Повзьöтчан керку

Служба вывсянь бертö гортас савдат. Матын ни гортыс, öтiк ойкöлöн локтiс бы, да öддьöн мыдзис и решитiс шоччисьыштны.

Деревняö пырис сёр рытöн, корсис узьны öтiклаö, мöдiклаö — эз лэдзö, а куимöтлаын шуисö:

— Миян керку учöт, водтöтны некытчö. Лысьтан, дак узь мöд керкуас.

А савдатлö кинлiсь повны? Куим война вылын вöлi — ловйöн кольччис, а деревняас мый поди лоас?

Вот савдат пырас пустöй керкуö, ольсасяс джодж шöрас. А савдатлöн ольпасьыс озыр — шинель. Сiя и увтас, и юрöдзас, и шебрас вылö тырмöтас.

Водас да пишкö, матiсь гортсö вöтасьö, да и узикас сё тöждiсьö, што ай-мамыслö и грош сьöм оз вай, кöть и служитiс быдса кыкдас вит год.

Дыр я, не я узяс савдат, друг — гым да гым!

Думайтас, пушкаэз лыйлöны, и чеччöвтас кок йылö, медбы окопö дзебсисьны. Но аддзö: эстöн абу пронт, эстöн керку и сотчö югыт би.

Дак мый нö гымöтö?

Токо думайтас сiдз, а джоджувсянь кинкö кыдз горöтас:

— Пета!

Савдат оз тöд, мый сэтчö висьтавны.

— Пета! Савдат чöлö.

— Пета! Савдат шуыштас:

— Петан — пет...

Ёрк оссяс джоджув ыбöс, и джодж шöрö гымгисяс гроб. Савдат дзик тувдас местаас — ки не кок оз вермы вöрзьöтны. А гроб пытшксянь кинкö эшö öддьöнжык ряксö:

— Осся! Савдат шы оз сет.

— Осся! Савдат чöлö.

— Осся!

Савдат висьтыштас:

— Оссян — оссьы...

Шовк оссяс гроб вевт да усяс джоджас. Савдат оз и видзöт, мый гробас, виччисьö, мый одзлань лоас. А гроб пытшкын кинкö пичкисьöмöн чирöстö:

— Кисся!

Савдатлöн син одзас пемдö, но чöлö.

— Кисся!

Савдатлöн кучикыс кыртö, но видзсьö.

— Кисся!

Савдатлöн садьыс бырö ни, токо и сюсюкнитас:

— Киссян — киссьы...

Гроб лэбыштас вывлань, камгисяс джодж бердас и жоль паськалас зарни чукöрöн.

Савдат чышкыштас пымалöм кымöссö, куралас мешöкас зарнисö да иньдöтчас гортас.

Кум да кума

Олöмась-вöлöмась кум да кума. Кумалöн вöлöма кага, и сiя пыр горзöма, йöлыс абу да. А кумлöн вöлöмась кык мöс. Кума и корö:

— Сет, кум, öтiк мöстö.

— Сета, — шуö кум, — тэ токо куим ой сьöрна зуась пустöй керкуын. Ежели тэнö чудыс оз сёй, сэк öтiк мöссö нуöтан.

Но мый керны? Йöлыс эд кагаыслö колö. И согласитчас.

Сибалö ой. Кума мунö чудливöй керкуö. Сьöрас босьтö лён зуавны да эшö петукöс — ёрт туйö.

Пукалö и зуасьö, и зуасьö.

Локтö ойшöр, жагöник лэбтiсьö джоджув западня, и мыччисьö чудыс. Шöри повзяс кума, öшас, а петукыс кыдз рявкнитас:

— Ке-ке-ре-ку! Кöзяйкаöс ог сет!

Сэтчö чудыс и усяс бöр джоджулас. А кума кватитас куделлесö да петуксö — дуй пышшас гортас.

Ашынас оз ни бы мун, да йöлыс эд кагаыслö колö. И бöра мунас петукнас да лённас.

Локтö ойшöр, жагöника оссьö джоджув западня, и петö чудыс.

Пукалö кума, зуасьö, а петукыс кыдз рявкнитас:

— Ке-ке-ре-ку! Кöзяйкаöс ог сет!

Сэтчö чудыс и усяс бöр джоджулас. А кума кватитас куделлесö да петуксö и — дуй пышшас гортас.

Сибалö куимöт ой. Кума и думайтö: «Талун сёроно ни сёяс менö чудыс, ежели муна...» Но йöлыс эд кагаыс понда колö, и кöть пов, кöть эн, а мунны колö.

Босьтö петукöс, босьтö кудель да кузь ем — колö шöрт печкыны да вочлiсьны.

Локтö ойшöр, жагöник лэбтiсьö джоджув западня, мыччисьö тушаыс чудлöн. А петукыс кыдз кинитчас сы дынö да лэбтiсяс горвайтны:

— Ке-ке-ре-ку! Ке-ке-ре-ку! Кöзяйкаöс ог сет! — Ачыс сiдз бы и кокыштö чудыслiсь синсö.

А кума сы коста кузь емнас кыдз пурскас-шодзалас чудыс бокö, сiя токо чер-бар усяс да тури-тари вотьыштас джоджулас.

Инькаыс курни-верни кватайтас кудельсö да петуксö бöжöттяс и свигайтас-котöртас гортас.

Пукалö кума не кулöм, не ловъя, а кумыс сэтöн и эм:

— Но мый, кума, эз вермы тэнö сёйны чудыс?

— Эз, кум. Менö петукö дорйис.

— Сэк ме тэныт, кума, сета Белянаöс.

Вайöтас кума кумыслiсь мöссö гортас и пондас красуйтчыны-овны мöсöн, и кага сэсся дугдас горзыны.