Нылочка да еги-баба

Нылочка мунас нюр дорö пиканавны. Аддзас сiя кöз увтiсь урпиянöс — учöтик-учöтик, шырок ыждышта. Босьтас нылочка урпиянсö да позас пуктас. Аддзылас этö урпиянлöн мамыс, шуас:

— Аттьö тэныт, нылочка. И ме отсала тэныт, кöр ковсяс, токо кытсав: «Уру, уру, лок ме дын, отсав меным».

«Мый ни тэ поди, урыс, отсалан?» — думайтö нылочка. Мунас, мунас, кайпиянöс аддзас, и сiйö позас лэбтас.

— Аттьö тэныт, нылочка, — шуö кайпияныслöн мамыс. — Ковсяс кö отсöт, кытсав менö: «Кеню, кеню, лок ме дын, отсав меным.»

«Мый ни тэ, кайыс, поди отсалан?» — думайтö нылочка.

Мунас, мунас — горшыс пондас косьмыны. Аддзö: керкуок сулалö, и пырас сэтчö. А сэтöн еги-баба олöма. Сiя казялас нылочкасö да кутны пондас. А синнэс сылöн гöнаöсь и умöля аддзöны, токо нюкнас мортсö кылö. Жын-жын пöдналас ыбöссö и кошшö нылочкасö.

Куталас, куталас — оз шед нылочкаыс. Керас керкусö куим пельöсаö ― оз шед; керас кык пельöсаö — оз шед; керас öтiк пельöсаö — кутас нылочкасö, жаритны мöдас. А нылочка кöсыник-кöсыник, дзик сартас. И лэбтас нылочкасö гоогничаö, йöрданö йöртас: ась пö олыштö сэтчин, поди ёнмас мымдакö. А гоогничаыс сылöн кымöр увтас вöлöма, кöз йыввез вевдöрын.

Аддзö нылочка: умöль делоыс, и горзыны пондас да причитайтны:

Ме тай урпиянсö

Умöльсис кыски,

Ме тай кайпиянсö

Умöльсис мездi.

А кин инö менö

Йöрдансис лэдзас?

И усяс нылочкалö тöдвылас урлöн баитöмыс. И шуас сiя, кыдз урыс велöтiс: «Уру, уру, лок ме дын, отсав меным».

Видзöтö: ур гыж-важ пу йылöдз кайыштiс, юалö:

— Мый месянь колö, нылочка?

— Отсав меным эстiсь петны, — шуö нылочка. Нем оз висьтав урыс, звигнитас-чылас вöрас.

Бöра горзö нылочка, курыт синвасö му вылас рудзöтö. А сэтчö öтiк ур сы дынö чеччöвтас, мöдiк, куимöт... Тыр и тыр локтасö да давай-ко йирны йöрдан игансö. Йирасö, йирасö — осьтасö да вöрас чыласö.

Но кыдз эстiсь лэдзчыны нылочкаыслö?

Сiя бöра горзö да причитайтö:

Ме тай урпиянсö

Умöльсис кыски,

Ме тай кайпиянсö

Умöльсис мездi.

А кин инö менö

Му вылас лэдзас?

И усяс нылочкалö тöдвылас кайыс. И шуас нылочка, кыдз кайыс велöтiс: «Кеню, кеню, лок ме дын, отсав меным». Видзöтö: сы дынö кай пырк лэбзис, юалö:

— Мый месянь, нылочка, колö?

— Отсав меным лэдзчыны му вылас, — корö нылочка. Кай шы оз сет, бöр лэбзяс вöрас. А нылочка горзыны кутчас, синваэсö му вылас рудзöтны.

Сэтчö шур-р лэбзяс сюрс кай, нiя öн моз ольсыштсясö йöрдан одзас, каттьыштасö сэтчö нылочкасö да лэбзьöтасö гортас.

Вот эд кыдзи: бур понда бурöн и вештiсьöны.

