Легонтай, легонтай

Оласö-вöласö мужык гозъя да нылöн куим зон. Мый и лоас — инькаыс кулас, мужыкыт дöвечöн кольччас. Дыр я, не я олас мужыкыт иньтöг, да гöтрасяс. Кöть и не озырö вайöтас, но томöс да мичаöс.

Мужык иньдöтас ыджытжык зонсö да иньсö ытшкисьны. Нiя лунтыр ытшкисясö, рытнас пондасö гортö локны. Мачека и шуö:

— Видзöт жö, зонка, бадь йылас листыс кытшöм виж! Кайлiн бы да судзöтiн, а ме бы сэтiсь аслыт йöрнöс вури.

— Но, ме судзöта, — шуас зонка да каяс бадь йылöдззас, нетшкöвтас виж листсö. А пондас лэдзчыны да нинкöмнас кышасяс ув бердö и öшöтчас юрнас увлань. Öшалö да горзö:

— Легонтай, легонтай! Вöлiмö куим вон, сэсся кыкöн кольччисö!

Мачека зонкасö сэтчö и коляс, а гортас висьталас, што сiя кытчöкö öштöтчис.

Мöдпырся мужык иньдöтас иньыскöт шöрöт зонсö турун куртны. Нiя лунтыр куртасö, пондасö гортö локны. Мачека и шуö:

— Видзöт жö, зонка, кыдз йылас листыс кытшöм веж! Кайлiн бы да судзöтiн, а ме бы сэтiсь тэныт йöрнöс вури.

— Но, ме судзöта, — шуас зонкаыт и каяс кыдз вылас. Сэтчин кышасяс воньнас да онняюрöн öшöтчас. Öшалö да горзö:

— Легонтай, легонтай! Вöлiм куим вон, сэсся öтiк кольччис!

Мачека сiйö сэтчö и коляс, а гортас висьталас, што зонкаыс кытчöкö öштöтчис.

Куимöтпырсяс мужык иньдöтас иньсö да медучöт зонсö зород тэчны. Нiя тэчасö зородсö, пондасö гортö локны. Мачека и шуö:

— Видзöт жö, зонка, пипу йылас листыс кытшöм гöрд! Кайлiн бы да судзöтiн, а ме бы тэныт сэтiсь йöрнöс вури.

— Но, ме судзöта, — шуас зонкаыс да каяс пипу вылас. Сэтчин йинас кышасяс ув бердö и öшöтчас юрнас увлань, öшалö да горзö:

— Легонтай, легонтай! Вöлiм куим вон, öнi некин эг лоö! Мачека сэтчö и коляс сiйö, а гортас висьталас, што зонкаыс кытчöкö öштöтчис.

Турунсö вайны мужык мунас иньыскöт. Локтасö бадь дынö, а бадь дынын кинкö горзö:

— Легонтай, легонтай! Вöлiм куим вон, да лёк морт оланнымöс босьтiс...

Локтасö кыдз весьтö, а кыдз дынын кинкö сiдз жö горзö, кыдз и бадь дынын. Мужык шы оз сет, одзлань вöвсö иньдöтö. Но локтасö нiя пипу весьтö, и сэтöн тожö кинкö горзыны пондас.

Мужык и шуас:

— Мый эта лоö? Кинкö горзö, а некин абу.

— Ме ог тöд сымдасö, — шуас иньыс да чеччас додьсис и вöрлань котöртас.

Вежöртас мужык: иньыс сылöн не морт, а обороника. Сiя и босьтiс зонкаэслiсь олансö. И вöтас обороникасö, додь бöрас гезöн кöрталас да быдöс деревняэсö гöгöртас: видзöтö пö, отир, кин зоннэзöс вийис.

Сэсся чапкас обороникасö кырасö.

Певрунь

Олöмась-вöлöмась öтiк гозъя. Олöмась нiя не дорас, не бöрас, а какраз му шöрас. И вöлöма нылöн ныв Певрунь, бытшöм да рам, ласков да удав. Ай-мамыс дивуйтчыны оз вермö сы вылö, сэтшöм ни вежöра да уджалiсь. Оласö, оласö нiя, а мамыс кут да и кув. Горзö нылыс, горзö айыс, да мый то керан? Дзебасö, одзлань олöны ая-ныла. Сэсся гöтрасяс мужыкыс, инькасö нылöн босьтас. Нывкаыс шадраа да чукыля сина, зато паськöмыс вылас чегö, сизьньöвтö-пежъялö, бурысся-бур.

