Мемлекеттік қызметкерлерге арналған электрондық пошта енгізіледі
Қазақстанда ақпараттық қауіпсіздік мақсатында мемлекеттік орган қызметкерлеріне арналған электрондық пошта енгізіледі.
Бұл туралы “Зерде” ұлттық ақпараттық-коммуникациялық холдинг” АҚ басқарма төрағасының орынбасары Асхат Оразбек мәлімдеді.
Астанада мемлекеттік органдарды ақпараттандыру мәселелері жөнінде өткен конференцияда А.Оразбек: “Біз электрондық пошта енгізуді жоспарлап отырмыз. Бұл бағытта үлкен жұмыс атқарылды. Биылғы жылы біз шамамен 1000 пайдаланушыны тіркейміз”, - деп атап көрсетті. Жиын барысында белгілі болғандай, бүгінгі таңда кейбір мемлекеттік органдар өз корпоративтік желісін құруда, алайда көпшілігінде мұндай мүмкіндік жоқ.
“Қазақстандық мемлекеттік қызметкерлердің басым бөлігі осы себептен "mail.ru" секілді жеке сервистерді пайдаланады. Бұл жағдайда ақпараттық қауіпсіздік туралы айту, әрине, артық. Сондықтан да біз осындай қызмет ұсынуды жоспарлап отырмыз”, - дейді А.Оразбек. Оның сөзіне қарағанда, 2012 жылы сервиске мемлекеттік қызметкерлер қатарынан 10 мыңға жуық пайдаланушыны қосу көзделген.
Сондай-ақ А.Оразбек 2013 жылдан бастап, бұл жүйеге барлық шенеуніктердің қосылатынын жеткізді.
Дереккөз - interfax.kz
Мақал-мәтелдер
Батыр туса, ел ырысы, Жаңбыр жауса, жер ырысы.
Ат басына күн туса, Ауыздықпен су ішер.
Ер басына күн туса, Етігімен су кешер.
Ердің екі сөйлегені өлгені.
Ер бір рет өледі, Қорқақ мың рет өледі.
Еменнің иілгені – сынғаны, Ер жігіттің ұялғаны – өлгені.
Қоянды қамыс өлтіреді, Ерді намыс өлтіреді.
Жақсы аттың жалын сақтағанша,
Жақсы ердің көңілін сақта.
Судан тонын аямаған, Жаудан жанын аямас.
Қауғадан шошынған мал оңбас, Жаудан шошынған ер оңбас.
Жаман жолдас жауға алдырар.
Жолдасын тастаған жолда қалар.
Қорқақ көлеңкесінен де қорқады.
Ер жігіт елі үшін туады, елі үшін өледі.
Болат қайнауда шынығады, Батыр майданда шынығады.
Тапсырма: Мақалдардың мағыналарын түсіндіріңіздер және өздеріңізге ұнаған бесеуін жаттап алыңыздар. Мақал бойынша екі сөйлем құрастырыңыздар.
Информатикаға үлес қосқан ғалымдар өмірбаянынан августа ада лавлейс (lovelace augusta ada) (Бірінші программист)
1833 жылы ағылшын ғалымы, Кембридж университетінің профессоры Чарльз Беббидж (1792-1871) программалық басқарумен, арифметикалық және сақтау құралы бар гиганттық арифмометр – аналитикалық машина жобасын жасайды. Беббидждің аналитикалық машинасы қолданылуы мен жұмыс істеуі бойынша, көп жерлерде программалық басқарумен жұмыс істейтін машиналардың біріншісі саналды.
Ч.Беббиджге ғылыми ізденістерде көп жағдайда көмекші және әріптес болған Лавлейс ханым еді.
Августа Ада Лавлейс – англияның ұлы ақыны Джордж Байронның қызы, ол 1815 жылы 10 желтоқсанда дүниеге келген. Д.Байронның отбасылық жағдайы дұрыс болмады – отбасы құрған жылы жолдасынан айрылды. Оның әйелі Анабелла Милбэнк (1792-1860) дарынды адам болған. Ол тұрмысқа шыққанға дейін бала жасынан математикаға құштар болған.
