Зонка читкыля юр

Кыдзкö мужык небис базарись баранокöс, вайöтiс гортас и зудъялö пурт. Сэсся лöсьöтчö кутны барансö. А кинкö и шувлö:

— Гирчыг-гирчыг, ныжмы пурт! Гирчыг-гирчыг, ныжмы пурт!

Кывзö мужык да дивуйтчö: кин бы сiдз баитö? Керкуын некин абу, а кинкö шыасьлö. Дугдас зудъясьны — шы абу. Токо кутчас кеслыны, бöра и кылö:

— Гирчыг-гирчыг, ныжмы пурт! Гирчыг-гирчыг, ныжмы пурт!

Кеслiс, кеслiс мужык, а пурт дор — тышыс кодь лоис.

— Мыся сэтшöм висян, — шуö мужык. — Кытöн ладыс? Да ась ни: кодя я баранокыс — и ныжнас горшсö пилита.

Токо петiс посöдзö, ныр увтöттяс шырк воробей лэбзис, туйсö поперегалiс. Сувтiс мужык да бöра думайтö: кытшöм притча кутчис? Оськöвтiс эшö — воробейыс бöра ныр гöгöрас каттисьö, кучиксис петö, чивзö. Лöгасис мужыкыт да курмыштiс-кыйис воробейсö.

— Чöв, — шуö, — и тэ пригодитчан: кышала пыжъян вылö да жарита, сё кишка тор тупкала. А сэтчö воробейыт и пондас кеймисьны:

— Мужык, мужыкиньöй, эн казнит менö, эн босьт менчим лолöс, а кывзы менö. Ме не кай-воробей, а ме нывка-невеста. Бараныс не гöна скотина, а удав зонка Читкыля Юр. Пондiмö мийö гöтрасьны, а лёк вежливеч пöртiс миянöс кайö да баранö. Отсав миянлö, и мийö век тэнö ог вунöтчö, öтнатö ог чапкö, челядь туйö тэныт лоамö.

Гыжъялiс-керис юрбöрсö мужык да юалö:

— А мыйöн ме верма отсавны тэныт, руд борд?

— Паськыт вöр саяс, Чой керöс вылын, олö старука Няръян-баб. Мунан сэтчин, казялан керкусö. А керкуас — не öшын, не ыбöс. Тэ ыджыт туйсяняс сiя керку дынöдз куимись одзöн ветлы, а туй вылас бöрöн петав. Сибöтчан куимöтпырсяс да кытсав:

— Керку! Керку! Сувт, кыдз дядьыт пуктiс!

Керку бергöтчас куимись, и ыбöс оссяс. А тэ ыбöсас эн пыр, пыр öшынас да висьтав:

— Няръян-баб, этö ме, внучекыт, локтi, тэныт юöр вайи. Сiя пондас юавны:

— Кытшöм юöрыт: сьöд али чочком? А тэ висьтав:

— Серакутшша, оз сiм не оз быгав.

Сэк тэнö сёйны пуксьöтас, ачыс юрсö пондас зуавны. Тэ нем и чуньöн эн вöрзьöт, а кор медчöскыт сёянсö. Няръян-баб мунас сёянсö вайны, коляс зусö пызан вылас, а тэ сiйö киат — да öшынас, вöлись и мавт кок петаэтö, бöрат дзар эн кер.

Кышыштас сивъяс пестерсö мужык, сукарок павжун кежö босьтас и мунö Чой керöс вылö. Лун оськалö, кыкö оськалö, пуксяс шоччисьны ю дорö да и кöтöтö сукароксö. Вöрись петас кöин, локтö сы дынö:

— Торйöтышт крöшки-мöд, мужык! Кынöмöс кос бердам ни зэлöтiс.

Жаль лоис мужыклö кöинсö, чепöльтiс сукар пельöссö да сетiс. Ачыс бöр пуктiс остаткисö, эз ни понды сёйны.

Кышыштiс сивъяс пестерсö и бöра туйö иньдöтчис.

Лун оськалö, кыкö оськалö, а кынöмыс вир петö сималö. Пуксис колода вылö, сукароксö кыскис. Сэтчö ош сибöтчö-пöрласьö, корö нянёкнас торйöтчыны.

Жаль лоис мужыклö ошсö, чепöльтiс сукар торок да мыччис бöжтöмлö. Остаткисö бöр пуктiс.

Кышыштiс пестерсö сивъяс и оськалö одзлань.

Вот и Чой керöс петiс, позьö и шоччисьыштны, öмсö кöтöтыштны ваокöн да сукар торсö йирыштны.

