Кöртовöй вöлок

Олiсö гозйöн мужык да инька. Челядьыс нылöн вöлiсö уна, но быдöнныс кулiсö, токо öтiк зон, медбöръяыс, быдмö. Айыс мамыскöт лöсьöтчöны пыртны зоннысö и думайтöны, кинöс бы корны вежайöн. Решитiсö: вежайöн лоас сiя, кин первöй пантасяс. Вот нуöтöны зоннысö пыртны. Пантасис кузнеч, сiя и лоис вежайöн.

Тырис кагалö год,и сылö вайис вежайыс кöртовöй вöлокöс. Зоночка пуксис вöлокыс вылö, сöтiс боккез кузяс, и вöлокыс летöвтчис öтöрö да лэбтiсис нёбоö.

Дыр виччисисö айыс мамыскöт, кöр бертас нылöн зонныс — эз вермö виччисьны. Кузнеч вылö судитчисö, сiйö пуксьöтiсö тюрмаö. Зоночка жö аслас вöлокöн вöлöм мöдiк му вылын. А отирыс сэтчин быдöс сьöдöсь и баитöны мöднёж. Босьтiс сiйö дынас öтiк купеч, йöртiс посöдзö. Зоночка чожа велалiс йöз кыв дынö, велалiс басöка орсны пöлянöн.

Дыр зонка олiс купеч ордын — кык дас год. А эта жö государствоын, эта жö карын олiс сар аслас нывкöт. Олiсö ыджыт керкуын витöт этажын. Гленитчис эта нывкаыс зонкалö. Кöр сарыс эз вöв гортас, нывка да зонка пантасьлiсö сар комнатаэзын.

Сар казялiс, што нылыс сытöг кинöскö вайöтлö, и мавтiс краскаöн балконсö, кытöн нывка пантасьлiс зонкакöт. Зонка мавтчис красканас и шедiс. Сар тшöктiс казнитны сiйö быдöс отир дырни. А зонкасö татöн öддьöн радейтiсö.

Вот керисö посок, сы дынö сувтöтiсö сизим поспуа лиснич — сэтöн пондасö казнитны. Вот и локтiс эта нёжтöм луныс. Зонка быдöнныскöт прошшайтчис и пондiс жагöник кайны лиснич кузя пекля дынö, а нывка-саревна пукалiс аслас балкон вылын и горзiс. Кöр зонкалö кольччис кайны медбöръя поспусö, сылö тöдвылас усис, што эз прошшайтчы аслас вöлоккöт. Корсис сарлiсь, сар лэдзис. А вöлокыс эстöн жö, отирыс коласын котрасьö. Зонка лэдзчис, пуксис вöлокыс вылö и — казьтывлы, кыдз шуисö! Вöлок лэбтiсис витöт сувдаöдз, босьтiс нывкасö бавкон вылiсь и лэбзис одзлань.

Дыр я, не я нiя лэбзисö, токо пружинкаыс вöлокыслöн потiс, и куимнанныс усисö улö. Нывкаыс усис вöрö, зонкаыс — кытшöмкö деревняокö, а вöлокыс усис ваö.

Зонкаыс пондiс овны пöрись гозъя ордын. Чожа саревнасö аддзисö вöрсис вöркералiссез и вайöтiсö эта жö деревняö. Нывка пондiс овны эна жö пöрись гозъя ордын.

Öтпыр пöрись гозъя лöсьöтчисö касьтiсьны. Мый токо нiя эзö страпайтö! Кöр пуксисö пызан сайö, старукаыс висьталiс:

— Талун, челядь, тырис кыкдас год, кыдз ме öштi зонöс. Вайö сiйö казьтылам.

Сэк зонка вежöртiс, што сiя шедiс не чужöйез дынö, а ай-мамыс дынö. Висьтасис сiя быдöс, мый сыкöт вöлi, кыдз сiя петiс петляись и кыдз пышшöтiс саревнасö. Пöрись гозъя лоисö öддьöн радöсь. Эшö неважын ме ны ордын гöститi. Öддьöн бура олöны. И кузнечсö аддзылi. А вöлокыс сiдз и öшис.

Ошвердас

Старука зэгъяс-мунас ягöдавны внучекнас да öштас зонкасö. Кошшасö, кошшасö да сiдз и оз аддзö. А зонкаыс котрасяс-керас вöрöттяс да ошпозö инмас. Ошыс примитас сiйö, быдтас и шуö:

— Ноко, мыччав вынтö, зону. Кыдз ме кодь вына ни, дак лэдза гортат.

Сибöтчас Ошвердас кöзок дынö, коса пу кыза вöлöма кöзокыс, вужсорнас шедтас да кöз сувда вывланьö шупкас.

— А ноко этö пондыв, — мыччалас ошыс потш кыза кöзок вылö

Зонка и сiйö шедтас.

— Ноко то этö шедты, — ош мыччалас четверт кыза пу вылö

Зонка öдва-öдва шедтас сiйö.

— Етшаöв эшö выныт, олыштны ковсяс ме дынын. Олö Ошвердас, быдмö да ёнмö, вынсö öктö. Локтас кад

бöра вынсö мыччавны, и ош тшöктас шедтыны сизим вершок кузя пу. Мырсяс, мырсяс зонка — шедтас сёдаки и радъялö. А ош шуö:

— Олышт эшö ме дынын, öкты вынтö.