Гона да öмека

Парма яг дорын олöмась-вöлöмась вöралiсь Тошко гозъя. Вот öтпыр Тошко локтас вöралансянь öддьöн мыдзöм, джоджас гым чапкас пельпон вывсис сьöкыт котомасö и шуö:

— Но и мыдзи ме талун. Пöрисьма, а юрвердiсь абу. Бур бы вöлi, лоис кöбы менам зон.

Эна кыввес пöртчисö забыльö. Год бöртi Тошколöн инь чужтiс не öтiк зонöс, а дажö кыкö. Тошко гозъя öт зоныслö сетiсö нимсö Гона, а мöдыслö Öмека.

И вот чулалöны воэз. Гона да Öмека быдмöны, а Тошко гозъя радуйтчöны. Кынымкö год бöртi Тошко кулiс, сыбöрын недыр мыйись кулiс и иньыс. Гона да Öмека кольччисö öтнаныс. Нiя велалiсö вöравны, чериавны, гöрны-кöдзны. Дас вося унажык нылö эз и вöв, а уджалiсö не умöльжыка ыджыт мортся.

Вот öтпыр нiя уджалöны ыб вылын, а матi ны дынöт мунö сар Кабала. Казялiс сiя кык вонöс да сэк жö ыстiс ны дынö ассис слугасö: мун пö вайöт ме дынö энö кык зонкасö.

Слуга вайöтiс Гонаöс да Öмекаöс сар одзö. Сар и юалö:

— Висьталö меным, зонкаэз, кыдз тiянöс нимнаныт шуöны?

— Менö шуöны Гона.

— А менö Öмека, мийö кык вон.

Сар босьтiс энö зонкаэсö сьöрас. Локтiсö нiя сар сьöрын подöн сы гажа дворечö. Чукöртiс сар Кабала ассис министрресö да советниккесö и пондiс нылö баитны:

— Господа, ме вайöтi кык зонкаöс, айтöм-мамтöммезöс; сетö меным совет, мый ныкöт керны.

Министррез да советниккез шушкöтчисö ас коласаныс да висьталiсö сарыслö:

— Государ, эна зонкаэс удж радейтiсьлöн зоннэз, ась нiя асьныс бöрйöны, кытшöм велöтчöм пыр нылö мунны гленитчас.

Сар Кабала кольччис довольнöй эта министррез советöн. Сiя корис дынас Гонаöс и юалö:

— Кывзы, зонка, мый бердö тэныт окота велöтчыны?

— Тэнат величество, — шуис Гона, — тшöкты керны двореч оградаат кузнича, эта кузничаын дора ме тэныт стоб да сы кузяö, што нёбоöдз!

Вежöртiс сар Кабала, што Гона бур кузнеч, и висьталiс:

— Кольччы кузнечöн.

Сыбöрын корис дынас Öмекаöс и юалiс:

— А тэ, зонка, мый бердö велöтчыны пондан? Öмека видзö ответ:

— Тэнат величество! Вот кузнеч вонö дорас нёбоöдз кöртовöй стобсö, сэк ме эта стоб кузя верма кайны вылö нёбоöдз и сэтчинсянь гöгöр понда аддзыны, мый керсьö куимдас сарствоын и сизимдас государствоын. Мый бы ме эг казяв, быдöс тiянлö понда висьтавны.

— То тэ кытшöм мортыс юра да вежöра. А он ли тэ вермы стоб вывсяняс казявны катшамировöй сарство, кöдаын олö басöк и басöк ныв. Ой и лун сiя пукалö терем öшын одзын да видзöтö öтiк ладорö. Если тэ верман сiйö казявны да сыбöрын вайöтны менам дворечö, сэк ме тэнö бура наградита, а если он вермы, то прошшайтчы чочком югыткöт — орöта юртö плака вылын.

Эта кадö кöртовöй стоб вöлi готов ни. Öмека, кыдз ур, чылöмöн кайис стоб вылас, пуксис стоб помас да пондiс видзöтны, кытöн мый керсьö. Казялiс сiя и катшамировöй сарствосö, казялiс сiдзжö и терем öшын сайись басöк нывсö саревнасö. Видзöтöв-керис эшö гöгöр да лэдзчис стоб вылiсь, локтiс сар Кабала дынö и баитö:

— Тэнат величество! Казялi ме саревнасö; поди сетан приказ мунны эта катшамировöй сарствоö? Ме готов.