Байронның қызы Ада да математикамен әуестенді. Кішкентай кезінен Аданың математикамен айналысуына достары, танымал ағылшын математигі Август де Морган (1806-1871) және оның жұбайы, математик Мэри Соммервил мен Чарльз Беббидж көмектесіп, қолдап отырды. Де Морган шәкіртінің математикалық қабілетін және шығармашылық мүмкіндігін жоғары бағалады. Ол Аданың ғылыми сабақтарын бақылайтын, қызықтаған мақалалар мен кітаптарын жіберетін. "Экзаминер" атты Лондон журналының танымал редакторы Олбани Фонбланк танысы Августа Аданың портретін қалдырған :"Ол ешкімге ұқсамайтын, бойында ақындық болмаса да математикалық және метафизикалық таланты бар еді. Ер адамдай шешім қабылдап, ойлап, жоспарын іске асыра білетін. Оның талғамы, білімі, тіпті музыкалық қабілеті де бар, әйелге тән нәзіктік пен сұлулық қасиеттері Аданың бойынан табылатын. Ғылыми салада танымал тұлғалармен таныс болуды, олармен пікір-алмасуды, білімді ортаны іздейтін".
Мэри Соммервил былай дейді: Ада екеуіміз "мистер Беббиджге жиі баратынбыз" және ол " бізді жылы қарсы алатын, өзі құрастырған машина құрылысын тиянақты түсіндіріп беретін тіпті, автоматты санау жүйесінің жұмысын практика жүзінде көрсететін".
1835 ж. шілдеде Ада Уильямға (он сегізінші Кинг) тұрмысқа шықты, Лавлейстің бірінші графы ретінде ізін басушы. Уильям Лавлейс, қарапайым мінезді жақсы адам болған, жарының ғылыммен айналысуына оң көзқараста болатын.
1836 ж. мамырда Аданың бірінші ұлы, 1838 ж. ақпанда – қызы және 1839 ж. – екінші ұлы дүниеге келді. Отбасы мәселелері де, денсаулығы да Аданың математикамен әуестенуіне еш кедергі болмайтын.
1841 жылы 22 ақпанда Ада Беббиджге былай дейді: оның санақ машинасына байланысты сұрақтардың шешімін іздеудемін "Мен келешекте мынадай шешімге тоқталдым. Сіз екеуіміздің әріптес, істес болуымыздың мүмкіндігі туралы көп ойлаймын (көмектесем – шын сеніммен айта алам)... Бұл әріптестігіміздің нәтижесі сіз екеуімізге де тиімді болады деп санаймын..."
1842 ж. қазанда италия математигі Л.Ф. Менабреа "Очерк аналитической машины, изобретенной Ч.Беббиджем" атты мақала жариялайды. Мақала Беббидждің 1840 жылы Туринде өткен Италия ғалымдарының конференциясында оқыған лекциясының негізінде жазылды.
Кейіннен очеркті Ада Лавлейс аударды. Оған Беббидж, Менабреа очеркіне кейбір ескертулер енгізуіне ұсыныс жасады.
Бұл ой Аде Лавлейсқа ұнады және ол бірден іске кірісті. Ада үлкен шабытпен жұмыс істеді. Ескерту жасап жаңаланған беттерді ол Беббиджге жіберетін, Беббидж ескерту беріп кері қайтарып немесе тексеріп дұрыс деп тапса баспағаға жіберіп отырды.
1843 ж. тамызда Менабреа мақаласының "Примечания" атты аудармасы жарық көрді. Мақала шыққан соң Беббидж Аданы "менің қымбатты Инператорым" деп атайтын болды.
Адада 50 жылдардың басында рактың алғашқы белгілері байқалған. 1852 жылы 27 қарашада, 37 жасқа толар шағында Ада қайтыс болады.
Сұрақтар мен тапсырмалар:
Августа Ада Лавлейстің өмірі туралы не айта аласыз?
Августа Ада Лавлейс ашқан жаңалық.
Аданың бірінші программист аталу себебі не деп ойлайсыз?
Мәтіннен сын есімдерді тауып жазыңыз. Ол сөздерді қандай басқа сөздермен ауыстырып қолдануға болады деп ойлайсыз.
Августа Ада Лавлейстің өзі туралы және еңбегі жайында қосымша мағлұмат қарастырыңыз.
