Третиенадесять.

Из разных вер и ересей к Нашей православной восточной Вере пряходящих, и ону приемлющих, всех вписати в книги и отдати блюстителю училищ со учительми, дабы они их в хранении Нашея православныя Веры и церковных преданий наблюдали; и кто из них како житие свое в ней препровождает, и крепко ли и цело ону и церковная предания содержит, известие имели. Аще же кто из новопросвещенных не цело храняй православную Нашу веру и церковная предания явится; и таковаго в дальные наши грады, на Терек и в Сибирь ссылати. Аще же кто явится в держании своея прежния веры, или ереси, из неяже пришел есть к православной Вере, а Нашея Веры в хулении; и таковый да сожжется без всякаго милосердия.

Четвертоенадесять.

И о сем их блюстителю со учительми тщатися крепце, ежебы всякаго чина духовным и мирским людем, волшебных и чародейных и гадательных, и всяких, от Церкви возбраняемых богохульных и богоненавистных книг и писаний у себя никому весьма не держати, и по оным не действовати, и иных тому не учити. А у них же таковыя книги или писания ныне суть, и оным таковы книги и писания сожигати, и никаких бы волхвований и чародеяний и гаданий впредь не держати. Такожде я неученым людем свободных учений никому Польских и Латиинских, и Немецких, и Лютерских, и Калвинских, и прочих еретических книг у себе в домех не держати, и их за неимением довольнаго разсуждения и ради в Вере Нашей усумнения не читати, и нигде никому из оных, еретических кних, и их восточной Нашей православной Вере, и церковным преданиям противных толкований, состязаний не имети, и подлогов не подлагати: зане обычай есть прелестником, яко они таковые подлоги подлагая, глаголют, еже они то творят не ради в Вере и церковных преданиях усумнения, но чином наукотворнаго состязания. И таковыя книги еретическия сожигати, или к блюстителю училищ и учителем приносити. Аще же кто сему Нашему Царскому повелению явится противен, и отныне начнет кто от духовных и мирских всякаго чина людей волшебныя и чародейныя и гадательныя и всякия, от Церкви возбраняемыя богохульныя и ненавистныя книги и писания у себе коим ни буди образом держати, и по оным действовати, и иных тому учити, или и без писания таковая богоненавистная делеса творити, или таковыми злыми делами хвалитися, яко мощен он таковая творити: и таковый человек за достоверным свидетелъством без всякаго милосердия да сожжется. Аще же кто свободных учений неискусный, имать Польския и Латинския, и Немецкия, Лютерския, и Калвинския и иныя еретическия книги в доме своем, имети, и их читати, и из них состязание имети, и подлоги на усумнения Нашея восточныя Веры, церковных преданий подлагати, и таковыя предаяти казни, смотря по их вине, нещадно.

Пятоенадесять.

Аще кто от чуждоземцов и Русских людей при пиршестве, или во ином каковом ни буди месте, при достодолжных свидетелех, православную нашу Християнскую веру, или церковная предания хулити и укорительная каковая словеса о ней глаголати имать; и таковаго на суд во оном деле отдавати блюстителю училищ со учительми. И аще кто в хулительстве Нашея Веры, или церковных преданий во укорительных словесех по суду явится, или во отрицании призывания Святых в помощь, и святых икон поклонения и мощей святых почитания обличится; и таковый без всякаго милосердия сожжен да будет.