4 Серпас.
Женя Братенков быдмӧ крепыд семьяын. Мамыс мичмӧдӧ дзоридзьясӧн карсаяслысь олӧм, велӧдӧ интернатса нывъясӧс сьӧлӧмсянь вӧчны удж. Батьыс, Степан Иванович, заводын инженер, пыдди пуктана морт, олӧ семья йылысь тӧждӧн. Тӧвсяньыс на пиыскӧд дасьтысьӧны чери кыйигкежлӧ: ньӧбӧны палатка, шатинъяс да мукӧд чери кыян кӧлуй. Схема вылын петкӧдлам найӧс сплӧш визьӧн (4 серпас). Женялы эм, код вылысь босьтны примерсӧ олӧмас. И зонка быдмӧ шань сьӧлӧмаӧн, сюсь вежӧраӧн, мукӧд мортлысь шогсӧ да олӧмас мичлунсӧ гӧгӧрвоанаӧн. Со сійӧ ӧлӧдӧ ичӧт челядьӧс клумба вывті котралӧмысь: «Ті нӧ, пыстаяс, мый тані вӧчанныд! Али онӧ тӧдӧй, мый оз позь талявны дзоридзьяссӧ?»
Мӧд делӧ – Роман. Сылӧн батьыс абу, мамыс актриса да пыр кӧнкӧ театрыскӧд гастрольяс вылын. Сійӧн мамсӧ пасъям оръясьӧм визьясӧн: мамыс гежӧда овлӧ гортас (4 серпас). Роман олӧ бабыскӧд, шань нывбабакӧд, но мам-батьлӧн радейтӧмыс сылы оз тырмы. Тшӧкыда веськавлӧ зонка лёктор вӧчанінӧ. Со 2 во сайын каньлы бӧжас чери кыян тиньган отсаліс пысавны посниджык челядьлы. Мӧдысь милиционер Середовлысь лэдзис понсӧ дом вылысь, сы вӧсна мый пыр омлялӧ вӧлі. Та бӧрын сэсся эмсӧ и абусӧ кутісны кӧвъявны зонка вылӧ.
Но Роман кыдз кужӧ, сідз сетчӧ бурлань. Сійӧн, гашкӧ, и кыскис сьӧлӧмыс Женя Братенков дорӧ. Кутшӧм рад лои Роман, кор тӧдмаліс, мый Степан Иванович тшӧтш босьтӧ сійӧс чери кыйны: «Нимкодь лои Романлы, мый Женялӧн батьыс тшӧтш босьтӧ сійӧс. Оз быдӧн вӧчны тадзитӧ. Сы дінӧ важӧн сибдіс «тӧлктӧм детина» ним».
Коймӧд геройыс – Нина. Ми тӧдмалам сылӧн абу ёна кокни челядьдыр йылысь. Коркӧ овлӧма бур семья: мамыс радейтлӧма быдтыны дзоридз, велӧдӧма тшӧтш и нывсӧ, а батьыс абу торъя мунӧма налы паныд, кӧть эськӧ абу гӧгӧрволӧма гӧтырсӧ да нывсӧ. А кор мамыс кулі, батьыс выльысь гӧтрасис, муніс посёлокысь Межа ты дорӧ веськöдлыны чери вугралысьяслöн базаöн, лоис Князьӧн. Нывсӧ ыстіс интернатӧ велӧдчыны, кытысь Нина волывліс сӧмын каникулъяс вылӧ. Торъя эз и гажтӧмтчы гортсьыс, ӧд волігъясас батьыс тшӧкыда вӧлі код юра, а тьӧткаыс, Гора, Ирина, пыр горзіс сы вылӧ. Ниналысь батьсӧ пасъям оръясьӧм визьӧн (4 серпас).
Ниналысь олӧмсӧ позьӧ шуны медся сьӧкыдӧн: сылӧн абу матысса ас йӧзыс, батьыс кӧть и шулӧ «Нинукӧн», но кӧдзалӧма нин нывсьыс, сылы веськодь нылыслӧн тӧждлунъясыс, мӧвпъясыс, аскылӧмъясыс. Квайтӧд класс помалӧм нывка быттьӧ нин верстьӧ морт: мӧвпалӧ водзӧ олӧм йылысь, удж йылысь. Но кольӧ ышмысь ичӧт нывкаӧн на: сералӧ, вильыша дурӧ да котралӧ зонкаяскӧд.
Мыйла повесьтыс шусьӧ «Князь ныв», а оз, шуам, «Женя Братенков» либӧ «Межа ты вылын»? Гашкӧ, сы вӧсна, мый авторыс кӧсйис тӧдчӧдны Ниналысь образсӧ, коланлунсӧ? Ӧд Ниналы колӧ аслыс торйӧдны олӧмас бурсӧ да лёксӧ, овны ас вылӧ надеяӧн. И арлыд вылӧ видзӧдтӧг Нина кужӧ гӧгӧрвоны олӧмас тӧлксӧ. Женялы отсалӧны мам да бать, Романлы – бабыс да Женя, а Ниналы – некод. И Женя гӧгӧрвоӧ, мый Нина абу ни кутю пон, ни сьӧд нывка, ни катша, ни ёма.
Повесьт помас чужӧ юалӧм: мыйла Князь ныв? Князьыс ӧд сэтшӧм зывӧктана петкӧдлӧма: ыкша, асьсӧ вылӧ пуктысь, вина юысь, вӧр-васӧ пасьнитысь, нывсӧ вунӧдӧм. Мыйла Ниналы сетны батьыслысь прӧзвищесӧ? Чайтам да, тані петкӧдчӧ «князь» кывлӧн мӧд вежӧртас: благороднӧй морт, вежӧра, тӧлка. Нина – князь ныв, княжна.