Иван саревич да мича ныв

Олöма-вöлöма сар. Сылöн вöлöмась куим ныв да öтiк зон. Зонсö шуöмась Иванöн.

Вот мамныс нылöн кулас. Эта бöрын и айныс чожа пондас шогавны да тожö кулас. Но кувтöнняс закажитас зоныслö, медбы сiя быд сойöс сетiс сы сайö, кин первöй локтас корасьны.

Куим ой бöртi айыс кулöм бöрын локтö, бедьöн дзурликасьö öтiк пиня старик, медбы пöрисьжык сойсö корасьны. Сойыс оз бы мун сы сайö, но Иван Саревич шуö:

— Кыдз айö тшöктiс керны, сiдз и кера.

Сойыс эз понды мугсьыны.

Водтöтасö том гозъяöс пöлатьö. Асывнас чеччасö, а нiя абуöсь ни. Кошшасö, кошшасö, озö аддзö. Сiдз сойыс и öшас.

Мöдiк рытö локтö, бедьöн дзурликасьö старик кык пиня. Сiя корасьö шöрöт сойсö. Шöрöт сойыс тожö оз бы мун. Но Иван Саревич керö айыс тшöктöм сьöртi.

Нiйö бöра жö водтöтасö пöлатьö. Асывнас чеччасö, а нiя абуöсь ни. Кошшасö, кошшасö, озö аддзö. Сiдз öшас и шöрöт сойыс.

Куимöт рытö локтö куим пиня старик. Сiя корасьö медучöт сойсö. Иван Саревичлö кöть и жаль сойсö, но айыслiсь тшöктöмсö оз лысьт не тыртны, сетас и учöтжык сойсö. Нiйö бöра жö водтöтасö пöлатьö. Ашынас чеччасö, а нiя абуöсь ни. Кошшасö, кошшасö и энö озö аддзö. Мöддэс моз жö öшас и учöт сойыс.

Мымдакö чулалас кад, и Иван Саревич тшöктö ассис служанкаэсö лöсьöтны котома. Сылiсь юалöны, кытчö лöсьöтчö мунны, но Иван оз висьтась.

Вот и котома готов. Иван Саревич петас туйö. Мунас дыр я, не я, и пондас сылöн симавны кынöмыс. Эта коста сы одзын оссьö кушин. Иван Саревич и думайтö:

— Поди эстöн эм шор, вот ме шор дорас и сёйышта. Петас кушинас и аддзö: кинкö ва кайöтö. Сiя тэрмасьöмöн котöртас сы дынö и мый жö аддзö? Сы одзын ведраэзöн сулалö пöрисьжык сойыс.

Нiя дыровайтчасö, окасясö, и сойыс корас сiйö гöститны. Локтасö, пырасö керкуас. Токо пондас сойыс лöсьöтны сёйны, сэтчö лэбас ыджыт и ыджыт тöв. Сойыс сюйыштас вонсö курöг позö да шуас:

— Эта локтö менам мужыкö Ворон Воронович. Сiя öддьöн радейтö сёйны отирöс.

Ворон Воронович пырас и шуö:

— Уф, кыдз роч дукöн нырö вачкö. А иньыс и шуö паныт:

— Ачыт роч муэз вылöт ветлöтан, вот роч дукöн и вайöтö.

Ворон Воронович сэк жö корас сёйны. Иньыс чожжык сы одзö быдöс ваяс. Кöр Ворон Воронович пондас пöтны ни, иньыс сылiсь юалö:

— Но мый, вöлi кöбы эстöн вонö, тэ бы эд сёйин сiйö? А Ворон Воронович и горöтчис:

— Ой, мыля бы ме сiйö сёйи. Сiя бы вöлi менам любимöй гöсьöн.

Сэк токо иньыс висьталас, што Иван Саревич сэтöн.

Ворон Воронович пондас видны иньсö, и Иван Саревичöс кыскасö курöг позсис да бура пондасö гöститöтны. А Ворон Воронович юасьö, кытчö пö туй видзан.

Иван Саревич и висьталас:

— Мöда ме гöтрасьны и муна кошшыны Мича Нывöс.

Сэтчö паныт Ворон Воронович и шуас:

— Мича Ныв дынö сюрны сьöкыт. Сылöн дворечыс гöгöртöма стынöн, а быд стынина вылын морт юр. Токо куим стынина вылын ни абу. Верман кö вуджны энö стынинаэсö, то кольччан ловйöн, он кö вермы — юрыт лоас стынина вылас.

Иван Саревич оз повзьы и лöсьöтчö мунны одзлань. Сiя сетас Ворон Вороновичлö носовöй чышъянок, тшöктас öшöтны сiйö Ен божничаö да закажитас:

— Кöр пондас эта чышъянокыс гöрдöтны, Ворон Воронович, лок меным отсавны.

А Ворон Воронович сетас сылö чышкöт да висьталас:

— Эта чышкöт вылын сёян запасыс тырмас вит год кежö.

Иван Саревич сюйыштас чышкöтсö котомаö да иньдöтчас одзлань.

Бöра сiя мунас дыр я, не я. Вились пондас кынöмыс симавны. Эта коста сы одзын оссьö кушин. Иван Саревич и думайтö:

— Поди кушинас эм шорок, вот ме сэтöн и сёйышта.