Уна ли, невна ли сiдз чулалас, а ош куимöтпырся тшöктö мыччавны, вына я зонкаыт лоис. Петас Ошвердас позсис, казялас сизим вершок кузя кыдз, кватитас сiйö морос одзас и дзик ньöрöс шедтас.

— Вот öнi тэ богатыр. Босьт этö пусö, мун гöрись дынö: вон сiя гöрö — юрыс зэгалö. Сылiсь коран гöрсö и сэтiсь копъё йыв дорöтан и эта кыдз бердö вартан. А сэсся мöдiккез висьталасö, мый керны.

Мунö зонка и думайтö, што сысся вынажыкыс некин ни абу. Öнi пö ме быдöс мирсö ас киö пидзырта.

Мунас Ошвердас гöрись дынö. А гöрисьыс сысся кыкись ыджытжык — гöрыс — дас пуд сьöкыта.

— Ме богатыр, — висьталö Ошвердас. — Вай меным гöртö, ме бы копъёöс дорöта, йывсö кöртовöйö кера бы.

— На, богатыр, дорöт, — шуас гöрисьыс да шедтас горсис ральниксö. А сiя — куим пуд сьöкыта. — Öнi мун кузнеч дынö да тшöкты дорны копъё йывсö.

Босьтас Ошвердас кöртсö да ассис пусö и мунас кузнечыс дынö, сетас заказ:

— Вот тэныт копъё, вот кöрт. Кер копъёöс сэтшöмö, мед бойын оз чег, а йылыс из бердö эз ныжмы.

Дорöм понда Ошвердас сетас öтiк лун, ачыс мунас узьны. Локтас ашынас, кузнеч сылö сетö копъё. Босьтас Ошвердас, пешлас — кокнитöв.

— Не быдöс тай кöртсö видзöмыт, — шуö Ошвердас. — Ашын вились локта, мед йылыс быдöс кöртiсь вöлi дорöма.

Дорас йывсö кузнеч, да бöра кöртсö не быдöс видзас. Ошвердас пешлас — кокнитöв.

— Эшö не быдöс кöртсö видзöмыт, — шуас Ошвердас. — Ашын мед вöлi керöм, кыдз тшöктi!

Кузнеч сэсся оз лысьт бöбöтчыны — керас копъёсö сiдз, кыдз колö. Ошвердас пешлас копъёсö — бур, сы сьöртi, — и мунас вермасьны богатыррезкöт: мыччала пö нылö, кин му вылас медвынаыс.

Мунас, мунас — инькаöс панталас.

— Тэ кытчö, инька?

— Вонöлö павжун нöбöта.

А павжуныс — ыджыт и ыджыт ноша.

— Кытöн воныт?

— Ыб гöрö.

— Муна-ко ме тэкöт, видзöта вонтö.

Локтасö ыб вылö, Ошвердас аддзö: морт ныргорнас узьö, межа вылiсь кöззэс узян горсянь окласьöны. Инька чапкас ношасö му вылас и виччисьö, кöр воныс саймас: саймöтан пö костi, дак öддьöн лöгасьö.

Ошвердас чувйыштас богатырыс бокö аслас копъёöн, сiя и юалö:

— Тэ, тыдалö, сойö, локтiн? А мыля гуттэсö ме дынiсь он вашöтлы?

— Этö не гуттэз, этö богатыр тэ дынö локтiс. Осьтас öт синсö узись богатыр, видзöтас, кытшöм сэтшöм богатыр локтiс, и бöр ланьтас.

Сэк Ошвердас сюйыштас копъё йывсö богатырыс нырö да гудыртöв-керас — сё бы саймöтö сiйö.

— Мыля, сойö, кöдзывсö он вашöт — нырам, кылö, пырис? — шуас богатыр да несъяс, — и Ошвердасöс тöвчикöн нöбöтас мöдiк ыб вылö.

Бура доймас Ошвердас усикас, но казялас, што богатырыс саймис и сувтiс кок йылас, да давай пышшыны — чисто копъёсö коляс. Кöр усьтöдз ни котöртас, мöдiк богатырöс казялас. Сiя зöр кöдзö ыджыт кöдзсянкудiсь. Вот и кеймисьö Ошвердас кöдзисьыслö:

— Дзеб жö менö, бур морт, а то лёк богатыр менö аддзас и вияс.

Кöдзись висьталас:

— Пыр кудас, дзебсись сю коласас.

Пырас Ошвердас кöдзсянкудас. А зöр кöдзись одзлань кöдзö: öтiк кырым ыб вылас койыштö, мöдiкö — öмас чапкö. И сюрас Ошвердас сы öмö, да кыдзкö гырка пинь пытшкö инмас и ловйöн кольччас. Но петнытö оз вермы, да вот и гильöтö кöдзисьыслiсь пинь гырксö, вот и гильöтö.

Кватитас кöдзись зорок, гуддьыштас пиньсис Ошвердассö, сьöвзяс öмсис. И лэбзяс Ошвердас гортöдззас да шуас:

— Ме вына-вына, а эмöсь тай эшö месся вынажыкöсь!