Кысянь-некысянь вöрмöс локтö-вуграсьö, кынöмсö витш кыскöм.

— Вердышт менö, бур мортiньöй, эн сет кувны. Курччöвтiс öтпырись сукароксö мужык да остаткисö вöрмöслö öмас сюйыштiс. Ачыс иньдöтчис керöс йылас.

Видзöтö: сулалö керку не керку, турунъюр не турунъюр, а öшшö няръян вылын. Керис, кыдз воробей велöтiс, да и горöтiс:

— Керку, керку! Сувт, кыдз дядьыт пуктiс!

Керку бергöтчис куимись, ыбöс оссис. А сiя не ыбöс вöлöма, а Няръян-бабыслöн öмыс векышсьöма. Мужык казялiс öшын, кыссис сэтчö да шуö:

— Няръян-баб, этö ме, нучокыт, локтi.

— Кытшöм юöр вайин: сьöдö али чочкомö?

— Серакутшшаö, оз сiм не оз быгав.

— Вешшы нö пызан саяс, гöстит, нучок.

Ачыс лэдзис баличаэсö и не тэрмасьöмöн сыналö. Мужыклöн дульыс лэдзчö, но местасис оз вöрзьöтчы.

— Вай, баб, медчöскыт сёянтö, ме пöта ни.

Пырис Няръян-баб джоджулö медчöскыт сёянысла, а зусö колис пызан понас. Мужык кватитiс сiйö, сюйыштiс пиас да чеччöвтiс öтöрас.

Петкöтiс сёянсö Няръян-баб, а внучекыслöн и следыс абу. Малыштiс пызан понсис зусö — сылöн токо местаыс кольöма. Уськöтчис öтöрас, тапикасьö няръян коккезнас, видзöтö следсö, кытчö гусясисьыс пышшöма. Чеччалiс, чеччалiс — эз аддзы: некин абу керку дынсяняс мунöма. Эшö öддьöнжык лöгасис, пиннезнас гырчигалö. Öддзис кыйны юрсисö, ачыс керку гöгöрас йöр сувда чеччалö.

Кыйис, кыйис — öт баличасö кыйыштiс, гöрöд керис помас. Сэк жö мужык одзын ю оссис, паськыт да пыдын, быдсöн Чой керöссö кытшöвтöма.

— То тай, — думайтö мужык, — оланыслöн помыс кытöн! Öнi жö няръян кокыт коскаэзöс вильöтас.

Кысянь-некысянь вöрмöс петiс.

— Пуксьы, мужык, ме вылö да видзсьы буржыка.

Мужык вожасис вöрмöс вылö, сюррес бердас кутчисис крепытжыка, медбы не усьны.

Вöрмöс чеччöвтiс керöссянь ваас, вурд моз уйыштiс мöдлапöлас да вöрöттяс веськыта ризя-лопка гöнитö. Гöнитiс, гöнитiс — мыдзис да чеччöтiс мужыксö. А Няръян-баб эз аддзы первöй кытшöвсис мортсö, кыйис мöд баличасö да керис мöдiк кытшöв. Гöгöртiс сiйö, казялiс гусясисьсö ва дорсис — и сы дынö. Öмсö паськöтiс ворота пасьта, нюжöтiс куран киэсö и тапикасьö-чеччалö мортыс вылö.

Кысянь-некысянь, мусянь я, васянь я, петiс ош да Няръян-баб ныр увтiсь гусялiс мужыксö. Пуксьöтiс вылас да нюжöтчö-котöртö, одзись коккесö бöриссес одзалöны. Керöс вывсянь бузгисис ваас да вашыр моз уйыштiс мöдöрас. Смекайтö няръян кок: кытчö лоис мортыс? Да и казялiс мöдöрсис мужыксö.

Эшö öддьöнжык лöгасис, мусö коккезнас куртö, иззэсö кватайтö. Ачыс сажённöй баличаэсö юр гöгöрас каттьö, балича кыйöтöн зэлöтö. Кыдз токо кöрталiс балича кыйöтсö — куимöт кытшöв керис ваись.

Котöртö сэтчин, синнэссис би чеччö. Мужык тöждiсьö берег дорас, жугдö юрсö, кыдз бы васö вуджны.

А ошыс оз ни дюжит сэсся, öдва поиктö, кокпыдöссэсö шондi вылас косьтö.

Кысянь-некысянь, мусянь я, васянь я, кöин вуграсьö-локтö, кукань кодь лоöма.

— Пуксьы вывлам, мужык, да эн мезмы!

