Иван да пров

Оласö-вöласö кык вон — Иван да Пров. Öтiк деревняын оласö, да не öтмоза: Иван эмтöм, а Пров шуч эма.

Локтас ар, усяс лым, а Иванлöн песыс öтiк жель абу. Колö бы вайны, да вывлат эд он ваяв.

Ноко, шуö Иван, ветла Провыс ордö, поди и вöвсö сетлас, бöра эд кыдзкö вештiсям жö. Вон мый ыждаöсь сылöн шороммес, эд вартны жö пондас. Да и пондас медавны кинöскö вöрсö керны да ослядь кузяс кыскыны, а поди яйöн ковсяс Усоллёö лэдзчыны, бöра жö эд колас миян кодьыс сылö.

Мунас Иван воныс дынö, баитö:

— Дыр ов, Пров Степанович! Вöв бы ме тэнчит юала, песокö эд чаг абу, колö бы вайыштны.

— Ммм, — мыкнитiс Пров. — Ог эд тöд, мый тэкöт керны. Аддзан, лым усис, подасö колö менам начкывлыны да яйнас Чердыньö ветлыны. Вот лок талун жö иньыткöт, отсалат начкисьнытö да сэсся кайлам яйнас Чердыньö, и вöвсö тэныт сетла.

— Ладно, — горöтчис Иван да и мунiс гортас.

Кык лун начкисисö Провлö, да эз ештö керны, мымда колiс — пороз кольччис начкывтöг.

Куимöт лунас чеччас Иван дзирс пемытöн да и шуö иньыслö:

— Мый жö, инька, эта вöтыс? Пöжöмыт тэ сёртниовöй парёнка, и ме öддьöн сiйö сёйи.

Висьталiс Иванлö иньыс:

— Эта бур вöтыс: сьöм одзын. Вот начкисят, кыскат яйсö, и сетас вонушкоыт гöрд сьöм.

Пасьтасяс Иван да и бöра мунас Провлö уджавны.

— Ноко, — шуö Пров, — мун гезнас домав порозсö. Каттям коккесö да и бучкам бок вылас.

Пырас Иван гидъяс да пондас арканавны порозсö, а порозыс кыдз юрнас сёдас, гов мужык садьтöг стена бердас усяс.

Джын лун нюжласяс сэтöн Иван, сэсся дровни додьöн гортас кыскасö да квать неделя гор вылын «парёнкасö» пöжас.

Веськалас невна Иван да бöра воныс дынö: пестöг эд он ов, сiдз ни керку угöввесö лонтiсö.

Пров сетас вöвсö воныслö, а сбруясö оз сет. Да и додьсö оз сет — аслат пö эм. Пуксяс Иван вöв вылö да и локтас гортас. Но ладно пö, уна я менам пес — сбруятöг вая: домала бöжнас додь ныр бердас, и кыскас вöлыс.

Кералыштас Иван неыджыт додёк да и ваяс гортас. Пондас öтöрас ректыны, да иньыс тшöктас загонö пыртны. Осьтас Иван воротасö да ныкнитас вöлыслö, а воротаувт пöвсö вунöтас босьтны. Вöлыс кыдз дёрнитас, сiдз сылöн бöжыс и орас.

Повзяс Иван — мый керны? Иньыс шуö:

— Вот пемдас, дак тэ гусьöник вöвсö нуöт да йöрт Провыс картаö.

Но, сiдз и керис эмтöм мужыкыт.

Ашынас чеччас Пров, петас вöввес дынö, видзöтö: вöлыслöн бöжыс абу. Котöртас воныс ордö да ножö ыждавны! Мый, шуö, горё, вöвсö керин?! Эд вия ме тэнö, горёöс, и тэ понда суд оз ло! И давай Иванöс джоджöттяс кыскавны, чужъявны, тальны! А Иван керпитö, шы оз сет: мый шогмис, дак шогмис.

Вартлiс, вартлiс Пров, мыдзис да мунiс гортас.