Кыдз токо петас кушинас, казялас сэтiсь шöрöт сойсö — ва кайöтö. Котöртас сойыс дынö. Дыровайтчасö, окасясö, и Иван Саревичöс сойыс корас гортас гöститны. Каясö, пырасö керкуас. Но токо пондас сойыс лöсьöтны сёйны, сэтчö лэбас гымалöм, вирдалöм, пуэз му бердöдз нёкрасьöны. Сойыс повзяс да вонсö игналас яшшикö, ачыс шуас:

— Эта локтö менам мужыкö Карл Карловичö. Карл Карлович пырас.

— Уф, кыдз роч дукöн нырö вачкö. А иньыс и баитö паныт:

— Ачыт роч муэз вылöт ветлöтан, вот роч дукöн и вайöтö.

Карл Карлович сэк жö корас сёйны. Иньыс чожжык быдöс сы одзö ваяс. Пуктас пызан вылö нянь да кирпич. Карл Карлович перво кирпичсö кутчас сёйны. Öмас би токо чеччö. А кöр пöтöв-керас, нянь бердö кутчас. Сэк иньыс пондас юасьны:

— Но мый, вöлi кöбы вонö эстöн, тэ бы эд сёйин сiйö? А Карл Карлович и горöтчас:

— Мыля бы ме сiйö сёйи? Сiя бы любимöй гöсьöн менам вöлi.

Сэк токо иньыс висьталас, што Иван Саревич сэтöн.

Карл Карлович кутчас видны иньсö. Иван Саревичöс кыскасö яшшиксис и пондасö юасьны-висьтасьны öта-мöдныслö да пируйтны.

Иван Саревич и висьталас:

— Мöда ме гöтрасьны и муна кошшыны Мича Нылöс.

Сэтчö паныт Карл Карлович шуас:

— Ой, кытшöм эд сьöкыт сюрны Мича Ныв дынöдз. Сы двореч гöгöр кругом стын сулалö, а быд стынина вылын морт юр. Токо кык стынина вылын ни абу. Верман кö вуджны энö стынинаэсö, то кольччан ловйöн, а он кö вермы, юрыт лоас стынина вылас.

Но эта страстись Иван Саревич оз повзьы и пондас лöсьöтчыны мунны одзлань. Петтöнняс сiя сетас Карл Карловичлö носовöй чышъянок, тшöктас öшöтны сiйö ен божничаö да закажитас:

— Кöр пондас эта чышъянокыс гöрдöтны, Карл Карлович, пет менö кошшыны.

А Карл Карлович сетас сылö пызандöра да висьталас:

— Эта пызандöра вылын сёян запасыс тырмас вит год кежö.

Иван Саревич каттяс пызандöрасö и петас туйö. Мунас-мунас, дыр я, не я, бöра пондас кынöмыс симавны. Аддзö — одзас тыдалö кушин. Решитас мунны кушинöдззас и сэтöн сёйны.

Кыдз токо петас кушинас, казялас сэтiсь учöт сойсö — ва кайöтö. Этö сойсö сiя медбура радейтiс.

Иван Саревич сибöтчас сойыс дынö. Дыровайтчасö, окасясö, и сойыс корас сiйö гортас гöститны. Но токо сiя пондас лöсьöтны сёйны, сразу пемдас, вирдыштас, гымнитас, бöра вирдыштас, пуэз муöдз нёкрасьöны, готовöсь керкусö пöрöтны.

— Эта локтö менам мужыкö Ёстр Пёстрович, — баитö сойыс. — Сiя воннэс коласiсь медстрашнöй.

И вонсö йöртас чуланö. Ёстр Пёстрович пырас и шуö:

— Уф, кыдз роч дукöн нырö вачкö. А иньыс и висьталö паныт:

— Дак мый, эд ачыт шуч роч муэз вылöт ветлöтан, вот роч дукöн и вайöтö.

Сэк Ёстр Пёстрович корас сёйны. Иньыс чожжык ваялас быдöс пызан вылö. Пуктас пызан вылö нянь да кирпич. Ёстр Пёстрович перво кирпичсö жö пондас сёйны. Öмас би токо чеччö. А кöр пöтöв-керас, нянь бердö кутчас.

Иньыс казялас, што жöникыс нянь ни пондö сёйны, и лöсьöтö басниэз:

— Но мый, вöлi кöбы менам вонö эстöн, тэ бы эд сiйö лöгувъят сёйин?

А Ёстр Пёстрович шуö:

— Но мыля бы ме сiйö сёйи? Сiя бы любимöй гöсьöн менам вöлi.

Сэк токо иньыс висьталас, што Иван Саревич сэтöн.

Ёстр Пёстрович пондас видны иньсö, мыля сiя дзебö вонсö. Вайöтасö чуланiсь. Пондасö öтлаын пируйтны. Ёстр Пёстрович и юалö, кытчö Иван саревич видзö туйсö.

— Мöда ме гöтрасьны и муна кошшыны Мича Нылöс, — висьталö Иван Саревич.

А Ёстр Пёстрович и шуö:

— Ой, кытшöм эд сiя ылын, кытшöм сьöкыт сы дынö сюрны. Сы двореч гöгöр стын сулалö, а быд стынина вылын морт юр. Токо öтiк стынина вылын ни абу. Верман кö вуджны этö стынинасö, то Мича Ныв тэнат лоас, а он кö вермы — юрыт сэтчö жö коляс.

Но Иван Саревичöс и эта страсьыс оз повзьöт. Сiя сёроно мунö кошшыны. Петтöнняс сетас Ёстр Пёстровичлö носовöй чышъянок, тшöктас öшöтны сiйö ен божничаö да висьталас:

— Кöр пондас эта чышъянокыс гöрдöтны, Ёстр Пёстрович, пет менö кошшыны.

