Мешайтчöма чернильнича

Эта вöлi кыкдас öкмысöт али куимдасöт годö. Инька мунас баняö пывсьыны (баняыс то миян садник сайын вöлi, увдöрас), а пытшкас кинкö гольöтö. Осьтас ыбöссö, бласловитчас да, а кинкöыс изторрезöн да галяэзöн койсьö — вашöтö пывсянсис. Кынымись ыбöссö осьтлас — сёроно вашöтö.

Инька каяс гортö, висьталас: чудитчö пö. Сыкöт мунасö мöдiккез — бöра галяэзöн чапкасьö, оз лэдз пывсьыны.

Мунасö Калашникова велöтiсь дынö, висьталасö: сiдз и сiдз пö лоö. Калашникова оз верит, шуас, што некытшöм чуд абу. И мунас да пондас пырны баняас, но тожö пышшас, только шуас: «Ужо, керамö мöднёж...»

А кöда повзьöтчис, сыбöрын банясис петöма да керкуö пырöма. Сiя керкуын патершикöн лесник олiс. Лесник ассис гижöттэз мöдас гижны да чернильнича сувтöтас öшын вылö. Только сувтöтас — чудыс джодж шöрас шупкас. Бöра сувтöтас — бöра шупкас. Чернильничаыс, видзöт, сылö мешайтчö...

Курöггезöн шупкасьö

Сiя жö керкуын, кытöн лесникыс олiс, чудыс курöггезöс позсис, горöдз увтсис, чапкавлiс. Да кыкись я, куимись я эд.

Мый пö и лоас — поз пöдансö шовк пöрöтас. Курöггес öта-мöд бердö ыжмитчасö, повзясö да, пельöсö лепитчасö — дзик лякасьöмöсь, перкйыштны оз позь. Этö сё чудыс керö: перво невна повзьöтас — гыж-гыж джодж увтас керас, — курöггес горöтны пондасö. Кöзяйкаыс лöньсьöтас курöггесö да чудсö страшшайтас — пурт йыв джодж пöввес коласö мöртас: то пö мый тэныт, эн ыждав!

Чудыс лöгасяс да и шупкалö курöггесö джодж шöрас.

Сыбöрын кытчöкö мунас жö.

Öтöрись чуддэз. Боболлез

Баняын блазнитiс

Вежöм зонка

Кöрт кокаэс мырддисö

Кутор чуд

Луншöрика

Луншöрика-обороника

Мöс картаись чуд

«Мун чомору!..»

Öвин Васька

Пукалiкö

Пывсянiсь чуд

Сiсь чурка

Умöль места

Чоморлöн стан

Чуд дозыляйтiс

Баняын блазнитiс

Мужык мунöма баня лонтны. Этö сiя ачыс меным висьтасис, öт киам, шуö, сартассэз видза, мöдам — спичаэз. Осьта, шуö, ыбöссö — кинкö чылöны баняас. Учöтикöсь, пасьтöмöсь — дзик кагаоккез. Кыдз осьтi, шуö, ыбöссö — кытчö и котöртiсö: кин лабич увтö, кин полок увтö, а öтiк ме дынö чеччöвтiс. Ме, шуö, сiйö сартассэзнам вештi одзсим, горас йöртi. Сiя мöдiс чеччöвтны сэтчинiсь — ме зэлытжыка сартассэзнас чувйыштi, и пасьтöмыт ляш-маш пöрис, кулiс.

Видзöта, шуö, — не кага, не акань. Кутi да чапки, шуö, öтöрас, лонтi горсö да гортö мунi, кора семъяöс: «Локтö видзöтö, кин баняас олö».

Петiм, шуö, видзöтны, а некин абу ни.

Этö баня чуд блазнитiс.

А мисеч бöртi сотчис баняыс.

Пукалiкö

Эта пукалiкö вöлöма, арнас. Нето Васёвчиын, нето Миконёвчиын.

Внуковскöй зонка мунöм пукалiсь нывкаэзöс кошшыны. Локтас баня дынö, кылö: пытшкас басöка и басöка сьылöны.

Пырас — шы абу. И пемыт. Баитö — чöлöны. Лöгасяс сэтчö, веськыта перкъяс: «Курва табун! Мый чöлат, чучаэз!» Некин абу.

Повзи, шуö, юрсиö кышöто-лэбтiсьö.

Зонка ештöма порог саяс петны, а баняиссес бöжöттяс видзöны. Летсьö зонкаыт, а шабурыс няжа орö. Öтiк клин орас — мöдiкöт кутöны. Сэсся чöвтас шабурсö да пышшас. Ашынас нарошно мунасö видзöтны, аддзöны: шабурсö, дзик шыр, чагдöма, йики кодь рукледь баняас куйлö.

Сiсь чурка

Кöркö, видзöт, кульыс-бесыс шуч ыжмавлöма. Öтпыр Пуксибын зонка, гармоньшик, ойнас пукаланö мунас. Кылö: баняас нывкаэз сьылöны, а гармоння шы оз кыв. Чöв пö, ме гажöта тiянöс.

Öтöрас жö и пондас орсны да пырас пытшкас. И друг биыс кусас, лöнь лоас. Гармоньшик дугдас орсны.

— Мыля нö, нывкаэз, чöв олат?

Кутас бы киэзнас нывкаэсö — стена шедас. Мöдöтчид кутас бы — тожö стена. Мый пö сэтшöмыс — гладь стена?!

— Мыля нö повзьöтчат, нывкаэз? Ме эд абу полiсь! Нывка паныт шуö:

— Абу кö полiсь, Менö босьт ас саят. Ме öддьöн басöк.

— Верма и босьтны. Кытiсь тэ?

Нывкаыс висьталö, што сэтiсь и сэтiсь пö, а шуöны пö менö Сенишна нылöн. Кресенняас пö лок корасьны, понда виччисьны. Менö пö гармонняыт сьöртi тöдан.

Босьтас нывкаыс гармоньшикыслiсь гармоннясö и лэдзас зонкасö гортас, токо висьталас, мед оз вунöтчы, мый мöдас. Зонкаыт оз бы аддзывтöмсö корась, да гармонняыс жаль, сэк нiя батi донаöсь вöлiсö. И мунас корасьны.

Локтас деревняö, юалö, кытöн Сенишна ныв олö.

— Седунняыс? Ылöстöмыс? Да то эстöн и олö, — мыччаласö сылö бур керку. — Он я мöд корасьны сiйö?

«Видзöт, кыдз шедi, — думайтö зонкаыс. — Ог и пыр, мед гармонняö пропадёт». И пондас вöвсö бергöтны, да посöдзас басöк нывка петас, киас гармоння, и пыртас зонкасö керкуас. А джоджас седуння пукалö, дзик джек. Нывкаыс сетас гармоннясö зонкаыслö: на пö орсышт. Зонкаыс кыдз паськöтас мексö — седунняыс гатш пöрас да пöртчас сiсь чуркаö. Нывкаыс шуас: менö пö баняын учöтнам вежисö, кöр мамö öтнамöс колис, а ме туйö то этö чуркасö пуктiсö.