Умöлик мерин

Умöлик деревняын олöма умöлик мужык — не мöс, не вöв абу видзöм. И нимыс умöлик, кыдз менам жö — Пепа.

Челядьыс мужыклöн гор вылын и пöлатьын тыр, а сусекын — шырлö нем сёйны. (Нужднöй год вöлöм, вот сiя мужыкыт и кольччöм няньтöг да податöг.)

Эм ли, абу ли няньыт, а уджавнытö эдö сё ни колö. Вот и мунас Пепа воннэзнас му гöрны. Зоннэс гöрсö кыскöны, а ачыс тойыштö. Сэтчö старик локтас, ны кодь жö умöлик, пондас жалейтны, мыля нiя вöвтöг гöрöны.

Пепа и шуö сылö:

— Жальöсь кö ми тэныт, дак отсыштiн бы. Баитöмсянят миянлö эд абу кокнитжык.

Старик нылö баитö:

— Ме гöрнытö ог понды, велöта тiянöс, кыдз керны. Тi босьтат вöв. А вöвсö вузалöны базарын — ме сэтчинсянь.

И висьталас: сэтöн и сэтöн-то сулалö, сэтшöм и сэтшöм-то гöна.

Пепа гажтöма шыннялö:

— Старик тэ, старик! Кöбы сьöмным вöлi, дак асьным гöрас эгö бы доддясьö!

Старик сетö сьöм:

— То тэныт квать руб. А вöлокыс сулалö сизим руб. Öтiк рубсö кыськö аддзан ни. Да эн вунöт менчим кыввезöс: босьт сiйö меринсö, кöдö тшöкта. И не донöнжык, и не донтöмжыка.

Пепа босьтас сьöмсö. Но тöдö, што вештiсьны кöркö колас, и юасьö:

— Дыр кежö я сьöмтö сетан? И кытчö одзöсöс вайны?

— Ковсяс, дак ме тэнö аддза: эстi тшöка ветлöта. Висьталас этадз старикыс да и мунас.

Но, мый: кöр вöв понда унажык сьöмыс эм ни, сэк колö невнасö кинлiськö одзöстны жö да базарö мунны — небны мериноксö.

Пепа коляс зоннэсö ыб вылас, ачыс мунас руб сьöм кошшыны, öтiк суседлiсь корас — абу, мöдiклiсь — абу. Озыр мужык ордö мунас, кеймисьö:

— Сетлы жö одзöсöн руб сьöм. Он кö сет — кувны ковсяс. Неделя бöртi бергöта.

Озыр шуö:

— Одзöст куим руб.

— Меным öтiк колö да.

— Öтiкнас ог сетав.

— Но, вай инö куим руб. Кыдзкö вештiся жö. Мужык сетас сылö сьöмсö да висьталас:

— На, да эн вунöтчы: дыржык видзан — унажык руб босьта.

Пуктiс Пепа одзöстöм сьöмсö ылöжык — да гортас. Вöлi квать руб, лоис öкмыс. (А сэк сьöмыс дона эд вöлöма!) Гортас кöмалас виль нинкöммез да котöртас базарö, аддзас, кытöн вöввезöн вежсьöны да вузасьöны. Юасьö, донаöсь я вöввес. Висьталöны: эта пö 12 руба, эта — дас руба, эта — öкмыса. А сылö колö сизим рубаö. Кытöн инö сiя? Можот сiя пö меринокыс, кöдалöн токо юр да кок кольччöм, да ордлыэс?

Умöлик мериноксö сы кодь жö умöлик старикжуг видзö.

— Вузалан?

— Вузала.

— Мымда коран?

— Сизим руб.

— Квать вылö он я сет?

— Не унажык, не етшажык ог босьт — токо сизим руб.

Пепа босьтö, позьö висьтавны, не аслас сьöм вылö, дак оз понды асныравны: кыдз тшöктасö, сiдз и керас — босьтас мериноксö. Кольччасö кык руб сылöн, и öт вылас сюок босьтас, а мöдсö пийöтны коляс — кöдзыс вылö.

Мунö гортас подöн — оз лысьт пуксьыны. Ачыс думайтö: «Пуксьыны ог лысьт, а кыдз нö гöрнытö понда?» Меринокыс пырс несъяс: эн тöждiсь пö, кöзяин, гöрам кыдзкö!

Вайöтас гортас, зоннэслö мыччалö, а нiя сералöны:

— Коккесö вермö жö вештавны? Али ачыт отсалан? Кытшöм ни сыись толк, поди.

