Лёгостай

Олiсö-вöлiсö гед да баб. Гедлöн — нинкöм да сьöктан, а баблöн — чöрс да печкан. Вöлi нылöн эшö курöжок, год вылас öтпырись кольттявлiс, да не зарни кольттез, а простöйезö.

Эта прискаски, а каскиыс одзланьын.

Вöлiсö старик гозъялöн куим зон: кыкыс уджалiссез, а куимöтыс — Лёгостай.

Ыджытжыккес каясö ректас вылö, а Лёгостай — горвыв сёрдын пукалö да тороканнэзöс сунис вылö пысавлö. Сё бы сьöдсö кутö, аслыс шуд кошшö.

Сапырнитас öтiкö, юалас:

— Лоан он вöлöн, пондан он менö кыскавны?

Оз кö шыась тороканжуг, не овны сылö: сюрас сунис вылö.

Видчö гед, желлясьö баб:

— И кин родö тэ сэтшöм абызыс мунöмыт? Йöзыс кыдз йöз, а тэ öтнат лёгостайö пöрöмыт: не он кöдз, не он вунды, а гор сайсис сасö куралан.

Оз спорит Лёгостай, да ас мознас керö.

Дыр я, не я тороканнэс сьöрын вöтлiсис, да гор сайсис сьöд торокан мыччисис. Уссэс — топ порозлöн сюррез. Кватитiс торокансö уссэзöттяс, а мöдыт бöрöн да бöрöн кыссьö, Лёгостайöс аслас осьтаö пыртö бы. А син бугыллессис бичир койö, сiйö и видзöт, медбы стенаыс эз öзйы.

— Чöв, — шуö, — сэрпöсь ныр. Ме пиньöвта тэнчит юртö. А кузь усыт сё бöрланьö, сё бöрланьö. Вот-вот берездасясö кыкнанныс гор саяс.

Пыкöтасис стенаас Лёгостай, кыккусiнь кöстiсис, а торокансö видзö даки.

Казялiс сьöд чутыр, што овсьö сылöн оланыс, пондiс кеймисьны:

— Вермин менö, Лёгостай, янöтiн. Лэдз, бур козин сета. А Лёгостайлö сiя и колö. Кешитчö торокан вылын, дозыляйтö сiйö:

— Пырт менö сэрпöсь сарствоат и пукты менö сарö.

— Быдöс сета, мый коран, токо сiйö ог вермы керны.

— Сiдз дак сiдз, — баитö Лёгостай. — Ог мун инö тэнат сарствоö. Токо сет меным куим воронöй вöв да виль керку сувтöт. Да медбы ме каждöй лун пöттöдз сёйи.

— Талун ойнас, кыдз первöй петукыс китöстас, лок вöрись дядьыс ты дорö. Шутньöвтан куимись и виччись менчим вöввезöс.

Лэдзис торокансö Лёгостай да водiс узьны. Саймис тожно ойшöрнас, лэдзчис улö. Полö öтнас козинысла мунны, а ветлыны колö. Саймöтiс воннэсö: сiдз и сiдз пö, ветлам сэтчин. Лöгасисö воннэс, сюйисö Лёгостайлö ордлыэз увтас, бöбöлöн шуисö да асьныс бöр водiсö. Норовитыштiс Лёгостай и бöра воннэсö чувйö, вöввез кöсйö, кыдзи мунасö сыкöт. Кылiсö этö воннэс, чеччисö.

— Ладно, — шуöны, — мунам. А бöбöтiн кö — кучиктö кульыштам.

Мунiсö, мунiсö, ты дорас локтiсö. Шутньöвтiс Лёгостай — кöиннэз унньöвтiсö. Воннэслöн юрсиныс шапканысö лэбтö, кышöпöн сувтö. Мöдпырся шутньöвтiс — токо вöрыс ружтыштiс. Куимöтпырся шутньöвтiс — тöв лэбис, вöрсö чегö-водтöтö. Сэки ты дорас учöтик-учöтик морток петiс: ниндуль да и токо.

— Мый виччисят, морттэз? — бакöстiс морток.

— Кöдö тöн кöсйин, — шуö Лёгостай.