А Ёстр Пёстрович сетас Иван Саревичлö сизим сюра жбан да шуас:

— Эта жбанын сёян запасыс тырмас вит год кежö. Иван Саревич сюйыштас сiйö котомаö Сiдз сёян сылöн öксис дас вит год кежö, а котомаыс сё сы ыжда.

Бöра петас туйö. Мунас, мунас, дыр я, не я, и локтас стын дынöдз да пондас кошшыны, кытöн эшö простöй стынинаыс, кöда вылын юрыс абу. Мунас стын гöгöрöттяс куим мисеч и аддзас сiйö. Пондас вуджны да стынинасö чегöтас. Караул кылас, и Иван Саревичöс кутасö.

И вот пыртöны сiйö дворечö, вайöтöны Идол одзö. Эта Идолыс уна ни умöльсö керöма отирлö. Сiя ачыс гусялöма да вайöтöма Мича Нывсö аслас дворечö эшö учöтнас, и бедняжка-нылiньöй öнöдз маитчö сы ордын.

— Кин тэнö татчö корис? — горöтiс Идол, аслас синнэзсис би чеччö — сы бура лöгасьöма.

Иван Саревич висьталас, кытшöм могöн сiя ветлöтö чочком югыт кузя.

— Менам тэ коддес эмöсь не öтiк сотня ни, быдöнныс нiя локтiсö корасьны менчим нылöс, — шуис бöра Идол да тшöктiс Иван Саревичöс йöртны сарайö. Сэтчин быль пукалiсö не öтiк сотня морт.

Асыв гöгöрас пондасö чапкавны сараяс кын кольтаэз, медбы вердны пукалiссесö. А Иван Саревич токо швыр да швыр шенталö кольтаэсö бöр Идолыс слугаэзлö. Слугаэз коласiсь кöда усьö, кöда пышшö, а пукалiссез пондöны тöждiсьны, горзыны.

— Мыля чапкалан кольтаэсö? Мийö эд тшыгйöн куламö!

— Эшö буржыка пондам овны, — шуö Иван Саревич. Слугаэз котöртасö и висьталöны Идовлö:

— Виль пукалiсьыс быдöс кольтаэсö шенталiс.

— Чöлö, рад лоас и кын кольтаэслö, — шуö Идол. — Этö эд токо первöй луннэзас сiдз керö.

А Иван Саревич кыскас котомасис чышкöт. Сэтöн чышкöт вылас лоас берся сёян-юаныс. Быдöнныс кутчасö пируйтны, коддзасö, пондасö сьывны да йöктыны.

А Идол кылас этö шумсö да слугаэсö иньдас видзöтны, мый нiя сэтчин керöны.

Слугаэс вовласö ны дынö, видзöтасö, тэрмасьöмöн бöр бертасö Идол дынö да висьталасö:

— Виль мортыс мыйкö вайöма сьöрас, а оз висьтав мый. Идовлö окота тöдны, мый сiя вайис сэтшöмсö. Тшöктас слугаэсö сёроно тöдны да босьтны сiйö сы дынiсь.

Слугаэс мунасö и юаласö. А Иван Саревич и шуö:

— Мед Мича Ныв мыччалас асьсö, сэк сета. Идол тшöктас Мича Нылöс мыччасьны Иван Саревичлö А сылö мый сэтiсь, мыччасьöмсис? Мунас и мыччасис. Öддьöн гленитчас Мича Нывлö эта визыв том зоныс. А Иван Саревич сетас сылö чышкöтсö. Пукалiссез бöра пондасö горзыны:

— Öнi куламö ни тшыгйöн.

— Эдö горзö, сёроно огö кулö, — шуö Иван Саревич. Мöд асылас Идол бöра тшöктас чапкавны пукалiссезлö кын кольтаэз. Слугаэс пондасö чапкавны, а Иван Саревич бöр токо швыр да швыр шентö. Слугаэс коласiсь бöра кöдна гатш-гатш усяласö, кöдна пышшасö.

Токо ештасö мунны слугаэс, Иван Саревич паськöтас пызандöра, и кутчасö пируйтны. Быдöнныс коддзасö, пондасö сьывны да йöктыны.

Шумсö бöра кылас Идолыс да слугаэсö иньдас сэтчин, мед нiя тöдiсö, мыйöн пируйтöны пукалiссес, да босьтны сiйö нылiсь. Слугаэс юаласö, а Иван Саревич шуö:

— Мед локтас татчö Мича Нылыс, сылö сета. Слугаэс мунасö, висьталасö этö Идовлö. Сiя тшöктас Мича Нывлö бöра ветлыны мыччасьны Иван Саревичлö. Локтас том нылiньöй, дзар керас визыв зон вылö и эшö öддьöнжык одззася öзъяс сылöн пым сьöлöмыс. А Иван Саревич сетас сылö пызандöрасö да висьталас:

— Мича нылiньöй, сьöлöмшöриньöй! Вöрзьöтiн тэ менчим том сьöлöмöс, öзйис сыын некусан радейтöм. Ло тэ менам невестаöн, пышшамö мийö татiсь, эта лёк Идол дынiсь. Пет талун сёр рытнас татчö, эта местаö.

— Ог, ог ме вермы этö керны, визыв зонiньöй. Вöтас миянöс пöрись Идол да вияс кыкнаннымöс.

— Эн пов, — шуö Иван Саревич, — аддзисясö меным отсалiссес, оз сетö нiя менö Идол киö.

Мича Ныв согласитчас пышшыны. Локтас рыт. Идол бöра тшöктас пукалiссезлö чапкавны кын кольтаэз.