И сар висьталiс:

— Лэдза кыкнаннытö, токо мунö да вайöтö ме дынö этö басöк нывсö-саревнасö.

Недыр лöсьöтчисö Гона да Öмека петны туйö. Мый колö — сёян, паськöм — тэчисö котомаэзö и мунiсö эта Кабала сарствоись. Мунiсö, мунiсö кузь туй вылöт ас коласаныс баиттöн и локтiсö лöз паськыт саридз дорö. Этö саридзсö нылö колö вуджны, а вуджнытö немöн. Гона кыскис косксис чер, пöрлалiс пуэз да керис быдса кораб. Пуксисö кык вон эта кораб вылö и мунiсö одзлань.

Öмека вöлi öддьöн удав, визыв и радейтiс каннез. Сiя кутiс саридз дорсис руд каньöс да сьöрас нуöтiс. Этö каньсö Öмека велöтiс йöктыны.

Саридз вылöт уйисö öддьöн дыр, а сыбöрын локтiсö сiя сарствоö, кытöн олiс басöк саревнаыс. Кораб сувтöтiсö öзынö, петiсö берегö. Öмека босьтiс морос одзас руд каньсö, и нiя мунiсö воныскöт сiя терем öшын увтö, кытöн олiс басöк саревнаыс. Локтiсö нiя терем öшын увтас, Öмека лэдзис каньсö кисис да тшöктiс йöктыны. Токо бус кайö — пиньласьö каньыс, быднёж йöктö. Эта коста басöк ныв Саревна пукалiс öшын одзын да и казялiс каньлiсь йöктöмсö. Эттшöм дивосö сiя и вöтöн эз аддзывлы. Кытсалiс ассис служанкаöс да шуис:

— Мун жö вон эна кык том молодеч дынö да кор нiйö, ась пырöны терем оградаас.

Служанка петiс Öмека да Гона дынö и пыртiс нiйö терем оградаö. Сэтчин сулалiс ни басöк ныв Саревнаыс. Сiя юалiс воннэзлiсь:

— Том молодеччез, тi висьталö меным, кыдз этö звироксö шуöны нимнас? Миян сарствоын эттшöм руд звироккес абуöсь: ок, кыдз бы сiя меным колö!

Öмека сетiс муöдз поклон да висьталiс саревналö:

— Эта звирокыс шусьö кань, а öддьöн кö сiя тэныт гленитчö, ме верма и козьнавны.

Рад лоис саревна эта подароклö и шуö:

— Тiйö вермат овны эстöн жö, теремас, и сэтчöдз, кытчöдз эта звирок оз велав ме дынö.

— Менам эм кораб, — муöдз поклон сетöмöн висьталiс Öмека, — и сiйö ме ог вермы кинлöкö мöдiклö доверитны. Этасянь мийö ог вермö кольччыны тэнат теремын. А ог кö понды тэныт мешайтны, то ме верма теремат и вовлыны этö звироксö велöтны.

Саревна эта вылö согласитчис. Öмека пондiс вовлыны теремö быд лун.

Вот öтпыр Öмека и баитö саревналö:

— Тэ бы ветлiн да видзöтiн, кытшöм менам корабыс, и уна бы аддзылiн сэтшöмö, мый тэнат государствоын абу и мый ме вайи сар Кабала государствоись.

Басöк ныв Саревна думайтыштiс и шуö:

— Ладно, ладно, ме ветла тэнат кораб дынö да видзöтышта.

Ашынас саревна босьтiс сьöрас дас кык мымда служанкаэз да локтiс Öмека кораб дынö öзынö. Гона казялiс саревнасö пристанись да котöртiс сылö паныт корны, мед пырис кораб пытшкас.

— Бытшöм нылiньöй, сарлöн нылiньöй, лок пыр кораб пытшкас, видзöт да тöдмав быд чужöма товарсö, токо пыр öтнат: миян эм сэтчин секретнöй товар, кöдö оз позь мыччавны тэнат служанкаэзлö.