А мöдыт и рад: зэлöтiс лёк гырктö коккезнас, рукйöсь гöнас киэсö мöртiс. Кöин кувтык уськöтчис ваас, ёкыш моз уйыштiс мöд ладорас.

Няръян-баб чуннесö чеглалö, юрсисö летö, да сэсся нем сылö керны, ва саяс не сылöн ни муыс.

А мужык лэдзис кöинсö, зэлöтiс буржыка кушаксö, мед эзжык симав кынöмыс, да оськалö гортас.

Бытшöма я, не я, а сёжö локтiс. Инькаыс тшыгсяняс чуть коккесö абу нюжöтöм, баран токо синнэзнас кваркышалö, кок гыжжес сайкытöсь ни.

Мый керны? Мужык медбöръя сукарсö сьöрас босьтлiс,а бöр крöшка эз вай.

— Муна, — шуö, — кинлiськö одзöстышта кöть невна.

А воробей:

— Чирк-чирик, чирк-чирик! Эн мун, мужык, ме сёянсö вайи, — и кокыштiс ворота юр вывсис мыйкö сю тусь кодьöмö да чапкис посöдзас.

— То тай дивоыс! — радмис мужык, кöр казялiс öн вылiсь берся сёянсö. Куртiс-картiс öнсö морос одзас да йирка-ёрка керкуас пырис, иньыс одзö öнсö паськöтö, сёям пö чожжык, кытчöдз эг кулö.

Сёйисö пöттöдз, мый син вылö усис, — куйлöны-ружтöны. Токо воробей бöра öшынас тук-тук да ачыс чирк-чирик: верд пö, мужык, и бараноксö — менчим ёртöс.

А ежели кутчин ректасьны, дак пасматö эн öшты. Оз бы и вöрзьöтчы мужык, но колö. Петiс öтöрас, а посöдзас берся веж туруныс, кор бердö кор лапйыштöма пластокöн.

Сетiс мужык этö турунсö бараноклö, а мöдыт марс-марс сёйыштiс да и кок йылас сувтiс.

— Öнi, — баитö воробей, — вай татчö зутö, сувтöт идз вылас карта шöрас. Сэсся гормöччанöн сы гöгöр кытшöв кер, öзты зусис сирсö да тшынöт барансö.

Керис этадз мужык, и баранок пöртчис читкыля юра зонкаö. Конувттэс да паккес гöгöр паськöмыс быдöс орласьöм.

Сотчис зуыс, тшакыльöн тшыныс лэбтiсис, а би местаас чукöрöн зарни гыöвтчис.

Зонка Читкыля Юр сибöтчис мужык дынö да и шуö:

— Курав этö чукöрсö дозö да пырт гортат. А ме муна кошшыны невестаöлiсь обличчосö да вештiсьны вежливечкöт.

Чожа каскиыс висьтассьö, да не чожа угöлыс тшупсьö, не чожа горыс вартсьö.

Мунiс зонка Читкыля Юр, кытчö коккес нуöтöны. Мунiс, мунiс да му дорас локтiс, сэсся некытчö ни мунны. Но некин сылö эз висьтав, кытöн невестаыслöн обличчоыс куйлö. Водыштiс шондi морос вылö да мыдзсяняс сэтчö и ланьтiс. Саркйö-узьö, а ачыс вöтасьö.

Бытьтö локтiс сы дынö кöин, пуксис ордчöн, морос бердас кагаокöс ыжмитöм да нимöтö. Кагаокыс морт пиян кыдз морт пиян, токо пеллес кöинлöнöсь. Пуксис да и висьтасьö:

— Тэ, зонук, мун, кысянь локтiн. Пондан пырны первöй деревняас — туйтö дзим сьöд кань поперегалас. Тэ сiйö вий да котомкаат пукты. Локтан мöд деревняас — сизим гöна петукöс панталан. Вий сiйö да пукты котомкаат. Медбöрын панталан старикöс — пондас юавны, мый туй вылас аддзылiн. А тэ эн висьтась. Петукыс да каньыс — сылöн зоннэз, а ачыс — медыджыт тун. Кöр локтан гортат, лонт баня да пу чочком чугунын каньсö и петуксö. Öтыслiсь аддзан анькытш тусь кодь коскаок, мöдыслiсь — ем кодьö. Кин бы нiйö эз кор — некинлö эн сет. А невестаытлöн обличчоыс куйлö вежливеч градкаэз вылын.

Саймис зонка Читкыля Юр да чожжыка гортас. Пондiс пырны первöй деревняö — одзöттяс сьöд кань котöртö, туйсö гусялö.

Зонка Читкыля Юр шупкис сы кузя бедьнас — кань нюжöтчис токо, сымда и олiс. Пуктiс зонка сiйö котомкаас, мунö одзлань, ассис думасö думайтö.