Чулалiс неделя-мöд, и локтö Иван ордö Пров, висьталö:

— Вай пасьтась, суд вылö мунам.

Пасьталас Иван гуня, кöмалас нинкöммез да сьöрас босьтас джын ярушник нянь и петас воныскöт öтiк ыбöсын. Локтасö Пров ордö, а сылöн вöв доддя ни.

— Но пуксьы, горыч, — лöгöн шуö Иванлö Пров. Пуксяс Иван, и нiя мунöны суд вылö. А Иваника пукалö гортас лабичын да горзö, причитайтö:

— Эз аддзыв олансö этöн умокнас, кынмис-косьмис йöз удж вылын. Час судитасö батi век кежö али туй вылас виясö кытöнкö, и кольчча ме кай-пöтка öтiк борд вылам, и шондiыс сэсся оз понды шонтнытö менö.

А Пров да Иван мунöны Чердыньö. Вöтас нiйö ой, пырасö керкуö, юасясö узьны. кöзяиныс Провыслö тöдса вöлöм, сiя тшöктас ассис роботниксö юскисьны, а Провсö пызан сайö пуксьöтас, страпня ваяс тыр шердын, вина гöрдö и чочкомö. А Иванöс кыдз оз и аддзö. Сёясö, пöтасö, кöзяйка дзимлялас пызан да шердынсö сёяннас градка вылö лэбтас. И водтöтасö Провсö гöбечö, Ивансö — ленивка вылö. Рад Иван: бурлаö водтöтöны, час пö ме сёроно страпнясö судзöта да пöттöдз сёя.

Водасö да и быдöнныс онмöссясö. Сувтас Иван пидзöсчаннес вылö и давай кыссьыны шаньгаэс дынö. Локтас шердыныс дорöдз и пондас сёйны: öт кинас видзсьö, мöднас — босьталö сёянсö. Мыдзас киыс да мöднас мöдас градка бердас кутчисьны да шердын сорнас и усяс. А улын вöлöма зыбка кагаöн, и Иван ляпкöтас кагасö.

Саймасö ай-мамыс, öзтасö би и джын ловсö Иванлiсь босьтасö — сiдз вартласö.

Асывнас доддясясö и вöрзясö Чердыньö кык вöлöн — Ивансö кыкпöв мöдöны судитны. Лунтыр гöнитасö, бöра ой локтас, и судитчиссес пырасö узьны тöдса ордö: богаттёлöн тöдсаыс эд во весь туй! Пырасö да мыччалöны Иван вылö: эн лэдз пö этö горычсö керкуас, а йöрт гидйö, мед сэтчин узяс. И кывзас нылiсь кывнысö кöзяиныс да быль йöртас баляэзкöт.

Кöдзыт узьны гидйын — зипунокöн тöвся ой мöдöтны. Кутас Иван шонтiсьны — баляэскöт вермасьны — да быдöннысö водтöтас, öтiкö ловйöн оз коль: сёроно пö кыкись он кув, а öтпырисьсö он орддьы.

Ашынас петас кöзяиныс гидъяс — öтiк баля абу ловъя, — да Ивансö чуть ловйöн колясö — куим киöн öтдруг вартласö. И бöра чапкасö Иванöс додь вылö да кыскасö Чердыньö — öнi куим судöн ни судитны. Пукалö Иван да думайтö: «Горт сэсся меным не аддзывны».

Вот и Чердыньö локтасö, вот и керку, кöдаын судыс, аддзасö. Иван шуö: лэдзлö менö öтöрасьны пö. Пров висьталö: ветлы пö, да мед чожжыка. Котöртас керку саяс Иван, аддзö: куйлö кирпич, босьтас сiйö да сюйыштас простöй кöшелёкас и локтас мöддэс дынö, шуö:

— Но, пырамте да судитö. — И ачыс медодзас пырас да сэк жö судья дынöдз:

— Ваше благороддё, судитö ме дор! — и мыччалö кöшелёксö: он пö кер ме сьöртi, дак то тэныт. Но сэтчö пырöны мöддэс, и судья шы оз сет, оз понды юасьны, мый да кыдз.

