Абу вермöм диктыны

Миянын вöралiсь вöлi, кузьтöв вöррезöт ветлöтiс, сё кыйсис. Эз вöв пöрись, но челядьыс ыджытöсь ни вöлiсö. Öтчид мунö ыб вылöт, юж туй кузя, лямпаэсö пельпон вылын кыскö. Мунас, мунас да синйыштас боклань — лымöттяс морт броддьö-мунö, ылынкодь туй дынсяняс. И дзик тöдса кинкö.

Пондас буржыка тöдмавны, да и тöдас: аслас иньыс.

Лэдзыштас лямпаэсö пельпон вылiсь, кöмалас да котöртас иньыс сьöрö. И токо вöтны, токо вöтны, но инькаыс öвтчыштас — и некытöн абу, токо лым бус сы местаын бергалö.

Сiя жö и бöбöтлöма мортсö — вöрись инькаыс. Нiя эд сiйö и кошшöны, кöдö диктыны позьö. А вöралiсьтö, видзöт, абу вермöм.

Вöрисьыс кежöтлöма

Эм миян Чудитчан лог, дак сэтi ойнас берегитчы ветлöтны. То тай мужык висьтасьöма вöлi, кыдз öтпыр ойнас сэтчö сидзöма.

Мунас сiя Кудзöсьö — деревня сэтшöм вöвлi, — и вот лог дорас öддьöн уброднöй туй лоас — вöлыс мыдзас да сувтас, сибдас лымъяс.

Тöлыс вижгö, кöдзыт, и мужык сайöвтчас вöлыс сайö.

Локтö старик, ачыс кузь, а тöлыс сiйö оз и вöрзьöтышт. И висьталö старикыт:

— Кынмин тай, мужык, лок шонтiсь ме ордын. И вöвтö шоччöтан. Ме пельняннез пуи.

— Кытöн тэ олан, матын я?

— То тай керкуö, бöрат.

Мужыкыт бергöтчас: быль — керку, трубасис тшын кайö. И шуö:

— Но, позяс пыравны.

— Бергöт вöвтö, — шуас старикыс да оськöвтас гортланяс. Вöлись казялас мужык, што эта мыйкö не сiдз: старикыт ыджытся-ыджыт, бедьыс киас — дзик потш!

Мужык пуксяс додяс, шонтас вöвсö плетьöн — ускок мунас! Кытчö ни сэтöн — не пельнянь дорöдз!

Ашынас сэтi жö мунö — туй волькыт, некытшöм уброд!

Вöрисьыс гортас эд кежöтны мöдöма!

Пон сёйись

Лешак пöртчас мужыкö, петас окотник дынö да шуö:

— Сетлы понтö, ме бы лесуйта сiйöн, а то менам умöль.

Мöдыс и сетас. Поныс кавгö, уннялö, оз мун бы сыкöт, а сё мунö.

Мужык думайтö: кытшöм пö ойнас лесуйтöм? Кыдз он вылiсь саймас да аслас пон сьöрö. Вöтас лешаксö, кылö: «Вот менам бур сёян талун!»

Поныс мортыслö жаль, корö:

— Вай понöс бöр!

Пон сёйись дзар керас бöрланяс — и одзлань. Мужык казялас ни: понсö синкымтöм кыскö. Нетшкöвтас голи да шентас сы юр вевдöрöт. Сiя лэдзас понсö, но лöгувъяс чужъяс ньыв кузя. Пуыс куж-каж пöрас да окотникыслiсь понсö ляпкöтас.

Лешак нуöтлöм

Кыкдас öкмысöт нето куимдасöт годö, кывсис, öшöма том инька, геолог, кöда уджалöма Майкар дынын. Сэк вöррес эшö пыдöсь вöлiсö, а вöрас быдкодь звир олiс, и ёрттэс сылöн сякöйсö думайтiсö.

Неделя-мöд бöртi аддзасö сылiсь инструмент: кинкö геологгес патера дынö чапкöм. И сы вылö гижöм: «Ме ловъя, но ог тöд, кöр берта».

Эшö мисеч ли, кык ли сiдз кыссяс — мöдiк инструмент и мöдiк гижöт: «Ме ловъя, ме берта».

Но мый пö эта — розбойник разь кутiс?

И вот арнас геологгес дынö локтö дзор старука и шуö:

— Этö ме, öшöмыс.

Сiйö лешак гортас видзöма. Лешакыс и петкöтлöма инструментсö, инькаыс тшöктöм да. Сыбöрын, видзöт, лэдзöма жö мортсö. Мисеч-мöд видзöма, а инькаыт — старука лоöм.

Шуöны, недыр жö сэсся олöма.

«ВÖР ШÖРЫН…»

Вöр шöрын старик караулитöма мошчуркаэз. Öтiк лунö макерисьыс мунöма гортас и рытнас мöдöма бертны.

Ойнас öшын увтас локтöмась сивöй вöлöн. Старик видзöтас öшынас — не товаришыс. А вöлыс сы син одзын пондас быдмыны и ыджыта быдмас, öшынас токо коккес пондасö тыдавны. Старик повзяс да каяс гор вылö.

Сыбöрын висьтасьöма: «Ме дынö сивöй вöлöн вовлiс лешакыс, ме повзи да ойбыт эг вермы узьны».

СТО МАЙÖГ

Иван лунö миянiсь мужык вöлi мунас вöв кошшыны. Пырас расö, кылö: мыйкö жольöтö. Сермöтö пö эд, видно. Видзöтас — сермöтыс зэлыта кöрталöм, öмлöсыс оз вöр. Дак мый нö жольöтö?

Муныштас невна — кöз увтын отир. Кашникись кашникö зарни сьöм кисьтлöны — жоль-жоль-жоль! Кисьтас öтiк, юалö:

— Кытчö дзебам? Мöдiк висьталö:

— Керöс йылас. Бöра юалöны:

— Мый заветсö пуктам?

— Сто майöг шедтыны.

— Стоыс унаöв. Кин сымдасö кошшас да шедтас?

— Абу уна. Сiдз еныс тшöктiс.

Зарни сьöмнас кашник дзебасö, сто майöг вартасö омöн рас пасьтас, шуасö:

— Кин быдöс энö майöггесö аддзас да шедталас, сылö и сьöм дöнзяс.

Мужык повзяс, пышшас.

Этö вöриссес сьöмнысö тöлöтöмась.

Аддзан: вöриссеслöн да еныслöн договор вöлöма.