Вöрись кульлöн отсöт

Пöрись гозъя мунiсö турунавны. Медодзза лунас ытшкисö, мöд лунас куртiсö, куимöтас зород пондiсö тэчны. Старик лэбтö, а старука зородсö тальö. Вот и тэчсис, пондiсö вершитны, но сэтчö тöвчик локтiс да зородсö пöрöтiс, öтлаын туруныскöт и старукаыс усис да бура и доймис. Горзö старука, геръялö.

Öвтчö тöвчикыс, старука гöгöр гöгралö да сералö: — Вак-вак-вака!

Лöгасис старик, кыскис пуртöссис пурт да шупкис пуртнас тöвчикас. А тöвчикас чаг лэбзис, и пуртыс инмис чагас. Чагыс усис му вылас да пöртчис вöрись кульö и пондiс ойзыны: пуртыс синсö писькöтöма.

Старик гозъя повзисö: кульыс вияс пö миянöс эстöн! Но кульыс пöртчис бабапель юрокö да кытчöкö лэбзис ойзöмöн.

Лöньсисö пöрись гозъя и пондiсö чукöртны рознитöм турунсö. А сэтчö куль чукöрыс петiс да пондiс юасьны, мыля сы увтырись öтiкöс дойдiсö.

Старик висьталiс, кыдз вöлi. Сэк пöрись куль пондiс видны сiйö, кöда зородсö пöрöтiс да старукасö дойдiс: оз пö ков гов йöзсö öбижайтны. И тшöктiс öтiк сина кульсö разьöм зородсö тэчны.

Куль чукöр мунiс гортас, а бöб куль кольччис стариклö отсасьны.

Мыйсянь китöмлöн киыс быдмис

Вöлöмась кык вон — гов да озыр. Гов вон локтас озыр ордö, корö:

— Отсышт-ко пизёкöн, семъяö тшыгйöн кулö. Озыр шуö:

— Чуньтö орöтан, дак сета.

Керны нем — гов вон орöтас чуньсö. Дыр не дыр сiя олас, мöдпырись озыр воныс дынö отсöтла локтас, а озырыс шуö:

— Орöт ки лапатö, дак отсала. Гов вон орöтас долоньсö.

Дыр не дыр сiя олас, куимöтпыр озыр воныс дынö отсöтла локтас, а озырыс шуö:

— Орöт китö гырдззави, дак отсала. Гов вон сiдз и керас.

Дыр не дыр сiя олас — тшакъявны мунас, пемдас вöрас да öшас. Аддзас куим вожа пу, каяс сы вылö да узьны лöсьöтчас — сэтiсь кöиннэс оз судзöтö.

Ойнас саймас, кылö басни. Гусьöник видзöтас улö — сьöд гöнаöсь тыдалöны. Этö вöр чуддэз.

Пöрись чуд юасьö томмеслiсь:

— Мый морттэслö умöльсö керит? Öтiк шуö:

— Ме гов мортöс калекаöдз воштi. Мöдiк шуö:

— Ме плотина кырöтi. Куимöт шуö:

— Ме инькалiсь синнэз бытшкалi. Пöрись чуд видö томмесö:

— Тiйö не сiдз керит. Слепöй инька миссяс ключ ваöн, кöда миян логись петö, и пондас аддзыны; мельник тупкас кырöтöмсö пасьнас, и сэсся некöр оз кырöт; калека сьöвзяс воныслö синнэзас, и киыс бöр быдмас.

Ой чулалас, гов вон лэдзчас пу вылiсь, петас вöрсис и мунас озыр воныс ордö. Казялас сiйö воныс и юалö, мыйлö бöра локтiс голыс сы дынö. А сiя шуö:

— Тэ меным уна отсалiн, ме сы понда етша вештi, дак вайи содтöт.

— А кытöн нö сiя? Мыйкö тай ог аддзы?

— Синнэтö буржыка паськöт.

Озыр вон паськöтас синнэсö, гов чурс сьöвзяс воныс синнэзö — и киыс лоас быдса.

Мунас мельник дынö, а сiя чуть оз горзы — прудсис ваыс пышшöма. И гов вон шуас:

— Тэ эн жалейт пасьтö, тупкав сiйöн кырöтöм местасö, и сэсся оз кырöт.