Саревна эз и думайт, мый мöдö керны Гона, и служанкаэзлö тшöктiс кольччыны берегö, а ачыс пырис кораб пытшкас. Кыдз токо саревна тальччис кокнас кораб вылас, Öмека сетiс аслас командалö приказ:

— Лэбтыны паруссэз, причаввез керавны.

Öтiк минутаöн лэбисö паруссэз и вöлiсö кералöмöсь причаввез, кораб стрелаöн пондiс мунны.

Токо сэк саревна казялiс, што сiйö бöбöтiсö, и öтiк секундаöн сiя пöртчис чочком юсьö, öвтыштiс борддэзнас да лэбтiсис воздукö. Но и Öмека эз узь. Сiя кватитiс пишаль да гымнитiс лыйис. Юсь пондiс усьны саридзö, да инмис кораб вылас. Гона кватитiс сiйö да пыртiс кораб каютаö. Юсь бöра пöртчис саревнаö. Уйöны Гона да Öмека, сибöтчöны асланыс сарство береггез дынö. А сар Кабала лун-мöд ни тöрчитö-тальсьö öзынын да ылö саридз вылас видзöтö.

Кораб локтiс öзынö. Сар юасьö Гоналiсь да Öмекалiсь, кыдз пö тiйö ветлiт, эз я вöв мыйкö умöль, вайöтiт я пö тiйö саревнасö?

Гона да Öмека видзöны ответ:

— Тэнат величество! Саревнаöс вайöтiм, но сiя узьö. Сар тшöктiс слугаэсö мунны дворечö да доддявны каретаö тройка воронöйезöс. Сэк жö эта вöлi керöм и тройканас, дзик тöвчикöн, локтiсö öзынö сарлöн слугаэс. Саймöтiсö саревнасö, пуксьöтiсö эта каретаö, и сар Кабала локтiс сыкöт аслас дворечö. Саревна и шуö:

— Кужин кö тэ аслат китросьöн менö вайöтны, дак тэныт меöн и владейтны.

Сар Кабала локтiс саревна одзö да висьталiс:

— Благодарита тэнö эта понда. Ме пыр думайтi тэ йылiсь, пыр гажтöмтчи, эг вермы лöньсьöтны ассим пым сьöлöмöс. Ашын жö мунам венчайтчыны.

— Огö на, — шуö саревна. — Вот сета ме тэныт öтiк заданнё: судзöт менам государствоись менчим вöв да карета.

Кывзiс энö кыввесö сар Кабала да мунiс аслас палатаэзö, корис дынас Гонаöс да Öмекаöс, висьталiс, мый колö судзöтны саревнаыс государствоись.

Öмека и шуö:

— Тэнат величество, вай меным срок дасвит лун да сет конюшнясит медбур тройка воронöйез, быдöс лоас керöм.

Сэтöн жö сар Кабала сетiс приказ аслас конюккезлö, медбы нiя эз падмöтö Öмекасö, кöр сiя пондас конюшняись бöрйыны медбур тройка воронöйез. Öмека бöрйис воронöйесö, доддялiс зарни каретаö, прошшайтчис Гонакöт и мунiс.

Дыр ли сiя ветлiс, чожа ли, эта йылiсь нем эз кывсьы, но сёжö локтiс саревнаыс государствоö, сувтiс патераö старука ордö. А мöд лунас öктiс быд берсясö: чунькытшшез, пристежжез, пелькытшшез, булавкаэз да мунiс торгуйтны. Локтiс теремö и вузалö этö товарсö сарлöн служанкаэзлö, кучеррезлö и мöдiк слугаэзлö. Вузалiс быдöс.

