Нывкаэз йылiсь каски

Нывкаэз лöсьöтчасö пукавны. Босьтасö печканнэз, куделлез, чöрссэз, öтлаасясö да мунöны уличаöт деревня помö, кытöн пукалан керкуыс. Локтасö пустöй керку весьтöдз да нарошноись горöтласö:

— Öй, пустöй керкуись нывка, лок миянкöт пукавны! Пустöй керкуись нывка, пукавны лок!

Баитасö сiдз да и вунöтасö сiйö баснисö.

Пукаласö, пукаласö, унаöн ни печкасö, и вöлись керкуö пырö ыджыт и ыджыт нывка. Бытшöм йöрнöс-дубаса, виль нинкöма. Печканыс тожö ыджыт — ас сьöртöттяс, и кудельсö сы бердö ыджытö домалöм.

Некин сiйö оз тöд, кысь сэтшöмыс.

Пырас юасьтöг, оз и шыась, порог дорись лабич вылö пуксяс. Виззьö-печкö, некытчö оз видзöт, некинкöт оз баит.

Нывкаэс тожö öммезнысö тупкасö — шы не тöв пукалöны.

Печкасö, печкасö сiдз, öтiк нывка смевсö лэдзас да и горöтчас:

— Öддьöн тай перыта, нывка, печкан? Кытчö нö сiдз тэрмасян?

Ыджыт нывка шуас:

— Ме кудельöс печкышта да и тiянлiсь юрси коколоккезнытö мöда печкыштны — сiйöн и тэрмася.

Нывкаэс повзясö да шы и шы сэсся оз сетö. Асьныс тэрмасьöны жö печкыны бы, а юраныс öтiк дума: «Мый нö лоас öнi? Мый лоас?»

И петны оз лысьтö: ыджыт нывкаыс порог дорас пукалö, вермас чöрснас ли, печканнас ли кокыштны.

Пукаласö, пукаласö, аддзöны: ыджыт нывкаыслöн кудельыс печкиссьö. А печкиссяс, дак эд нылö умöль лоас! Сэтчö смевжык нывкаыс и шуас бöра:

— Эн жö сiдз тэрмась, нывка, эн одзав миянöс печкöмнат.

Ыджыт нывка одззамоз висьталас:

— Ме кудельöс печкышта да тiянлiсь юрси коколоккезнытö мöда печкыны. Сiйöн и тэрмася.

Нывкаэс эшö öддьöнжык повзясö, но некин шы оз сет, а юраныс сё важ думаныс: «Мый нö лоас öнi? Мый лоас?»

Смевжык нывкаыс думайтас, думайтас да казялас, мый керны: видзöтас öшынас да кыдз горöтас:

— Ой, пустöй керкуыс сотчö! Пустöй керкуыс сотчö! Ыджыт нывкаыс чеччöвтас местасис, кватитас печкансö — да ыбöс сайö!

Эта коста смевжык нывкаыс чапкас печкансö да керку ыбöссö чик-чок крючокалас. Сэсся молитва лыддяс, кресталас ыбöссö да лабичсö, кытöн чож печкисьыс печкис.

Ыджыт нывка казялас, што сiйö бöбöтiсö, посöдзöт голь-голь ветлöтö, да пырны оз вермы.

Голляс, голляс да ыбöс сайсяняс шуас пукалiссеслö:

— Но, кужит овны, нывкаэз! Кöбы эд бöбöтö, ме тiянöс велöтi бы!

Смев нывкаыс шуас сылö:

— Кöр ог кужö: тэ öтнат, а мийö унаöсь.

Ыджыт нывка мунас гортас, а пукалiссес сэтöн и оййöмась.

БЫТ ЙЫЛIСЬ

Ай да сылöн куим зон

Асныррез

Атрапей

Боболь

Озыр жöник сайын

Озыр корасись

Бöб зонпиян

Бöбсялöм поп

Вöралiсь Опонь да барин

Горш попаддя

Грек шедтiссес

Гузи да Мези

Дзирыт пельняннез

Донтöмик пятаккез

Дудык

Дыш Олёнушка

Дышкучик

Елесько

Ен сетöм

«Ёгортан курöтан…»

Зимогор

Иван да Пров

Китрöй мужык

Кöбыла кольттез

Кöчкыйись да поп

Куим вон

Кыдз Данько бурлачитiс

Кыдз Епаöс кöч велöтiс

Кыдз зонка би кошшис

Кыдз мужык дзодзоггезöс янсöтiс

Кыдз Овдя пиканалiс

Кыдз сёйис, сiдз и уджалiс

Кык вон

Кытчö ветлiн да мый аддзылiн

Мортсёйись инь

Мöдiк Кудымкар

Мывкыда воннэз да Бöб Иван

Мывкыда Митей

Не поп не чорт

Некывзiсь сапоггез

Нёль вон да пишаль

Нинйöм чаркиэз

Нинкöм да налевка

Петра-сар, савдат да розбойниккез

Поп да срошнöй

Потя да Потика

Сiдз сылö и колö

Сизимок

Старик да старука

Таратайкаын поп

Тöдiсь доктор

Туй вылын öшынок

Тыра курöг

Чочком колпака морт

«Эн керась, усян!»

Юкмöсын тэсь

Яньки, Паньки да Ваньки