Иван саревич (1)

Кытшöмкö сарствоын, кытшöмкö государствоын олiс сар. Сылöн вöлi токо öтiк зон Иван. Годiсь годö быдмис Иван Саревич и вот лоис ни жöник. Сар аддзис невеста и лöсьöтчö зонсö гöтравны, а Иван Саревичлö невестаыс оз гленитчы. Кыдз токо сар эз пондыв зонсö рамтны, а сiя некыдз лесь вылö оз сетчы, кратайтчö, пыксьö. Медбöрын сар лöгасис, чапкисис и шуö:

— Гöтрась кыдз тэ мöдан и босьт кинöс тэныт окота, ме касайтчыны ог понды.

И вот саревич петiс туйö. Дыр я, не я сiя мунiс, локтiс вöр дорö. Пырö вöрö, а сэтчö ыджыт и ыджыт мужык пантасьö. Дыровайтчисö, юасисö-висьтасисö, и мужык пондiс тöдны, што Иван Саревич петiс кошшыны аслыс невеста да и шуö:

— Мунам ме ордö, шоччисян да поди и невеста аслыт бöръян.

Мунö Иван Саревич мужыккöт, пырöны вöр тэлляö. Вот кушин, а сэтöн и керку, ыджытся-ыджыт. Пырöны керкуö. Мужык Иван Саревичöс чöвтас, пуксьöтас, а ачыс мунас мöдiк жырö ныввез дынö. Сыкоста Иван Саревич ештiс баитны старушкакöт, кöда сэтöн вöлi, и тöдiс, што эта не простöй мортыс, а вöр дядь и што сылöн аслас кык ныв, а куимöтыс саревна, кöдö сiя гусялöма да и старушкаыс важын ни, эшö том воэзас, тожö вöлöма гусялöм. Кöр сiя тöдiс, што Иван Саревич петöма туйö кошшыны невеста, пондiс шуны:

— Тэ эн жö бöбась гöтрасьнытö вöрисьыс ныв вылын. Гöтрась тэ бур молодеч, саревнаыс вылын.

Но мед не сорасьны, ме тэныт примета висьтала: бöрйы сiйö, кöда коккесö тэчас кокись кок вылö.

Вот и петiсö ныввез, пуксисö паныт Иван Саревичлö, сёрнитöны сыкöт, а сiя сё видзöтлö ны вылö да коккезныс вылö. Аддзö: дорисьыс пукалö креста коккезöн. Иван Саревич сiйö и бöрйис.

Мужык ашынас жö корö свадьбаöн. Мунiс Иван Саревич гортас и баитö айыслö:

— Ме бур ныв аддзи вöрисьлiсь, и айыс сылöн ашын жö корис свадьбаöн.

Ай Иван Саревичöс оз кывзы, свадебшанаöс оз öкты. Сэк саревич мунö кабак дынö. А сэтöн унаысся уна отир: кöда юö, кöда сьылö, кöда йöктö, кöдна мыйкö редитчöны. Иван Саревич сетiс нылö поклон и корис аслас свадьба вылö. Кодуллез согласитчисö быдöнныс. Пуксисö доддезö, пуксьöтiсö Иван Саревичöс и гыма-йирка мунöны вöрö невестала. Локтiсö невеста горт дынö, жöникöс свадебшанакöт, кыдз колö, примитiсö.

Бöр мунöм одзын ни Иван Саревичлöн тесьыс петiс оградаö, вайис ыджыт чукöр бон да быдöс сiйöн каттис кошоваэсö, оглобляэсö, сбруясö, дугаэсö да и свадебшанасö. Сiдз и тшöктiс пуксьыны доддезö. А жöниклö закажитö:

— Ме гöститны тэ ордö локта куимöт лунö свадьба бöрас, токо керкуат ог пыр, а тэ посöдзас сувтöт кöньöс брага, кöньöс сур да кöньöс вина. Менö керкуö эн кор. Ме сiйö юа и муна гортö.

Ештiсö токо петны вöрись, кыдз боныс свадебшана вылын, сбруя вылын, кошоваэз вылын пöрис шовкö.

Вот свиттьöв-свиттьöв свадьбаöн чарлалöны-локтöны вичкуö, а вичкуын поп абу. Аддзисö свадебшана попöс, нуöтöны бы вичкуö, а сiя оз мун.

Кöдкоста Иван Саревич мунiс невеста дынö свадьбаöн, сыкоста сар закажитiс попыслö:

— Локтас кö зонö венчайтчыны, тэ сiйö эн венчайт: эд сiя гöтрасьö вöрись ныв вылын, некрешшонöй вылын.

