Чюдо преподобнаго Ферапонта, како исцеле болный у гроба его.

Человек некий имянем Кирил по реклу Зеленин жительство имеяше во граде Галиче на посаде, еще млад сый. И впаде в лют недуг и люте огнем жгом, и закосне недуг его. Уже все лето тружаяся в недузе том, и в некое время в полудне явися ему преподобный Ферапонт и рече ему: «Что страждеши в недузе сем долгое время? Веси ли манастырь на устье//(л. 111 об.) Моньзы реки?» Больный же рече: «Не вем, господине мой, точию вем Железноборовский манастырь преподобнаго чюдотворца Иакова и молюся ему, дабы исцелил мя от лютыя болезни сея». И рече ему явивыйся: «Иди тамо, иже ти аз поведах, и тамо помолися Богу, совершенно исцеление получиши. Востани и повеждь отцу своему и матери». Больный же вопроси его: «Ты кто еси, отче?» И рече: «Аз Благовещеньскаго манастыря с устья Моньзы реки». Болный же рече: «Аз не могу тамо доити конем и воза не имам//(л. 112). Отец и мати моя состарехся и в скорьби велицей о моем недузе». Явивыйся рече ему: «Вам путь рекама прилежит». И абие невидим бысть явивыйся, и возбнув болящий, и слышах себе во облегчении, и изыде ис клети своея. И поведах все видение отцу своему и матери и явившагося старца пречюдна. Родители же его слышах от него вся, и наемше струг, и ехав в Благовещенской манастырь, везох сына своего и приехав, певше молебная пения воскресению Христову, и Благо//(л. 112 об.)вещению Пресвятей Богородицы, и великому чюдотворцу Николе, над гробом преподобнаго певше панахиду, и по отпущении панахиды в том часе здрав бысть болящий молитвами преподобнаго Ферапонта совершенно получи исцеление и отехав в дом свой, радуяся. И по том прежереченный Кирил Зеленин велию веру име к преподобному Ферапонту, и свои ему дети посылаше в манастырь молитися, и вдаде вклады велия по манастырьскому чину, яко же и в прочих монастырех. По некоем же времени//(л. 113) и сам Кирил пострижеся в Благовещеньском манастыре на устье Монзы реки.

Чюдо преподобнаго Ферапонта.

Человек некий имянем Борис пришлец бе, поведав ся славнаго града Казани, тамо родители его пребывающе. И поживе лето едино в Благовещенском манастыре, и абие нападе на очи его болезнь велия, и не видех света уже три месяцы. Во един же от дни приде той Борис ко старцу Андреяну и поведах ему: «Приходит ко мне етер старец сея обители по вся нощи. Уже бо десятая//(л. 113 об.) нощь мимошедши, по вся нощи вижду его, ово во сне, ово яве вижду. При нем и свет вижду, и манастырь весь, и глаголя ми не преступати обета своего». Андреян же вопросих его: «Какия обеты имаши?» Он же рече: «Не свемы, точию слышах у отца моего и матери моея, егда бех младенец, и он иде, обещах мене во веки пребывати в манастыре боголепнаго Преображения Христа Бога Нашего и у гробов святых отец Гурия и Варсунофия Казаньских чюдотворцов». И вопроси Андреян: «Каков//(л. 114) бе старец, иже явлейся ти?» Он же поведах подобие преподобнаго Ферапонта и вопроси о имяни старца. Он же поведах: «Не смех вопросити его и не свем имяни его, токмо не видех в братии таковаго старца святолепна и украшена». И веде его Андреян к гробу преподобнаго, и помолихся с ним на долг час и, взем Андреян персти з гроба преподобнаго Ферапоньта, и всыпа персть в церьковный сосуд, и влияше священныя воды, и повеле слепому умытися. Он же//(л. 114 об.) умывся, и прозре, и славя Бога и преподобнаго Ферапонта, и полагаше обеты велия, яко да пребывает в Благовещеньском манастыре у гроба преподобнаго Ферапонта до коньчины живота своего. Во един же от дни в полудни пришедша к нему преподобный и рече: «Испольни обеты родителей своих, иди во свой град, да не обладан будеши паки слепотою». И не виде его ктому. Он же поведах Андреяну все по ряду, Андреян же оптусти его с миром.

Чюдо преподобнаго Ферапонта.//(л. 115)

Человек некий имянем Борис, пребывание имый во граде, нарицаемом Буе, и нападе на очи его болезнь люта зело, и два месяца не видеша света, ни восклоняяся от ничания. Во един же от дни явися преподобный Ферапонт и рече ему: «Иди в Благовещенской манастырь, на устье Монзы реки и испроси у Андреяна, дабы ти повелел взяти земли с Ферапонтова гроба, и вложи ея в воду, и умытися от нея, и будеши исцелен». И не виде явившагося ктому. Он же не можах востати и ити в манастырь//(л. 115 об.), и поведа родителем своим, и повеле вся сотворити по глаголу явившагося ему. Отец же болящаго иде в манастырь и поведа вся Андреяну, и помолився преподобному, и испроси з гроба его земли, и несе в дом свой, и умывся болящий и бысть здрав очима, яко николиже болеша очи его.