О преставлении строителя и начальника старца священноинока Андреяна.

Егда приближашеся время отшествия его от еже к Богу священноинока старца Андреяна, иже и зачат святую обитель сию, и преже исхода своего за две седмицы посылает к духовному своему отцу во область града Вологды во Арсениев манастырь ко священноигумену Антонию, егоже и выше именовахом во обретении мо//(л. 147 об.)щей преподобнаго чюдотворца Ферапонта. Тогда прилучившуся ему быти во обители нашей, посланнии же поидоша ко игумену Антонию. В то же время старец Андреян по вся дни созываше братию, и поучая их о боголюбезном житии и о всяком духовном пребывании, и указы творя на житие преподобнаго чюдотворца Ферапонта. Братия же, помышляюще, негли Андреян хощет отоити во ину обитель, понеже именоваше себе иного строителя инока Григория.//(л. 148) Последи же бысть и игуменом тоя же обители. Приехавшу же игумену Антонию, глаголющу Андреяну: «Почто тако сотворил еси? Посла по мене и поведа ми отшествие твое к Богу, ты же здрав пребываеши». Андреян же молих его пребыти сию седмицу. Во утрии же нача скорбети Андреян, и болезнь его уже к смерти варит. Игумен же и вси сущии ту вельми удивляшеся и глаголюще, негли истинно уведав Андреян преставление свое к Богу. Андреян же молиша игумена,//(л. 148 об.) да бы ему вся тако сотворити, яко же он преподобнаго Ферапонта по смерти причастих богоявленскою водою. И седмь дний болех, преставися к Богу. Отец же его духовный священноигумен Антоний вся об нем творяше, яко же заповеда ему Андреян, по преставлении же его причастих его богоявленьскою водою. Он же, чюдо показав, приимаше святую воду усты, яко жив. И просветися лице его, белостию сияя, яко снег. И скутавше трудолюбезное тело его и//(л. 149) многотрудное, и положиша во гробе, и абие изыде из гроба его благоухание велии и наполнися весь манастырь и по-за манастырю. И по погребении его таково благоухание ношашеся две седьмицы повсюду благоухающе, яко же и на преставлении преподобнаго чюдотворца Ферапонта. Преставися строитель и начальник обители сея священный инок старец Андреян в лето 7127-го (1619) маия в 5 день. И погребенно бысть многотрудьное тело его в той же его обители на устье Моньзы реки//(л. 149 об.) в церкви Воскресения Христа Бога Нашего близ гроба старца Феодосия, его же выше именовахом, иже слеп бе.

О явлении преподобнаго чюдотворца Ферапонта, и начальника старца Андреяна, и старца Феодосия.

Бе некий отрок имянем Иаков сын преже помянутого Иоанна Ваковарина и матери Пелагеи, млад сый. Ехавшу ему от устья Моньзы реки к манастырю, и приехав к гумну манастырьскому, и видит триех старцов, стоящих у гумна. И удержавше о//(л. 150)трока и глаголюще ему: «Камо едеши?» Он же отвеща им: «Еду ко отцу своему на ниву собирати снопы». Старцы же реша отроку: «Повеждь отцу своему и игумену, да не собирают класы в сие время в гумна сия, дондеже обновятца огнем». Отрок же рече им: «Пустите мене, аз не вем вас, откуду естя». И понуди мску свою, и отехаша от них, озреся, никого же видех. Отрок же поведа отцу своему, яже видех и слышах у триех старцов, глаголюще ему: «Гумна поновятца огнем».//(л. 150 об.) Отец же его разуме, яко видение виде отрок, и шед поведа игумену и братии. И призвавше отрока, и вопроси его о видении, како видех триех старцов и знаяше ли их, и что ему глаголаше. Он же рече: «Не вем их». И поведа им вся по ряду выше писанная и уразумевша вси, яко чюдо бысть преподобных отец Ферапонта, и Андреяна, и Феодосия, и веру яша истинно, и не повеле жита собирати в гумна, и заповеда тверде блюсти ото огня. В пятый же день по//(л. 151) явлении святых згореша вся строения гумная. И во вторую нощь по пожаре явися преподобный Ферапонт старцу Назарию, его же и выше именовахом, и рече ему в видении: «Повелите убо не от огня блюсти всякое строение, но от падения греховнаго, да не входят жены обнощевати в гумна с мужи во едино». И паки невидим бысть преподобный. Старец же Назарей поведа видение преподобнаго чюдотворца Ферапонта игумену и всей братие, и прославиша Бога о бывших чюдесех святых отец.//(л. 151 об.)