Кöин-лекар

Кöркö олöмась пöрись гозъя. Локтöм тулыс. Колö кöдзны сёртни, а некытчö, и кöдзöмась сiйö голобничаö. Öтпыр старука кайöма видзöтны сёртнисö да усьöма и стрöйдiсьöма.

Старик мунö кошшыны лекарöс. Пантасьö кöч. Старик и юалö:

— Кöчиньöй, кöчиньöй, он я куж лечитчыны?

— Ог, — шуö кöч.

Старик мунö одзлань. Дыр я, не дыр я мунас и панталö ручöс. Бöра пондö юасьны:

— Ручиньöй, ручиньöй, он я куж лечитчыны? Руч откажитчö.

Старик эшö одзлань мунö и пантасьö кöинкöт. Юасьö, оз я куж кöиныс лечитчыны. Кöин висьталö:

— Кужа. Ме — первöй лекар.

И мунö старик ордö. Старик лонтö баня. Лэдзчöтö баняö старукаöс. Пывсьöтны старукасö пырö кöин, а старик передникын сулалö.

Сулалöв-керис и пондiс юасьны:

— Чöвтчит ни?

— Эгö на.

— Койит ни?

— Эгö на.

— Пывсит ни?

— Эгö на.

— Пасьтасит ни?

— Эгö на.

Стариклö лоис думно, и сiя осьтыштiс ыбöссö. Кöин сы коста старукасö сёйöма ни, а бöжсö пöимас туплялöма Кыдз старикыс ыбöссö осьтас, кöиныс сылö синнэзас бöжнас öвтыштас-вачкас. Старик слепмас, а кöин сы коста пышшас.

Вот и лекар — старукасö сёйис!

Кыдз старукаöс ош лечитiс

Олöмась-вöлöмась пöрись гозъя. Старик керку пöлскас кöдзас сёртни. Чулалас неделя, старука шуö:

— Видзöтiн бы, гед, ыджыта я сёртниыт быдмис. Старик кайлас пöлскö да и шуö:

— А-а, чунь пасьта вöлись.

— Но, мед эшö быдмыштас. Чулалас мöдiк неделя, старука шуö:

— Видзöтiн бы, гед, ыджыта я сёртниыт быдмис. Старик кайлас пöлскö да и шуö:

— А-а, панёк пасьта вöлись.

— Но, мед эшö быдмыштас. Чулалас куимöт неделя, старука шуö:

— Видзöтiн бы, старик, ыджыта я сёртниыт быдмис. Гед кайлас пöлскö да и шуö:

— О-о, бекöр пасьта ни! Колö керны.

Каясö пöлскö, керасö сёртнисö, пондасö лэдзчыны. Старик сёртнисö лэдзчöтö, старука — корсö.

Старик лэдзчыштас — некытчö оз кышась. Старука дубас подулнас пиня тув бердö кышасяс да посöдзас усяс. (Леснич туйö нылöн пуовöй тула пиня вöлöма.) Усяс да бура и доймас.

Старик дойдöм местасö чышъянöн каттяс — старукалö абу долытжык; сёртни кор пуктас — оз отсав; туруна ваöн мавтас — старука оз веськав.

Но, колö пö нуöтны лекар дынö.

Старик пуксьöтас старукасö дадь вылö (тележкаэс сэк абу на вöлöмась), кыскö сiйö да шувлö:

Юж вывтi юж-яж, Турун вывтi кыш-паш, Потш вывтi турс-тарс,

Пантасьö кöч, старик сылiсь юалö:

— Кöчö-сочö, лечитчыны кужан? Кöч сылö:

— Ог, ог, ог!

Старик мунö одзлань да шувлö:

Юж вывтi юж-яж, Турун вывтi кыш-паш, Потш вывтi турс-тарс.

Пантасьö руч, старик сылiсь юалö:

— Ручö-сочö, лечитчыны кужан? Руч сылö:

— Ог, ог, ог!

Старик мунö одзлань да шувлö:

Юж вывтi юж-яж, Турун вывтi кыш-паш, Потш вывтi турс-тарс.

Пантасьö ош, старик сылiсь юалö:

— Ошö-сочö, лечитчыны кужан? Ош сылö:

— Кужа, кужа!

Старик вайöтас ошсö гортас, лонтас баня, ештöтас и нуöтас старукасö лечитны. Ош пырас старука дынö баняас, а старик кольччас öтöрö. Котöртас баня гöгöрöт, локтас ыбöс одзас, юалö:

— Чöвтчитö ни?

Ош висьталö:

— Эгö на.

Старик круг котöртас да юалö:

— Чöвтчитö ни?

— Чöвтчим.

Старик круг котöртас да юалö:

— Пывситö ни?

— Эгö на.

Старик круг котöртас да юалö:

— Пывситö ни?

— Пывсим.

Старик круг котöртас да юалö:

— Пасьтасят ни?

— Огö на.

Старик круг котöртас да юалö:

— Пасьтасит ни?

Ош висьталö:

— Пасьтасим, лок петкöт старукатö.

Старик осьтыштас ыбöссö, ош сылö синнэзас пöимöн койыштас да пышшас. Старик гуддьöв-керас синнэсö да казялас: гор вылын мыйкö чочком видзö. А этö ошыс старукасö сёяс да лыэсö öтлаö тэчас.

Гед горзас, горзас да пондас думайтны, кыдз старукаыс понда ошкöт вештiсьны.