Мöд лунас этö жö товарсö тэчис чукöрöн коробъяö, öшöтiс сиви вылас да локтiс теремö. Ветлöтö терем оградаöт и смекайтыштлö, кытöн мый куйлö, кытöн сiя каретаыс. Сiдз ветлöтiс нёль лун. А витöт лунö мунiс базарö, небис виннöй погребись быдса нёльдас ведра тöрик бочка вина. Локтiс теремö, этö нёльдас ведра тöрик бочкасö быгыльтiс оградаö и баитö:

— Локтö-ко тi ме дынö, вайи ме тiянлö бур зелля. Служанкаэз, кучеррез, конюккез, поваррез — быдöнныс пуксисö эта бочка гöгöр да пондiсö юны не стоканнэзöн, а кöшшезöн. Юисö, юисö и кок йывсиныс усисö да быдса сутки сiдз туплясисö.

Öмека босьтiс кучер зепись ключ, осьтiс конюшня ыбöс, вöвсö петкöтiс, доддялiс каретаö да шутньöвтiс-мунiс. Сымда и вöлi.

Локтiс сар Кабала сарствоö, сувтiс сар одзö и баитö:

— Тэнат величество, тэнчит приказтö тыртi быдсöн, вот тэныт и вöв, вот и карета.

Благодаритiс Öмекаöс сар Кабала, наградитiс кыкнан вонсö зарниöн да лэдзис гортаныс. А ачыс ёртасис эта басöк ныв-саревнакöт, но вексö эз жö олö.

ОШПЕЛЬ

Не ылын, не матын олöмась-вöлöмась коми му вылын, парма ягын, изъя ю дорын öтiк вöралiсь гозъя. Öтпыр жöникыс мунiс вöравны, а иньыс — ягöдавны и öшис парма ягас. Сiйö кутiс ош и нуöтiс аслас берлогаö. И олiс эта инькаыс ошкöт берлогаас куим год, чужтiс зон, кöдалö сетiс нимсö Ошпель.

Кыдз сiя зорамис, эта йылiсь ме ог вермы висьтавны. Но öтпыр тулысöн Ошпель петiс берлогасис да пышшис. Мунас парма ягöт, вылын керöс пöлöн, лöгасяс да и керöслö бокас брын чужъяс. Эта керöсыс ылöкодь вешшас бокö. А керöс увтсис петас морт да горöтчас:

— Менö шуöны нимнам Сюзьöн, босьт менö сьöрат, ась ме лоа тэныт учöтжык вонöн.

Мунöны кыкöн. Локтiсö ыджыт ю дорö, а берег увтiсь тюк мыччисис морт да баитö:

— Менö нимнам шуöны Петукöн, босьтö менö сьöраныт, ась ме лоа медучöт вонöн.

И мунöны куимöн одзлань. Мунiсö, мунiсö и локтiсö кыксувда керку дынö. Пырисö эта керкуö, а керку пытшкас абу некин. Лонтiсö гор, пуисö сьöла да дозмöр яй и пуксисö пажнайтны.

Пажнайтöм бöрын шоччисьыштiсö, и Ошпель да Сюзь мунiсö вöрö сьöлаэз кыйны, а гортолiсяс колисö Петукöс.

Мунöм бöраныс недыр мыйись джоджувсянь кышки-пашки петiс старик, ачыс аршин сувда, а тошыс куим аршин кузя. Чеччöвтiс эта старик, кутiс Петукöс юр чубöттяс и давай вартлыны. Клёпöтiс да клёпöтiс Петуксö и талис джодж половича коласö шеляс. Ачыс берездасис и пöртчис кудель ношаö да усис джоджулас.

Рытнас Ошпель да Сюзь локтiсö вöралансянь и корöны ужнайтны. Петук и баитö:

— Бур воннэз тiйö менам, öддьöн и кольми талун ме и пуны нем эг вермы.

Ошпель да Сюзь весöтiсö сьöлаэз и дозмöррез, лонтiсö гор, пуисö яйсö да ужнайтiсö.

Ашынас чеччисö и мунiсö вöравны Ошпель да Петук, а Сюзьöс колисö гортолiсьö.

Токо ештiсö нiя мунны, кыдз бöра джоджувсянь петыштiс лöг старик, ачыс аршин сувда, а тошыс куим аршин кузя, и ыкöстiс:

— Кытiсь тiйö локтiт сэтшöм отир да юасьтöг-висьтасьтöг селитчит менам керкуö! Ноко вермасям, кöда вынажыкыс.

