Кабморт

Пöрись гозъя öкмысдас годöдз олöмась, челядь нылöн абу вöлöмась — некинлö и ва удны. Старука и шуö öтпырись:

— Керин бы, старик, меным виль каб. Пуктi бы сiйö зыбкаö да дюттьöтны пондi, сё бы гажажык вöлi — бытьтö кагаöс гыччöта.

Старик керас кабсö, и баб гыччöтны пондас. Лун гыччöтас, кыкö гыччöтас — кабыс ловзяс, кагаö пöрас и сёйны пондас корны. Вердас сiйö старука сюрись йöлöн öтпыр — кагаыс зыбкаас оз понды тöрны. Чеччöтас баб сiйö зыбкасис, пызан сайö пуксьöтас, тёритöм кушманöн вердас — зонка эшö ыджытжык лоас. Старука зонкасö ырöшöн юкталас — зонка сажень сувда быдмас и шуö:

— Мун, тятю, дорöт меным витдас пуд сьöкыта чер, а тэ, мама, мун деревняэзöт да öкты сто аршин дöра.

Старик мунас заводö (кузнеччес эд сы ыжда черсö оз вермö дорны), дорöтас черсö и куим вöлöн öдва ваяс. Старука кытшöвтас дас деревня и öктас сто аршин дöра.

Кабморт тшöктас мамсö дöрасис вурны мешöк. Старука неделя вурас — вурыштас мешöксö. Кабморт сэтчö волыссэз лöсьöтас, босьтас мешöксö да черсö и мунас удж кошшыны.

Локтас озыр мужык ордö, юасьö, оз я колö сылö роботниккез.

— Менам вот сю вартны эм, он я кутчы? — шуö мужык.

— Мыля не сiдз! — висьталö Кабморт. — Верма вартны.

Медалас озыр мужык крестянасö сю ваявны ыб вылiсь. Дас кык вöлöн сюсö ваялöны да пöрлалöны гуна долонь вылö. Кабморт паздыштас чер обукнас вайöм сю кузяс — сюыс паськалас токо, мöдпырся паздыштас — сюыс быдсöн тöлöтсяс, куимöтпырся паздыштас — сюыс амбар сусекö гизь киссяс.

Озыр мужык рад не рад, ошшасьö иньыслö: бур роботник пö сюрис — дас кык вöлöн пö ог ешты сюсö ваявны, а сiя вартö, и тöлöтö, и сусекö пö ачыс сюсö пуктö. Мый пö токо уджыс понда босьтас.

А иньыс шуö:

— Тэ перво юав, мымда босьтас, а вöлись и ошкы. Юалас мужык, мымда босьтас Кабморт удж понда.

— Да мый унасö, — шуö Кабморт. — Сетан кö сымда, мымда вывтам верма нöбöтны, и ладно.

«Уна я сiя вывтас нöбöтас, — думайтö мужык. — Квать пудся унажык оз нöбöт».

Лунтыр вартас Кабморт, и рытнас сюыс вартсяс. Мунас кöзяиныс дынö, шуö:

— Но вештiсь инö, мужык, уджö понда. Курав-ко тэ этiя кöзичкаö сюсö, — и сетас сылö мешöксö, кöда сто аршин кузя дöрасис вурöма.

Кöзяин öтiк закромись куралас — мешöк оз тыр; мöдiкись — бöра оз тыр; куимöтiсь — тырас мало-дело.

Кабморт чапкас мешöксö пельпон вылас, черсö коскас сюйыштас и мунö гортас.

Жаль лоас мужыклö сюыс, и сiя домйылiсь лöг понсö лэдзас — пурас пö кокпетаэсö, дак чапкас мешöксö... Поныс, дзик тшыг кöин, уськöтчас Кабморт вылö. А Кабморт кватитас понсö да черыс дынö коскас сюйыштас — пригодитчас пö поди.

— Ак тэ! — лöгасяс мужык да лэдзас жеребечсö: ась пö таляс-курччалас розорительсö. Но Кабморт кватитас жеребечсö конувтас и мунö одзлань. Сэк мужык лöг и лöг порозöс лэдзас: сiя пышналас пö кынöмсö и кишкаэсö лэдзас. А Кабморт и порозсö конувтас сюйыштас да сьöрас нöбöтас.

Локтас Кабморт гортас, черсö посöдзö пуктас, вöвсö картаö йöртас, порозсö яй вылö начкылас, сюсö изас, а понсö домйылö пуксьöтас. Öнi нянь эм, яй эм и доддявны лоас кинöс.

А озыр мужыклöн лöгсяняс öмыс пиньöвтчас, и сё думайтö, кыдз бы вештiсьны Кабморткöт. А иньыс и шуö:

— Ысты тэ сiйö пес вайны ыджыт вöрö. А сэтчин чочком ош олö. Сiя некинöс вöрсис ловйöн оз лэдз.

