Кама иван

Служитас армиаын савдат. Дыр служитас. Гажтöм лоас, и корсьö гортас. Мунас начальник дынö, кеймисьö:

— Вашескороддё, лэдзлы кöть час-мöд кежö гортö. Айö пöрись, мамö пöрись, куласö — ог и аддзыв.

Начальник шуö:

— Вит год служитiн да и гортö ни корсян? Тэ стукйы кöть дассö да вöлись ме дынö лок. Сэк поди савдат ни лоан да и ветлан.

Öбидитчас савдат эта дырна ни служитö, а сё не савдат. Сы сорöн и мунас.

Чулалас лун, чулалас кык, куимöтас савдатöс начальник корö. Локтас начальник дынö, доложитас, дзик сёрток сьöртi лыддьöтас:

— Вашескороддё, савдат Кама Иван локтiс тэ син одзö!

— Вот мый, — шуö начальник. — Гортат сё бы ветлан?

— Точно сiдз, Вашескороддё! — шуö савдат.

— Сэк кырас дорись пост вылö ветлы. Сэтчинiсь быд ой пес гусялöны, и некин оз шед. Кутан ворсö али он сет гусявны — гортат ветлан. Вежöртiн?

— Точно сiдз, Вашескороддё, вежöртi!

Мунас Кама Иван пост вылö, сьöрас тесак босьтас. Час сулалö, кыкö сулалö — оз и вöрзьöтчы местасис Ойшöр локтас — кок шы кылö Чуш-паш басöк нывка сы дынö сибöтчас да öмидз голосöн горöтчас:

— Ванюш, тэ мыйлö татчö локтiн? Разь он ни бы сэсся чочком югытсö аддзыв? Разь он мöд гöтрасьны? Али гортыт абу жаль?

— Ме эшö тэсся дыржык ола да тэсся басöкжыкö босьта, басöк нывка!

Пес поленич сы коста гиль-голь киссяс!

Казялас Иван, што пессö гусялöны, чепöссяс сэтчин — абу некин. Бöр котöртас — вöлi да абу нывкаыт, дзик юрсигусь, лэбзьö.

Ашынас Кама Иванöс корö дынас начальник, юалö:

— Кыдз ой чулалiс, дзонь я песыт?

— Дзонь, — шуö савдат, — токо мылякö поленичыс киссис.

― Сiдзкö, умöля видзöтiн — пестö нöбöтiсö? Талун мунан — бура видзöт!

Вот Кама Иван мöдiк ой кежö мунас. Сулалö — оз и вöрзьöтчы.

Ойшöр сибалас — кык басöк нывка локтöны.

— Ванюш, тэ бöра татöн? Сет миянлö пестö. Он кö сет, дак асьтö нöбöтам!

— А этö эд аддзылö? — и сюйыштас ныр увтаныс ассис тесаксö.

Сэтчö поленич гиль-голь киссяс. Дзар керас савдат — джын песыс абу, и нывкаэс, дзик юрсигуссез, лэбзьöны. Ашынас начальник бöра юасьö:

— Но, кыдз ой чулалiс, савдат? Дзонь я песыт? Кама Иван шуö:

— А мый сылö лоас? Токо поленичыс бöра мылякö киссис.

— Сiдзкö, умöля дозирайтiн. Ме кылi ни: вовлöмась кык гусясись. Этадз пондан служитны — юртö дыр он новйöт. Ветлы эшö öтпыр, видзöтам, мый петас.

Керны нем, приказ эм приказ. И бöра савдат мунас пост вылö, но талун тесаксö пельпон вылас ни видзö и ас гöгöрас синмöн видзöтö.

Сибалас ойшöр. Локтöны кык басöк нывка, шöраныс пöрись-пöрись инькаöс вайöтöны, бытьтö гуляйтны петöмась.

— Сувтчö! — чирзö савдат. — Сибöтчат — юрнытö керала!

А нiя сё матöжык, матöжык локтöны.

Мöдпырись тшöктас сувтчыны — оз кывзö сiйö. Куимöтпыр сувтöтö — нiя сёроно локтöны.

Сэк Кама Иван ковскас пöрись каргаыслö юр кузяс — тесак увтсис би чепöссяс, а басöк нывкаэс да пöрисьыс, кыдз юрсигуссез, лэбзясö, а поленичаыс оз киссьы и песыс дзонь кольччас.

Ашынас начальник юасьö:

— Кыдз ой чулöтiн, савдат?

— Дзонь песыс, токо тесакöс лязi.

— Зудъяв тесактö и лöсьöтчы гортат, — висьталас начальник.

Кама Иван тэчас котомка, тесаксö бокас кышалас, трек-трек керас котомканас — кокнитöв сiя, эта сёянö гортöдз пö оз тырмы. А кинкö — то ли шондiыс, то ли тöлокыс — сылö шуö: «Тырмöтчы сiйöн гортöдз, некинлiсь сёянсö эн босьт».

Но, сiдз, дак сiдз — ог пö некинлiсь кор, — и айда гортö!

Лунтыр мунас — локтас ю дорö, котомка чöвтас, коккесö пöрччалас да пуксяс павжнайтны и одзланься туй йылiсь думайтны. Пукалö, йирö няньтор. Сы дынö сибöтчö басöк нывка.

— Тэ кытчö, Ванюш, иньдöтчин?