Слугаэз пондасö чапкавны, а Иван Саревич паныт нылö шенталö да сэтшöм ёна, што слугаэс коласiсь кöдна тараласö-усясö, кöдна пышшасö висьтавны эта йылiсь Идовлö.

А Идол и шуö:

— Ась, талун эд токо бöр-ту шенталасö. Мöдпырся радöсь лоасö да некысь лоас вайны.

Токо слугаэс мунасö, Иван Саревич осьтас сизим сюра жбансö. Мыйыс токо оз ло одзаныс. Пондасö бöра пируйтны. Сёясö-юасö, сёясö-юасö, а жбанын берсяыс сё пизьö, сё тыр. Быдöнныс пондасö сьывны да йöктыны.

Идол кылас шумсö да иньдас слугаэсö, медбы тöдны, кытшöм шум, мыйöн пируйтöны, и босьтны сiйö ны дынiсь.

Слугаэс локтасö, юаласö, а Иван Саревич и шуö:

— Локтö, видзöтö асьныт, ме ог жалейт нем, верма потшшуйтны и тiянöс.

Слугаэз сибöтчасö жбан дынö и пондасö сёйны-юны, асьныс дивуйтчöны да ошкöны Иван Саревичöс. Юасö да юасö и ляз коддзасö, тараласö кок вывсиныс да недыр мыйись сар-р онмöссясö

А эта коста локтас Мича Ныв. Нiя Иван Саревичкöт баитасö-керасö да тэрмасьöмöн пышшасö. Быдöс пукалiссес сiдз жö мунасö-рознитчасö кинлö кытчö колö.

Виччисяс, виччисяс Идол ассис слугаэсö и думно сылö лоас: эз я пö аркмы мыйкö умöль. Мунас Мича Ныв жыр дынö, осьтыштас ыбöссö — некин абу. Котöртас сарайö, видзöтö: слугаэс валяйтчöны ляз кодöсь, нем оз ылöстö, а сэсся тожö некин абу.

Пондас дукавны туйсö Идол, тöдö бы, кöдöрö пышшисö Иван Саревич да Мича Ныв, ачыс лöгся-лöг, пиннезнас гирчыгалö. Дукалас, дукалас и вежöртас кöдаланьö иньдöтчис сылöн пленничаыс аслас ёрткöт, и давай вöтчыны.

Мымда вын котöртö Иван Саревич аслас невестакöт, а бöрсяняныс Идол сё матынжык и матынжык. Вöтас нiйö колодеч дынын, Иван Саревичöс вияс, а Мича Нывсö нуöтас бöр.

Сы коста зяттез дынын чышъяноккес пондасö гöрдöтны и сэтчöдз гöрдöтасö, нельки вир ни вотявны пондас ны вывсянь.

Зяттес казяласö, што чышъяноккес гöрдöтöмась, и сэк жö пöртчасö дудiэзö да пондасö лэбавны — кошшыны Иван Саревичöс. Локтасö колодеч дынöдз и аддзöны: Иван Саревичыс вийöм.

А колодечас вöлöма ловъя ва.

Сэк öтiк дудiыс лэбтiсяс вылö эд да колодечас уськöтчас, öмас босьтас васö да петас. Сы бöрын мöдiк дудiыс уськöтчас и тожö öмас босьтас васö да петас. Сiдз жö керас и куимöтыс.

Первöй дудiыс брызнитас — Иван Саревичлöн яй торрес öтлаасясö, мöдыс брызнитас — пондас лолавны; куимöтыс брызнитас — сiя пондас нёджжасьны, ловзяс совсем и шуö:

— Ой, мый дырна ме узи ...

А зяттес паныт и висьталöны:

— Кöбы не мийö, то век бы эн саймы. Иван Саревич чеччас да бöра мунас мездыны Идол дынiсь Мича Нылöс. Локтас Идол двореч дынö и Мича Нывсö гусялас. Пондасö нiя пышшыны. Пышшасö, пышшасö — джын туйöдз локтасö. Сэтчö Идолыс вöтас. Казялас Иван Саревичöс, дивуйтчö, мыля сiя ловъя. Вежöртас, што эта том мортыс не простöй морт, и баитö сылö берегитчöмöн, рамыника:

— Первöй винносьтö простита.

Мича Нылöс мырддяс да бöр дынас нуöтас. Иван Саревич бергöтчас да пондас вöтчыны, мед вились гусявны Мича Нывсö. Локтас дворечыс дынöдз (а Идолыс гортас абу вöлöм), судзöтас сiя Мича Нывсö öшынöт и ножö пышшыны. А Мича Ныв и шуö:

— Вöтас кö миянöс Идолыс, тэ сэсся ме сьöрö эн вöтчы, а мун менам тётка дынö. Сiя тэныт отсалас.

Вот и саясяс ни дворечыс, токо вуджны колö стынсö, сэтчö и вöтас Идолыс. Мича Нылöс мырддяс, а Иван Саревичлö шуö:

— Мöдiк винносьтö простита, ог вий.

Кöр Мича Ныв бертасö Идолкöт, Иван Саревич иньдöтчас кошшыны невестаыслiсь тёткасö. Мунас-мунас и локтас тёткаыс ордö. Пырас керкуас, а сэтöн старука куйлö, юрыс пöлать сёрдын, коккес горвыв сёрдын, и шуö:

— О, кыдз роч дукöн нырö вачкö! Сейчас ме тэнö сёя. А Иван Саревич и горöтчас:

— Эн сёй, эн сёй. Перво уд-верд да юась, а сыбöрын вöлись и сёй.

