Губная белозерская грамота.

Российское законодательство x-xx вв. Т.2 М., 1985.с213-219

Приложение 4

1. От великого князя Ивана Васильевича всеа Русии в Белозерской уезд князем и детем боярскым, отчинником и помесчиком, и всем служилым людем, и старостам, сотцкым, и десятс­ким, и всем крестьянам моим великого князя, и митрополичим, и владычним, княжим, и боярскым, и помесчиковым, и монастырскым, и черным, и псарем, и осочником, и перевестником, и бортником, и рыболовем, и бобровником, и оборочником и всем без омены, чей кто нибуди.

2.Били естя нам челом о том, что у вас в тех ваших волостях многие села и деревни розбойники розбивают и животы ваши грабит», и села и деревни жгут, и на дорогах многих людей грабят и розбивают, и убивают многих людей до смерти. А иные многие люди у вас в волостях розбойников у собя держат, а к иным людем розбойники с розбоем приезжают и роз-бойную рухлядь к ним привозят. И мы к вам посылали на Белоозеро обыщиков своих, и от наших деи обыщцков чинятся вам великие убытки. А вы деи с нашими обыщики лихих людей разбойников не имаете для того, что вам волокита велика, а сами деи вы розбойников меж себя, без нашего ведома, обыскивати и имати розбойников на смеете.

3. И вы бы, меж собя свестясь все заодин, учинили собе в тех своих волостях в головах детей боярских в волости человекы три или четыре, которые бы грамоте умели и которые при­гожи, да с ними старост и десятцких и лутчих людей крестиян человек пять или шесть, да промеж бы есте собя, в станех и в волостях, лихих людей розбойников сами обыскивали по наше­му крестному иелованью въправду без хитрости, да где которых розбойников обыщете, или хто у собя розбойников дер­жит, или к кому розбойникы приезжают и розбойную рухлядь приводят, и вы б тех розбойников ведомых меж собя имали да обыскивали их, и доведчи на них и пытали накрепко, и допытався у них, что они розбивают, да тех бы естя розбойников бив кнутьем да казнили смертью. То есми положил на душах наших, а вам от меня опалы в том нет, и от наших наместников, и от волостелей в том продажи вам нету.

4. А вперед, в ваших волостях, где розобьют розбойники се­ло или деревню, или кого на дорозе розобьют, а на которых людей на своих товарищев учнут, которые розбойникы пытаны говорити, что с ними розбивали или х кому приезжали, а те будут люди живут в Белозерском уезде, и вы 6 тех розбойни­ков имали ж, да обыскав и доведчи на них и пытав накрепко, казнили смертью ж. А которой розбойник скажет своих това­рищев розбойников же в иных городех, и вы бо тех розбойникех писали грамоты в те городы к детем боярскым, которые де­ти боярскые в тех городех и в волостях учинены у того дела в головах, и где которой розбойник живет; а в грамотах бы естя писали, чтоб тех розбойников в тех городех меж собя по тому ж имали, да обыскав их и доведчи, казнили по нашим грамотам. А обсылалися б естя о тех делех меж собя неизмешкая.

5. Где розобьют розбойники село или деревню, или кого на дорозе розобьют, а с розбоев те розбойники куды нибуди поедут, и в Новогородцкую землю, а вам про тот розбой весть учинится, и вы б меж собя свестяся все за одинь, за теми розбойники ездили, де где нибуди тех розбойников доедете, и вы б тех розбойников имали безпенно. Да которых розбойников поймаете с поличным с розбойным или без поличного, а ведомого розбойника, или у которых людей розбойников переимаете и поличное у них розбойное подымаете, а тот будет ведомой же лихой человек, и вы б тех розбойников и х которым людем розбойники приезжают, меж собя обыскав и пытав накрепко и доведчи на них правду, казнили смертью ж. То есми положил на ваших душах.

6. А которых розбойников где поймаете и доведчи на них да их казните, и которых людей тех розбойников поймают и в которых на них делех доведут, и вы б то все велели себе писати на список подлинно, а сами бесте, которые у вас умеют грамоте, к томи списки оики свои поиклалывпли.

7. А по недружбе, в земском деле, или в брани в какой нибуди, меж собя не мстилися нихто никому, по нашему крестному целовенью, и неповино б естя не имали и не казнили никакова человека, того бы есте меж собя обыскывали накрепко по нашему крестному и,елованью, вправду без хитрости.

8. А не учнете меж собя розбойников обыскивати и имати, и тех людей, х которым розбойники приезжают, или не учнете за разбойники ездити и имати и казнити, или станет розбойников пущати, или кто станет розбойником норовити, и мне велети на вас на всех имати иски тех людей, которых в вашей волости розобьют, и без суда вдвое; а самим вам от меня быти в казне и в продаже.

9. А которых разбойников ведомых поймаете и, обыскав их, казните, и тех бы розбойников подворья, животы и статкы отдавали бестя тем людем, которых учините у собя в головах, а они б отдавали тем людем, которых те розбойники разбивали, в их иски. А сколко у которого розбойника животов возмете и роздадите иси, ем, и вы б то себе все писали на списки. А что будет у исцовых исков останется розбойничих животов, и вы б то все, переписав на список, да клали, где будет пригоже; да о том бы естя отписывали на Москву, к нашим бояром, которым розбойные дела приказаны.

10. А которых детей боярскых и старость и десятцких, и лут чих людей учините в головах, в которой волости нибуди, и вы бо том отписали часа того на Москву, к нашему боярину ко князю Ивану Даниловичю Пенкову с товарищи.

А сю бы есте нашу грамоту держали у тех людей, которых учините в которой волости в головах; а с сее бы есте грамоты списав списки розсылали меж собя по волостем, не издержав ни часу. Писана на Москве, лета 7048, восьмого октебря в 23 день.

На обороте: Князь велики веса Руси.

По склейке: Данило Выродков.