— Дак босьтö нö, вон кöсйöмыс! — и гöна ниндуль мыччалiс воннэз бöрö.

Бергöтчисö воннэз, аддзöны: пу бердö зарни чеппезöн вöввез кöрталöмась. Не вöввез, а би!

Уськöтчисö ны дынö воннэс, мездöтiсö зарни чеппесö да шовковöй поводдэсö, кышасисö воронöйез вылас и тöвчикöн гöнитiсö гортаныс.

Дзаръялö Лёгостай, ассис вöвсö смекайтö, да некытöн абу. Валёжина дынын нёкыртчöмöн сулалö öтiк чанёк: пон пон и эм, да эшö люштыра пеля.

Дзугыльтчис зонлöн сьöлöмыс, юрсö сьöкыт дума нырыштö. Бöбöтiсö Лёгостайöс воннэс, вöвтöг сiйö колисö. Кöть бы нокотьöсь чанёксö босьтны, да и кутнытö немöн, сермöтыс абу.

Токо думайтiс этадз, сэтчö учöтик мортокыт и горöтчис:

— Мыйись ныртö муас мöртiн, Лёгостай? Вот сермöтокыс öшалö ув вылас, каттьышт коскат да и вöтчы воннэт сьöрö.

Лёгостай босьтiс сермöтжуг, а Воронко шырк пырыштiс зон коккез коласö и ножö пöльтны-петны дзибъяинiсь. Кыдзкö ештiс зонка кутчисьны грива бердас, а то бы берездасис вöлокыс вылiсь, асьсö шöри стрöйдiс.

Лёгостай эз ешты и кваркыш керны, кыдз гортас лоис. Йöртiс вöлоксö пос увтö, сермöтжугсö йöр вылö кышалiс. Ачыс пырис керкуас, горвыв сёрдö кайис. Сэтчö и воннэс бертiсö, жольöтöны зарни чеппезнаныс, кышöтöны шовковöй поводдэзнаныс. Сувтöтiсö вöввезнысö оградаас, йирка-ёрка керкуас пырöны. Пырисö, торс пидзöссэз выланыс сувтiсö, енлö пернапассэз тэчöны вöввес понда и Лёгостайöс жалейтöны: босьтiс пö, натьтö, ловсö сылiсь вöрись дядьыс, сюйыштiс сiйö нечистöй тыö.

А Лёгостай шыасьö трубка сайсянь: ловъя пö ме, воннэз, татöн шонтiся. А воннэс — юасьны: кыдз пö тэ миянся одзжык локтiн? Оз висьтась Лёгостай, а пöрисьжыккесö стыдитö, мыля сiйö, учöтсö, дзибъяинас öтнасö чапкисö.

Лöгасисö воннэс, мыля Лёгостай не ны сьöртi баитö. Мутузитiсö коньöрöс, öтöрас тойлалiсö да нырас и öмас тшуписö, мед сiя эз висьтась, кытiсь вöввесö аддзисö.

Мый öнi керны Лёгостайлö? Пырис пос увтас ассис вöлоксö видзöтны, а сылöн и дукыс абу. Босьтiс киас сермöтжугсö, а одзас кузь пеля Воронкоыс быдмис, бытьтö мусис петiс и морт моз юалö:

— Мыйлö корин, Лёгостай? Думыш керис зонка да и шуö:

— Кыскы менö сэтшöм муэзö, кытöн абу завистливöй да горш отир, кытöн некин некинöс и кылöн оз дойд.

— Сьöкыт удж меным сетан, Лёгостай. Ог тöд ме, эм я сэтшöм вольнöй вольничаыс. Но эн тöждiсь: лэдз менö куим лун да куим ой кежö, и ме кытшöвта чочком югытсö. Токо эн вöрзьöт сермöтсö, эн костiав менö.

Лэдзис Воронкосö Лёгостай, ачыс бöра гор вылас корсис.

Чулалiс лун, чулалiс мöдiк. Лёгостай лопаткаэсö шонтö да потолокас сьöлалö. Вот и куимöт лун чулалiс, ой сибалiс да Лёгостайлö юöр вайис. Кинкö гор сайсянь горöтчис:

— Пет öтöрас, Воронкоыт локтiс.