Старука лэдзчас пöлатьсис, юкталас-вердас, юасяс-висьтасяс.

Иваныс и шуö:

— Вот ме бы кыдзкö мезда Идол дынiсь Мича Нылöс, но ог тöд, кыдз этö керны.

— Ме нем ог тöд, — баитö старука. — Тэ ветлы пöрисьжык сойö дынö да сылiсь юась.

Сэк Иван Саревич иньдöтчас ылöжык, локтас старукаыс сой дынö, тожö старука дынö. Пырас керкуö и аддзö: юрыс пöлать сёрдын, а коккес горвыв сёрдын. Старука шуö:

— О, кыдз роч дукöн нырö вачкö. Сейчас ме тэнö сёя.

— Бабу, эн сёй, эн сёй, — баитö Иван Саревич, — перво уд-верд, юась-висьтась да вöлись и сёй.

Старука лэдзчас горвыв сёрдiсь, юкталас-вердас, юасяс-висьтасяс.

А Иван Саревич и юалö:

— Кыдз бы мездыны Идол дынiсь Мича Нылöс?

Старукаыс и шуö:

— Мун пöрисьжык сойö дынö. Кор сылiсь вöв. Сылöн вöввес уна. Тэ босьт медумöльсö. Кöть сiя и бурресö пондас сетны, тэ нiйö эн примит.

Иван Саревич мунас кошшыны сiйö старукасö.

Мунас-мунас, дыр я, не я, пондас кынöмыс симавны. Аддзö: воробей табун лэбалö. Иван Саревич и шуö: «Ме часöт энö воробейесö сёя».

А воробейес чивзöны:

— Эн сёй, Иван Саревич, мийö тэныт мыйöнкö отсаламö. Иван Саревич оз сёй, а одзлань мунас. Аслас кынöмыс вир петö сималö. Аддзö: зiэз лэбалöны. Иван Саревич бöра аскöттяс баитö: «Ме энö зiэсö сёроно сёя». А зiэс и шуöны:

— Иван Саревич, эн сёй, мийö тэныт мыйöнкö отсаламö.

Иван Саревич и нiйö коляс, мунас сё одзлань.

Мунас-мунас и казялас: берег дорын шука куйлö. А Иван Саревичлöн кынöмыс сималö, керпитны оз позь! Вот сiя и шуö: «Этö шукасö ме и сёя».

А шукаыс горöтчас:

— Иван Саревич, эн сёй, а лэдз менö ваас, ме мыйöнкö тэныт отсала.

Иван Саревич лэдзас шукасö ваас и мунас одзлань. Мунас-мунас и локтас керку дынöдз. Пырас керкуö. А сэтöн старука бöра сэтшöм жö куйлö: юрыс пöлать сёрдын, коккес горвыв сёрдын, и шуö:

— О, кыдз роч дукöн нырö вачкö. Ме часöт жö тэнö сёя.

— Бабу, бабу, эн сёй, — горöтчас Иван Саревич. — Перво уд-верд, юась-висьтась да вöлись сёй.

Старука лэдзчас пöлатьсис, юкталас-вердас, юасяс-висьтасяс.

Иван Саревич пондас сылiсь корны вöв, медбы мырддьыны Идол дынiсь Мича Нылöс. Старукаыс и шуö:

— Ме сета тэныт удж. Керан кö сiйö, сэки сета вöв. Старука петас керкуись, босьтас сю мешöктыр и быдöс сюсö кöдзас ыб вылö. Сыбöрын Иван Саревичöс тшöктас öктыны сiйö öтiк тусьöн.

Иван Саревич петас, мунас и пондас öктыны сюсö öтiк тусьöн, ачыс думайтö: «Меным эд воробейез мöдiсö мыйöнкö отсавны».

Воробейес сэтчö лэбзясö быдса табун и быдöс сюсö öктасö мешöктыр. Иван Саревич локтас и старукалö сетас мешöксö. Но старука эшö кольччас недовольнöй и шуö:

— Ме вöрö лэдзала мöссэз, öтiккесö — öтöрö, мöдiккесö — мöдöрö, а тэ öкты нiйö быдöннысö.

Старука петас, лэдзалас мöссэсö, вашöтас öтöр-мöдöрö Иван Саревич вöтлiсяс, вöтлiсяс — мöссэс пышшалöны, озö локтö. Сэк сылö тöдвылас усяс: «Меным эд зiэз мыйöнкö мöдiсö отсавны».

Мыччисясö зiэз, пондасö чушкавны мöссэсö и вашöтасö гортаныс. Иван Саревич локтас, а старука и баитö:

— Эшö öтiк удж сета, керан сiйö — получитан вöв. Петас старука, картаись лэдзалас вöввез, вашöтас саридзö и тшöктас Иван Саревичöс öктыны нiйö.

Иван Саревич öтöрö уськöтчас — вöввес мöдöрö гöнитасö; мöдöрö уськöтчас — вöввес куимöтлаö гöнитöны. Некыдз оз вермы вайöтны. Бöра тöдвылас усяс: «Мыйöнкö эд шука мöдiс отсавны».

Сэк шукаэз пондасö вöввеслiсь коккезнысö йирны.

Вöввес петасö саридзсис и гöнитасö гортаныс. Локтас сэк и Иван Саревич. Старука юалö:

— Но мый, вайöтiн вöввесö?

— Вайöтi, — шуö Иван Саревич.

— Раз керин быдöс уджжез, то лок и босьт, кытшöм тэныт вöв гленитчас.