Мельник тупкалас — прудыс син одзын тырас. И сетас мельник гов вонлö и пизь, и сьöм. Гов вон нöбöтас шедтöм добросö гортас, аддзас инькаöс, кöдалiсь том чудыс синнэсö бытшкалöм, нуöтас сiйö чуд ключ дорö да миссьöтас ванас, и инька пондас аддзыны.

Лёк туннэз йылiсь

Кама дорын олöмась тун гозъя, кыкнанныс öддьöн лёкöсь вöлöмась. Сэтшöм лёкöсь, што бур йöзыс ны дынöт и ветлöтны полöмась: кин ны дынöт мунö, сiйö и тшыкöтöны.

Вот локтö ны ордö морт, корсьö узьны А кöзяиннэс важын ни абу тшыкöтчöмась и радöсь: лёкнысö эм кытчö воштыны.

Лэдзасö мортсö узьны, шоныт ырöш сылö удасö. А ырöшас вына турун пуктасö, кöдасянь мортыс звирö пöртчö.

Кöда узьнытö корсяс, тожö тун вöлöма и тожö сэтшöм лёкöн локтас — кöзяин-кöзяйкасö звиррезö пöртны, сыбöрын нылiсь добросö нöбöтны И сiя гöснеч нылö сетö — калач да преник.

Локтiсьыслöн горшыс бура косьмöма, и сiя ырöшсö быдöс юас. Кöзяин-кöзяйка тшыгöсь вöласö и гöснечсö быдöс сёйыштасö.

Сёясö-юасö, лабиччез вылö пуксясö, öта-мöд вылö видзöтöны, виччисьöны, мый лоас.

Казялас кöзяйка, што гöсьыслöн киэс гöнсялöны, юалас сылiсь:

— Тэ, мортiньöй, абу я сана родiсь? Мыйкö тай лапаэз да.

Гöсьыс шуö:

— Абу, абу ме сана родiсь, — ачыс киэсö дзебö. Кöзяин юалö:

— Тэ, мортiньöй, абу я ош родiсь? Мыйкö тай гöна чука да.

Гöсьыс шуö:

— Абу, абу ме ош родiсь.

Пукыштасö недыр, и гöсь юалö мöддэслiсь:

— Тi абу я кöин да руч? Мыйкö тай тiян пеллезныт кузьöсь да гöнаöсь.

Тун гозъя шуöны:

— Абу, абу ми кöин да руч.

Дыр я, недыр я сiдз пукаласö, и локтiсь тун лоас сьöд ош, кöзяин — руд кöин, а кöзяйка — гöрд руч. Ош баитö:

— Тiян мöс эм, вайö жö сёям сiйö.

Кöин да руч согласитчасö: сёроно öнi некинлö вердны сiйö — весь кулас.

Ош косялас мöссö, яй керас. Быдöнныс сёясö, мыйкö дырна пöтöсь оласö, нем йылiсь оз думайтö.

Бырсис мöс яйыс, ош шуö:

— Тiян баля эм, вайö жö сёям сiйö.

Кöин да руч согласитчасö, и ош косялас балясö, яй керас. Сёйыштасö сiйö öтiк лунöн, и бöра тшыгöсь. Ош и шуö:

— Вайö жö гыжъясьны кутчам: кинöс гыжйöвтам да горзыны пондас — сiйö и сёям.

Руч гыжйöвтас кöинлiсь боксö — кöин оз горзы.

Кöин гыжйöвтас ошлiсь боксö — ош оз горзы.

Ош лöсьöтчö гыжйöвтны ручлiсь боксö. Кылö руч: сылö ковсяс горзыны, и пышшас керкусис. Ош да кöин — сы сьöрö.

Ручлö усяс тöдвылас, што вöрын эм кыйсян гу. Сiя котöртас сэтчин, гу вевдöрöт чеччöвтас. А ош да кöин тальччасö гу вевтöс вылö да усясö пыдын гуö.

Тшыг ош косялас кöинсö да пондас сёйны. Руч локтас гу дынас, казялас косялöм кöинсö да пондас горзыны. Этö кылас вöралiсь, локтас сэтчö и перво ручсö вияс, а сыбöрын — ошсö.