Кутiс Сюзьöс юр чамырöттяс и давай вартлыны. Вартлiс, масьтiс, талис да талис джодж половича коласас шельö, ачыс берездасис, пöртчис кудель ношаö да усис джоджулас.

Ошпель да Петук локтiсö вöралансянь, сёйны корöны.

— Кывзö тi, менам воннэз, öддьöн и кольми ме, нем эг и пу, — баитö Сюзь.

Ошпель гыж-гыж керис юрбöрсö и нем эз висьтав. Сьöла да дозмöр яйись пуисö шыд и ужнайтiсö.

Куимöт асылö мунiсö вöравны Сюзь да Петук, а Ошпель кольччис гортолiсьöн. Мунöны нiя и ас коласаныс баитöны:

— Эта лöг старикыс талун Ошпельнымöс ёна таляс. Пукалö гöбеч дорын Ошпель и ныр увтас гусьöник сьылö:

Ок, и бур менам ньöвъёсь,

Сэтшöмсö некысь он бось!

Сiйö ачым кери ме...

Югыт шондi, кытöн тэ?

Гым-ёрк джоджувсянь петыштiс аршин сувда старик, куим аршин кузя тош, и давай ыксыны:

— Сьылан, зонка! Сьылöтö тэнö йöз керкуас, кытшöмкö шондi йылiсь эшö казьтылан! Талун ме тiянöс куимнаннытö сёя. А сёйтöдззас давай вермасьыштам, кöдным вынажыкöсь.

Кутчисисö кыдз колö да пондiсö öта-мöднысö кыскавны. Кыскалiсö, пиньлалiсö и некöднысö озö вермö. Тышкасик коста уськöтiсö пызан вылiсь пань. Старик и баитö Ошпельлö:

— Лэбты джоджсис паньсö пызан вылö.

Мышкыртчис Ошпель лэбтыны паньсö, а старик эта коста уськöтчис спина вылас и давай мый вын вартны лопаткаэз коласö.

Ошпель кыдз чывкнитiс спина вывсис старичишкасö, старик усис да инмис усьнытö джоджув осьта весьтас; невна бы дак и пышшис джоджулас, но Ошпель ештiс кутны кузь тошöттяс.

Кутiс тошöттяс, джодж бердас размöд брякнитiс и петкöтiс картаö, кöрталiс тош бердас гез да тошöттяс öшöтiс медвылын слега бердö.

Локтiсö вöралансянь воннэз, юалöны:

— Но, кыдз, эн кольмы?

— Мыля кольма, эг. А кольмöтчан головнясö петкöтi. Локтö ме сьöрö, мыччала.

Петiсö нiя картаö, а слега бердас öшалö токо öтiк тош, ачыс старикыс пышшöма. Ошпель и шуö:

— Вот мый, воннэз, ковсяс аддзыны кузь гез да лэдзчисьны эта гез кузя джоджулас, кошшыны этö стариксö.

Аддзисö гез. Ошпель эта гез кузя лэдзчисис джоджулас и казялiс öддьöн гажа видз. Мунiс, мунiс эта видз вылöт и локтiс керкуок дынö. Пырис керкуокас, а сэтчин пöрись гозъя пукалöны пызан сайын, сёйöны, кыкнанныс дзорöсь и слепöйöсь.

Локтiс Ошпель ны дынö, босьтiс пань да пондiс öтлаын сёйны. Сёйисö, сёйисö пöрись гозъя, эз пöтö и баитöны ас коласаныс:

— Быд коста эта жö бекöрись сёяныс тырмывлiс, а талун то эз тырмы. Кинкö, натьтö, сёйö миянкöт. Пöрись кö морт, ась сiя миянлö вон туйö лоас, а том кö морт — зон туйö лоас.

Ошпель и шуö:

— Ме татöн, том морт. Ме локтi ыджыт делоöн: кошша аршин сувда старикöс.

Пöрись гозъя öтiк öмись висьталiсö:

— Эта аршин сувда старикыс öддьöн и öбидитö миянöс. Витдас öшка сiя миянлiсь сёйис. Нерадöсь ни лоим. Кольччы миянлö зон туйö и пастучит мöс табуннымöс.