Вот сiйöн и поп пыксьö, некыдз оз мун вичкуас. Медбöрын невеста голясис босьтас перна, а сэтöн вöлöма айыслöн — сарлöн карточка. Кöр поп казялiс, шай-пай лоис. Эд сiя этö мöдiк государствоись сарсö тöдö. Пондiс курни-верни пасьтасьны. Сюйыштö бы, сюйыштö киэсö соссэзас, а нiя некыдз озö инмö. Öтсö сёжö кышалiс, мöдсö кышавтöг сiдз и лет-лет котöртiс.

Вот и венчайтiс. Том гозъя айыс ордö свадьбаöн гымалöны-локтöны, а воротаэз иганаöсь. Дворечö сар том гозъяöс эз лэдз.

Неылын сэтöн вöлöма сарлöн избушка — сэтöн и свадьбасö чулöтöмась.

Вот и олöны том гозъя, öта-мöд вылö любуйтчöны. Сiдз чулалас неделя, мисеч и мисеч-мöд. Сёйны лоö нем. Сар вокорень откажитчис зоныс дынiсь и немöн эз понды отсавны. Сэк том ичмонь и шуö жöникыслö:

— Иван Саревич, вот тэныт менам перна. Босьт сiйö и мун айö ордö. Этö пернасö мыччан, сэк айö тöдас, што тэ менам жöник.

И петiс Иван Саревич туйö. Дыр я, не я сiя сiдз мунiс и локтiс иньыс ай ордö. Пырис да мыччис иньыслiсь пернасö. Бура сiйö удiсö-вердiсö и грузитiсö козинсö нылыслö быдса кораб. Кольлiсö Иван Саревичöс кораб вылö. Вот и локтö гортас Иван Саревич корабöн, рад не рад, што чожа аддзисяс иньыскöт и пондасö эта доброöн бура овны.

Мунö лун, мунö кыкö, мунö дыр ни. И вот лэбтiсис ыджытся-ыджыт тöв. Пондiс летны-вотны, корабсö брякйыны. Быдöс сiйö паздiс и медбöрын быдсöн паськöтiс и ванас резiс öтмöдöрö.

Иван Саревич кольччис токо öтiк кер вылын ва шöрас и чапайтчö-лэдзчö. Кытшöм токо думаэз юрас эзö пыралö. Но вот погоддя пондiс раммыны и чапкис сiйö кытшöмкö берегö.

Недыр мыйись сэтчö локтiс старик да пондiс юасьны:

— Мый нö тэ эстöн берег дорас керан, бур молодеч?

— Ме, геду, мунi корабöн. Лэбис тöвчик, корабöс быдсöн паздiс, а менö вот кер вылын этчö чапкис. Öнi ог тöд, кыдз меным сюрны том иньö дынö.

— А эд иньтö айыс сетö мöдiк жöник сайö. Чожа свадьба ни лоас.

Кöр Иван Саревич локтiс настояшшöй тесьыс ордö, сарыс ордö, да мыччис пернасö иньыслiсь, то тесьыс думайтiс, што эта мортыс и гусялiс сылiсь нывсö. Кöр сiя удiс-вердiс Иван Саревичöс, туйö лöсьöтiс, сы коста иньдiс гонеччезöс, медбы нiя нывсö чожажык вайöтiсö. Гонеччез мунiсö и висьталiсö ичмоньлö:

— Айыт и тэнö корö гöститны.

Вайöтiсö сар дынö сылiсь нывсö, а Иван Саревич эз ни вöв, сiя корабнас вöлi мунöма ни.

Локтiс Иван Саревичлöн инь айыс ордö, а айлöн готов ни мöдiк жöник. Саревна пыксьö, оз бы мун мöдiк жöник сайö: сiя эд öддьöн радейтö Иван Саревичсö, но айыс неволитöмöн неволитас. И вот лöсьöтчöны свадьба кежö.

Шуштöм-гажтöм лоис Иван Саревич. А старик и шуö:

— Эн öшöт юртö, Иван Саревич, а вот тэныт ключ. Босьт сiйö, мун сарскöй сад дынö и ключнас сiйö осьтан. Пыран сэтчин да нем эн сёй. Сэтчö садас петас иньыт.

Босьтiс Иван Саревич ключ, мунiс сад дынö, жиль-жоль осьтiс сад ыбöссö да и пырис. А садас мыйыс-мыйыс токо абу: яблокыс, вишняыс, сливаэз и быдкодь ягöдыс. Ветлöтiс-ветлöтiс сад кузя Иван Саревич, а иньыс оз пет. Аслас кынöмыс вир петö сималö. Сибöтчис вишня дынö да и öтiк вишняок сёйис: мый пö сэтiсь, эд нем оз жö ло. Пуксис сэтчö вишня увтас да и сар-р токо öнмöссис.

