Чюдо преподобнаго Ферапонта.

Человек некий имянем Марко от детьска одержим бе слепотою, ни мало видев блеску. И слышав о чюдесех преподобнаго Ферапонта, и иде в манастырь на устье Монзы реки. Растояние же его имый от обители 15 поприщ, прииде и поведав обеты своя игумену и братии, яко обещася преподобному Ферапонту пети молебны и дати вклад, елико мощно во обитель сию. Игумен же и братия веде его ко гробу преподобнаго,//(л. 152) и совершивше молебная пения, и вземши перьсти з гроба преподобнаго, и вложивша во святую воду, и умыв лице и очи слепаго. И абие прозре на образ преподобнаго и видех, яко совершенно исцеление получи. И отиде в дом свой, радуяся.

Ино чюдо преподобнаго.

Некий юноша имянем Пагкратий веси, нарицаемыя Корежьския, болеша глава его год и два месяца, ни шия его обращашеся на кую страну, ни наклонитися могущи. И привезоша родители его в манастырь на устье//(л. 152 об.) Моньзы реки, и молившеся у гроба преподобнаго Ферапонта, и певше молебен, и нача юноша метание творити до земли пред образом преподобнаго чюдотворца Ферапонта и глядати семо и овамо, и поведа всем, яко совершенно исцеление чюяше недуга своего. И отиде в дом свой, славя Бога, и Пречистую Его Богоматерь, и угодьника их преподобнаго чюдотворца Ферапонта.

Ино чюдо преподобнаго.

Некий муж имянем Викула веси, нарицаемыя Волоку Лежьсково, наиде на него//(л. 153) некогда забытие, и омрачашеся ум его, и главою не владяше и падаше на землю. Недуг же той продолжашеся боле пяти лет, и едва некогда прииде в чювство, и нача обеты велия полагати восприяти ему ангельский образ во обители преподобнаго Ферапонта на устье Моньзы реки. И приехав в Благовещеньской манастырь на устье Монзы реки, и молився у гроба преподобнаго Ферапонта, и певше молебная пения, и вдаша вклад немал и милостыню довольну братии.// И (л. 153 об.) в том часе бысть здрав, отойде от него забытие и падение, и поживе в дому своем 20 лет, здрав сый; на всякое лето подаваше милостыни довольны в манастырь. Последи же исполнив обещание свое и бысть мних, и поживе во обители два надесят лет, богоугодное житие прохождаше, и многи труды и подвиги полагаше во обители день и нощь, непрестанно работая на страде манастырьской. И преставися к Богу, и погребенно бысть трудолюбезное тело//(л. 154) инока Василия в той же обители честно.

Чюдо преподобнаго Ферапонта.

Тоя же прежепомянутыя веси Волоку Лежьского некий муж имянем Пагкратий злым недугом одержим бысть многие лета, заимашеся ему задний проход и вельми страдаше от злаго того недуга. И прииде в чювство, и остави дом свой и жену, и иде в манастырь преподобнаго чюдотворца Ферапонта на устье Монзы реки, и пострижеся во иноческий образ, и веде его началный старец на гроб препо//(л. 154 об.)добнаго Ферапонта. И целовав образ на гробнице, и от того часа исцеле от недуга своего. В девятый день поведа игумену и братии, яко истинно получи исцеление молитвами преподобнаго Ферапонта. И в десятое лето по обещании иноческаго жития преставися к Богу.

Ино чюдо преподобнаго Ферапонта.

Муж некий имянем Марко и в некое время нападе на очи его болезнь люто зело и не видех света год и два месяца и прииде ему во ум ити в Благовещенской манасты//(л. 155)рь на устье Монзы реки и помолитися преподобному чюдотворцу Ферапонту, слышах от многих, яко исцеления приемлют молитвами его многи недужныя, ведоша же сродницы его в манастырь на устье Монзы реки и помолився у гроба преподобнаго чюдотворца Ферапонта и, певше молебная пения и вземше персти из гробницы, и вложивше во святую воду, и умывше очи слепаго, и в том часе прозре, и виде соверашено, и уразуме, яко истинно исцеление получи и отойде в дом свой радуяся//(л. 155 об.) и потом изучися художьству ковати железо.