Мұны да біліп алыңыздар:
Есте сақтау қабілетін жақсарту
№ 1 кеңес. Миыңыздың жұмысын жеңілдетіңіз
Миыңызды артық ақпараттан босатыңыз. Күнтізбеге жоспарлаған істеріңізді жазып қойыңыз: базарға бару, кездесу, қонаққа бару және т.б. Көрінетін жерлерге маңызды шаруалар жазылған қағаздар жазып қойыңыз: «Анама қоңырау шалу», «Сүт сатып алу» деген сияқты.
№ 2 кеңес. Тынығу
Ми әр уақытта жұмыс істеп тұрады. Миға салмақ түсірмей жұмыс істеп отырмын дегеннің өзінде де бірнеше минутқа тынығуға жетпейді. Миыңызға ара-тұра жеңіл массаж жасаңыз (қабағыңыз бен шашыңызды орта тұсын саусақтың ұшымен шеңбер жасағандай сәл батырып, уқалаңыз). Немесе мақтаға сергітетін май тамызып, (мысалы, бергамот) самай, құлағыңыздың ұшын, мұрныңызды уқалаңыз.
№ 3 кеңес. Дайындық
Егер көпшілік алдында сөйлеу керек болса, мәтінді актер сияқты жаттап алыңыз. Мәтіндегі сөздеріңізге жұртшылықтың реакциясы қандай болар екен, соны ойлаңыз. Мұндай дайындық сөйлеп тұрғанда сөздерді ұмытып, үнсіз қалған кезде көмектеседі.
№ 4 кеңес. Ассоциациялар
Әсерлерді үйлестіріп көріңіз. Мысалы, егер үнемі газды өшіруге, үтікті өшіруге ұмытып кете берсеңіз, дәл есіктің алдына плакат жасап қойыңыз. Шығып бара жатқанда, көзіңіз бірден соған түсетін болсын.
№ 5 кеңес. Жоспарлау
Ұмытшақтықпен күресетін бірден-бір жол. Демалысқа бара жатырсыз ба? Алдын ала саяхатты сызып, керек-жарақты жазып қойыңыз.
№ 6 кеңес. Тәртіп
Күнделікті қолданыстағы заттардың (жалпы бар заттың) өз орны болсын.
№ 7 кеңес. Спорт
Денсаулықты сақтаудың ең жақсы әдісі – жүгіру. Бұл жүрек жұмысын жақсартып, қан айналымын ретке келтіреді. Көптеген ғалымдар ғылымдық жұмыстарын жазып жатқанда осы әдіспен миларын босатып, жұмыс істеу қабілетін арттырады. Ол үшін аптасына үш рет асықпай, жарты сағат жүгіріп тұрыңыз. Тамыр соғысы минутына 140 соғудан аспасын.
№ 8 кеңес. Сандарды тез жаттау
Сандар желісін көз алдымызға телефонның пернетақтасын елестету арқылы тез жаттауға болады. Немесе туған-туыстарыңыздың туған күндерін, туған жылдары және т.с.с таныс сандар арқылы жаттауға болады. Тағы бір тәсіл, әрбір санға арнайы сөз тағайындап қойыңыз. Мысалы, 1 – қарындаш, 2 – аққу, 3 – үй, 4 – орындық және т.б. Егер 350214 сандарын жаттау керек болса, "Үй машинасы жоқ аққумен қарындаш орындық ойнады" деген сөйлем құрап алып, санды жаттап аласыз. Әрі қарай бәрі өз фантазияңызға байланысты. Ұзын сандар тізбегін бірнеше бөлшекке бөліп, жаттасаңыз болады.
Мұндай тәсілдер өте көп, ең бастысы өзіңізге ыңғайлысын таңдап алыңыз.
Зерттеушілер миға тұрақты түрде интеллектуалды салмақ түсіру оның жұмысын қартайғанға дейін жақсы сақтайтынын дәлелдеген. Күнделікті көптеген ақпарат алатын бізге мидың бұл қасиеті өте маңызды.
Және есте сақтауға байланысты соңғы жаттығу: Мына мақаланы жақсылап есте сақтадыңыз ба? №1 кеңес есіңізде ме? Қалай аталған еді? Егер мақаланың сол бөлімі есіңізден шығып кетсе, осы кеңестерді дереу орындауға кірісіңіз!