Дыр я, не я, мöдiк деревняö локтiс. Пырис сэтчö, миськалö-мунö туй шöрöттяс. А одзас петук тальö туйсö, тар моз курзö, бытьтö роститны лöсьöтчö зонкасö. Бöжыс, кыдз енöшка, сизим рöма, ачыс зöр кольта сувда, синнэс, топ малина туссез.

Зонка Читкыля Юр торскис бедьнас юрпыдöсас — петук коккесö вывлань лэбталiс. Босьтiс зонка и сiйö да котомкаас дзимлялiс.

Мунiс, мунiс да туйвеж ордйис, креста туй вылö петiс. А сэтöн паськыт рожаа старик сулалö, нырпысас бедьöн гуддисьö.

— Тэ кытчö, зонка, ветлiн да мый аддзылiн? — юалö старик.

— Ме ветлi му дорас, видзöтi, мый сэтчин керсьö, кыдз отирыс олöны, да некинöс эг аддзыв.

— А кин тэныт паныт шедлiс, мый бурсö висьталiс?

— Некин эз пантась, не эз вöт, а ме некинöс эг вöрöт.

— А мый нö вöлыс вылат кыскан?

— Тшак да пикан — аслым сёян.

И мунiс зонка Читкыля Юр аслас туй кузя да пывсян кадö гортас локтiс. Жарöтiс баня, аддзис чочком чугун и пуö сэтöн вийöм сьöд каньсö да сизим гöна петуксö.

Варкйис, варкйис ваыс да коскаэс тожно и торъясисö яй бердсиныс, пуксисö пыдöсас, а яй да гöн ортсö быгöн лэдзчисö. Зонка Читкыля Юр рудзöтiс васö öшын тупкöт пыр, аддзис колан коскаэсö и мунö гортас. Предбанникас патерасис кöзяйкаыс пантасьö:

— Вай, зону, ме нöбöта коскаэсö, а тэ банясö ештöт.

Эз и шыась зонка, мунö одзлань. Осьтiс ворота, а паныт — кöзяиныс:

— Вай, зону, ме нöбöта коскаэсö, а тэ вöвсö юктав.

Эз и видзöт мужыкыт вылö зонка, кайö посöдзас. А паныт невестаыс:

— Ок, ёртöй, вай чожжык коскаэсö, а то ме бöр пöртча воробеяс, вöлись кошшы менö.

Зонка Читкыля Юр кошшö писис коскаэсö, лöсьöтчö сетны нiйö да казялас, што невестаыс синкымтöм.

Тапкис сылö моросас да уськöтчис керкуас. А сэтчин кöзяин гозъяыс пукалöны пызан сайын.

Кыдз пырис керкуас зонка Читкыля Юр, öшынö воробей — нырнас тарс-тарс да ачыс чирк-чирик, кытсалö зонкасö, руд бордокнас шовкöтö, радуйтчö:

— Бур, ёртöй, бур! Öнi вежливеч ордö мун.

— А кытöн сiя олö? Ме ог тöд, — шуö зонка.

— Лэдз анькытш тусь кодь коскасö одзат, сiя нуöтас. А кин пондас кокыштны нето ньылыштны сiйö — эн сет. Сы туйö мöд коскасö чапкы.

Зонка Читкыля Юр петiс туй вылö, тарöвтiс коскаоксö, а мöдыт и давай тарöвтчыны, давай тарöвтчыны, пемытiнас биа донокöн тыдалö. Зонка сы бöрсянь котöртö, а воробей ордчöн лэбзьö.

Мунiсö, мунiсö, асъявнас кырйылö локтiсö. Сулалö сэтöн öтка керку, биок дзуз видзö. Тарöвтчö коскаок веськыта сiя керку дынö. Друг вылiсянь кырныш шарк лэдзчисис, эз и казяв зонка, но воробейытлöн синыс лэчыт: ныр увтсис кырнышлiсь коскасö гусялiс. А сэтчö и зонка чапкис ем кодь коскасö; кырныш сапкис-кокыштiс, и коскаыс тасасис горшас, виньдöтiс лёквирöс. Токо сiя вöлi не кырныш, а ачыс вежливечыс.

Зонка Читкыля Юр аддзис градка коласiсь невестаыслiсь обличчосö да кышалiс воробейыс юр вылö. Сэк жö воробей чапкис руд паськöмсö да пöртчис мича нылö. Сразу шондi петiс, туйсö югдöтiс.

Сэтчö и каскилö пом, а зонлö да нывлö — венеч.