Дядькалöн пестуння

Миянiсь нывкаок öшлiс. Мунöма котрасьны да абу и абу. Куим ой эз узь гортас, гортiссес кок вылiсь усисö, сё котрасисö, но некысь эз аддзö. Сэсся вöр дорын пантасяс йöзлö — тöдасö, што эта и эм öшöмыс.

Паськöмыс нöитчöм чисто, соссэс пуджöмась, нинкöмыс ва, куш нять. Киас пуовöй пинятув.

— Кытчö нö, Надя, мунан? — юалöны сылiсь.

— Гортöс кошша, — висьталö нывкаокыс. — Менö дядька кутiс да вöрокас пыртiс.

— А мийö кошшим тай вöроксис, да эг аддзö?

— Тулупö каттис менö дядькаыс, эз лэдз мыччасьны. Менчим аканьöс шупкис и этö чачасö сетiс. Вöлись гортас нуöтiс, тшöктiс пестунничайтны.

Вайöтiсö нывкаоксö гортас, мöдпöв вичкуын пыртiсö — морт тай лоис.

Дядькаыс вöрлешак вöлöма. Аддзан, гортас нуöтлöма Надясö, джодж тшöктывлöма чышкыны да кага видзны, не сьöкыта уджöтлöм. Вежöртö жö поди: челядёкöс кутiс.

Аддзан, сэсся лэдзöма жö.

Пугырнюрись кöзяин

Пугырмыс дорас эм нюр — Пугырнюр и шуам. Сэтöн и олö Митрофан Митрофановичыс — кузь киаыс да кузь кокаыс. Сылöн нюр шöрас аслас кöзяйство, кыксувда керку, а керкуас мый токо абу — дзик купеч олö.

Сьöрас пыртлö отирöс, но оз тшöкты висьтасьлыны.

Старикöс вöлi нуöтлöм гортас (эта важын ни вöлi, война одзас), мыччалöма керкусö да чорыта висьталöма:

— Кыдзи висьтасян кинлöкö, чожа кулан.

Старик видзас, видзас сьöлöм вылас сьöкыт думасö да и висьтасяс миянлö. Этасянь и кулiс чожа.

Мöдiкöс пыртлöма, да абу жö тшöктöм висьтасьны, а сiя висьтасяс жö — шогавны пондас да сэсся оз ни лэбтiсь.

Митрофан митрофановичлöн тётка

Кöть и шуöны, што Ёмаыс — Митрофан Митрофановичыслöн инь, но сiя сылöн тётка. Сы кодь жö кузь киа да кузь кока. И сы моз жö морттэсö новйöтö.

Казялас Ёма мортсö, пуксяс кытчöкö да виччисьö, кöр сы дынö матöжык локтасö. Сыбöрын дынас корö да пидзöс вылас пуксьöтö. Сэсся чеччас да сивъяс мортсö кутчöтас — вылын-вылын нуöтö, токо юрыс мортыслöн летъялö-мельтыкайтö.

Асьсö Ёмасö эг аддзыв, токо кывлi сы йылiсь, а мöдыскöт пантасьлi. Но ог висьтась — ола бы эшö, семдесят три вöлись да.

Дявлöн туй

Мунас мужык песла, пöрöтас кöс кöз, орлалас — быдса додь лоас. Шылльöтö гортас лэдзчö, токо лымок додь увтас дзуркöтö.

Друг вöлыс тяк сувтас. Мужык вашöтö сiйö, а вöв жöдзö и додьсö оз вермы вöрзьöтны. Мый сэтшöмыс, разь мыр инмис додь яззэс коласö? Омöн видзöтас — нем абу, додь увтыс волькыт. Бöра вöвсö öддзöтö, вожжинас вачкö. Вöлок летсьö — кучиксис готов петны, а додьыс дзик кынмöма полознича бердас. Вöлыс сэтчöдз нетшкас — гужиыс орас, а додь кыдз сулалiс, сiдз и сулалö.

Йитас мужык гужисö, мöдпöв доддясяс и оз на ешты «ны»-сö шуны, а вöлыс мырсьытöг вöрзьöтас додьсö.

— То тай мый петö! — повзяс мужык да чожжык додь вылас каяс. А бöрас, кылö, ризя-лопка пуэс чегласьöны. И вежöртас сэтчö мужык: сiя дявыслiсь туйсö поперегавны пондiс, да сэтчö ачыс дявыс инмис и пуксьылiс сы додьö.

Мыйсянь чегис кок

Эта важын ни вöлöма. Мужык олöма — ыпы кодь. Öтпыр кытчöкö пондас мунны да креста туй шöрö сувтас и куритны керö.

Мый и лоас — кок дзулля дыныс тресь чегас, ровно нöшöн сöтасö. Усяс кок йывсис — ой да ай! Кыссяс пидзöс вылас гортöдззас, сы дынö тöдiсь старукаöс вайöтасö, сiя и шуас мужыклö.

— А мыйлö, ыпы, креста туй вылас сулалан? Сэтöн эд дявпияннэс шарпавкаöн орсöны, вот и инмисö кокат.