Петасö. Иван Саревич видзöтас вöввез вылö и мыччалас медумöль, горбыля вöв вылö. А старука и шуö:

— Мыйлö тэ этö медумöльсö босьтан? Мый сiйöн пондан керны? Босьт медбур вöвсö.

Но Иван Саревич оз босьт медбурсö. Старука согласитчас.

Босьтас Иван Саревич вöвсö и пондас мунны кошшыны Мича Нылöс.

Мунас-мунас, локтас ю дорöдз. Вöлыс и шуö:

— Вай, Иван Саревич, лэдз менö купайтчыны.

Иван Саревич сiйö лэдзас. Вöв купайтчас и лоас сылöн борд. Пуксяс Иван Саревич сы вылö и пондасö лэбзьыны.

Чожа локтасö мöдiк ю дорöдз. Вöв бöра корсьö купайтчыны. Иван Саревич лэдзас. Сiя купайтчас и быдмас мöдiк борд.

Иван Саревич пуксяс вöв вылö, пондасö мунны одзлань: кыт лэбзясö, кыт гöнитасö и локтасö куимöт ю дынöдз.

Кык борда вöв бöра корсьö купайтчыны. Иван Саревич сiйö лэдзас. Вöлыс купайтчас и лоас куим борда.

Иван Саревич пуксяс, и пондасö мунны одзлань: кытi лэбзясö, кытi гöнитасö и локтасö Мича Ныв дынöдз. Иван Саревич пуксьöтас Мича Нывсö вöв вылö. Пуксяс и ачыс и давай пышшыны Идол дынiсь.

Идол тожö вöв вылö пуксяс и давай ны сьöрö вöтчыны. Пондас нач ни вöтны. А Иван Саревичлöн куим борда вöлыс и шуö Идолыс вöвлö:

— Тэ менам пиян и нуöтан Идолöс. Ме тэнат мам, нуöта бур мортöс. Вай тэ лэбтiсь вылö, кымöрас, и лэдз Идолсö онняюрöн.

Сэк куим борда вöвлöн пияныс лэбзяс кымöрö да лэдзас Идолсö онняюрöн. Идол öтöр-мöдöрö быдсöн киссяс. Иван Саревич сё одзлань тэрмасьö гортас, а Идолыслöн кытöн юр, кытöн ки, кытöн кок и быдöс ны сьöрö вöтчöны. Мича Ныв чапкас зу, и бöраныс лоас вöр. Идовлöн юрыс пуэз коласö пырас и керас аслыс туй. Вились вöтчö ны сьöрö.

Сэк Мича Ныв чапкас матег и лоас саридз. Идовлöн саридзас пондас быдöс торйын уявны: и юр, и коккез, и киэз. Иван Саревич Мича Нывкöт локтасö гортаныс и пондасö бура овны.

МАМ ДÖРА

Важынся-важын керкуокын, кöда вöлi вевттьöма идзасöн, олiс пöрись инька. Мужыкыс сылöн кулiс и кольччис сiя аслас зоннэзкöт. Пöрисьжыксö шуисö Митяöн, шöрöтсö — Лёняöн, а куимöтсö — Иванöн. Пöрись инька вöлi мастерича, сiя кыйис дöра. Рисуноккез, кöдна вöлiсö дöра вылын, орсiсö, кыдз ловьяöсь. Отир öддьöн босьталiсö сылiсь басöка кыйöм дöрасö, и эта вылын токо и олiс семъя.

Öтпыр старука мунiс базарö вузавны ассис дöрасö. Вузасис да пырис öтiк лавкаö. Сэтчин казялiс басöк картина. Сы вылын вöлi рисуйтöмась басöк керкуэз, паськыт ыббез, сад, пруд.

Старукалö сiдз гленитчис картинаыс, што сiя нянь эз понды небны, а босьтiс этö картинасö. Гортас мунiкö сiя сё думайтiс картина йылiсь и баитiс:

— Кытшöм гажа овны эттшöм посадас!

Гортас инька путшöтiс каттьöм картинасö и мыччалiс зоннэслö. Нылö картинаыс сiдзжö гленитчис. Мам и шуö аслас ыджытжык зонлö:

― Митю, ме бы öддьöн ола эттшöм посадын.

— Эта тэнат думаыт пустöй, мама! — висьталiс зоныс.

Сэк старука шуö шöрöт зонлö:

― Лёню, кыдз бы ме ола эттшöм посадын!

— Но токо не эта оланын, — паныт шуис зонка.

Сэк старука шуö медучöт зоныслö:

— Иван, ме ог вермы овны эттшöм посадтöг. Если и тэ нем он вермы керны, то ме горёсянь кула.

Иван пондiс бурöтны мамсö:

— Эн тöждiсь, маминьöй, тэ эд кужан кыйны дöра вылын сiдз жö, кыдз эстöн рисуйтöм. Пондыв. Сэк бы тэ уджалiкат видзöтiн и думайтiн, што тэ сэтöн олан. Мам шыасис:

— Тэ не весь баитан. Пондыла ноко.

Сiя босьтiс быдкодь рöма суниссэз да пондiс кыйны дöра. Сiдз чулалiс лун, мöдiк, чулалiс мисеч, мöдiк. Ыджытжык зоннэз пондiсö лöгавны мамныс вылö:

— Тэ, мама, сё уджалан-уджалан, а нем он вузав. Миян сьöм вылын и олан.

Сэк Иван шуö воннэслö:

— Мед мамö керö ассис уджсö, эта уджыс вашöтö сы дынiсь сьöкыт думаэз. А кыдз мыдзит уджавны, ме öтнам верма сылö отсавны.

