Озыр жöник сайын

Вöлöмась куим сой. Кöр быдмöмась, быдöннысö жöниккезлö сетöмась: öтсö — матö, мöдсö — ылöжык, а куимöтсö, медбасöксö, дыр гортас видзöмась, сё озыржык жöник виччисьöмась и вöлись медылö, тöдтöм сайö сетöмась.

Вот жöник ордын чулöтöмась свадьба, нывкалiсь ай-мамсö гортаныс иньдöтöмась и томмесö водтöтöмась чуланö.

Токо водöмась нiя, абу на и онмöссьöмась, а сэтчö чулан саяс шум лэбöм: вайöтöмась кытшöмкö нывкаöс, и сiя чижъялö-горзö, лöньсьыны оз вермы, а свадьбовшана сералöны. Горзiсь нывкасö йöртöмась чомö. Сiя горзöм, горзöм и сэк жö дугдöм, бытьтö öмсö тупкалöмась.

Ичмонька юалöма жöникыслiсь:

— Эта мый сэтшöмыс чомъяс керсьö? Жöникыс висьталöма:

— Эн юась менчим, узь!

Сэсся ичмонька дугдöма юасьны, сiдз и чулöтöма ойсö.

Ашынас том гозъя чеччöмась, пырöмась керкуö. Нылö яяшыд вайöмась сёйны. Ичмонька паньыштас шыдсö — паняс морт юрси шедас. Мöдпырся паньыштас — морт гыж шедас. Куимöтпырся паньыштас — морт чунь шедас. И сэк юалöма жöникыслiсь:

— Эта кытiсь?

Жöникыс висьталöма:

— Эн юась менчим, сёй! А кытшöм ни сэтöн сёйöм?

Свадьбовшана чисто кодöсь, кин пö йöктö, кин горöтлö, кин туплясьö. Ичмонькалö эта абу гленитчöм, сiя мöдöма пышшыны и шуöма жöникыслö:

— Ме бы öтöрö петала, лэдзлы менö...

— Но, петалам инö, — висьталöм жöникыс и ачыс иньсö петкöтöма.

Посöдзöт мунiкö ичмонька казялöм небурика оссьöм ыбöс и видзöтöма ыбöс саяс: сэтчин пö морт тушаэз öшалöны. И сэк вежöртас, мыля ойнас нывкаыс öддьöн горзöма и сiдз перыта лöньсьöма: сiйö начкылöмась.

Дзаръясьöма-керöма ичмонька, кыдз бы эта керкуись пышшыны, да ыбöс и ворота ёна игналöма, а жöникыс дынсис некытчö абу ветлöма. И ковсьöма бöра керкуö пырны — мортсёйиссес коласö.

Свадьбовшана пируйтöмась, а ичмонька токо сы йылiсь и думайтöма, кыдз жöник дынiсь мездöтчыны. Вот сiя луннас бöра пондöм корсьыны жöникыслiсь:

— Менам юрö öддьöн висьö, лэдзлы менö öтöрö ветлöтыштны.

Жöникыс бöра абу лэдзöма:

— Эн корсьы менчим, пукав керкуас!

Рытнас том гозъясö свадьбовшана йöртöмась чуланö, а асьныс пондöмась пурттэз тöчитны, бöра лöсьöтчöны кинöскö начкывны. Ичмонька токо сы йылiсь и думайтö, што вот-вот пырасö чуланас да и петкöтасö сiйö. И висьталö жöникыслö:

— Ме бы öтöрö петала.

А жöникыс сё ассис модьö:

— Эн корсьы менчим, керпит!

— Дак ог ни вермы! Петавны колö!

— Кытчö петан — ми замок сайын!

А ичмонькаыс абу дугдöма корсьыны:

— Тэ менö öшынокöттяс лэдз. Ме öтöрася да бöр пыра.

— Öддьöн вылын öшыныс.

— А тэ гезöн лэдз.

Жöникыс согласитчöма да сiдз и керöма: аддзöма чулансис гез, кöрталöма сы бердö иньсö да и лэдзöма öшынöттяс. А инькаыс гезсö пöрччалöма да угöв бердö кышалöма и пышшöма. Жöникыс трекнитас пö гезсö — оз мезмы, и думайтö, што ичмонькаыс керö сiйö делосö, мыйла петiс. Сiдз размöд трекнитöма, сэсся виччисьöм, виччисьöм да кыскöма гезсö чомъяс, а инькаыс абу.

Но мый пö öнi керны? Кыдзкö эд колö правдайтчыны пö свадьбовшанаыс одзын, пондасö кö юавны иньсö. Думайтöм-керöм да öшынсö пöдналöм и стеклосö нарошно жугдöм, а гезсö дзебöм, ачыс кровать вылö водöм и бытьтö узьö. Сы дынö свадьбовшанаыс локтöмась, быдöнныс пурттэзöн. И пондöмась пö юасьны:

— Кытöн инькаыт, жöник? А жöник висьталö пö:

— Ог тöд, ог тöд. Ме крепыта узи да эг кыв, кöр боксим чеччöма. Поди тiйö нуöтiт ни да?

Свадьбовшана видзöтöмась öшынсö — жугдöм, и вежöртöмась, што эта уджыс ичмонькалöн. Сэтчö öддьöн и лöгасьöмась да давай следдэсö кошшыны, туйсö нюкайтны, медбы тöдны, кöдöрö котöртiс пышшисьыс. Нюкайтöмась, нюкайтöмась и дукыс сьöртi аддзöмась ичмоньыслiсь туйсö. Эта туйыс вайöтöма свадьбовшанасö ичмонькаыс гортöдз. Но ичмоньыт не бöбöв гортас пукавны — кытчöкö дзебсисьöма. Свадьбовшана кошшöмась, кошшöмась да сiдз и абу аддзöмась.

Кöр мортсёйиссес мунасö, шудтöм ичмонь гортас бертöма да одзлань овны пондöма. И часöт олö.