Кольччис Ошпель эта пöрись гозъя ордö, кутчисис пастучитны мöс табунсö. И вот сiя пастучитö, ветлöтö поскотина вылöт, а аршин сувда старик пöртчис ошö да локтiс виль пастук дынö.

Ошпель гусясьöмöн локтiс эта ош дынö, кутiс сiйö пеллезöттяс, лэбтiс юр вевдöрас да из бердö брякнитiс, вийис. Сибöтчис бöр мöс табуныс дынö, видзöтö: неылын сулалöны куим нывка, басöкöсь и басöкöсь. Нiйö кинкö домалöма чепöн, а чеп поммесö замокöн пöдналöма.

Ошпель жугдiс замоксö, орлалiс чеппесö, мездiс куим басöк нылöс и нуöтiс сьöрас. Сибöтчис гез дынö, трекнитiс сiйö, а воннэз лэбтiсö нiйö нёльнаннысö.

И ёртасисö куим вон эна куим басöк нывкöт и öнöдз олöны öддьöн гажöн да бытшöма.

ЯГ-БАБ ДА ЗОНОЧКА

Вöра яг дорын оласö пöрись гозъя. Некин нылöн абу вöлöма, вот и, медбы ойлунсö джендöтны да оланнысö гажöтны, босьтасö быдтасöс — зоночкаöс. А öтка зоннэс, ды эшö быдтассэс, сэтшöмöсь: мый нылö колö — йирись судзöт да сет.

Пондас корны зоночка айыслiсь дадь: вай пö да и токо!

Кералас старик кыдзок, лöсъяс полоззэз сэтiсь, горö пöжны сюйыштас. Небзясö горас полоззэс, старик нiйö бала вылын кöсталас, копыввез да нашеппез садитас — и дадь готов.

― Эн ыслась, зону, яг вывсяняс, — шуöны ай-мамыс, — сэсчин яг-баб олö, кутас тэнö.

Оз кывзы нiйö быдтасыс — каяс яг вылö. И токо лöсьöтчас ыскöвтны, кыдз керöс увтсяняс морт шы, кылас:

— Татчö ыскöвт, татчö! Татi öддьöн шыльыт туйыс!

Ыскöвтас зоночка бокö и некинöс оз аддзыв.

Ашынас бöра каяс ягö, бöра лöсьöтчö ыскöвтны, а улiсянь кинкö корö ни:

— Татчö ыскöвт, татчö! Татi öддьöн шыльыт туйыс!

Но быдтас ыскöвтас мöдöрö.

Öддьöн гленитчис зоночкалö ысласьны яг керöс вывсянь, и куимöтпыр сэтчö жö локтас сiя. Öтiклаö лöсьöтчас ыскöвтны — керöс увтсяняс некин оз чирзы. Мöдiклаö дадь нырсö бергöтас — шы не тöв. И лэдзас дадьсö веськыта, тöння туй кузя. А эта туй вылö яг-баб ассис кыйсяннэз тэчас, и зоночка пырас какраз яг-бабыс мордаö.

Пессьö ысласись, мездöтчö бы эта налькись, но некыдз оз вермы петны мордасис. А яг-баб радсяняс тоин кок йылас йöктö, кузь ковпиннезнас чакöтö, куран киэзнас лымсö куртö-картö да нёжтöма кижгö.

— Шедiс яйыс, хе-хе-хе! Шедiс небыт, хе-хе-хе!

Вежмасьöв-керас сiдз яг-баб, вöлись лэбтас мордасö пельпон вылас да нöбöтас гортас и висьталас ныввеслö:

— Ме муна мöдiк кыйсяннэз видзöтны, а тiйö страпайтö сы коста: зоночка тымусiсь пирöггез керö, юрись-кокись юр-кок пöжö, а яйсö жаровняын жаритö.

Мунас нёжтöм куль, а ныввес зоночкалö ассиныс уджсö тшöктöны керны: ыджытжыкыс — ва кайöтны, шöрöтыс — пес пыртны, медучöтыс — öрын капуста масьтыны.