Иван уджалiс лун и ой, а мамыс пукалiс аслас дöра сайын. Сiдз чулалiс год, но мортыс сё уджалiс и уджалiс. Синнэз сылöн пондiсö аддзыны умöля ни. Сiя эз мöд чапкыны ассис уджсö сэтчöдз, кытчöдз дöраыс оз кыйсьы.

Куим год бöртi дöра вöлi кыйöм. Мамыс пондiс мыччавны уджсö зоннэслö. Диво кутiс зонкаэсö, нiя öтiк öмись горöтiсö:

— Кытшöм басöк дöраыс!

Сiя лоöм топ картинаыс кодь. Эта кадö лэбтiсис ыджыт тöв, кватитiс дöрасö и нöбöтiс шондi петан ладорö. Инька уськöтчис дöра сьöрö, но синнэз сылöн аддзисö умöля, и сiя усис. Кöр садясис, висьталiс ыджытжык зоныслö:

— Митю, мун кошшы этö дöрасö, сэтöн менам быдöс оланö.

Лöсьöтчис Митя туйö. Мунiс сiя быдса мисеч и локтiс керöс дынöдз. Керöс дынын сулалiс керкуок, а веськытланяс керкуок бокын — изовöй вöв. Керкуокын олiс старука, сiя казялiс Митяöс и шуö:

— Кытчöдз туй видзан, зонiньöй?

— Дöра кошшыны. Менам мамö кыйис дöра. Кöр дöраыс кыйсис, лöг тöв пышшöтiс сiйö.

— Этö дöрасö босьтiсö басöк нывкаэз, кöдна олöны шондi петан ладорын. Нiя мöдöны кыйны эттшöм жö дöра. Ны дынöдз туйыс öддьöн сьöкыт. Перво колö шедтыны ассит кык пинь, сувтöтны нiйö вöвыс öмö. Сэк вöлыс ловзяс и пондас сёйны ягöддэз, кöдна быдмöны сы гöгöр.

Сёяс дас ягöд, сэк вермас нуöтны нывкаэз дынö. Но эта не быдöс. Одзлань тэныт колас шытöг вуджны керöс, кöда лолалö биöн. Горöтчан кö вуджтöн öтiк кыв, пöртчан пöимö. Вуджан этö керöссö да локтан ыджыт саридз дынöдз. Сы кузя пондасö кывтны йыэз. Вились эстöн тэныт колас керпитны кöдзытсö и зубытсö. Кыдз верман керны быдöс этö, сэк саридз кузя уян сiя государствоöдз, кытöн олöны басöк нывкаэз. Коран нылiсь дöра, кöдö кыйис тэнат мамыт.

Митялö жаль лоис ассис кык пиньсö, да сэтöн жö эшö одзас би и ва. Сiдз повзис, што рожаыс зелёной лоис. Старука пондiс серавны сы вылын: — Тыдалö, не тэ сьöртi быдöс эта. Берт гортат. Ме сета тэныт коробкаок зарниöн, и тэ верман бура овны. Сiя эз берт гортас, а мунiс кытчö синнэз видзöтiсö да коккез нуöтiсö.

Эта кадö мамыс öддьöн шогалiс. Чулалiс куим мисеч, кыдз ыджытжык зоныс мунiс гортсис, но сысянь дажö юöр некытшöм эз вöв, Сэк мамыс шуö аслас шöрöт зонлö:

— Öнi тэ Лёня, мун кошшыны дöрасö. Эд сэтöн менам быдöс оланö!

Лёня согласитчис. Сiя лöсьöтчис туйö и мунiс. Чулалiс мисеч, локтiс сiя керкуок дынöдз, кöда сулалiс керöс дорын. Зонкасö панталiс старука да висьталiс сiйö жö, мый баитiс ыджытжык воныслö. Кывзiс сiйö Лёня и повзьöмсянь рожа вылас пондiс лöзöтны: эшö бы — öштыны кык пинь, пессьыны бикöт и вакöт — этö не сы сьöртi! Старука сылö сетiс тожö зарни коробкаокöн, и Лёняыс, пöрисьжык воныс моз жö, эз берт гортас. А мамыс виччисис ассис зоннэсö. Эз вöлö некытшöм юöррез некöдасянь.

Сiдз чулалiс эшö куим мисеч. Эта кадö инька пыр горзiс, и лоис сылö эшö умöльжык. Öтпыр Иван шуö мамыслö:

— Мама! Менам воннэзö сё эшö эзö локтö, нiя, натьтö, шедiсö бедаö. Колö меным мунны да мездыны нiйö бедаись и аддзыны дöрасö.

Старука думайтыштiс и шуö:

— Ладно, öнi мун тэ, да берегит асьтö. Ме понда эн пов, суседдэз меным отсаласö.

Иван чожа лöсьöтчис туйö да мунiс гортсис. Локтiс сiя эта жö керöс дынö и панталiс керкуок дынiсь сiйö жö старукасö, кöдö аддзылiсö сылöн воннэз. Старука висьтасис сылö нiя испытаннёэз йылiсь, кöдна лоасö туй вылын, медбы локны сiя государствоö, кытöн öддьöн басöк нылiньöйез. А сыбöрын содтiс:

— Тэнат воннэт татöн вöлiсö. Ме сетi нылö зарни коробкаоккезöн, и нiя бöр бертiсö. Сiдз жö и тэ, босьт лутшö коробкаокöн зарни да мун бöр.

