Чудо святаго отца Антония о провидении под Оршавою о побоищи православных христиан.

Некогда блаженному отцу Антонию упражняющеся в келлии своей и во мнозе посте и в молитвах провиде бывшее под Оршавою побиение православных. Во един от дней рече брату, служащему: «Днесь, брате, под Оршавою множество православных побиеных бысть грех ради наших». И вся по ряду сказав брату и по малех днех приидоша возвещающе бывшее, яко збысться реченное// отцем. И удивися брат о чем проречении его и поведа всем братиям своим при животе и по смерти убо после сказано будет. Что же многа глаголати и писати святаго и преподобнаго чудотворца Антония чудеса, исправления добродетелей яже в житии сем и смерти бываема, но яко же слышах и прежде пришествия его на место сие человеколюбивый и всесилный Бог Наш от многих лет показа, яко на сем месте прославитися святому Его имени, зане отчасти вкратце написах о сем, яко рещи краем перста коснухся, яже по достоянию и по числу отнюдь немощно словом изрещи, яко же и звезды небесныя// и песок земный изчести невозможно суть, тако и святых чудеса кто может подробно сказати или исписати, занеже по вся дни, яко же от источника почерпающе исцеление приемлем и до сего дне.

Чудо святаго отца Антониа некогда загореся тоя пустыни на трапезе церковная кровля и угасе пламень огня.

Егда зело загореся и воста велии ветр и нача пламень возгаратися велми на келлии иже близ трапезы стоят и бысть толик жар, яко вмале не загорешася келлии пламенем. Мне же времена случися быти // в келарях и зращу ми толику беду и недомышляхся, како бособити. И текох скоро ко святому отцу Антонию и падох пред ним. И начат молити ево со слезами, да бых помолихся Господу Богу и Пречистей Его Богоматере. И ему стоящу у двереи в келлии своеи и обратися ко образу Всемилостивому Спасу иже стоя в келлии его и рече: «Изволил еси возлюбити место сие, попусти же наказание с милостию и сотвори достойно». И обратился ко мне и рече: «Не бойся, брате, не оскорбит нас Всемилостивый Господь Бог Наш выше нашея меры». И абие в той час обратився пламень на другую страну и паки нача пламень вихром витися вверх, иного ничего не повреди. И тако паки погасе о себе в лето 7050 году месяца февраля в 11 день. //

О приходе святаго отца Антониа в царствующий град Москву.

Бе же в то время державный царь и великий князь Весилей Иоаннович всея России самодержец. Яко услыша пришествие святаго старца Антониа, возрадовася зело, желая видети его, от многа времени слышав бо добродетелное житие его и знаем бяше им, и почиташе его, яко единаго от святых. Зело бо любляше благочестив и нищелюбив царь и призва святаго благословения прося от святаго. И рече святый: «Сего ради приидох к твоей державе молити Бога за твое благородие». Царь же велми почти старца и милостыню дав доволно, елико требует, и отпусти. И молит его царь молити Бога о нем,// даде же ему и рыбные ловли на озере Илмене и землю и даде же ему грамоты жалованные с крепкими с подписми и печатми Пречестныя обители, даже и доныне нами видими чуть милостию Божиею. Блаженный же Антоний, яко нецыи от древних людей поведают о нем много потрудися в животе своем Бога ради. О славе же и о богатестве никако же печешися и до преставления своего, его же молитвами, Христе Боже, помилуй и спаси нас ныне, и присно, и во веки веков. Аминь.