Петiс дышкуль, сермöтсö киас босьтiс, а вöлокыс сэтöн и эм.

— Сьöкыт задача меным сетiн, Лёгостай. Быдöс мусö кытшöвтi, а некысь эг аддзы вольнöй вольничасö.

Эшö лажмытжыка öшöтiс юрсö Лёгостай, сьöкыт дума думайтö. А Воронко баитö:

— Сапкун керöс вылын эм тöдiсь кай. Сiя быдöс тöдö. Юась сьöд тороканыслiсь и мийö ветлам сэтчин.

— Ветлам.

Пырис гортас Лёгостай, кайис гор вылас да кытсалiс тороканöс. Мыччис уссэсö сьöд чутыр, юалiс:

— Мый тэныт колö, Лёгостай?

— Лэдзлы-ко менö Сапкун керöс вылö тöдiсь кай дынö. Ась висьталас сiя, кытöн эм вольнöй Вольнича.

— Ветлö инö, но чур: месянь сэсся нем эн кор.

Согласитчис Лёгостай, чепöссис öтöрас, сермöтсö трекйö. Локтiс Воронко — кузь пель, Лёгостай вожасис сы вылö да и лэбтiсис кай моз нёбоас. А вöлокыс велöтö кöзяинсö, кыдз да мый керны, мед ловйöн кольччыны.

Дыр я, не я, лун я, неделя я сiдз кымöррезöттяс уйисö, да локтiс первöй öзын. Дышкульöс косьмöм тшак кодь баб панталö, юасьö дивнöй диво йылiсь. А Лёгостай шы оз сет да темляк вылас гöрöд бöрсянь гöрöд пуктö: юалас баб — Лёгостай керö гöрöд, юалас мöдпырся — Лёгостай керö мöдiкö.

Мыдзис баб юасьтöнняс, а Лёгостай сапырнитiс сылiсь медкузь баличасö, швач вундыштiс да пиас дзебис. Ачыс вöлок вылö пуксис, и лэбзьöны одзлань.

Лэбзисö, лэбзисö — мöдiк öзын локтiс. Панталö нiйö öтiк сина дзор старик, юасьö абу-абутöм йылiсь, тöдiсь кай йылiсь. Лёгостай шы оз сет да темлякас гöрöд вылö гöрöд пуктö, стариклiсь вынсö чинтö. Кыдз мыдзис старик, Лёгостай сылiсь джын тошсö швач вундыштiс да пиас сюйыштiс.

Шоччисьöв-керисö и лэбзьöны одзлань, токо керöссэз да саридззез мелькайтöны, а бокöттяныс кöдзуввез шутнялöмöн уйöны.

Дыр я, не я, мисеч я, год я сiдз лэбзисö, да локтiс медбöръя öзын — Сапкун керöс, кытöн тöдiсь кайыс олö. Пуксисö эта керöс вылö, öшалан из вылö. А сiя изыс куш зарниись аркмöм, и гöгöр крустальнöй двореччез свиттялöны.

Панталö Лёгостайöс мича нывка, юасьö сылiсь, кыдз татчöдз локтiс да мый аддзылiс. А Лёгостай тöдö, мый висьтавны:

— Перво, мича ныв, уд-верд, а вöлись и юась. Гöститöтiсö Лёгостайöс, а мича ныв бöра ассис модьö: кыдз локтiн да мый аддзылiн. А дышкуль тожö ассис:

— Кыдз аддзыны вольнöй Вольнича?

Мыдзис нывкаыт, кык бордтыв уськöтiс, сьöдö да чочкомö. Чочком вылас Лёгостай тап тальччис да гаруснöй йиас куим гöрöд керис. Сэтчö и висьталiс мича ныв:

— Куимпöв чочком югытсö кытшöвтан, а вольнöй вольничасö он аддзы. Но позьö керны сэтшöмсö аслыт. Босьт энö бордтыввесö сьöрат. Тöд: чочкомыс — воля да спасеннё, а сьöдыс — неволя да смерть. Локтан гортат, кошшы сэтшöм места, кöда тэныт любо. Босьт чочком бордтывсö, пуксьы вöв вылö и кытшöвт сiйö местасö. Вот и лоас вольнöй Вольнича. Но тэ вылö уськöтчасö, покодöн локтасö завистливöй да горш отир. Эн вунöт: сьöд бордтывсянь лёк йöзлöн оланныс овсьö.

