Житие Ферапонта Усть-Монзенского

НИОР РГБ

Фонд 247 (Рогожское собрание). № 610.

17 Век. Полуустав. 184 листа.

(л. 27) Житие, и жизнь, и сказание от части чюдес преподобнаго отца нашего Ферапонта Усть Монзенскаго новаго чюдотворца, иже бысть во областе града Галича, и о зачале Благовещеньскаго монастыря, что на реке на Костроме, на устье Монзы реки. Понеже зачатся обитель сия житием и начальством раба Божия священноинока старца Андреяна некоего боголюбива мниха, о нем же//(л. 27 об.) и повесть сия предлежит.

Бысть некий юноша имянем Аммос. Рождение же его и воспитание града, нарицаемаго Костромы, благоверну и богобоязниву родителю сын, отца имянем Даниила и матери Марии. Сей же блаженныи юноша от младых ногтей божественною ревностию распаляем, желая облещися во иноческий образ. И не можаше родителей своих умолити о сем, дабы ему восприяти ангельский образ. И понуди//(л. 28)ста родители его сочтатися законному браку, и обручиста ему невесту. Он же мало поживе с подружием своим, но точию мысля, како бы ему улучити желание свое – облещися во ангельский образ. И вельми желаше пустыннаго жития.

И бе в некое время прилучися ему сердечная болезнь. Зело люто боляше. Он же в болезни той обещася восприяти иноческий образ, и имый в мысли своей молебныя глаголы, и взирая ко образу Пречистыя Богородицы//(л. 28 об.), над ним же бе икона честнаго и славнаго Ея Благовещения, и моляшеся, чтобы Господь Бог и Пречистая Мати Божия показали, каково место ко иноческому жительству. И вельми желаше пустыннаго жития.

В то же время слышав себе во облегчении от тоя лютыя болезни, и мало воздремався, и бысть восторзе, и видех в храмине свет велий, в ней же лежаше. И видех Пресвятую Богородицу, от иконы сходящу, и рече ему: «Востани и иди по мне». И абие //(л. 29) воста, и иде с нею, и прииде на некое пусто место, и видех между рекама церковь пусту. И показа ему Пресвятая Богородица место то и рече: «Зде селитву имаши во веки». И внидох в церковь с Нею, образа же ни единаго не видех. И абие возбнув от сна, и обретеся на своем месте, и видех в ту храмину, идеже лежаху, входящу жену, от Нея же свет велий облиста. Отрок же, во ужасе быв, и возрев на икону Пресвятыя Богородицы Честнаго и Славнаго Ея Благовещения// (л. 29 об.) и видех Пречистую стоящу на иконе, яко же бе утворена вапы, иного никого же видех в храмине, точию отрок един.

И нача велми плакати, и держа во уме место, идеже показа ему Пресвятая Богородица, и не ведяше, в коеи стране место то. И востав с постели своея здрав, и не чюяше болезни. И помолився, и нача мыслити во уме своем, како бы ему изыти из дому отца своего, и утаився родителей своих, и иде в манастырь Пречистыя Богородицы//(л. 30), иже нарицается на Толге близ града Ярославля. И хотяще ту восприяти ангельский образ. Уведанно же бысть родителем его, и не даша ему на Толге постричися.

Он же отиде во обитель Всемилостиваго Спаса в Генадиев манастырь, и прииде ко обители, и погрузися в езеро, иже есть близ манастыря//(л. 30 об.) того, точию глава его на бреге лежаше. И ощутиша его етеры старцы тоя обители, и поведа игумену: «Человек некий близ манастыря лежа во езере, точию выя его обреташеся на суше». И изыде игумен от манастыря, и видев тако, яко же старцы рекоша ему, и вопроси его игумен: «Кто еси ты и коего града или веси? И како погрузися во езере сем? Хощеши навесть печаль месту нашему?» Он же, мало восклонився, и рече ко игумену: «Аз, отче, от далных градов, родители же мои преставистася к Богу. Аз же остах един сиротою, не имею, где главы подклонити» (Мф 8:20; Лк 9:58). И мо//(л. 31)ли игумена, дабы его приял и облек во иноческий образ. Игумен же милосердова о нем, прият его во обитель свою, и по мале времени повеле его постричи и облещи во иноческий образ, и предаде его искусну старцу. И поживе многое время в Генадиеве манастыре, и прииде ему во ум преже показанное место.

