Кулöммес ловъяэслö отсалöны

Ме быдöс кулöм родöс казьтыла — сiдз бабö тшöктiс. Тэ, шуö, Пена, ловъяэсö почитайт, а кулöммесö казьтыв — нiя тэныт уна бурсö керасö. И былись эд, кöр мыйкö ог вермы керны али ог куж, нiйö кора: «Отсыштö жö, геда-баба, дзескытсис петны, эд сетö доймыны...» И нiя отсалöны.

Ны отсöтöн жö поди и чочкоммес дынiсь мезми, кöр допрос вылö Кудымкарö нуöтiсö, а то вийисö бы — Мититö гöрддэс дын вöлi.

Кöр Мититö кулiс, сылö прокод баитi: «Отсав, Митит, йöрсö керны, отсав мусö гöрны...» Сiя, жöникö, медöддьöн отсалiс. Турунок ытшка да тэча кытчö — сылö закажита: «Караулит, Митит, эн сет гусявны...» Пес керала — сылö закажита. Йöзыслiсь гусялöны, сотöны, пöрöтöны, а менчим öтпыр некин эз вöрöт, а эта дырна ни ола.

ЖЫБАН

Друг мужыклöн картапонас виль жыбан лоас, а кытiсь — пон тöдас. Но дак мый, сулалö и ась сулалö, юны-сёйны оз кор тай. Сэсся сарай дорö чапкас и вунöтас сы йылiсь.

Арнас турун ваяс, сараяс лэбтавны кутчас. И тальччас жыбан вылас да шöри поткöтас сiйö. И кинкö морт голосöн ойкнитас пö: «Ой-й!»

Чапкас мужыкыс жыбансö улö — песö пö мунас.

Ойнас иньыс вöтасьö: нывка сылö причот пуктö да шувлö: «Матушка тэ, мам! Мыля жыбансö кинат эн кутышт, мöднат эн малышт, менö, ёрдöмсö, гортö эн примит?»

Саймас и быдöс вежöртас: эта эд öшöм нылыс гортас жыбанöн бертас да мамыс киö корсяс!

Пондасö кошшыны жыбансö — абу ни.

ОГНЁВКА

Март помын ме мунi видз вылöт, чарöм кузя. Аддза: огнёвка лэбзьö. Не сiдз вылына, но не лажмыта жö — пуэзся вылынжыка, натьтö. И öтвылына видзсьö — оз лэбтiсь не оз лажмав. Меным паныт лэбзьö, ачыс биöн сотчö. Джын метра кузя, натьтö, лоас. Абу кыз, юрока.

Сувтi, виччися, мый лоас. А неылын сы туй весьтын зород сулалö. Но инмас кö, думайта, зородас — сотас добросö! Тöв эд, вердчаныс дона.

Кыдзкö бокижык лэбзис да пуксис лым вылас. Ме мунi пуксьöм местаас, кошшöв-кери, но нем эг аддзы: тыдалö, лымас гарйисис.

Кин сiя, мый сiя — ог тöд. Шуöны тай — огнёвка.

Змея нимасис

Кытöн этадз шогмис, ог тöд, а токо висьтасисö. Уж — змея сэтшöм — инька вылö уськöтчöм. Уськöтчöм, голя бердас каттисьöм, юрсö ковта увтас сюйыштöм да öмнас морос бердас кутчисьöм. И быдöс йöвсö морос бердсис нималöм, некыдз инькаыс мездöтчыны абу вермöм. Аддзан мый шогмö? Ой, ой!

Сiдз и локтас гортö, больничаö котöртас — мыйкö пö врач поди керас. Но и больничаас оз вермö мездöтны: кыдз пондасö мездöтны морос бердсис — голясö зэлöтö, джагöтö инькасö.

Сэк тай ужыс одзö жеркала вайöмась. Уж казялас сэтчинiсь инька вуджöрсö да жеркала вылас кинитчас — думайтас, ловъя инька жö.

Зеркала отсöтöн токо и вермöмась мездöтны.

Мырыв да кöкöв

Одзжык татi пыд вöр вöлöма — тайга. Медодзза морттэс Пуксипи ладорись локтöмась, шуöмась нiйö Мырыв да Кöкöв — гозъя вöлöмась.

Мырыв вöралöмöн олöма, абу гöрöм да кöдзöм. Мый кыяс — сёян керас, паськöм да кöмкöт, нянь вылö вежас. А кыйны вöлöма кинöс, не кыдз öнi: и пöткаыс, и звирыс вöртыръяс вöлöма.

Кöкöв асывнас гор лонтас, кöзяиныслö шуö:

— Колiс бы пельнянь керны...

— Дак керам!

Мырыв босьтас лыйсянсö, öшынок осьтыштас (вештасяна öшынок вöлöма), кроп лыяс вöрас — пу вылiсь сьöла да дозмöр усясö. Пыртас нiйö гортас, куштас, масьтас, пельнянь керас — вот и завтрак.