Мича марпида

Олöма кöркö Мича Марпида. Сылöн вöлöмась кык сотня дудi. Вердöма нiйö зöрöн. Джыныслö, стоыслö, зöрыс тырмöма, а мöд стоыслö абу тырмöма.

Öтпыр сiйö локтас корасьны Иван Иванович. А Иван Иванович вöлöма черикыйись и вöралiсь. Сылöн роднöй мамыс кулöма, и тятюыс босьтöма мöдiк мамöс, кöдö шуöмась ягишнаöн. Эта мамыс вöлöма öддьöн лёк. Мунас пö вöрö, дзарнитас аслас ки увтöт и сэк жö пöртчас кöинö. Сiйöн и ягишнаöн шуöмась.

Вот Иван Иванович локтас корасьны Мича Марпида дынö да и шуö:

— Мунан тэ, Мича Марпида, ме сайö?

— Ог мун тэ сайö, Иван Иванович, — висьталас Мича Марпида.

А дудiэс, мöд стоыс, сэтöн и баитöны:

— Тэ миянöс он верд, мийö сёроно мунам. Тэ кöр онмöссян, мийö тэнö босьтам да нуöтам öтлаын.

А одзза сотняыс горöтчасö:

— А мийö ог сетö.

— Тiйö пöтöсь да онмöссят, а мийö тшыгöсь да ог онмöссьö. Мийö караулитам да и нуöтам.

Локтас ой. Мича Марпида ланьтас. Дудiэз гусьöник босьтасö сiйö да нöбöтасö. Туй вылас трекнитасö чуть, и Мича Марпида саймас. Сiя чепöссяс, кыскас шöрись чуньсис зарни чунькытш да чапкас саридзö, ачыс висьталас:

— Кытчöдз ме этö чунькытшöс ог аддзы да чуням бöр ог сюйышт, некöр меным жöниккöт не сёрнитны.

Эта бöрын Мича Марпидаöс дудiэз пыртасö керкуас Иван Иванович ордö.

Ашынас Ягишна и шуö Мича Марпидалö:

— Мун пет да мöссö чилькöт.

Марпида иньдöтчас öтöрö. Иван Иванович петас сьöрсяняс да висьталас:

— Эн чилькöт. Сылöн мöсыс кöин. Сiя тэнö сёяс. Ведратö сувтöт да шу: «Мöс, лысьтiссьы, лысьтiссьы. Йöв, киссьы, киссьы».

Нывка сiдз и керас. Ведра тырас йöлöн. Мича Марпида пыртас йöвсö керкуö да шы оз сет. Ягишна баитö:

— Кыдз тэнö менам мöсö эз сёй? Мун пет да балясö шыр.

Иван Иванович гусьöн бöра жö висьталас аслас Марпидалö:

— Сылöн баляыс ош, сёяс тэнö, тэ сiйö эн шыр, а тазсö пукты му вылас, ножничсö баля спина вылö, ачыт шу: «Шырсьы, шырсьы, тазö киссьы, киссьы».

Марпида сiдз и керас. Тазтыр пыртас вурун. Старука ягишна бöра баитö кыз лёк голосöн:

— Кыдз тэнö менам баляэзö эз сёйö? Мун менам кума ордö да вай сы дынiсь менчим чöрс.

Мича Марпида мунас. Сылö паныт чепöссяс пон. Марпида чапкас понлö яй тор, и поныс лэдзас сiйö.

Эта бöрын дзодзоггез кутчасö кокавны. Марпида кисьтас нылö шогдi. Дзодзоггез лэдзасö сiйö.

Сэсся кань пондас гыжъявны, и Марпида швыргас сылö яй торок. Кань тожö лэдзас.

И вöлись Мича Марпида пырас ягишнаыс кума ордö да и шуас:

— Чöрсла локтi. А кума и горöтчас:

— Эг на ештöт печкöмöс. Ме часöт муна баняö пывсьыны, а тэ сы коста печкышт менчим кудельöс.

Ягишналöн кума мунас баняö не пывсьыны, а пинь тöчитны, медбы Мича Марпидасö сёйны. А кань эта коста висьталас Марпидалö:

— Ме орöта шöртсö, а тэ чöрссö босьт да пышшы, мун татiсь.

Мича Марпида сiдз и керас. Босьтас чöрссö, петас да котöртас.

А ягишналöн кума локтас банясяняс и ножö видны каньсö:

— Ак тэ, лёкшöр, мыля сiйö лэдзин? Вия ме тэнö ки-коктö чеглала!

Петас öтöрö, видзöтас. Аддзö: ылын ни — и оз понды вöтчыны Марпида сьöрö.

Мича Марпида локтас гортö. Иван Иванович какраз вöлi ыджыт шукаöс весöтö. Кишкасö поткöтас да зарни чунькытш аддзас. Мыччас Марпидалö. Мича Марпида вöлись и висьталас:

— Вот ме тэкöт öнi вöлись понда сёрнитны.