Быдса чудо

Мужык мунiс изны. Мунiс, мунiс — вöрö пырис. Сэтöн телегасис кругыс шовк мезмис да ылö таралiс. Чеччис мужык, видзöтö: гайкаыс личалiс али мый? Но гайкаыс аслас местаын, кругыс — дзонь. Гыж-гыж керис тошсö горöтчис:

— То тайка чудоыс!

А вöрсяняс кинкö шуис:

— Эта абу чудо. Тэ юав кумытлiсь, мый сыкöт вöлi, — вот сiя чудо! Юалан?

Повзьыштiс мужыкыт: кытшöм чомор этö баитö? — да токо и висьталiс:

— Тшöктан кö юавны, дак и юала.

Мужык кышалiс кругсö да мунiс кумыс ордö, висьтасис аслас чудо йылiсь. Но кумыс шуис:

— Тэнат чудоыт эшö не чудо. Кывзы-ко менчим... Мунi ме вöравны и зонöс сьöрам босьтi — ась, мыся, велöтчö. Локтi вöр дорас — медодзза кöз вывсис урöс лэдзи, сэсся шедiсö: кöч, сьöла, дозмöр. Этö, мыся, зонö сэтшöм шуда.

Ветлöтöв-керим да пуксим шоччисьны. Друг поныс нёжтöм голосöн пондiс вувтны да одзаным чеччавны. Но, мыся, кöин нето ош сибöтчö. Кватитi пишальöс, картеча патрон зарадалi. Видзöта: кöззэс коласiсь старик петö — месся кыкись ыджытжык. Ме сылö: эн сибöтчы, мун аслат туй кузя! А сiя локтö. Ме вились: эн сибöтчы, мыся, а то водтöта! А сiя сералö: «Чапкы пишальтö, менö не дроб, не пуля оз босьт! Буржык лоас, ежели уртö сетан!» Ме шупки одзас урсö — сiя кульк-мельк быдсöн ньылыштiс да кöчöс корис. И сетi: сёй тэ, мыся, да мун татiсь! А сiя сё корö — сьöлатö пö вай! И чапки ме сылö сьöлаöс, дозмöрöс, понöс — быдöс куж-каж сёйис и шуö: «Зонтö вай!» И тожö сетi — некыдз эг вермы пыксьыны.

Босьтiс зонöс, пестерас сюйыштiс да тшöктiс: «Пуксьы сивъям да бура видзсьы. И кер то кыдз: пондам медодзза потш увтö пырны — эн кутчись сы бердö; пондам мöдiк увтö пырны — эн кутчись; пондам куимöт увтö пырны — кутчись сы бердö ёнжыка да мамтö горöнжыка кытсав!».

Пукси ме старикыс вылö, сiя давай вöрöттяс гöнитны — токо кöззэс мелькайтöны. Видзöта — одзаным потш поперегасьöм. Ме мышкыртi юрöс — свигнитiм увтöттяс. Эг ешты несйыны — мöдiк потш. Бöра мышкыртчи, гöнита одзлань. Дыр я не я — куимöт потш. Кутчиси сы бердö да рякöстi: «Мама-а!» И эз ло не вöрыс, не старикыс. Дзир-бар кери — джодж вылын сулала да пöлать брус бердын видзся. Дынам инькаö локтыштiс, юалiс, мый горöтла. А ме сылö: Ванька зонöс, мыся, аддзылiн? Аддзылi, шуö, то тай гöбечын узьö. А поныс, мыся, эм я? И поныс, шуö, локтiс да эшö пишаль, урöс, кöчöс, сьöлаöс, дозмöрöс вайис.

— То тайка чудоыс! — шуис мужык. А кумыс висьталiс:

— Эта абу чудо. Тэ сватытлiсь юав, мый сыкöт аркмис, — вот сiя чудо!

Мужык мунiс сватыс ордö, юалiс, кытшöм чудо сiя аддзылiс. Сватыс висьталiс:

— Тöн ме кыйи тарöс. Пондi мездöтны, а сiя шуö: «Тэ лэдз менö, мортiньöй, сы понда сета тэныт ассим аканьöс. Сiя пондас оградаöт ветлöтны, борддэзнас шовкöтны, а бöжнас — ёгсö чышкыны. Сылö не юан, не сёян оз ков, а тэнö прокод яйöн пондас вердны. Токо висьтав: «Тар акань, керкуö пыр, горöдзö кай!» — и сiя керкуö пырас, горöдзö пуксяс и берся яёвöй сёян пуас да пöжалас, вöлись готсьыны пондас. Сэк тэ висьтав: «Тар акань, лэдзчы горöдзсис, öтöрö пет!»

Лэдзи ме тарсö, и сiя сетiс ассис аканьсö. Ачыс аканьыс тар гöна, а бöжыс да нырыс зарниись.

Вайи тар аканьсö гортö, висьталi: «Тар акань, керкуö пыр, горöдзö кай!». Тар акань пырис, пуксис горöдзö — и сэк жö чугунын да жаровняын яй пусис и жаритчис. Висьталi: «Тар акань, лэдзчы горöдзсис, öтöрö пет!» — и сiя петiс керкусис, пондiс оградаöт ветлöтны, борддэзнас шовкöтны да бöжнас ёгсö чукöртны.

Кылас эта чудо йылiсь озыр мужык да тшöктас гусявны менчим тар аканьöс. Гусяласö, вайöтасö озыр ордö, лэдзасö оградаö. Тар акань ветлöтö, борддэзнас шовкöтö да бöжнас ёгсö чышкö. Озыр мужык тшöктö: «Тар акань, керкуö пыр, пöжав меным яй!» Тар акань пырас, но горöдзö оз пуксьы, яйсö оз пöжав. Сiдз и этадз озыр гозъя кеймасö — оз пуксьы и быдöс! Мужыклöн иньыс лöгасяс да чувйыштас тар аканьсö гормöччанöн. Гормöччан лякасяс тар акань бердö. Мездöтчас, мездöтчас инькаыт, но оз вермы, тшöктас отсавны жöниксö. Сiя павкöтчас иньыс бердö и тожö лякасяс. Тар акань петкöтас озыр гозъяöс öтöрö, нуöтö уличаöт да шувлö: «Нечестнöй мортыс миян дын сюрас, миянкöт мунас!»

Пантасяс поп попаддянас, пондас богаттёсö позорсис мездыны, да асьныс мöддэскöт йитсясö. Тар акань нуöтö нiйö мöдiк деревняэзöт да ассис прибауткасö модьö: «Нечестнöй мортыс миян дын сюрас, миянкöт мунас!»

Тар акань куим деревня гöгöртас, куим дас нечестнöй мортöс аслас лёдзö чукöртас, сэсся ме дынö вайöтiс да юалö: «Мый пондам керны энакöт?»

Ме öтпыр думайтi, мöдпыр думайтi — нем юрам эз пыр.

Куимöтпыр думайтiкас несйи, и лэбис сэтшöм тöв, што быдöннысö одзсим лэбзьöтiс.

— Эта — быдса чудо! — висьталiс мужыкыт да мунiс изны.