунöтö: видчыны оз ков.

Бöб зонпиянлiсь юалöны.

— Мый нö тэ уджалiн?

— Яй тай кери.

— Мыля нö сымда? Гожум эд, тшыксяс.

— А öтiкö кутi, мöддэс тай видчыны пондiсö, да и нiйö кутi, öнi чöлöны.

Сымда и баитасö.

Куимöт лунас кöзяин гозъя мунöны вузавны яй, кöдö срошнöйыс керис, и шуöны мунтöнняныс:

— Немтор эн кер, токо керку идзöс караулит. Кыдзи колян öтнассö — воррез пырасö.

— Ог коль, ог коль, эд полö.

Кöзяин-кöзяйка мунасö, бöб зонпиян сёяс пöттöдз, узьыштас да ыбöс одзö пуксяс. Мымдакö пукалас да кылас öтöрсис баитöм и петас ворота сайö. А туй кузя кыссьö отир, киэзаныс — еннэз, одзаныс — поп.

— Кытчö тiйö мунат? — юасьö бöб зонпиян. Сылö шуöны:

— Ыб вылö. Енлiсь зэр корны.

Бöб зонпиянлö окота жö зэрсö корны, да эд медасис сiя ыбöс караулитны. Кыдзи коляс ыбöссö öтнассö, вермасö гусявны сiйö.

И сэтöн сидзас юрас: «Мед эз гусялö идзöссö, ме сiйö сьöрам босьта».

Сiдз и керас бöб зонпиян: дзирресö шедтас, ыбöссö сиви вылас тöбалас да мунас ыб вылö енлiсь зэр корны. А сы коста локтасö воррез да быдöс, мый вöлас керкуас буржыкыс, петкöтасö.

Бöб зонпиян бертас ыб вылiсь, кышалас ыбöссö косяк бердö и бöра караулитö. Сэтчö и кöзяин-кöзяйка локтасö да казяласö, што воррез пыралöмась ны керкуö, и юалöны срошнöйлiсь:

— Тэ разь идзöссö эн караулит?

— Мыля эг? Пыр тай сы одзын пукалi. А кöр ыб вылö зэр корны мунi, дак сьöрам кайöтлi.

Этасся мый шуан сылö? Видны срошнöйöс оз туй — сiдз рöдитчисö.

Водасö узьны. Кöзяин да кöзяйка баитöны:

— Сiя этадз миянöс кöс розоритас. Вай сiйö колям этчö, асьным пышшам.

Сiдз и баитчасö: югдандорас гусьöник пышшыны, мед срошнöйыс оз кыв не оз аддзыв. А мöдыт быдöс кылö да юрас тэчö.

Ойнас кöзяин-кöзяйка чеччасö, котомаэзö тэчасö паськöмок да сукаррез и бöр водасö, онмöссясö да корöтöны-узьöны.

Бöб зонпиян асъяпоннас чеччас, öт котомасö ректас да ачыс сэтчö пуксяс, Асывнас кöзяин-кöзяйка саймасö, пасьтасясö кыша-паша и карлань тэрмасьöны.

Бöб зонпиян котома пытшксянь шуö:

— Тэрмасьö эд тэрмасьö, а сёроно вöта и медасьöм донöс босьта.

Кöзяин-кöзяйка баитöны:

— Бöб зонпияныс вöтчö, вай кытчöкö дзебсисям. Пырасö нiя расокö, кöз увтö пуксясö, а зонпиян бöра:

— Дзебсисьö эд дзебсисьö, а сёроно вöта и медасьöм донöс босьта.

Кöзяин-кöзяйка чапкасö котомаэзнысö и давай пышшыны сэтiсь. Бöб зонпиян петас котомасис — да ны сьöрö ачыс горöтö:

— Котöртö эд котöртö, а сёроно вöта и медасьöм донöс босьта!

И вöтас да висьталас:

— А ноко медасьöм донöс вайö меным! Кöзяин-кöзяйкалö эсся нем керны: сетасö срошнöйлö сто руб — сiдз вöлi рöдитчöма.

Вот и быдöс, бытшöм йöз