Кылiс этö Лёгостай и чожжык гортлань иньдöтчис.

Чожа каскиыс висьтассьö, да не чожа делоыс керсьö Локтiсö öзынö, шоччисьны сувтчисö. А öтiк сина старик сэтöн и эм. Брякнитчис му бердас — ыджытся-ыджыт öшкаö пöртчис. Паськöтiс öмсö — дзирыт ю ыркнитiс öмсис. Визывтö и визывтö юыс, гöгöр дзирыт ванас вöтис.

Лёгостай вöлоксö тэрмöтö, а сылöн садьыс дук абу, лэбзьыны оз вермы. Ваыс ны дынöдз ни сибалö, бульыктö-бергöтö, и ачыс öшкаыс пидзöсви ваын. Усис тöдвылас Лёгостайлö, што пиас стариклöн тош эм, свиснитiс ваас. И ваыс давай бöр больгыны-пырны öшкаыс гыркö.

Сэтчö и Воронко öктiс вынсö, готов лэбзьыны одзлань. Вожасис Лёгостай сы вылö, и вöлок чепöссис нёбоö.

Лэбзисö, лэбзисö, бöра шоччисьны сувтчисö. А старука сэтöн и эм. Сунгисис му вылас — гöрд катшаö пöртчис, вöрас лэбзис. И сэк жö быдöс вöрыс биöн кутчис.

— Пышшам чожжык, — тэрмасьö Лёгостай.

А Воронкоыт эз на шоччись, садьыс дук абу. Биыс кымöрсö калитö, нырöн-нырöн ны дынö локтö. Лёгостай кыскис старукалiсь баличасö, шентiс биас. И öддзис сэк катша лэбавны би весьтöттяс, круг да круг керны. А кыт лэбзьö — бöрас зелёной вöр кольö.

Сэтчö и Воронко öктiс вынсö, и лэбзисö нiя одзлань.

Чожа каскиыс висьтассьö, да не чожа делоыс аркмö. Не куим лун, не куим неделя, а куим год чулалiс, кыдз Лёгостай гортсис мунiс.

Бертiс айыс керку дынö дышкуль, а керкуыс абу. Сы местаын кык терем сулалöны, ворота одзас стража. Богатсялöмась воннэс нiя вöввез пыр, кöднö вöрись петкöтiсö. Лёгостайкöт оз и баитö бы, син одзсиныс вашöтöны. Öдва-öдва лэдзисö оградаас.

А Лёгостай кут да и висьтав чочком бордтылыс йылiсь да тöдiсь кайыс йылiсь. Воннэс мырддясö бордтывсö, а Лёгостайлö бöрпонас брынгасö, öтöрас тойлаласö и стражалö закажитасö:

— Матö эд лэдзö ворота дынас этö ёрдöм коскасö!

Лöгасис Лёгостай, павкöтiс сьöд бордтывнас керкуэз бердö — тереммес гиля-голя киссисö. Сэк кутiсö Лёгостайсö да ямаö сюйыштiсö, ыбöссö сизим замок вылö жын-жын игналiсö. А дышкуль павкöтчис сы бердö — ыбöс шöри паськалiс. Быдса дружина лэдзисö Лёгостай вылö — öтiк морт ловйöн эз берт. Сэк воннэс асьныс уськöтчисö, а Лёгостай и нiйö вийис да чочком бордтывсö дынас босьтiс.

И мунiс эта бордтылöн керöссэзöт да логгезöт, вöррезöт да ыббезöт — керис вольнича вольнöйö. Корис дынас быдöс гов отирсö, чукöртiс пöрисьсö и томсö. И олöны сэтчин, лёк нуждасö оз тöдö, йöз эмбур вылö оз заритчö.

Мунi бы и ме сэтчин, да кин нö сэки каскиэсö пондас висьтасьны?