Иван паныт висьталiс:

— Ог ме босьт тэнчит коробкаок зарниöн. И мый бы эз ло, ме муна кошшыны дöрасö аслам роднöй мамö понда.

Сiя сэтöн жö нетшкöвтiс ассис кык пинь и сувтöтiс нiйö вöлыс öмö. Изовöй вöв ловзис и пондiс сёйны ягöд. Кыдз сiя токо сёйис дасöт ягöд тусь, Иван пуксис сы вылö и вöрзис туйö.

Куим лун и куим ой гöнитiс, и вот одзаныс мыччисис керöс, кöда лолалö биöн. Биыс уськöтчис Иван вылö и пондiс сотны сiйö.

Пиннесö гичыртiс, эшö крепытжыка кутчисис сермöт бердас Иван и мунiс одзлань. Сiя шы эз сет, кöть сылö вöлi öддьöн зубыт. Недыр мыйись сiя локтiс паськыт саридз дорö. Токо сибöтчис сiя берег дорö, кыдз кöдзыт ва уськöтчис сы вылö. И сэтöн Иван эз повзьы, а мунiс сё одзлань. Лун бöртi Иван локтiс мöд берегöдз и казялiс государство, кытöн олiсö мича ныввез. Эта государствоын сулалiс сэтшöм басöк двореч, што пероöн не гижны, каскиын не висьтавны. Сэтöн и олiсö мича нылiньöйез. Иван локтiс двореч дынö и аддзö, кыдз нывкаэз кыйöны дöра. А дöраыс, кöдö кошшö Иван, куйлö шöраныс и быдöнныс сы вылö видзöттöн велöтчöны кыйны. Иван висьтасис нылö, мый понда локтiс. Нывкаэз кöсйисö сылö, што ашын нiя кыясö ассиныс дöра да сетасö сылö мамыслiсь дöра торсö. Иван согласитчис виччисьны. Нывкаэз вердiсö Иванöс, и зонка онмöссис крепыт онöн. Ойнас нывкаэз öзтiсö биэз и кыйисö дöра. Перво кыйсис дöраыс гöрд паськöма нывкалöн. Эта нывкаыс вöлi медвежöра да медбасöк. Сiя пондiс видзöтны ассис кыйöмсö да сiйö, кöда сьöртi кыйис. Мамлöн дöра унаись вöлi буржык. Нывка öддьöн дивуйтчис и шуö:

— Кытшöм бур овны эттшöм местаын! И сэтöн жö старукаыс дöра вылын кыйис ассис портрет.

Чожа и мöд нывкаэзлöн кыйсис, и нiя водiсö узьны. Иван чеччис и думайтö:

— А кыдз нiя ашын озö сетö меным дöра торсö? А сэтöн мамлöн быдöс оланыс. Ме ог виччись асылöдз, а босьта дöрасö да муна.

Мый думайтiс — сiйö и керис. Каттьыштiс дöрасö, босьтiс конувтас, чеччöвтiс вöв вылö. Вöв пондiс лэбзьыны стрелаöн, но туй вылын Иван бöра пессис и кöдзыт вакöт, и бикöт. И вот локтiс сiя старука дынöдз. Мöдыс панталiс Иванöс шыннялöмöн:

— Молодеч! А öнi тэрмась мамыт ордö!

Старука шедтiс вöвлiсь кык пиньсö да сетiс нiйö Иванлö, а вöв бöр лоис изовöй. Старука козьналiс Иванлö кык гоз лэбöтан чаркиэз и висьталiс:

— Тэрмась, мамыт вот-вот кулас!

Иван токо ештiс кöмавны лэбöтан чаркиэз, кыдз лоис гортас ни. Мамыс куйлiс кроватьын и öдва ни лолалiс. Иван горöтiс:

— Мама! — и путшöтiс дöрасö. Шондi югöррезсянь, кöдна койыштiсö дöра вывсис, оссисö синнэз старукалöн. Видзöтiс, серöмтчис старука дöра вылö. Босьтiс сiйö киас и петiс öтöрö, медбы буржыка видзöтны аслас узöр вылö.

Кыдз токо пуктiс дöра торсö му вылö, лэбтiсис дзоридззезлöн чöскыт дук. Дöра тор лоис сё ыджытжык и ыджытжык. Друг öшис учöтик идзасöн вевттьöм керкуок, кытöн олiс старука аслас зоннэзкöт, и сы местаö быдмис ыджыт басöк двореч. Двореч гöгöрын — басöк саддэз, ыджыт пруд, кыдз вöлi кыйöм дöра вылын. Пöрись старука казялiс пруд дорись басöк том нылiньöйöс. Нывка серöмтчыштiс да висьталiс:

— Тэнат дöраыт меным сiдз гленитчис, што öтлаын сыкöт ме локтi тiян дынö.

Старука корис пырны нывкасö дворечö. Чожа Иван гöтрасис нывка вылын, и нiя лоисö öддьöн часьливöйöсь.

Пöрись старука корис ас дынас овны суседдэсö, кöдна эз чапкö сiйö умöль кадö. Öтпыр двореч дынö локтiсö кык нишшöй. Этö вöлiсö Митя да Лёня. Зарни, кöдö получитiсö старукасянь, чожа бырсис, и нiя лоисö нишшöйезöн. Кöр казялiсö, кытшöм бура олöны мамыс и воныс иньканас, нылö лоис стыд. Зонкаэз эз и лысьтö пырны дворечö. Гусьöник, дзебсисьöмöн пышшисö, и öнi сё ветлöтöны кортöн.