Гусялöм сойез

Оласö-вöласö пöрись гозъя, нылöн вöласö куим ныв. Медыджыт нывсö ош пондас корасьны (одзжык эд нывкаэс и ошшес сайö петавлöмась), но старик гозъя оз сетö сы сайö: томöв пö эшö, ась чикисьсö новйö кытчöдз, а баличаэсö ештас кыйны.

Шöрöт нывсö локтас корасьны кырныш. Старик гозъя нывнысö сы сайö оз сетö: томöв пö эшö, ась пö нывка юрöн кытчöдз пукалö.

Медучöтсö, чаль чуньсö, корасяс тöлiсь — и сылö откажитасö: томöв пö эшö, ась гортын пукалö да йöв доззэз шудзöтö.

Медыджыт ныв ягöдавны мунас да ошöс панталас, и ош нывкасö аслас позö пыртас.

Шöрöт ныв видз вылö петас, а сэтчö ырк лэбзяс кырныш да лэбзьöтас нывкасö аслас позö.

Медучöтыс, чаль чуньыс, лэдзчас вадöрö, а сэтчö мича тöлiсь мыччисяс да кайöтас нывкасö кымöрас, аслас гортö пыртас.

Горзöны старик гозъя ― синныс оз косьмыв: öтiк неделяöн куим ныв öшисö!

Локтас öшын увтас сьöд ош да горöтчас:

— Ыджыт нывныт понда эд горзö: сiя ме сайын олö, кыдз айыс-мамыс шöрын. Локтö асьныт видзöтö.

Дугдасö горзыны старик гозъя, мунасö вöрö, а сэтöн керку дзик чача сулалö да öшын-посöдзнас свиттялö. Петас керкусис серöтöм нинкöма морт.

Не я пö эта зятьным миянöс панталö?

А морт шуö: а ме пö и эм зятьныт. Локтö пö да видзöтö, кыдз ме ола.

Пыртас морт керкуас, мыччалö: эта пö олан жыр, эта — узьлан жыр, а эта — добро видзан.

Видзöтасö старик гозъя олан жырсö — югыт да шоныт; видзöтасö узьлансö — лöнь да небыт; видзöтасö добро видзансö — сэтчин добросянь дзескыт.

Быдса неделя ош ордын жыкруйтасö да югмöм синнэзöн гортаныс бертасö.

Оласö, оласö — тöдвыланыс шöрöт нывныс усяс, и бöра горзöны. Öшын увтö кырныш лэбзяс да шуö:

— Шöрöт нывныт понда эд горзö, сiя ме сайын, кыдз барыня, олö. Локтö асьныт видзöтö.

Дугдасö горзыны старик гозъя, мунасö паськыт видз шöрö. Видз вылас яг, яг вылас пожум, а пожум йылас — керку, быдöс дзин-дзурк керöм.

Не я пö сэтöн кырнышыс олö? Кыдз нö пö мийö сэтчин каямö?

А сэтчö кыш-паш лэдзчисяс небытик лиснич да ны нинкöммез дынöдз нюжалас. Керкусис петас чаркиа морт, лэдзчас улö да öм дорнас серавлö: ме пö тiян зять, локтö пырö менам керкуö.

Пырасö старик гозъя керкуас, чаркиа морт мыччалö: эта пö олан жыр, эта — узьлан, а нiя кыкыс — добро видзаннэз.

Видзöтасö керкусö старик гозъя и гажмасö: ош зятьныс бура олö, а эта — эшö буржыка.

Кык неделя кырныш ордын жыкруйтасö да кокнит сьöлöмöн бертасö гортаныс.

Оласö, оласö, медучöт нывныс понда гажтöм кутас, и пондасö горзыны. Видзöтiмö пö, кыдз мöддэс олöны, а кытöн пö учöтным, кин сылö пöтсö да шонытсö керö, кин сiйö шогöтiсь мездö?

Öшынас тöлiсь шынь-шынь мыччисяс да и шуö:

— Учöт нывныт понда эд горзö, сiя мекöт олö и некытшöм нужда оз тöд — не лёк висян, не курыт кыв. Локтö асьныт видзöтö.

А кыдз жö пö мийö кымöрас каям?

Тöлiсь шуас: то эта додьыс кайöтас пö, — и коляс нылö раддза додь. Пöрись гозъя дугдасö горзыны, бытшöмика пасьтасясö да кöмасясö, пуксясö раддза додьö, и додь нiйö лэбтас кымöрö. А кымöр шöрас изовöй керку сулалö — чочком и чочком. Сы дынö и сувтас додьыс.

Не я пö эстöн тöлiсьыс олö?

Керкусис петас сапога морт и корö: локтö пö пырö ме ордö, ме пö тiян зять.

Пыртас тöлiсь гортас, мыччалö: эта пö олан жыр, эта — узьлан, а эна куимыс — добро видзаннэз.

Видзöтасö зятьныслiсь керкусö, и сьöлöмныс кокнямас кырныш да ош зяттес бура-бура олöны, а эта — мед ни бура.

Старик гозъя куим неделя тöлiсь ордын жыкруйтасö, да лэдзчасö гортаныс: йöзас пö кöть кытшöм бур, а гортат сё ни буржык.