Вот озыр мужык и корас дынас Кабмортсö да тшöктас ассис пара вöв доддявны и песла ветлыны. Доддялас озырлiсь буржык вöввесö Кабморт, босьтас черсö да каяс вöрö, кытчö кöзяиныс висьталiс, öт додяс ачыс пукалö, а мöдас некин абу — погоннöй вöлыс. Пырас пыдöжык вöрас, аддзас кöс пу, пöрöтас, орлалас, кыкнан додьсö песöн тыртас. Сэтчö чочком ошыс локтас да и шуö:

— О-о, ачыс тай сёяныс ме дынö локтöма, павжнайтны инö колас. Лок матöжык, зонка, тэсянь пондöтча.

— А тэ перво одзись вöвсö сёй, а вöлись и менö.

Сёяс ош вöвсö, кынöмсö малалö, тырппесö вильöтö. Кабморт кватитас черсö да вурас да вурас ошсö и доддялас одзись додяс. Ош ав-ав да ножö котöртны, ножö гöнитны — мöд вöлыс öдва ештö сы сьöрын.

Локтас Кабморт озыр мужык ордö, ректас пессö, пырас керкуас да юалö, кытчö вöввесö йöртны. А мужык сылö: йöрт пö öтлаö мöддэскöт.

Сiдз и керас Кабморт да мунас гортас. Кöзяиныс саймас ойнас, а картаас вöввес токо ив да ив зурасьöны-курччасьöны, и думайтö: вайöтiс эд пö, тыдалö, Кабмортыс жеребечсö, кöдö сы вылö лэдзлi. Петас видзöтны вöввесö, а нiя чисто кулöмöсь. Вежöртас мужык, што Кабморт ошсö картаас йöртлiс, и эшö öддьöнжык лöгасяс роботникыс вылö, бöра думайтö, кыдз бы сыкöт вештiсьны.

А иньыс бöра и велöтö:

— Ысты тэ сiйö ой кежас мельничаö, сэтчин эм Куль, сiя и джагöтас вражинасö.

Куралас кöзяин десяток мешöкö песöк и корö Кабмортсö:

— Кер ме понда эшö öтiк дело: доддяв жеребечтö, ветлы таой мельничаö изыштны.

— Мыля не сiдз, — шуö Кабморт, — ветла, изышта.

И доддялас рытнас жеребечсö, босьтас озыр мужык ордiсь мешöккесö да мунас мельничаö.

Кисьтас кöшас песöксö, лэдзас мельничасö и гырскö-изö. Сэтчö и петас Кульыс да юалö:

— Тэ мыля менам мельничаöн изан? Кин тшöктiс?

— А кин тiян медыджытыс татöн? — Юалö Кабморт. — Ме бы сыкöт баитышта.

Чеччöвтас-локтас сэтчö медыджытыс, а Кабморт кутас сiйö бöжöттяс да кыдз паздыштас да паздыштас изын бердас — Кульлöн сюррес чегласясö, и ножö сiя кеймисьны пондас:

— Эн стрöйды менö, Кабморт, кор, мый тэныт колö, — быдöс сета.

— Вай, — шуö Кабморт, — додьтыр крупчатка пизь да мешöктыр зарни — сэк лэдза.

Тшöктас Куль аслас увтырлö петкöтны пизь, а зарниыс пö абу. Кабморт желльыштас Кульсö изын бердас — куим пинь чегöтас лёквирлiсь.

— Сетö, сетö сылö зарнисö! — чирзö Куль аслас увтырлö, — а то сiя быдöннымöс вияс!

Кула-кола, кула-кола бергöтöны-соровтöны Кульпияннэс мельнича увтас — кошшöны зарнисö, а Кабморт Кульсö бöжöттяс видзö, кöсйöмсö виччисьö.

Вот ваясö сылö быдса мешöк зарни, и Кабморт лэдзас Кульсö да пизьнас и зарнинас мунас гортас.

Мужык ашынас кылас, што Кабморт ловъя — юрсисö лöгсяняс летö. Но кыдз жö пö сыкöт вештiсьны одззасяыс понда. Быдöс пö зарниöс видза, да сёроно сiйö светсис выживита: медала пö кинöскö, мед вияс сiйö.

Кылас этö баснисö Кабморт и шуас айыслö:

— Петав-ко деревняас да висьтав, што ме кулi.

Ачыс водас гор вылö да и куйлö, оз и вöрзьöтчы. Кывсяс озыр мужыклö, што сылöн розорительыс кулiс, тшöктö роботниккесö чожжык керны ёнжык гроб: дзебны пö колö эд Кабмортсö. Вот керасö гробсö, пуктасö сэтчö Кабмортсö и могильникö кыскасö, яма гаръясö — дзебны лöсьöтчöны. А озыр мужык сэтöн жö ветлöтö, дзебиссесö тэрмöтö. Вот и гробсö ни лэдзны лöсьöтчасö, но сэтчö Кабморт чеччас да кутас озыр мужыксö, гробас сюйыштас да ямаас гробсö чапкас.

Сэсся озыррес эта деревняын эз лоö.