— Гортö тай.

— Эн мун — тэнö кöин сёяс.

— Ме ачым кöин кодь: Кама дорын чужи, Иньва дорын быдми.

— Смев тэ, да видзöтам, ылö я мунан.

— Муна сэтчинöдз, кытчöдз думайтi.

— Но лок инö сёйышт ме ордын, шоччись невна. То менам керкуö — керöс вылас.

Дзар керас Кама Иван — ыджыт да басöк керку сулалö, öшынтыр чочком би сотчö.

— Менö тшöктiсö аслам няньсолöн гортöдз локны. Некытчö ог мун.

Узяс кöз увтын Кама Иван и бöра одзлань писькöтчö. Лунтыр мунас — пуксяс шоччисьны паськыт пожум увтö. Басöк нывка петö — мöд сойыс.

— Тэ кытчö, Ванюш?

— Гортö тай.

— Эн мун — тэнö ош сёяс.

— Ме ачым ош кодь: Кама дорын чужи, Иньва дорын быдми.

— Смев тэ, да видзöтам, ылöдз я мунан.

— Муна сэтчинöдз, кытчöдз думайтi.

— Но, лок инö сёйышт ме ордын да шоччись. То менам керкуö — ю дорас.

Дзар керис Кама Иван юланяс — сэтчин кыксувда керку сулалö — öшыннэстыр лöз би сотчö.

— Менö тшöктiсö аслам няньсолöн гортöдз локны. Некытчö ог мун.

— Ачыт тöдан, Ванюш.

Чулöтас ойсö кöз увтын и бöра гортас орöтчö. Мунас, мунас, мыдзас да сёйны пуксяс, а котомкаыс пустöй. Мый керны? Аддзö: бур керку сулалö, куимсувда. Улын — чочком би, шöрас — лöз, вылын — гöрд.

«Ноко пырала да нянёк корышта?», — решитiс Кама Иван. Пырас оградаö — стойлоэзын уна йöз сулалö да чисто коми. «То тай-ка, — думайтö, — тыдалö, сюри эд!» Мöдас бöр петны, а воротаыс пöдана ни. «Но, мый лоас, сiя и ло, а керкуас пырала!» Пырис, некин оз тыдав, токо джоджас уна паськöм валяйтчö да ыбöс дынас пон куйлö — синнэс, кыдз петаккез, гöгрöсаöсь. Кайис вылö — тожö некинöс эз пантав, токо кöртовöй öррезын ва пизьö да косяк бердас чеп вылö кöрталöма кöин — синнэс, топ солонкаэз. Кайис куимöт сувдаас — сэтчин старука гор вылын туплясьö да ойзö, аслас юрыс пызандöраöн каттьöма, бокас морт юррез да вильöтöм коскаэз куйлöны, а ыбöс дорас ош сулалö — синнэс, топ бекöррез, а вапсыррес — печкан лап пасьтаöсь.

Тöдiс Кама Иван — эстöн ачыс пöрись каргаыс олö, и эстiсь нем бурсö он аддзы.

Бергалiс-керис савдат да мöдiс бöр петны, а ош кык кок вылö ордчис, öмыс — пильöм ыжда, турунъюр тöрас сэтчö.

Старука кылiс ошыслiсь шысö, путшöтiс юрсö да шуис:

— А, миян тай гöсь эм! Ноко мыччась, кин тэ! Кама Иван мыччисис, карга шуö:

— Тэ менчим юрöс тесакнат поткöтiн, öнi ме шогала. Орöт шульга китö, ме нимала сiйö, сэк ловйöн эстiсь петан. Он сет виртö нимавны — быдсöн асьтö сёя.

— Ме Кама дорын чужи, Иньва дорын быдми. Некытöн эг öш, некытчö эг сибды, и тэныт, карга, менö не сёйны!

— Смев тэ, да видзöтам, петан я татiсь. Лок инö сёйышт мекöт, раз пырин.

— Менö тшöктiсö аслам няньсолöн гортöдз локны.

Серöмтчас карга да гор вывсис увтор чапкас. Увторыс чеччöвтас да дявпиянö пöртчас и давай джагöтны Кама Ивансö, но савдат ештас тесаксö кыскыны да кералас дявпиянсö.

Карга чапкас кокорка — сiя дяв лоас и Кама Иван вылö уськöтчас, но савдат и сылö оз сетчы.

Пöрись карга чуркаöн гор вывсис чеччöвтас да ножö савдатсö вартны, сiйö и видзöт — нето коккесö чеглалас, нето юрсö поткöтлас. И мымда бы Кама Иван оз керав чуркасö, некыдз сы дынiсь оз вермы мездöтчыны. Сэсся эд кыдзкö инмас вачкыны чурка помас, и сiя шовк потас да кык торйö усяс.

Ош ряв-ряв керас да вешшас ыбöс одзсис, и Кама Иван лэдзчас кöин дынö. Кöин уннялöмöн мунас порог одзсис, лэдзас савдатсö медулö лэдзчыны, а улын поныс абу ни — чеп сорнас орöтчöма.

Кама Иван осьтас стойлоэсö да лэдзас сэтчинiсь коми йöзсö, кöднö пöрись карга видзöма яй вылö, а пувлöма нiйö кöртовöй öррезын какраз гусялöм песнас.