КЫК ТУН

Туннэз ветласö ярмарка вылö и локтöны гортаныс. Мунöны ордчöн, а чöлöны — лöгныс пöдтö. Пöдтö сысянь, мыля некинöс абу вермöмась тшыкöтны.

Вот локтасö волокöдз, а волокас — туйвеж: öтыслö öтланьö мунны, мöдыслö — мöдланьö.

— Шоччисьыштам, — шуö öтыс.

— Шоччисям инö, — шуö мöдыс.

Аддзан, öтыс думайтö тшыкöтны ёртсö и мöдыс сiдз жö.

Вот пуксясö туй дорас, няньторрез йирöны и куллеслö кеймöны, медбы нiя отсалiсö нылö. Пукалöны оча син да тунöтчöны-колдуйтчöны. И сэтчöдз тунöтчасö, што öтыс гатш таралас да колодаö пöртчас, а мöдыс пуксöн муас быдмас да мыр лоас.

Дыр я нiя сiдзи пукаласö, мийö ог тöдö. Токо öтпыр мунас сэтi инька, и сiя инмас вожмöвтны колодасö. Вожмöвтас колодасö, колодаыс морт лоас, чеччас и шуö:

— Ок-ок, бокö сiсьмис тай, дыр куйлi да! Этö то сiя менö сiсьтiс! — и чужъяс мыр кузяс. Мырыс зэгнитчас, морт лоас да и шуö:

— Ок-ок, коккезö тай сiсьмисö, дыр пукалi да! Пондылас мырыс-мортыс чеччыны, да оз вермы. Инька повзяс, котöртас деревняö. Локтасö отир, видзöтöны бы, кытшöм сэтшöм чудо шогмис, а морттэс абу ни, токо öтiклаын куйлöны сьöд юрси да колпак, а мöдiклаын — гöрд юрси да гöрд колпак.

Ны сьöртi и тöдасö, што сэтöн тунöтчисö лёк туннэз.

СЁЁВÖЙ ЗОН

Олiсö пöрись гозъя. Нылöн челядьыс некин эзö вöлö. Тöждiсьöны нiя челядьтöг, оз тöдö, кыдз мый керны. И вот старик лякис сёёвöй акань. Сувтöтiс этö аканьсö западня вылö, и друг аканьыс ловзяс, лоис сёёвöй морток. Пондiсö старик да старука быдтыны сiйö зон туйö.

Пукалöны öтпыр гöбеч дорын пöрись гозъя, öтыс нинкöммез кыйö, а мöдыс печкö. Печкас, печкас старука да чöрсыс сылöн усяс.

— Зону, вай жö чöрсöс, — горöтчас сэк сiя. А зоныс паныт:

— Абу ни чöрсыс, ньылыштi.

Сыбöрын усяс стариклöн сьöктаныс. Старик гöбеч дорсяняс шуö сёёвöй зоныслö:

— Зону, лэбты жö сьöктанöс.

Зоныс босьтыштас сьöктансö да ньылыштас. Сыбöрын усяс старукалöн печканыс. Старука корö:

— Зону, лэбты жö менчим печканöс. А зоныс улiсянь:

— Мый лэбта, сёйи ни печкантö да.

«Кытшöм эта диво?» — пукалöны, думайтöны пöрись гозъя. Недыр мыйись бöра усис стариклöн кабыс. Старик корö сiйö:

— Зону, лэбты жö кабöс.

А сёёвöй зон важын ни сiйö ньылыштöм. Сэк лэдзчис улö старукаыс. Ньылыштiс зоныс и старукасö. Старик виччисис, виччисис ассис старукасö — эз вермы виччисьны. Нем лоис керны, ковсис лэдзчыны аслыс.

Но токо ештiс сiя лэдзчыны, зоныс ньылыштiс и сiйö.

Ньылалiс сёёвöй морток быдöннысö да ачыс петiс öтöрö, оськалö туй кузя.

Друг лэбтiсис сук зэра кымöр. Вирдыштiс, гымыштiс, киссис му вылö веськыт зэрöн. Сёёвöй зонок шедiс зэр увтас да быдöс незьдiс. Петiсö вöлись сы кынöмись старикыс и старукаыс. Пондiсö нiя бöра овны öтнаныс, челядьтöг.