Кайöтлас зоночка ва, пыртлас да сюяс горö пес да кутчас öрын капуста масьтыны, а ныввес мöдiк жырын баитöны ас коласаныс: кыдз пö масьтыштас капустасö, сiдз пö сiйö и начкам.

Зоночка кылас этö и шы оз сет.

Торскöтö-ёркöтö лэчыт сечка, няж-няж масьтiссьö капуста. Петыштас зоночка дынö вашыр и бöрас сувтчас. Капуста масьтiсь тöдас: этö яг-баблöн нылыс сiйö вийны локтiс. И бергöтчас да кыдз заваритас сечканас вашырыслö — сiя трек-трек коккезнас керас да кулас. Зоночка сiйö öрас чапкас да тусь-тась масьтас.

Петыштас сэтчö дзимшыр — и тожö öрас сюрас.

Виччисяс, виччисяс куимöт сойыс, кöр сiйö мöддэс корасö страпайтны, пöртчас чужмöрö и зоночка дын петыштас, да сыись тожö яй шогмас.

Лонтас зоночка гор, кисьтас öрсис масьтöмсö чугунö да öшöтас чугунсö би одзö — яг-баблö сёян пуö. Ачыс думайтö, кыдз бы лёк старука дынiсь мездöтчыны. Думайтас, думайтас, нем оз вермы думайтны. Сэтчö гор ештас, сёян пусяс, да токо говняэз кольччасö. Öктас зоночка говняэсö помой ведраö и петкöтö öтöрö. А сылö паныт яг-бабыс пырö — лöг и лöг локтö, мыля некин сылö абу шедöма.

Казялас зоночка посöдз пельöсiсь кыз увъя сырса — лиснич — и каяс сы кузя вöскас да и ведрасö сьöрас кайöтас, а сырсасö пöрöтас.

Пырас яг-баб гортас, уськöтчас чугун дынö и кырыммезнас пондас панявны сёянсö. Тыткас, тыткас — кынöмсö тыртас, вöлись гажмас да пондас ошкыны ныввеслiсь страпнясö:

— Чöскыт яйыс, хе-хе-хе! Яйыс небыт, хе-хе-хе!

А зоночка кывзас, кывзас сылiсь кижгöмсö да вöсксяняс тшын öшынас горöтас:

— Ассит нывветö эд сёйин, пöрись куль!

Кватитчас яг-баб — ныввес былись абу. Кутчас вöлись юрсисö летны да ковпиннезнас чакöтны, ачыс тоин коккес вылын потолокöдззас чеччöвтö. Чеччалас, чеччалас, сырса дынö котöртас, но сувтöтны сiйö оз вермы да бöр керкуас пырас, тшын öшынас зоночкалö баитö:

— Лэдзчы татчö, ырöшöн юктав менö.

— Лöсьöт öмтö, ме тасянь кисьта, — шуö зоночка.

Яг-баб чатыртас юрсö, осьтас ыджыт öмсö, а зоночка джын помойсö сы öмö кисьтас.

Шоччисис невна нёжтöм куль да бöра тшöктö:

— Лэдзчы татчö, тшакъяшыдöн верд.

— Лöсьöт öмтö, ме тасянь верда.

Яг-баб чатыртас юрсö, а зоночка кольöм помойсö головняэзнас кисьтас.

— А öнi эшö чöвпан нянь лэдз, — корö яг-баб.

— На, босьт, — шуас зоночка да чапкас яг-баб юр вылö из — кольмöтас нёжтöм кульöс да котöртас гортас.

Пöрись гозъя блиннэз пöжалöмась и медбöръя блинöн мырддясьöны. Да сiдз тойласьöны, што керку стенаэс нюмрасьöны.

— Этö ме сёя! — горöтлö öтыс.

— Не, сiйö ме сёя! — горöтлö мöдыс.

— А меным колят жö? — юалас зоночка.

Тöдасö пöрись гозъя зоннысö, радмасö, што ловъя локтiс, и сылö сетасö блинсö.