Уна я, не я оласö, токо мачекаыс оз понды радейтны Певруньсö. Да и нылыс эз понды тöрны, косöйезнас токо видзöтлö Певруньыс вылö да сё лöсьöтчö мыйöн-нибудь нагорнитны.

Вот и шуö öтпырись кöзяиныслö инькаыс:

— Вошты кытчöкö менам син одзись торк кудельтö. Эз понды сетны олансö нылöлö.

Думайтiс-керис старик да корö иньсö:

— Норовит эшö поди вежöртчас.

Дыр я, не я оласö, вились иньыс ыждалö, зника оз сет мужыклö. Мый керны? Доддялас вöлоксö мужык, пуксьöтас Певруньöс розвальö и кыскö карö. Рыпкö-гöнитö вöлокыс, додьыс юж-важ ыскöвтö, морозко вапсыррезнас шовкöтö. А ая-ныла гегдöны-дрöжитöны: зипунокыс да шабурокыс эд оз ни унасö шонт.

Мунасö, мунасö да ойшöрнас ыджыт вöрö пырасö. А паныт нылö — кöиннэз.

— То тай, — думайтö мужык, — ульöн тай инькаö сёйис нылöс, и вöлöс, и ачымöс.

Бергöтас вöвсö бöр, оз и казяв, кыдз нывсö öштас, и сточма вöрсис петас. Нывка кольччас вöрас, кулöм не ловъя сулалö. Кöиннэс токо пиннезнаныс чакöтöны, кытшöвтiсö нывкаöс.

Певрунь кунис синнэсö, чужöмсö киэзнас вевттис. Друг кылö морт шы:

— Эн пов, басöк чужöм, видзöт ме вылö.

Дзар керис нывка: одзас гöрд йöрнöса да лöз вешъяна зонка сулалö.

Висьтасис Певрунь, кыдз сiя татчö сюрис.

— Чöв, — шуö зонкаыс, — мунам ме ордö овны, и некытшöм лёк тэнö оз босьт.

Сибöтчисö ыджыт ньыв дынö, зонка горöтчис:

— Матушка Паранюшка, осьт меным ыбöссö.

И сэк жö ны одзын кыксувда керку быдмис, öшыннэзсис зарни югыт койö, а гöгöр саддэз дзоридзалöны. Садас отир ветлöтö, орсöны да сьылöны, и некытöн öтiк пöрись морт оз тыдав.

Удiсö-вердiсö Певруньöс, бур паськöмö пасьтöтiсö, топ барыняöс. Зонка кольччыны тшöктö, ов пö миянкöт. Да айсö Певруньлö жаль, оз согласитчы: гортö пö лэдзö.

Сэк зонкаыт шовк керис оча ки — одзас локтiс кöин.

— Сет, — шуö, — сватушко, эта нывлö, мый босьтас, да нуöт гортас.

Нем эз босьт Певрунь: токо пась да пимиэз корис, шоныт шальöн шалясис. Пуксис кöиныс вылö — шакардаöн гортöдззас локтiс.

Дивуйтчö Певруньлöн айыс, радöн нывсö панталö, а мачекаыс эшö лёкжыка видчö: медбöръя копейкасö пö гортiсь ылöтiн, Певруньтö роч аканьöн керин. Мужык и висьталас сэк, кыдз аркмис.

Чулалö лун, чулалö неделя. Инька сёйöмöн-сёйö мужыксö:

— Нуöт сэтчин и менчим кагаöс да сiдз жö пасьтöт.

Стариклö нем керны, ковсис нуöтны.

Локтiсö ойшöрнас сiя жö вöрö, а паныт — кöин табун эрзö. Мужык бергöтiс вöлоксö, пöрöтiс нывкасö лымас, уськöтчис розваляс — и сточма гортас.

Ой чулалiс, лун сибалiс, а нывка эз берт гортас.

«Натьтö, оз вермы öтнас вайны добросö, — думайтö мамыс. — Ужо, ветла ачым, отсала малин тусьöлö».

Доддялiс вöлоксö мужык, розвальö веж идзас чапкыштiс, пуксьöтiс иньсö да иньдöтiс вöрас.

Мунiс иньыс да и öнöдз сё ветлö, а ая-ныла сэксянь бура олöны.