Чожа эта бöрын иньыс и петiс. Гуляйтö садöт, лолалö сöстöм воздукнас, и друг аддзö: вишня увтын узьö морт. Сибöтчис матöжык, видзöтö, мортыс öддьöн вачкисьö Иван Саревич вылö — жöникыс вылö. Пондiс сiйö треситны-саймöтны. Кыдз токо эз кутчыв лэбтыны, но Иван Саревич и трек оз кер. Сэк садовниккезлö тшöктiс босьтны да петкöтны садсис. Можот пö и не сiя, ― думайтö аскöттяс.

Садовниккез петкöтiсö Иван Саревичöс садсис, водтöтiсö лабич вылö, пырисö садас и жын сiйö игналiсö.

Узис-узис Иван Саревич и саймис. Видзöтö: сад игана, а сiя токо сад бокын. Вот пö и аддзылi иньöс, думайтö сiя, ачыс готов вывтсис быдöс летны, мыля эз кывзы стариксö, мыля сiя бöбасис сёйны. Пукалö, горюйтö.

Сэтчö бöра и локтö старикыс да и шуö:

— Ак, тэ, Иван саревич: эд, видно, сёйин мыйкö садсис. А эд тэ не етша узин: куим лун ни кольччис токо иньыт свадьбаöдз. Вот босьт бöра ключ да эшö пыр садас. Виччись сэтчин да нем эн жö сёй. Иньыт сэтчö петас.

Босьтiс Иван Саревич ключ, мунiс ыбöс дынö да жиль-жоль осьтiс. Пырис и ветлöтö садöт. А пуэз вывсис вишняэз розйöн-розйöн öшалöны. Яблоккес, сливаэс, быдкодь ягöдыс, видзöтан да, сiдз ровно нiя öмö и чеччöвтöны. «Но мый жö поди сэтiсь лоас, — думайтö, — босьта да кöть öтiкö сёя». Сёйис кытшöмкö ягöдтор да сэк жö бöра пондiс саркйыны-узьны. Иньыс петiс садö, бöра аддзö, кинкö сэтöн узьö, öддьöн ни сiя вачкисьö жöникыс вылö — Иван Саревич вылö. Стрась окота сылö саймöтны. Вот эд чожа свадьба ни, а сiя оз жö бы мун мöдiкыс сайö. Быднёж пондылiс трекйыны Иван Саревичöс, а сiя токо корöтö-узьö.

Тшöктiс бöра сiйö петкöтны садiсь: «Поди кин сэтшöмыс и эм, а ме сiйö аслам жöникöн лыддя», — думайтö саревна.

Дыр узис Иван Саревич. Куимöт лунас вöлись саймис. Юр вывсис готов юрсисö быдöс летны, но нем он кер.

Буражык одззася шуштöм-гажтöм пукалö Иван Саревич. Вот пö эд кыдз не кывзынытö.

Сэтчö бöра старикыс и локтö да юалö:

— Но мый, Иван саревич, аддзылiн иньтö?

— Эг.

— Эк-ка тэ эд бöра видно мыйкö сёйин? Эд иньытлöн талун свадьба ни. Но эн тöждiсь. Вот тэныт гармоння. Пыр сiйöн дворечас да невна орсышт, а сэтчин ачыт казялан, мый лоас.

Босьтiс Иван Саревич конувтас гармоння и пырис дворечö. Сiйö бытшöма примитiсö и тшöктiсö орсны. Сiя токо размöдiсь дзигнитiс — быдöс гöссес пидзöссэз выланыс усисö; мöдпырся дзигнитiс — быдöнныс водiсö и онмöссисö.

Иван Саревич кватитiс иньсö да — ыбöсö, и чожа-чожа гортаныс локтiсö. Пырисö гортаныс, Иван Саревич öшöтiс гармоннясö тув вылö да и совсем сы йылiсь вунöтiс, кöть старикыс сылö закажитiс пырны керкуас да орсыштны невна.

Вот олöны Иван Саревич гозйöн, радуйтчöны. Зон ни шогмис да и куимöт год ни сылö: котрасьö, лепечитö-баитö. Öтпыр тув вывсис казялiс гармоннясö да и пондiс корны айыслiсь.

Сэк токо Иван Саревич бытьтö он вылiсь саймис:

— Ак, тэ, эд старикыс менö сэк жö тшöктiс орсыштны, кыдз токо пыра гортö.

Босьтiс гармоннясö да ножö орсны, а зонок кывзö. Сэк вöлись мöдiк государствоас иньыс нывся гортын свадебшанаыс пондiсö саймыны: öтпырись дзигнитöм бöрын пондiсö вöрöтчыны, мöдпырись дзигнитöм бöрын пидзöссэз выланыс сувтiсö, а куимöтпырись дзигнитöм бöрын коккез выланыс сувтiсö. Видзöтöны: и жöник сэтöн, а невеста абу. Баитöны: дырöв пö, некö, узьсьöма.

А Иван Саревич гозъя олöны да олöны. И зонокнысö быдтöны.