Место же то не весть в коей стране, точию мысля ити в западную страну на взыскание места того, негли обря//(л. 31 об.)щется человек, иже поведает ему место оно. И прииде во град, нарицаемый Вологда, и не получи желаемаго, кто бы ему поведал место, иже выше наменихом. И отиде оттуду, велми скорбя, иже не получи желаемаго, и слыша во обители Всемилостиваго Спаса на Каменном, иже есть на Кубенском езере. И прииде во обитель Всемилостиваго Спаса, и прият бысть архимаритом и братиею тоя обители, и живяше немало время на Каменном, и хра//(л. 32)няше заповеданныя ему службы, и любим бысть архимаритом и братиею.

И не в кое время прииде ему мысль о преже показанном месте о пустои церькви, что ему указа Пресвятая Богородица между реками, и разгарашася старец мыслию, дабы единем часом обрел место оно, и не весть в коей стране место то. И прииде ему во ум молитися Господу Богу и Пречистой Его Богоматери, да явит ему Господь Бог и Пресвятая Богородица место оно. И моляся старец со многими слезами//(л. 32 об.), три дни ни пит, ни яст. В третию же нощь случися ему изыти ис келии своея, и возрев на восток, и виде к восточной стране в далном растоянии взыде столп огнен высок до небеси тонок видом. Старец же, постояв на месте, долу поник, и паки возрев, и видев того тонькаго столпа по левую страну, вторый столп огнень же превелик зело сиюящь до небеси. Во округ же тех столпов идяше вода речныя быстрины//(л. 33), и чюдися старец видению тому, и имея во уме своем: тамо есть место оно, иже показа ему Святая Богородица и его же ради моляшеся. И разгарашеся старец мыслию, дабы единем часом обрел место оно, и не ведяше, где бе, в коем граде или веси.

Раб же Божий Андреян (тако бо наречено бысть имя его во иноческом обещании) радовашеся душею, яко не презре Бог моления его, яко явишася ему стольпи и во округ вода. И держа во уме своем ити на восто//(л. 33 об.)чную страну на взыскание места того, и изыде из манастыря, иже нарицается Каменной, и иде на восток, и случися ему приити во обитель Пресвятыя Живоначальныя Троицы в Павлов манастырь во область града Вологды. И живе ту немало время, крыласкую службу храня. Тоя же обители некий духовный старец священноинок имянем Пафнутии, и той желаше пустыннаго жития, прият его в духовныи совет, и обще поя Богу в правиле по вся//(л. 34) дни, поведая житие свое старцу Пафнутию, како измлада желая иноческаго и пустыннаго жития, и како родители его принудиста по закону пояти жену, и како ему случися сердечная болезнь люта зело, и како в скорби той моляся и обеты полагая облещися во иноческий образ, и како ему бысть облегчение от той лютыя болезни, и како явися ему Пресвятая Богородица, от иконы сходящи и в пустыни с Нею ходящи, и како показа ему место и церковь пусту//(л. 34 об.) между двема рекама и паки обретеся в храмине своей, в дому отца своего, и видех Пречистую Богородицу входящу в храмину, аки жену, и свет видех, и паки обретеся на иконе, и како восприят иноческий образ в Генадиеве манастыре, и како ему прииде желание о взыскании показаннаго ему места Пречистою Богородицею, и како живяше на Каменном в монастыре, и како молися о явлении места, и како ему явися столпы и вода, и вся предиреченная поведая//(л. 35) ему. Старец же Пафнутий в сладость послушая его с радостию, и мысляше о месте том вельми желательно, и не знаяше места. Пафнутий же моляше старца Андреяна, дабы восприял чин священничества. Он же повинуяся воли его, и восприят чин священничества, но и паче же послушав Пафнутия, еже и он обещася с ним взыскати места оного и жити обще.

Времени же некоему мимошедшу, старец Пафнутий и Андреян, сто//(л. 35 об.)яще на обычном своем келейном правиле, и по отпущении правила старец Пафнутий изыде ис келии своея на присение поклонитися гробу преподобнаго Павла Чюдотворца, занеже келия та близ храма того, идеже гроб чюдотворцев. Обычай же бе старцу по вся нощи исходити ис келии своей поклонятися гробу преподобнаго Павла Чюдотворца. Егда же изыде старец Пафнутий на присение и видех на востоце//(л. 36 об.) зарю сияющу, а в ней церкви и кресты, аки солнце восходяще, вельми сияюще паче солнца, и нейде ко гробу преподобнаго Павла, и возвратися в келию свою, и поведа видение Андреяну, и изыде оба ис келии на присение, и то же видение видев. И рече Андреян: «Отче Пафнутие, видех и аз в той стране столпы огненныя и воду, их же ти многажды поведах. Мню, яко то есть место, его же ми показа Пресвятая Богородица». И паки, вшедше в келию свою, и в тыи дни никому же//(л. 36 об.) поведая видения того, его же видех.