Пондöтчас суд, и судья юалö:

— Мый понда судитан бы тэ, Пров Степанович, вонтö? — Сiя босьтлiс менчим вöв и бöжнас домалöм додь ныр бердö да бöжсö орöтöм.

— А тэ Иваныслö, сетлiн сбруясö?

— Эг сетлы.

— Эн, дак ачыт виноват, — шуö судья. — Верман мунны. — И юалö мöдiкыслiсь: — А тэнат мый?

— Миянö пырис Пров Степанович воннэс узьны. Ме Провсö вердi, а Ивансö эг. Сiя ойнас пондас сёян кошшыны и кага ляпкöтас.

— О-о! — шуö судья. — Тэ ачыт виноват — мыля Ивансö эн верд. Верман мунны. — И куимöтыслiсь юалö: — Но, а тэнат мый?

— Ме йöртi Ивансö баля гидйö узьны, а сiя баляэзöс ойнас вийлöма. Мед ны понда меным вештö.

— Дак тэ мый — мортсö подаöн лыддян? — горöтчас судья. — Эта понда сылö нем оз ло, тэныт штрап сетам, мед одзлань эн издевайтчы отирыс вылын. Верман мунны мöддэс сьöрö.

Иван кольччас öтнас, и судья шуö:

— Ноко вай сьöмтö.

— Кытшöм сьöм?

— Кöшелёксит.

Иван кыскас конувтсис кирпича кöшелёксö да шуас:

— Аттьö тэныт, што судитiн правильнöя. А ежели бы мöднёж керин — этö юр бердат быдöс паздi бы, — мыччалас кирпичсö.

Судья шай-пай лоас, а Иван бергöтчас да петас судсис. Пондас судья горöтлыны, стража корны, медбы Ивансö кутны, но сылöн и дукыс матын абу.

Мунö Иван гортас — гажа, што сiдз петiс сылöн. Мунас, мунас — ойыс вöтас. Локтас деревняöдз, пырас öтiк керкуö, узьны корсяс.

Кöзяиныс и шуö:

— Пырин, дак и узь. Да висьтась, кысянь и кытчöдз мунан.

— Чердыньсянь гортö муна, — шуö Иван. — Ме коми-пермяк, эмтöм мужык.

Печка гурйöтö-лонтiсьö, сы вылын поклёбка пусьö, пызан вылын капуста да лук. Пуксьöтасö Иванöс пызан сайö, вердасö да юкталасö, одзлань юасьны пондасö. И висьтасяс Иван быдöс, мый сыкöт шогмис.

— Керпит, Иван, эшö невна, — шуö кöзяиныс. — Локтас кад, быдöс энö виръюиссесö му вывсис öктасö, бутыльö сюясö да бура тупъяласö, и нiя сэтöн гуттэз моз век пондасö дзингыны. А часöт гортат эн мун — богаттёыс тэнö виясö.

Но эд гортас Маръяыс тöждiсьö, сёроно колö ветлыны — и мунас иньыс дынö. Пырас гортас ойнас, а иньыс радся-рад, што Иван ловъя. И висьтасяс, кыдз Пров черöн вовлiс да повзьöтлiс: горт шöрас пö юрсö Иванлiсь босьта.

— Эн тöждiсь, Маръя, — шуö Иван. — Вай тэч паськöмоккетö котомаö, да петам. Ме буржык места аддзи, мунам сэтчин овны.

Маръя тэчас котомкаö паськöмок, босьтасö пуд етш идъя-зöръя сюок да ярушник нянь и мунасö. А мисеч-мöд бöртi Гыркöс юок дорö лэбтiсяс керку. Час сэтöн деревня сулалö — Мара-Ивановка шусьö.