Меринок бöра пырс несъяс, и айныс шуас:

— Кылат, мый висьталö: эд тöждiсьö пö!

Лöсьöтас Пепа меринокыс сьöртi сийöс-сермöт да каяс ыб вылö. Ачыс гöрö, а зоннэс кöдзöны да куранöн пинялöны — кöдзöм сюсö тыртöны.

Жагöна вöлыс ветлö да и мыдзö: куимись гöгöртас лекасö и шоччисьö. Пепа думайтö: «Этадз ми кузьгожум пондам гöрны, а сюыслö кöр быдмыны?»

Мерин бöра пырс несъяс: эн тöждiсь пö, кöзяин, вай гöр чожжык!

Пепа кутчас гöр бердö, ныкнитас, отсалас вöлыслö гöрсö вöрзьöтны. Мерин вöрзьöтчас и бöр сувтас. Пепа вöлыслö шать мыччалас, а меринок нетшкöвтчас жö бы да оз вермы гöрсö вöрзьöтны. Но, кышасис пö, гöрыс вужö. (Виль ректас поди гöрис дак, вужыс да мырыс тыр!)

Шедтас мужыкыт гöрсö мусис, а гöр йылас бановöй комзыль мыччисяс. Кыскас комзыльсö, путшöтас — мак кавалей! — сьöм жиля-жоля киссьö!

Котöртасö сы дынö зоннэс — ок да ак! Пепа сетас нылö комзыльсö — нате пö лыддьö, мымда сэтöн эмбурыс, а ачыс гöрны пондас.

И зоннэс лыддясö витсё рубся унажык да шуасö:

— Ая, эн ни маит мериноксö. Сьöм миян галяма — босьтам мöдiк вöв, а этö шоччöтöв-керам да вузалам, кöр вочмас.

Айныс кывзас зоннэсö — чапкисяс гöрансис, и нiя лэдзчасö гортаныс, мунасö вöв торговöй дынö и босьтасö виль вöв. Меринокöс лэдзасö öтöрö, а сiя вильыскöт быдлаö мунö, кыдз мам сьöрö чань.

Но вот, сьöм лоас, дак Пепа мунас одзöссö вештыны. Сетö озыр мужыклö куим руб, а сiя шуö:

— Мыля етша? Разь вунöтiн, кыдз рöдитчим? Мыся, дыржык кö видзан, унажык и вештан.

(Озырыт кылöма ни, што Пепалöн сьöм эм.) Пепа сетö мужыкытлö квать руб, а мöдыс висьталö:

— Тэ вештiсьöмнат кыскин дас лун, а быд луныс менам куим руб дона. Вай куимдас руб. Он понды сетны — судö лэдза.

Одзжык судсис полöмась, кыдз биись, и Пепа оз понды пыксьыны — сетас куимдас рубсö.

Но эд сылö эшö öтiк одзöс колö бергöтны — умöлик стариклö. А кыдз и сiя пö этадз жö пондас кульны, дак эд кöс розоритас!

Да мый сэтöн керан, ежели сiдз петас.

Пепа гöрö да бöра и тöждö, бöра тöждö. А сэтчö сiя — умöлик старикыс — локтö. Дыровайтчас да и баитö:

— Тiян тай виль вöв ни.

— Виль. Мöдсö шоччöтны лэдзим. Шутём вылын вынсö меринокным öктö.

— Донöн я меринсö босьтлiт?

— Сизим рубöн.

Умöлик старик кыскас кыськö эзысёвöй руб да шуас:

— Ме тэныт, Пепа, одзжык сетлi квать руб. На тэныт сизимöтö, а мериноксö меным сет.

Пепа оз бы босьт сьöмсö:

— Мый тэ, мый тэ, бур морт! Кытшöм эшö тэсянь сьöм босьтöм? Ме тэныт сiдз меринсö сета. Да эшö геньгаок верма сетны. Сiя жö, мериныс, и отсалiс сьöмсö шедтыны.

Умöлик старик сылö паныт шуас:

— Сьöм оз ков меным. Гезок буди умöликö аркан туйö сетан. Ме сiйöн и кута меринсö да нуöта.

Пепа сетас косксис тельниксö да кольлалас умöлик стариксö шутём дорöдз, кытöн умöлик мерикокыс йирсяс.

Аддзылiн, мый керöма умöлик старикыт умöлик меринокнас?