Чудвисьттэз

Суседкоэз

Öтöрись чуддэз, боболлез

Ваись, нюрись куллез

Вöрись чуддэз

Тöдiссез, тшыкöтчиссез

Суседкоэз

Гидйись суседко

Кинкö мыччасис

Курöггезöн шупкасьö

Мешайтчöма чернильнича

Печкись суседко

Суседко

Суседко

Суседко джоджулын олö, а кöр и гор сайын. Мортыслö етша умöльсö керö, разь ляпкöтас нарошноись.

Öтпыр мамöс ольпасьын вöлi ляпкöтöма — морос вылас пуксьöм. Сьöкыт и сьöкыт пö — из кодь. Мамö не ловзисьны, не кикоксö вöрзьöтны оз вермы, а сiя сьöд и сьöд пукалö да чочком югытсö сайöвтö. Кеймисяс мамö: «Лэдз жö, батюшко, йöлöн верда!» И суседкоыс лэдзас, а мамö дыр эшö оз вермы чеччыны. А кыдз чеччас — вердас суседкосö пöжöм йöлöн. Сiйö радейтö суседкоыс. Эшö варенеч радейтö.

Вердас, и нем тай умöльыс эз вöв.

А сiдз-ту суседкосö умöлика вердöны, сiя чöскытсö оз кор. Кань осьта дорö капуста пуктасö, кытсöвтасö: «Суседко, суседко, няньсов, няньсов! На-ко капуста росов!» Сёяс — вежöра лоö, раммö и пондö миян ньылат керны, не боболь моз.

Печкись суседко

Эта важын ни вöлi, эшö война коста — суседкоöс аддзылi. Пукаламö вонöкöт гор вылын, шонтiсям котрасьöм бöрын. Пукалам лöня, друг кыла: шырр, шырр, шырр! Этадз чöрс шырöтö, кöр печкöны. Но кин печкö? Мамö абу, сойным тожö гортын абу. Видзöтi улö — инька пукалö печкан дорын да кудель печкö, чöрсыс — шырр, шырр, шырр!

Мöдi висьтавны вонöлö, што кинкö печкö, бергöтчи сыланьö да кокнам, тыдалö, ёркнитi, и чöрсыс дугдiс шырöтны. Бöра видзöтi улö — оз ни печкы.

Гидйись суседко

Ванькинчи деревняын то кытшöм случай вöлi. Сергинчиись Опонь, кöда лечитчö тай, меным висьтасис.

Опоньыс гедлöн Ванькинчиас свояк олöма, и гедыс сы ордö мунöма гöститны. Вöлöн, конешно. Одзжык мужыкыт миян моз подöн эз чапликась.

Потшшуйтöмась гöсьсö, сур-брагаöн юкталöмась да и кабакскöйö удöмась. И коддзас гöсьыт да узьны кольччас. Но и узь пö вакрамеш, местаыс понда сьöм ог босьтö. А ме пö вöвсö стайкаас йöрта да сэтöн и узя. Но, ачыт тöдан пö, öнi не тöв, он чорзьы.

Вöв йöртас стайкаö, ачыс водас колода увтас — сэтiсь вöлыс оз таль. Саймас шумсянь, кылö: вöлыс бергалö, дзик сiйö джагöтöны, да оз сетчы. Горöтчас: «Тпру, Соовко! Мый чепсасян?!» А öтöрыс югыт ни вöлöм, öшыныс осьта, и казялöм: вöв вылiсь кинкö сьöд чеччöвтас — котрасись кага ыжда. Сэсся ыбöсыс дзур-вир керас — сьöдыс гидсис петас, и Соовко лöньсяс.

Чеччас мужыкыт, малыштас вöвсö — куш быг!

Этö суседкоыс сы вылын гöняйтöм. И бурсиас чикись кыйöм.

Кинкö мыччасис

Меным горт керкуын кинкö öтпыр мыччасис. Годов десятокыс вöлi, эз я меным, а уна ни вежöртi.

Сайми ойнас, видно, асывланяс — бура ни тыдалiс, — сiя тай кинкö котрасьö джодж кузяс. Кокшыыс гусь, чуть кылö.

Кин жö, мыся?

Куйла, видзöта: учöт нывкаок, дубасока. Миян сэтшöмыс эз ни вöв, кинкö тöдтöм.

Лэбтыштi юрöс — ноко, мыся, буржыка видзöта. Нывкаокыс чывк бергöтчис да кань осьтаö тöрöтчис.

Асывнас мамöлö шуа:

— Ойнас керкуас дубасока нывкаок котрасис. Мамö видiс менö:

— Мун, эн баит умöль баснисö!

Соёкö тай сiя гожумö и вöйис. Да кöть бы пыдын ваö, а горт дынын, асланым Тышоркаö.